Samuɛlə dɔlɔɔ 23 - Bible

Deeƃé è Keila taai kula yêei kɛ̀

¹ Ɣele tɔnɔ da ǹûai dí mò Deeƃé ma dîyɛɛi, “Felesia-ŋai díkaa nɔ́ niî kɔ́ pɛlɛ̂i Keila taai ma, díkɛ ǹaa-ƃelai dímii-sãai kùla m̀ii-sãa táŋ kwaai ma.”

² Nya ƃe Deeƃé è Yâwɛɛ marê kɛ̀ ǹyɛɛi, “Ŋá kɔ́ pɛ́lɛ Felesia-ŋai ŋí dîa?” Yâwɛɛ è ŋ̀óo su tòo ǹyɛɛi, “Óoei, kɔ́ pɛ́lɛ dîa í Keila ŋuŋ ma ƃó.”

³ Kɛ́lɛ Deeƃé ŋɔkɔ-kuluƃa-ŋai dí mò ma dîyɛɛi, “Ya gâai, kwa yaôi Felesia-ŋai dîa Zuda ƃɛ́. Lé ƃé pâi kúkɛ̂i à kɛ̀ kwà lì Keila a gɛ́ɛ kú kɔ́ naa kwa dîa-ni?”

⁴ Deeƃé è ŋɔ́nɔ Yâwɛɛ marê kɛ̀. Yâwɛɛ ǹyɛɛ m̀ai, “Ye lí lônii ma. Ŋa pâi gɛ̂i í Felesia-ŋai yée mɛi ɣále gɔ́i su Keila.”

⁵ Deeƃé da ŋɔkɔ-kuluƃa-ŋai dí lì naa dí kɔ́ kpɔ́ Felesia-ŋai pɔ́-naa a gbanaŋɔɔ. Dí dítamaa ɣele pàa dí díniŋa-ŋai da Keila kula yêei kɛ́.

⁶ Gɛ́ɛ tíi, Sɔ̂ɔ è mɛni a gɛ́ɛ Deeƃé káa Keila. Sɔ̂ɔ è mò ǹyɛɛi, “Ɣâla aâ fáa ma a gɛ́ɛ ŋá Deeƃé sóŋ. Deeƃé káa nâa daai su nyíi maa tinaŋɔɔ̂i a siyâŋ. Núu a pɔri ǹáa tɛ̂i é zɔ́ɔŋ tóo.”

⁷ Sɔ̂ɔ è gbɛ̀tɛ gíli ŋá a gɛ́ɛ é lí naa é ŋɔkɔ-kuluƃa-ŋai tínaŋ daai ma a gɛ́ɛ é Deeƃé sóŋ da ŋɔkɔ-kuluƃa-ŋai. È kéla-ŋa tɛ̀ɛ daa-ŋai su da gbanâŋ-ŋai lá a gɛ́ɛ dí m̀ó dîa ǹyɛɛi, “Ka zinâai tɛɛ a gɛ́ɛ dí kɛ́ a Sɔ̂ɔ ŋɔkɔ-kuluƃa-ŋai da!”

⁸ Sɔ̂ɔ è ŋɔkɔ-kuluƃa-ŋai ŋáa tɛ̀ ma kɔ́ kɔ́ mɛni ma a gɛ́ɛ dí Keila dí sóŋ Deeƃé da ŋɔkpakolo-ŋai

⁹ Deeƃé è mɛ̀ni a gɛ́ɛ Sɔ̂ɔ a gbɛ̀tɛ a gɛ́ɛ é zóŋ. È mò zâla-laa soŋ-nuui Aƃiata ma ǹyɛɛi, “Kú Ɣâla marê kɛ́ lé ƃé kwa pɔri gɛ̂i.”

¹⁰ Deeƃé è Ɣâla fɛ̀li ǹyɛɛi, “Óo Yâwɛɛ, Eezuɛ Ŋɔɣâlai, dí mò ḿâ a gɛ́ɛ Sɔ̂ɔ a gbɛtɛ̂i gíli ŋá a gɛ́ɛ é pá ƃɛ́. Lé ƃé ŋa pɔri gɛ̂i? À kɛ̀ a ǹûai maa yao a gɛ́ɛ é daai su kara, kpɛ́ni fêi, kúkaa ƃɛ́.

¹¹ Keila-ƃela kpaya-kpaya da pâi ńdɛɛ̂i Sɔ̂ɔ pɔ́-naa? Kpaa máŋ gáa pâi a tɔ̃yâ? Kpera yɛ̂, ye m̀ó ḿâ, Yâwɛɛ.” Yâwɛɛ ǹyɛɛ m̀ai, “Owoei, a pâi pâi.”

¹² Deeƃé ǹyɛɛ m̀ai, “Nûa kpaya-kpayai Keila da pâi kwa ŋákɔ-kuluƃa-ŋai kútɛɛ̂i Sɔ̂ɔ pɔ́?” Yâwɛɛ ǹyɛɛ m̀ai, “Owoei da pâi gɛ̂i tí.”

¹³ Nya ƃe Deeƃé da ŋɔkɔ-kuluƃa ŋuŋ lɔ́ɔlu mɛi dai dí pɛ̀lɛ lì ƃɛ́i-ŋai dí kɛ̀ wɛ̂lii lai a tɛɛ-ŋa. Sɔ̂ɔ è mɛ̀ni a gɛ́ɛ Deeƃé a kula Keila. È gbɛ̀tɛ a gɛ́ɛ vé lɛ̀ɛ bôlu.

Zonetaŋ è mò a gɛ́ɛ Deeƃé a pâi kɛ̂i a kâloŋ

¹⁴ Deeƃé è kɛ̀ loo-pere su Zifi Fɛ̃ɛ-kpalaŋ su ǹyée lɔii su. Sɔ̂ɔ è kɛ̀ nɔ́ gɔ̂rii, kɛ́lɛ Ɣâla fé fáa ní ma a gɛ́ɛ é zoŋ.

¹⁵ Ɣele tɔnɔ da Deeƃé è kɛ̀ Ɔriɛ, Zifi fɛ̃ɛ-kpalaŋ su. È kɛ̀ yaôi, kpɛ́ni fêi, Sɔ̂ɔ è pà gwaa tɔnɔi tí ma pere a gɛ́ɛ é bàa.

¹⁶ Nya ƃe Sɔ̂ɔ ǹóŋ Zonetaŋ è lì Olɛ a gɛ́ɛ é Deeƃé káa. Ɣâla è kpɔŋ mâa bɔ́ é gɛ́ Deeƃé líi mu é siɣe.

¹⁷ Zonetaŋ è mò ma ǹyɛɛi, “Ífe yao, ǹâŋ Sɔ̂ɔ fé pâi pɔri ǹyée pɛlɛ̂i yâ a dɔnɔ kpîŋ. Nyíŋi pôlu ma yá ƃé pâi kɛ̂i a Eezuɛ-ŋai díkâloŋ. Ǹyaŋ ŋa pâi kɛ̂i a ítii kɛ́-nuu kɛ́tɛi. Ńâŋ ǹyaa kpîŋ è nyíŋi kɔ́lɔŋ a ǹɛ́lɛɛ.”

¹⁸ Dífeerɛ dí díkono tèe díkîe-ni yêei a gɛ́ɛ da pâi kɛ̂i a díteniŋ ƃoɔɔ díkîe-ni mɛni ma. Nya ƃe Zonetaŋ è lì pôlu bɔ́-naa. Kɛ́lɛ Deeƃé è lɛ̀ɛ Ɔriɛ.

Deeƃé è pù Sɔ̂ɔ yêei

¹⁹ Núu da-ni dí kùla Zifi taai su dí lí Sɔ̂ɔ pɔ́-naa Giƃea dîyɛɛ m̀ai, “Gâloŋ, Deeƃé káa ǹoôi kúkɔlɛ ma. Ǹaa káa nɔ́ Ɔriɛ kɔlɛ Akila yeei ma, Zɛsimɔŋ kwára pere.

²⁰ À kɛ̀ ya pa kwa pâi kpɔnîii yâ ízɔŋ.”

²¹ Sɔ̂ɔ è mò dîa ǹyɛɛi, “Ka mɛni lɛ́lɛɛ támaa kɛ́ mî. Ŋa Yâwɛɛ fɛlîi a gɛ́ɛ é lûwa láa kâa.

²² Kɛ́lɛ ŋa ŋ̀wɛ̂lii ká ƃɛ́i ma kɔ́ri Deeƃé káa naai da ƃɛ́i kélee a kɛ̀ lì naai. Ka naa maa kpɛ́ɛ a kɛ̀ núu da a tá gáa. Dí mò ḿâ a gɛ́ɛ wôya târe támaa káa ǹyêei.

²³ Ka ƃɛ́i-ŋai kɔ́ri a nòo naa a tɛɛ-ŋai. À kɛ̀ tí, ká pá pôlu, gɛ̀ ní kwa kâa-ni kwa pâi liî naa. À kɛ̀ gáa niî gwaa tɔnɔi tí ma, kpaa máŋ a kula naa a lí Zuda-ƃelai sáma, ŋa pâi lɛɛ̂i gɔ̂rii é lɛ́ɛ la zu ŋá zoŋ.”

²⁴ Dí dímu sìɣe dí lí Zifi t Sɔ̂ɔ túɛ. Dí gàa a gɛ́ɛ Deeƃé da ŋɔkɔ-kuluƃa-ŋai díkɛ niî Mao vɛ̃ɛ-kpâlaŋ su, Araba kpiniŋ su Zɛsiŋmɔŋ lɔii kwára pere.

²⁵ Sɔ̂ɔ da ŋɔkɔ-kuluƃa-ŋai dí lì a gɛ́ɛ dí Deeƃé kɔ́ri. Deeƃé è mɛ̀ni a gɛ́ɛ Sɔ̂ɔ è kɛ̀ pâi. Nya ƃe è lì ƃɛ́i da naa tòli a kɔnii é sée naa Mao Fɛ̃ɛ-kpalaŋ su. Sɔ̂ɔ kɛ́ɛ a mɛni a gɛ́ɛ Deeƃé káa vɛ̃ɛ-kpâlaŋ tí sui è làaŋ ma.

²⁶ Sɔ̂ɔ è lì ǹyéei m̀éla tɔnɔ ma, Deeƃé da ŋɔkɔ-kuluƃa-ŋai dí ƃò ǹyée-ƃelai nyíti ma pere díkɛ kɔ̀ a gɛ́ɛ dí pú. Naa è lɛ̀ɛ a guro a gɛ́ɛ Sɔ̂ɔ da ŋɔkɔ-kuluƃa-ŋai dí Deeƃé ni soŋ.

²⁷ Worɛ̂-woo ƃó-nuu tɔnɔ da è pà Sɔ̂ɔ pɔ́-naa ǹyɛɛ m̀ai, “Pá a maa félaa! Felesia-ŋai daâ ǹɔii síɣe. Da naa sãai kélee siɣêi.”

²⁸ Sɔ̂ɔ è nâa sìɣe Deeƃé pôlu é pene pôlu é pɛ́lɛ kɔ̂i Felesia-ŋai pɔ́. Zɛŋ ƃé da gwaai tí ma tòli la a “Bú Kɔnii ma.”

²⁹ Deeƃé è kùla naa é lí é nòo Ɛŋgidi nyíi tínaɔɔi a siɣâŋ.