Samuɛlə dɔlɔɔ 2 - Bible

Ana è Ɣâla láa maa tɛ̀

¹ Ana è Ɣâla láa maa tɛ̀ ǹyɛɛi, “Ńii nɛ̃ɛ̂i Ɣâla Yâwɛɛ sârai. A ŋuŋ ma ƃô tɛ̀ɛ ḿbɔ. Mɛni ma ŋa pɔri lii-nɛ̃ɛ kulâi, ŋá ɣɛ́lɛ ŋ́gbɔara-ƃelai dîa.

² “Sɛŋ da fé naa maa waa yɛ̂ɛ Yâwɛɛ. Sɛŋ da fé naa é kúla bôlu. Kɔni da fé naa é kpanaŋ yɛ̂ɛ ǹyaa.

³ Zu mɛni kɛ̂tɛ-ƃelai, ka tée su mɛni kɛ̂tɛ ma, ka kpera yoŋka têei. Yâwɛɛ káa a táre Ɣala. È m̀ɛni-ŋai kélee kɔ́lɔŋ kwa gɛ̂i, ǹyaŋ a pâi díŋa têei.

⁴ A ŋ̀wála-wâla-ƃelai díkpalai ŋá ɣále. Kɛ́lɛ a kpɔŋ mâa tɛ̀ɛ diai pɔ́ pɔri ḿâa fé dîɛi.

⁵ Diai mii-sãa támaa è kɛ̀ díyêei da fé ŋɔ́nɔ díyêei. Diai puru è kɛ̀ díkɛ̂i dípelaâi. Gbóma-nɛnii aâ lóŋ lɔ́ɔlu mɛi-feerɛ maa sɔlɔ ƃó. Kɛ́lɛ ǹɛnîi lóŋ támaa è kɛ̀ ǹyêei da fé ŋɔ́nɔ ǹyêei.

⁶ Yâwɛɛ a fúlu-laa siɣe gɛ̀ pà pôlu a fúlu-laa. A núu tɛ̀ɛ saa táa, é ŋɔ́nɔ pá la pôlu fúlu-laa su.

⁷ Yâwɛɛ a kôlo-nuu kpɛ̀tɛ gɛ́ tɔɔ-nuu kpɛ̀tɛ. A núu maa tɛ̀ gɛ́ núu maa yêŋ.

⁸ A gôlo-ƃelai tɛ̀ ɣelêi. A kwaa ma tɛ̀ɛ dîai pɔ́ díkɛ̂i fé mai. A dísiɣe yɛ̂ɛ kâloŋ lonii é dísee ƃaa-kɛ́-maa see-sɛŋ ŋá. Yâwɛɛ ƃé ǹɔii kpɛ̀tɛ, ǹyaŋ zãâi kélee zui, gáa a bɔ́ɔ.

⁹ “A pâi dɔ̃yâ-ƃelai mɛi kâai. Kɛ́lɛ a pâi zɔnyɔ̂ŋ-ƃelai tɛɛ̂i kpînii. Díta fé pâi pɔrîi ŋɔkpɔara-nuu yée mɛi ɣâlei a gbîŋ wala-wala.

¹⁰ Yâwɛɛ a pâi ŋɔkpɔara-ƃelai su karâi. A pâi dísu karâi a ɣele gbâna ŋɔŋ. A pâi pâi a mɛni ŋá téɛɛ ŋ̀éniɛi gwaa kélee. A pâi wála-wala da kponoi-kpanaŋ tɛɛ̂i ŋɔwɛli kɛ́-maa-ƃelai pɔ́.”

¹¹ Nya ƃe Ɛɛkena è lì bɔ́-naa Lama. Ǹolôŋ è lɛ̀ɛ Ilai yêei gɛ́ tíi kɛ̀ Yâwɛɛ ŋɔpɛ́rɛi mu.

Ilai ǹônii-sinaai

¹² Ǹyaŋ Ilai ǹônii dí kɛ̀ a sɔnyɔ̂ŋ-ƃela. Ƃaa kɛ́ maa fé kɛ́ ní díyêei Yâwɛɛ mɛni ma.

¹³ Núu da a kâa fɛnɛ-sɛŋ sala kùla Yâwɛɛ ma, Ilai ǹônii-sinaai da kâa díyee mu-nuui tɛ̀ɛ a wúru ŋá seniɛ́ɛ taɣaŋ lá-ƃoɔɔ, ǹáoi à kɛ̀ nɛ̂nii,

¹⁴ é ǹɔ́ ǹeɣii su. Zuai nyíi kélee a lɛ̀ɛ ŋ̀úrii ŋái gáa a Ilai dípɔɔ. Bere ƃé da kâa tûa la a Eezuɛ-ŋai nyíi-ŋai da kâa pà sâla kulâi Silo.

¹⁵ É kúla nyíŋi pôlu, tãi da dílɛɛ pâi zua wulɔi kêrenii, zâla-laa soŋ-nuui-laa-soŋ nuui yée mu nuui a pâ ǹúui pɔ́-naa zâla-laa soŋ-nuuii kulâi ǹyɛɛ m̀ai, “Sua tɛ́ɛ ḿbɔ ŋá ŋɔŋ zâla-laa soŋ-nuui láa-soŋ-nuui mɛni ma. Vé wɛ̂lii a sua ɣíliɛɛ, fɛ̂ɛ nɔ́ sua ŋunu.”

¹⁶ À kɛ̀ maa-nuui à mò ma ǹyɛɛi, “Ǹɛɛ naa dí zua wulɔi kéreŋ a maa-ŋuŋ, gɛ̀ ní nyíi kélee ya ŋ̀wɛ̂lii ya pɔri ziɣêi.” A mò ma ǹyɛɛ, “Kpao, fɛ̂ɛ nɔ́ ya dɛɛ ḿbɔ. À wàla kɛ́ tí, ŋa pâi ziɣêi a wála-wala laa.”

¹⁷ Ǹûai ŋí dísɔnyɔ̂ŋ su è kɛ̀tɛ Yâwɛɛ ŋɛ́i. Dí Yâwɛɛ ŋɔsama-sãai kɛ̀ a dínîa-pere.

Samia káa Silo

¹⁸ Samia è kɛ̀ tíi kɛ̂i Yâwɛɛ ŋɔpɛ́rɛi mu seɣe-ƃela kpíniŋɔɔ ǹeŋei.

¹⁹ Ǹee a kâa yokpo loŋ sɔ̀lɔ mì a kóraŋ kélee da ŋɔsurɔ̂ŋ da kɛ̀ liî Silo góraŋ salai kulâi é lí la é dɛ́ɛ bɔ́.

²⁰ Gɛ̀ ní Ilai a lûwa làa Ɛɛkena ma da ŋɔnɛnîi Ana ǹyɛɛ dîai, “Tɔɔ Yâwɛɛ é nîa-pɛlɛɛ támaa tɛ́ɛ kápɔ Samia pɔ́ɔ ŋá nyíi ká dɛ̀ɛ Yâwɛɛ pɔ́i.” À kɛ̀ tí, da lî pôlu dípɔ-taai.

²¹ Ǹyaŋ Yâwɛɛ è Ana naa kàa. Nya ƃe Ana è lônii-sinaa saaƃa maa sɔlɔ ƃò da nɛyâa-nɛyaa feerɛ. Kɛ́lɛ Samia è kɛ̀ Yâwɛɛ ŋɔpɛ́rɛi mu.

Ilai è ǹônii-sinaai lia-woo ƃò

²² Ilai è kɛ̀ a bɔlɔɔ a ŋ̀ánaa gɛ́ m̀ɛni-ŋai mɛ̀ni ǹônii da kâa kɛ̀ gɛ̂i a Eezuɛ-ŋai. È m̀ɛni a gɛ́ɛ da kâa kɛ̀ nyiî a ǹɛyâai kɛ̀ tíi kɛ̂i Yâwɛɛ ŋɔpɛ́rɛi mui.

²³ È mò dîa ǹyɛɛi, “Ka mɛni-ŋai ŋí kɛ̂i lé mɛni ma? M̀ɛni nyɔ́mɔɔ-ŋai kélee ka gɛ̂i nûa da ƃôi ḿâ.

²⁴ Ńônii, mɛni-ŋai Yâwɛɛ ŋɔnûai da môi é pîlaŋ kâai vé lɛ́lɛ ní.

²⁵ À kɛ̀ núu da a sɔnyɔ̂ŋ kɛ̀ a m̀arâŋ-nuu Ɣâla a lɔ̂ díloai. Kɛ́lɛ núu da a sɔnyɔ̂ŋ kɛ̀ a Yâwɛɛ gbɛ̂ɛ ƃa lɔ̂ díloai?” Kɛ́lɛ dífe díwoli tɔɔ ní dínâŋ ma. Ǹyaŋ Yâwɛɛ è gbɛ̀tɛ a gɛ́ɛ é dípaa.

²⁶ Samia è kɛ̀ nɔ́ ƃɔlɔ̂i Yâwɛɛ da núu-kpune dílii-laai su.

Ŋ̀âla-wooi dɔɔ̂i Ilai ŋɔkáa-laai su-ƃelai dîai

²⁷ Nya ƃe ɣele tɔnɔ da Yâwɛɛ ŋɔlóno kɛ́-nuui dɔnɔ è pà Ilai pɔ́-naa ǹyɛɛ m̀ai, Yâwɛɛ ǹyɛɛi, “Ŋ́a ŋ́gbîŋ lɛ̀ ínâŋ-ni dîa díkɛɛ Ize kaloŋ yée mu Izei.

²⁸ Maa tãi tí, ŋá Eelɔŋ da ŋɔsuui sìɣe zu Eezuɛ sii-ŋai kélee sáma ŋá díkɛ a ŋásâla láa soŋ-ƃela díkɛ sâla kùla ŋáteƃelei ma, díkɛ kéreŋ-sãa kúŋ nɛ̃ɛ kèreŋ naa, díkɛ zâla-laa soŋ-nuui kula seɣe-ŋai tòo dîa. Ŋá ŋɔŋ sâla sãai kélee da tɛ́ɛ dípɔ Eezuɛ.

²⁹ Kɛ́lɛ ya ƃaa-kɛ maa tɛ́ɛ ílônii pɔ́ a tɛɛ ḿâ. Ífe ŋɔ́nɔ íyee seêi ŋásâla kula mɛni-ŋai da ŋásama-sãai mu. Ka zãai ŋí ǹɛ́lɛɛ-ŋai kélee sìɣe nɔ́ kákpîŋ mɛni ma ka ílônii.

³⁰ Mɛni ma, Ńyãa Yâwɛɛ, Eezuɛ-ŋai Díɣâlai, ŋá ŋ́gono tèe a gɛɛ ínûai da ínâŋ-ni dínûai da pâi kɛ̂i a ŋásâla láa soŋ-ƃela wɔ́lɔ-wɔlɔ da wɔlɔ-wɔlɔ. Kɛ́lɛ ŋa môi yâ a gɛ́ɛ dîai nɔ́ da ƃaa-kɛ́-maa tɛ̀ɛ ḿbɔi, dia nɔ́ ƃé ŋa pâi ńyee seêi dímu ŋá dîai kula maa kɛ́ da tɔ̂ɔ ḿâi.

³¹ Ŋa m̀ôi yâ ɣele da a pâi ŋa pâi ínuu suui kélee su-karâi. Káta fé ŋɔ́nɔ pâi kɛ̂i a ŋásâla láa soŋ-nuu. Ínûai kélee da pâi saâi dísaa tãi é lɛ́ɛ pâi serîi. Ínûai da fé pâi lɛɛ̂i ɣele ma é pɔlɔ.

³² Lii-too pôlu támaa a pâi pâi ípɔ. Yà Eezuɛ-ƃelai kpéli-ŋai kàa mɛni lɛ́lɛɛ támaa su, kpɔara a pilîi ílii su. Kɛ́lɛ ínûai da fé pâi lɛɛ̂i ɣele ma é pɔlɔ.

³³ Ínuui nyíi ŋa pâi ŋ̀ɛ́i malôŋ kâai a gɛ́ɛ é lɛ́ɛ ŋápɛrɛi mui, a pâi kɛ̂i a m̀alôŋɔɔ, ǹíi toɔ́ɔ pôlu. Kɛ́lɛ ínûai kélee da pâi ƃóa-sɔ̂kpɔ saa kɛ̂i.

³⁴ Ílônii-sinaa feerɛi, Ofini da Finiɣa da pâi saâi a ŋ̀elei tí, nyíi pâi kɛ̂i a mɛnii ŋí maa ŋɛi-kɛ-maa maai.

³⁵ Ŋa pâi núu da kpɛ́ni siɣêi gɛ́ ƃò a ŋásâla láa-soŋ-nuu. A pâi kɛ̂i a ǹúui nyíi teniŋ ƃó-nuu gɛ́ ŋ́oo mɛni. Ǹyaŋ ŋa pâi ŋɔsuu kɛ̂i ma díkɛ ƃò a sâla láa soŋ-ƃela ŋákâloŋ ŋá zìɣe mɛni ma.

³⁶ Ǹyaŋ dîai pâi lɛɛ̂i ípɛrɛi mui da pâi pâi díkɛ zâla-laa soŋ-nuui láa soŋ-nuu kpera fê gôo da kpólo-kpua mɛni ma. Da pâi môi mà máŋ dîyɛɛi, ‘Ǹɛɛ naa kúkɛ a zâla-laa soŋ-nuui láa soŋ-ƃelai da a gɛ́ɛ kúkɛ mii-sɛŋ sɔlɔ ƃô kúkɛ mìi.’ ”