Samuɛlə dɔlɔɔ 22 - Bible

Nûa dí pà Deeƃé pɔ́

¹ Deeƃé púɔɔ é kúla Gâa taai sui, è lì Adulaŋ-kɔni woloi su. Ǹîa-ni da ŋɔkáa-yɔɔ-ŋai gbeli-ŋai kɛ́ɛ da gɔ́lɔŋ dí lì bɔ́-naa.

² Nûa da kpɛ́ni-ŋa dí pà bɔ́-naa máŋ. Ǹûai ŋí da-ŋa líi è kɛ̀ a doɔ́ɔ pôlu, da-ni dí ƃò mɛni kpɔ̂lu su kpa kɛ́ ƃò da-ŋa dîa. Deeƃé è nâa kɛ̀ a dílaa túɛ-nuu. Kpakolo ŋuŋ náaŋ ƃé kɛ̀ ǹyée mu.

³ Deeƃé è kùla Adulaŋ-kɔni woloi su é lí Meepa-taai su nyíi kɛ̀ Môa lɔii su. Naa ƃé è lòno naa Môa Kaloŋ pɔ́ ǹyɛɛ m̀ai, “Ye kpera yɛ̂ nɛ̀ɛ naa ńâŋ da ńee dí pá ƃɛ́ ípɔ-naa dí lɛ́ɛ naa é lɛ́ɛ la zu ŋá m̀ɛnii káa Ɣâla a pâi gɛ̂i ḿîi.”

⁴ È ŋɔnûai lɛ̀ɛ Môa kaloŋ pɔ́-naa díkɛ ƃò naa ǹyaŋ gɛ́ ƃò loo pêre su.

⁵ Ɣele tɔnɔ da Ɣâla ŋɔlóno kɛ́-nuui Gâa é m̀ó Deeƃé ma ǹyɛɛi, “Ífe nâa kɛ̀ ƃɛ́! Lí pôlu Zuda.” Deeƃé è kùla naa é lí Ɛrɛɛ wolai su.

Sɔ̂ɔ è Yâwɛɛ ŋɔsâla láa soŋ-ƃelai pàa

⁶ Sɔ̂ɔ kɛ́ɛ seeni wúru loŋ tɔnɔ da mu ǹyéei tôŋ su Giƃeai, è mɛni a gɛ́ɛ dí Deeƃé kàa da ŋɔkɔ-kuluƃa-ŋai. Sɔ̂ɔ ŋɔkpálai è kɛ̀ ǹyêei, ŋɔtíi kɛ́-ƃela kpaya-kpayai díkɛ ƃò tɔɔni ŋ̀ɛ́i túɛ.

⁷ È mò dîa ǹyɛ̂ɛi, “Káai a Bɛŋsima suui su-ƃelai, káwoli tɔ́ɔ. À kɛ̀ Zɛse ǹóŋ tí a kɛ̀ a kâloŋ, vé pâi tíi kɛ́ kwaa ma tɛɛ̂i kápɔ kpaa máŋ kpɔmɔ ƃa-kpalaŋ. Vé pâi káta kɛ̂i a ŋɔtíi-ŋai da mɛi-ƃela núu ŋuŋ-ŋa paa máŋ núu wála-ŋa láa túɛ yɛ̂ berei ŋá gɛ̀ lai.

⁸ Kɛ́lɛ kákaa mɛni kpɛtɛ̂i é pîlaŋ ḿâ! Káta fé m̀ó ní ḿâ a gɛ́ɛ ńoŋ Zonetaŋ da ǹyaa dí díwoo sèe. Káta fé kɛ́ ní a gbáaŋɔɔ é m̀ó ḿâ a gɛ́ɛ Zonetaŋ aâ kpɔŋ ŋá tíi kɛ́-nuui dɔnɔ ma tɔ̀ɔ ḿâ. Ǹyaŋ Zɛse ǹóŋ tí a ŋ̀wɛ̂lii é sée ḿberêi.”

⁹ Idɔŋ-nuui Doɛɛ kɛ̀ tɔɔni díi kɛ́-ƃelai kpéli-ŋai sámai è lòno ǹyɛɛi, “Tãi ŋá kɛ̀ la Ǹɔɔ-taai sui, ŋá Zɛse ǹóŋ tí kàa. È kɛ̀ zâla láa soŋ-nuui Aitu ǹóŋ Aimelɛ naa kâai.

¹⁰ Aimelɛ è lòno Yâwɛɛ pɔ́ m̀ɛni ma. Nya ƃe è mii-sɛŋ tɛ̀ɛ bɔ́. È ŋɔ́nɔ Felesia-nuui Golaya ŋɔƃóa-sɔkpɔi tɛ̀ɛ bɔ́.”

¹¹ Sɔ̂ɔ è worɛ̂ tɛ̀ɛ Aimelɛ pɔ́-naa da zâla láa soŋ-nuu suui kélee kɛ̀ Ǹɔɔ a gɛ́ɛ dí pá bɔ́-naa. Dí páai,

¹² Sɔ̂ɔ è mò dîa ǹyɛɛi, “Aitu ǹóŋ, ye íwoli tɔ́ɔ ḿâ.” Aimelɛ ǹyɛɛ m̀ai, “Owoei ǹuu-namui.”

¹³ Sɔ̂ɔ ǹyɛɛ m̀ai, “Lé mɛni ƃé ka Zɛse ǹóŋ tí ká tɔ̀ɔ la ḿâi? Yá ƃé gɛ̀ gɛ́ɛ é tɔ́ɔ ḿâ kpɛ́ni fêi, í mii-sɛŋ da ƃóa-sɔ̂kpɔ tɔ̀ɔ bɔ́ í lóno Ɣâla pɔ́ m̀aa mɛni ma. Gáa, a kɔ̂i a gɛɛ é sée ḿberêi!”

¹⁴ Aimelɛ è gâloŋ wóo su tòo ǹyɛɛ m̀ai, “Ǹúu kɛ́tɛi, ítii kɛ́-ƃelai nenɛ̂ ƃé deniŋ ƃoɔɔ̂i yɛ̂ɛ Deeƃé! Gáa a íƃɔ̂lɔ, gɛ́ ƃò a íkɔlɛ ma kɔ-kuluƃa-ŋai láa túɛ-nuu. Íkaa-yɔɔ-ŋai kélee da ƃaa kɛ́-maa tɛ̀ɛ bɔ́.

¹⁵ Sâa nɔ́ ƃa maa ŋuŋ ŋá lóno Ɣâla pɔ́ m̀aa mɛni mai? Kpao, ǹyaŋ ífe niî ta ílii ŋwána ní! Ye kpera yɛ̂ ífe mɛni kɛ́ɛ tí pɛ̀lɛ a ńaa kpaa máŋ ŋánuu-suui-ŋai láa. Ḿve mɛni da kɔ́lɔŋ é pîlaŋ m̀ɛnii kɛ̂i ŋí ma!”

¹⁶ Sɔ̂ɔ è làɣi ǹyɛɛi, “Aimelɛ, ka ínuu suui kélee ka pâi saâi.”

¹⁷ Sɔ̂ɔ è làɣi ŋɔkɔ-kuluƃa-ŋai da kâa mɛi kâai dîa ǹyɛɛi, “Yâwɛɛ ŋɔlóno kɛ́-ƃelai ŋí dí kpɔ́ŋ Deeƃé ma a gɛɛ é pú! Dí kɛ̀ a gɔ́lɔŋɔɔ a gɛ́ɛ a pûi, kɛ́lɛ, dífe m̀ó ní ḿâ. Ka dípaa!” Kɛ́lɛ gâloŋ ŋɔkɔ-kuluƃa-ŋai dífe díyee pɛlɛ ní Yâwɛɛ ŋɔsâla láa soŋ-ƃelai dîa.

¹⁸ Nya ƃe Sɔ̂ɔ è tìnaŋ Idɔŋ-nuui Doɛɛ pɔ́-naa ǹyɛɛ m̀ai, “Zâla láa soŋ-ƃelai ŋí páa!” Maa ɣelei tí Doɛɛ è Sâla láa soŋ-ƃela buu lɔ́ɔlu mɛi saaƃa káo lɔ́ɔlu pàa.

¹⁹ È lì é kɔ́ pɛ́lɛ Ǹɔɔ taai ma ƃɛ́i zâla láa soŋ-ƃelai díkɛ naai é nàa-ƃela kélee páa, sinâa, nɛyâa, nîa-pɛlɛɛ da gwatala-ŋai. È máŋ díwɛlɛ soo-ŋai, díniŋa-ŋai da díƃala-ŋai kélee pàa.

Abiata nɔ́ ƃé kùla

²⁰ Aimelɛ ǹóŋ-surɔŋ Abiata nɔ́ ƃé kɛ̀ a ǹúui nyíi kùla. È pù é lí Deeƃé pɔ́-naa

²¹ é m̀ó ma ǹyɛɛi, “Sɔ̂ɔ aâ zâla láa soŋ-ƃelai kɛ̀ Ǹɔɔ taai sui dí kélee dí páa!”

²² Deeƃé è ŋ̀óo su tòo ǹyɛɛi, “Ŋá ɣele Doɛɛ kàa. Ŋá kɛ̀ a gɔ́lɔŋɔɔ a gɛ́ɛ a pâi m̀ôi Sɔ̂ɔ ma! Ínûai dí sàa ḿaa mɛni ma.

²³ Ye kɛ́ ƃɛ́ ífe yào. Núu da à kɛ̀ ŋ̀wɛ̂lii é ífulu-laai su lá, gɛ̀ ní m̀aa a kɔ̂i ŋ́ɔi pɔ́ máŋ. Ílii fé sɛ̀lɛŋ! Ya pâi kɛ̂i a íŋuŋ ma ƃóɔɔ ŋ́gɔlɛ ma ƃɛ́.”