Samuɛlə dɔlɔɔ 19 - Bible

Sɔ̂ɔ è kɔ̀ a gɛ́ɛ é Deeƃé páa

¹ Ɣele tɔnɔ da, Sɔ̂ɔ è mò ǹóŋ-surɔŋ Zonetaŋ da ŋɔtíi kɛ́-ƃelai a gɛ́ɛ dí Deeƃé páa. Kɛ́lɛ Zonetaŋ è kɛ̀ a Deeƃé wɛ́liɛɛ a ŋ̀ánaa.

² È Zonetaŋ Deeƃé lîa-woo ƃò mai, “Ńâŋ a kɔ̂i a gɛ́ɛ é ípaa. M̀ɛni ma, ye ímɛi káa a ǹɛ́lɛɛ. Ye tínaa lí ǹɔɔi su í íloo naa.

³ Ŋa pâi pâi la naa ŋ̀ele walai su ŋá pâi lóno bɔ́ é pîlaŋ yâ. M̀ɛnii a pâi m̀ôi ḿâi, ŋa pâi ǹɛɛ̂i naa í gɔ́lɔŋ.”

⁴ Bôlu ma ɣele walai, Zonetaŋ è mɛni lɛ́lɛɛ-ŋa ǹâŋ Sɔ̂ɔ ma é pîlaŋ Deeƃé. Ǹyɛɛ m̀ai, “Gâloŋ fé zɔnyɔ̂ŋ saŋ ŋí kɛ̀ a ǹyée mu-nuui Deeƃé. Vé niî mɛni nyɔ́mɔɔ da kélee kɛ́ ní a yá. Gáa a ítii kɛ́-nu lɛ́lɛɛ.

⁵ È máŋ ǹɛ̂wo sèe a sɛ́ɣɛ Felesia naloŋ Golaya paa mɛnii su. Yâwɛɛ è kpɔŋ Eezuɛ ma é gɔ́ kɛ́tɛi tí yée mɛi ɣále a maa foloi tí. Yá kpîŋ í ǹaa kàa í koi-nɛ̃ɛ kúla kpɔ́ a zu-kɛ́tɛ.”

⁶ Sɔ̂ɔ è ǹíi maa fáleŋ é góno tée ǹyêei ǹyɛɛ m̀ai, “Ŋa ḿvoo a gɛ̀ ɣele Yâwɛɛi a gɛ́ɛ ḿve pâi Deeƃé paâi!”

⁷ Zonetaŋ è Deeƃé tòli mɛni-ŋai kélee Sɔ̂ɔ è mò m̀ai é m̀ó ma. Nya ƃe è pà a Deeƃé Sɔ̂ɔ pɔ́-naa. Deeƃé è tíi kɛ̀ ŋɔ́nɔ Sɔ̂ɔ ŋɔkɔ-kuluƃa-ŋai sáma yɛ̂ɛ berei nɔ́ a kâa gɛ̀ la a bɔlɔi.

⁸ Naa pôlu ma, kɔ́ è ŋɔ́nɔ tèe Felesia-ŋai loai. Deeƃé è kɔ̀ kpɔ́ a gbanaŋɔɔ é gɛ́ dí pú pôlu.

Maka è gɛ̀ Deeƃé é pú

⁹ Kpíni tɔnɔ da Deeƃé è kɛ̀ Sɔ̂ɔ ŋɔpɛ́rɛi mu gɛ́ gɔnîŋ ɣàle ma. Sɔ̂ɔ ŋɔkpálai è kɛ̀ ǹyêei gɛ́ ƃò seeni naa. Ǹyînaŋ nyɔ́mɔɔi è ŋɔ́nɔ Sɔ̂ɔ pôlu é dòo ǹɔii ma.

¹⁰ Sɔ̂ɔ è kɛ̀ pâi Deeƃé kpamôi bɛ́rɛ-kaŋ ma a ŋɔkpálai. Kɛ́lɛ Deeƃé è kùla gbálai perei gbálai é kpàmo bɛ́rɛ-kaŋ ma. Deeƃé è pù é kúla Sɔ̂ɔ ŋɔpɛ́rɛi mu.

¹¹ Sɔ̂ɔ è ŋɔkɔ-kuluƃa-ŋai tɛ̀ɛ a gɛ́ɛ dí Deeƃé ŋɔpɛ́rɛi mɛi káa é lɛ́ɛ la zu ɣele é ƃɔ́ a à pà é bàa a ŋ̀ele-ƃɔi. Deeƃé ŋɔnɛnîi Maka è mò ma ǹyɛɛi, “Pú a gbínii ŋí à wàla kɛ́ tí da pâi ípaai tínaa!”

¹² È kpɔŋ Deeƃé ma é tɛ́ wônai lá é pîlaŋ naa pôlu pere. Deeƃé è kɛ́ɛ pûi,

¹³ Maka è pɔkɔɔŋ sii da saá a wúru làa ŋɔgbìŋ ŋá. È ŋuŋ mu-sɛŋ da kpɛtɛɛ a ƃoli-leɣai lɔ̀ ŋuŋ mu é mɛi pɛ́lɛ a Deeƃé ŋɔseɣei da.

¹⁴ Bôlu ma ɣele walai, Sɔ̂ɔ è gɔ-kuluƃa-ŋai tɛ̀ɛ a gɛ́ɛ dí Deeƃé sóŋ. Kɛ́lɛ Maka è mò dîa ǹyɛɛi, “Deeƃé a kɔlɛ̂i.”

¹⁵ Sɔ̂ɔ è gɔ-kuluƃa-ŋai tɛ̀ɛ pôlu é ǹyɛɛ dîai, “Ka lí naa pôlu ká gula gbìŋ ŋá ká pá la ḿbɔ ŋá bàa.”

¹⁶ Dí liɛ́ɛ naa pôlu dí lɔ́ bɛ́rɛi mui, zɛŋ nɔ́ dí gàa gbìŋ ŋái ƃe kɛ̀ a ŋ̀úru saai, m̀oli-leɣa ŋuŋ mu-sɛŋ kɛ́ ƃò pɛ̂lɛni m̀ɛi.

¹⁷ Sɔ̂ɔ è mò Maka ǹyɛɛ m̀ai, “Lé mɛni ƃé í ḿbɛ̀lɛ la a bere sîi kɛ́ɛ tíi. Í kpɔ̀ŋ ŋ́gbɔara-nuui ma é pú lé mɛni ma?” Maka ǹyɛɛ m̀ai, “È kɛ̀ ḿâ yà wàla kpɔŋ ḿâ ŋá pú, ŋa pâi ípaâi!”

¹⁸ Ǹaa kɛ́ɛ tí Deeƃé è lì Samia pɔ́-naa Lama é mɛnii kélee su kula ma Sɔ̂ɔ è gɛ̀ lai. Samia da Deeƃé dí lì Ɣâla ŋɔlóno kɛ́-ƃela díkpanaŋ lá díkɛ ƃò naa.

¹⁹ Núu da è mò Sɔ̂ɔ ma ǹyɛɛi, “Deeƃé káa Ɣâla ŋɔlóno kɛ́-ƃelai díkpanaŋ lá Lama.”

²⁰ Sɔ̂ɔ è kɔ-kuluƃa kpulu loŋ tɛ̀ɛ naa a gɛ́ɛ dí Deeƃé sóŋ dí pá la pôlu. Dí lì Lama dí Samia káa gɛ́ ƃò a Ɣâla ŋɔlóno kɛ́-ƃelai mɛi nuu. Ǹûai ŋí dí kɛ̀ Ɣâla ŋɔwóoi ƃôi. Gɛ́ɛ tíi, Ɣâla ŋɔmɔ̂leŋ è pà gɔ-kuluƃa-ŋai mɛi, dîa máŋ dí pɛ́lɛ Ɣâla woo ƃôi.

²¹ Sɔ̂ɔ kɛ́ɛ a mɛnii ŋí mɛ́nii, è ŋɔkɔ-kuluƃai gbulu da kpɛ́ni tɛ̀ɛ naa. Dí liɛ́ɛi dia máŋ dí pɛ̀lɛ Ɣâla ŋɔwóoi ƃôi yɛ̂ɛ ǹûai duɛ-tuɛi. È ŋɔ́nɔ gɔ-kuluƃai gbulu zaaƃai tɛ̀ɛ. Kɛ́lɛ dîa máŋ dí pɛ̀lɛ mɛni tɔnɔi kɛ̂i.

²² Ǹaa kɛ́ɛ tíi, Sɔ̂ɔ ǹyaa kpîŋ è lì Lama. È lì ǹóa kɛ́tɛi lá kɛ̀ Sikɔɔi ǹyɛɛ ǹûai dîai, “Mí ƃé Samia da Deeƃé dí káa naai?” Dîyɛɛ m̀ai, “Díkaa Ɣâla ŋɔlóno kɛ́-ƃelai díkpanâŋ lá.”

²³ Sɔ̂ɔ è lì Lama. Kɛ́lɛ gɛ́ɛ kɛ̀ siâi berei mai, Ɣâla ŋɔmɔ̂leŋ è dòo é pɛ̀lɛ Ɣâla-woo ƃôi. Zeriɛ́ɛ Ɣâla ŋɔlóno kɛ́-ƃelai díkpanaŋ lái,

²⁴ è ŋɔseɣei kùla ma é pɛ́lɛ Ɣâla-woo ƃôi Samia ŋɛ́i-tuɛ. È tòo ǹɔii ma gɛ́ ƃò lâani naa a gaŋ é síɣe ɣele-wala ma é tóo gbínii ma. M̀ɛnii ŋí nûa m̀o la dîyɛɛi, “Sɔ̂ɔ ǹyaa máŋ a kɛ́ a Ɣâla ŋɔlóno kɛ́-ƃelai da?”