Samuɛlə dɔlɔɔ 18 - Bible

¹ Sɔ̂ɔ da Deeƃé dí kpɛ̀ɛ lônoi, Deeƃé da Zonetaŋ dí ŋɔ́nɔ dílawoi-laa pù gîei. Zonetaŋ a kâa Deeƃé kàa nɔ́ yɛ̂ɛ berei a kâa gbîŋ kàa lai.

² É síɣe tãi tí ma é lí tuɛ pere, Sɔ̂ɔ è Deeƃé sìɣe a ŋɔtíi nuui da. Vé fáa ní ma a gɛ́ɛ Deeƃé é lí é ŋɔnûai naa káa.

³ Zonetaŋ da Deeƃé díkɛ̀ a díkîe-ni wɛ́liɛɛ kpɔ́ a ŋ̀ánaa. Mɛni ma, dí díkono tèe díkîe-ni yêei a gɛ́ɛ da pâi teniŋ ƃo-ƃela díkîe ni mɛni.

⁴ Zonetaŋ è ŋɔyɛkɛi kùla gɔŋ ma é dòo Deeƃé kɔŋ ma. È máŋ ŋɔkɔ́ kɔ́-seɣei, ŋɔƃóa-sɔkpɔi, ŋɔkerâŋ, da dɔ̃a-ŋai da ŋɔseɣe mu ɣiri-ɣɛlii tɛ̀ɛ Deeƃé pɔ́.

⁵ Ƃɛ́i kélee Sɔ̂ɔ a kâa Deeƃé tɛ̀ɛ naai a kâa mɛni lɛ́lɛɛ sɔlɔ ƃô naa. Nya ƃe Sɔ̂ɔ è gɛ̀ a ŋɔtíi kɛ́-ƃela kpaya-kpayai dɔnɔ ŋɔkɔ-kuluƃa-ŋai sáma. M̀ɛnii ŋí è ǹûai kélee kpɔ́ líi làa, é máŋ kɛ́ yɛ̂ɛ díi kɛ́-ƃela kpaya-kpaya gbeli-ŋai.

Sɔ̂ɔ è kɛ̀ a Deeƃé kpɔara nuu

⁶ Deeƃé kɛ́ɛ a Golaya pàai, gɔ́i è kpɛ̀ɛ. Eezuɛ kɔ-kuluƃa-ŋai dí pène pôlu dí lí dí pɔ́-naa. Gɔ-kuluƃa-ŋai kɛ́ɛ tɛɛ̂i, ǹɛyâai dí kùla Eezuɛ taa-ŋai su dí pá Gáloŋ Sɔ̂ɔ perêi tɔɔ̂i. Díkɛ lii-nɛ̃ɛ wule tòo, díkɛ ɣale-sãa ɣàle díkɛ m̀ãla.

⁷ Dí kɛ̀ wule toôi dîyɛɛi, “Sɔ̂ɔ a ŋɔkpɔara-ƃelai wála tɔnɔ pàa, Deeƃé a ŋɔkpɔara-ƃelai wála puu páa!”

⁸ Ŋ̀ulei ŋí è Sɔ̂ɔ líi ŋwàna kpɔ́ gɛ́ gíli ŋá sìa ǹyɛɛi, “Da kɛ̂i dîyɛɛ Deeƃé a ŋɔkpɔara-ƃelai páa a zeêi puu é tɛ́ɛ ḿâ. Ǹaa pôlu ma da pâi gɛ̂i a kâloŋ.”

⁹ Sɔ̂ɔ fé ŋɔ́nɔ láa ní a Deeƃé é síɣe ŋ̀elei tí ma.

¹⁰ Bôlu ma ɣelei Yâwɛɛ è gɛ̀ nyînaŋ nyɔ́mɔɔ é pìlaŋ Sɔ̂ɔ pôlu. È pɛ̀lɛ tûai yɛ̂ɛ ƃoo-nuu ŋɔpɛ́rɛi mu. Deeƃé è pà gɛ́ gɔnîŋ ɣâle ma yɛ̂ɛ berei a kâa gɛ̀ la a bɔlɔi. Kɛ́lɛ tãi ŋí ma Sɔ̂ɔ ŋɔkpálai è kɛ̀ ǹyée ŋá.

¹¹ Sɔ̂ɔ è gíli ŋá sìa ǹyɛɛi, “Ŋa pâi Deeƃé kpamôi nɔ́ bɛ́rɛ kaŋ ma.” Nya ƃe è gbálai pìli Deeƃé pɔ́-naa pere gîei feerɛ, kɛ́lɛ Deeƃé è kùla berei.

¹² Sɔ̂ɔ è nâa kɛ̀ yaôi Deeƃé ma, kpɛ́ni fêi, Yâwɛɛ è kɛ̀ kpɔnîi Deeƃé ma, vé kɛ́ ní n kpɔnîi ǹyaa Sɔ̂ɔ ma.

¹³ Sɔ̂ɔ è Deeƃé kɛ̀ ŋɔkɔ-kuluƃa-ŋai ŋɔwála tɔnɔ mɛi é dítɛɛ kɔ́ kɔ̂i.

¹⁴ Yâwɛɛ è kpɔ̀ŋ Deeƃé ma. Deeƃé da ŋɔkɔ-kuluƃa-ŋai dí gɔ́i yée mɛi ɣàle.

¹⁵ Nyíŋi è gɛ̀ Sɔ̂ɔ é yao kpɔ́ Deeƃé ma a dámaa.

¹⁶ Kɛ́lɛ Zuda-ƃelai kélee é da Eezuɛ-ƃelai kélee, díkɛ a Deeƃé wɛ́liɛɛ, kpɛ́ni fêi, a kâa lì a gɔ́ kɔ́-ƃelai kɔ́ kɔ̂i.

Deeƃé a Sɔ̂ɔ ǹóŋ-nɛnii kùla a nɛnî

¹⁷ Ɣele tɔnɔ da Sɔ̂ɔ è mò Deeƃé ma ǹyɛɛi, “À kɛ̀ ƃa kɛ̀ a ílii kpeliɛɛ, í Yâwɛɛ ŋɔkɔ́i kɔ́ mì, ŋa pâi ńoŋ nɛni kɛ́tɛi Mela tɛɛ̂i ípɔ a ínɛnî.” Kɛ́lɛ Sɔ̂ɔ è kɛ̀ gíli ŋá siâi ǹyɛɛi, “Ḿve ŋ̀wɛ̂lii a gɛ́ɛ ńyãa kpîŋ ŋá Deeƃé páa. M̀ɛni ma, ŋa pâi ǹɛɛ̂i naa Felesia-ŋai dí baa.”

¹⁸ Deeƃé ǹyɛɛ m̀ai, “Ŋa pɔri íloŋ nɛnii kulâi-pere kɛ̂i léŋ a nɛnî ǹyaŋ fé a núu maa mɛni kpanaŋɔɔ. Ŋánûai dífe a ǹûai nyíi dítɔɔ̂i kɛ́tɛi.”

¹⁹ Kɛ́lɛ ǹɛnîi ŋí tɛɛ ɣêle è sèri nɔ́ Sɔ̂ɔ mi Deeƃé pɔ́, Sɔ̂ɔ é dɛɛ mì Aduɛɛ pɔ́ nyíi kùla Meola taai sui a ŋɔnɛnî.

²⁰ Sɔ̂ɔ ǹóŋ nɛnii da kpɛ́ni è kɛ̀ naa. Ǹáa ƃe kɛ̀ a Maka. È gàa a gɛ́ɛ Deeƃé wɛ́li káa ma. Nyíŋi è Sɔ̂ɔ líi nɛ̃ɛ.

²¹ Nya ƃe è gíli ŋá sìa ǹyɛɛi, “Ŋa pâi m̀ôi Deeƃé ma a gɛ́ɛ da Maka dí tûa, kɛ́lɛ ŋa pâi gɛ̂i Felesia-ŋai dí bàa.” Ǹyɛɛ Deeƃé mai, “Ŋa pâi tãi tɛɛ̂i ípɔ ŋɔ́nɔ a gɛ́ɛ í ńoŋ-nɛnii dɔnɔ kula a nɛnî.”

²² Sɔ̂ɔ è mò ǹyée mu-ƃelai dîa a gɛ́ɛ dí lóno Deeƃé pɔ́ loo perei. Nya ƃe dí lì dí m̀ó Deeƃé ma dîyɛɛi, “Deeƃé, ye berei káa Gâloŋ è íwɛlini la ka ǹyée mu-ƃelai kéleei. Lé ƃé ífa m̀arê kɛ̀ a gɛ́ɛ é ǹóŋ Maka tɛɛ ípɔ a ínɛnî?”

²³ Deeƃé ǹyɛɛ diai, “Ḿve a tɔɔ-nuu. Nûa dífe ŋ́gɔlɔŋ a ǹɛ́lɛɛ a gɛ́ɛ ŋá gâloŋ ǹóŋ Maka kula a nɛnî.”

²⁴ Sɔ̂ɔ yée mu-ƃelai dí lì pôlu bɔ́-naa dí m̀ó nɔ́ ma yɛ̂ɛ berei Deeƃé è mò la dîai.

²⁵ Sɔ̂ɔ è gbɛ̀tɛ gíli ŋá a gɛ́ɛ Felesia-ŋai dí Deeƃé páa. Nya ƃe è mò ǹyée mu-ƃelai dîa ǹyɛɛi, “Ka m̀ó Deeƃé ma kâai ‘Gâloŋ fé káne kpaa máŋ gôo da wɛ̂lii íyêei. A wɛ̂lii nɔ́ da ŋɔkpɔara-ƃelai dí pɔri. M̀ɛnii nɔ́ ya pɔri gɛ̂i ǹyaa ƃa í pá a sêre a gɛ́ɛ ya pâi Felesia-ŋai ŋuŋ tɔnɔ paâi.’ ”

²⁶ Sɔ̂ɔ yée mu-ƃelai dí lí dí m̀ó Deeƃé ma. Deeƃé ǹyaŋ è kɛ̀ ŋ̀wɛ̂lii é gâloŋ ǹóŋ nɛnii kúla a ŋɔnɛnî. Gâloŋ Sɔ̂ɔ è kúu làa mɛni ŋí ma, ǹyaŋ ŋ̀elei ŋí é lɛ́ɛ pâi serîi,

²⁷ Deeƃé da ŋɔkɔ-kuluƃa-ŋai dí lì dí Felesia-ŋai ŋuŋ-feerɛ páa. È pà pôlu é zêrei lɛ́ Sɔ̂ɔ ma a gɛ́ɛ é Maka kula a ŋɔnɛnî. Sɔ̂ɔ è fàa ma.

²⁸ Sɔ̂ɔ è kɛ̀ a gɔ́lɔŋɔɔ a gɛ́ɛ Maka è kɛ̀ a Deeƃé wɛ́liɛɛ. È kɛ̀ ŋɔ́nɔ gɔ̀lɔŋ a gɛ́ɛ Yâwɛɛ è kɛ̀ kpɔnîi Deeƃé ma Eezuɛ-ŋai kélee dí kɛ́ ƃò a ŋ̀wɛ́liɛɛ.

²⁹ M̀ɛnii ŋí Sɔ̂ɔ yào kpɔ́ Deeƃé ma a ŋ̀ánaa. È nâa kɛ̀ a Deeƃé ŋɔkpɔara-nuu é lɛ́ɛ la zu é sáa.

³⁰ Felesia-ŋai láa túɛ-ƃelai díkɛ̀ kpɔ́ nɔ́ pâi díkɛ kɔ́ pɛ̀lɛ Eezuɛ-ŋai dîa a ɣele kélee. Kɛ́lɛ Deeƃé a kâa kɔ̀ la dípɔ a díyee mɛi ɣàle. Dí nâa gɔ̀lɔŋ kpɔ́ a ǹɛ́lɛɛ, kpɛ́ni fêi, dí kɔ́ támaa kɔ̀ da Felesia-ŋai é díyee mɛi ɣále é tɛ́ɛ Sɔ̂ɔ ŋɔtíi kɛ́-ƃelai kélee dîa.