Samuɛlə dɔlɔɔ 15 - Bible

Sɔ̂ɔ è kɔ́ pɛ̀lɛ Amɛlɛ-ŋai dîa

¹ Ɣele tɔnɔ da, Samia è mò Sɔ̂ɔ ma ǹyɛɛi, “Yâwɛɛ è ŋ́gɛ ŋá ísiɣe a kâloŋ ŋɔnûai, Eezuɛ-ŋai mɛi. M̀ɛni ma íwoli tɔ́ɔ ŋ̀orɛ̂-wooi ŋí ma nyíi kulâi Yâwɛɛ yêei:

² ‘Eezuɛ-ŋai kɛ́ɛ da kùla dí kɛ̀ Ize lɔii su díkɛ pâi, Amɛlɛi lɔii su-ƃelai dí pɛ̀lɛ dîa a kɔ́. Ńyãai a ŋ̀wála-wala kélee Yâwɛɛ, ŋá pâi gɛ̂i Amɛlɛ-ŋai dí m̀ɛnii ŋí fela-fei kɛ́!

³ Lí í kɔ́ pɛ́lɛ dîa í díkelee dí su-kara da díkɔ̃liŋ kélee. Ífe díŋɛi malôŋ kàa a dɔnɔ kpîŋ. Dí sinaai kélee páa, dínɛyâai da dínîa-pɛlɛɛi. Dí niŋa-ŋai, díƃala-ŋai, dísoo faleŋ-ŋai da díwɛlɛ soo-ŋai kélee kpɔ́ páa.’ ”

⁴ Sɔ̂ɔ è kéla-ŋa tɛ̀ɛ a gɛ́ɛ dí ŋ̀órɛ̂-wooi ŋí ƃó daa-ŋai su da gbanâŋ-ŋai lá a gɛ́ɛ dí kpakolo-ŋa tɛ̀ɛ dí tóo gɔ-kuluƃ-ŋai dîa kɛ̀ Tɛlɛɛŋ. Gɔ-kuluƃa-ŋai kɛ̀ naai dí kɛ̀ a wála ŋuŋ feerɛ pôlu puu (210,000). Ǹûai ŋí ŋɔwála puu è kùla Zuda. Sɔ̂ɔ è dí pù díkîie ma,

⁵ é lí a dîa gbotoloi su kɛ̀ Amɛlɛ-ŋai taa-ŋai dɔnɔ kɔlɛ mai. Naa ƃé dí díkpîŋ kpɛ̀tɛ naa a gɛ́ɛ dí kɔ́ pɛ́lɛ Amɛlɛ-ŋai dîa dítɛ̂i pere.

⁶ Sɔ̂ɔ è mò Kɛ̃ŋ-ƃelai dîa nyíi-ŋai kɛ̀ naa kɔlɛ mai, ǹyɛɛi, “Kú kuláa Ize lɔii sui, kánûai dí tùa a ǹɛ́lɛɛ a kúa. M̀ɛni ma, fé ŋ̀wɛ̂lii a gɛ́ɛ ŋá kápaa ŋa kɔ́ pɛlɛ Amɛlɛ-ŋai dîa ŋá dí su karâi. Ka kula dísama ká lí kwaa da kpɛ́ni ma ká kɛ́ naa.” Nya ƃe Kɛ̃ŋ-ƃelai dí kùla naa.

⁷ Sɔ̂ɔ è kɔ́ pɛ̀lɛ Amɛlɛ-ŋai dîa é síɣe Avila é seri Suɔɔ nyíi gáa vóloi kulâi pere Ize lɔii sui.

⁸ Dí Amɛlɛ-ŋai kélee kpɔ́ pàa é tée nɔ́ Gâloŋ Aga pôlu.

⁹ Sɔ̂ɔ da ŋɔkɔ-kuluƃa-ŋai dífe Aga paa ní. Dí m̀ála lɛ́lɛɛ-ŋai da niŋa lɛ́lɛɛ-ŋai lɛ̀ɛ máŋ. Dífe kɛ́ ní ŋ̀wɛ̂lii dí sɛŋ da kélee páa nyíi kɛ̀ a m̀aa mɛni kpanaŋɔɔi. M̀ɛni ma, dí daa-tulɛ-ŋai pàa nyíi-ŋai dímaa mɛni fé kɛ́ ní a gbanâŋɔɔi dífii kpɛɛi.

Yâwɛɛ è ǹyée kùla Sɔ̂ɔ mu

¹⁰ Yâwɛɛ è mò Samia ma ǹyɛɛi,

¹¹ “Sɔ̂ɔ aâ ŋóo píli. Malôŋ toɔɔ̂i ḿâ a gɛ́ɛ ŋá gɛ̀ a kâloŋ.” Samia è líi è tòo pôlu é pɛ́lɛ wɔ̂lɔi ma é lɛ́ɛ la zu ɣele é ƃɔ́.

¹² Samia è mù sìɣe a ɣele ƃɔ̂i nɛ̃ɛ-nɛ̃ɛ é lí a gɛ́ɛ é lóno Sɔ̂ɔ pɔ́. Kɛ́lɛ núu da è mò ma, “Sɔ̂ɔ è lì Kamɛɛ ƃɛ́i a pɔɔkɔ̂ŋ tɔɔ naa a gɛ́ɛ núu kélee a gàa gíli é lɛ́ɛ ŋá a gɛ́ɛ ǹyaa Sɔ̂ɔ è gɔ́i yée mɛi ɣale. È kùla naa é lí Geega.”

¹³ Ǹaa kɛ́ɛ tí, Samia è Sɔ̂ɔ kàa, Sɔ̂ɔ ǹyɛɛ m̀ai, “Ńâai la Yâwɛɛ a pâi lûwa lâai yâ, kpɛni fêi, ŋaâ mɛni-ŋai kélee ŋàa-see kɛ́ Yâwɛɛ è mò ḿâ a gɛ́ɛ ŋá gɛi.”

¹⁴ Samia è marê kɛ̀ ǹyɛɛ m̀ai, “Gɛ̀ ní lé ƃé kɛ̀ a màla-ŋai da niŋa-ŋai da wɔ̂lɔi?”

¹⁵ Sɔ̂ɔ ǹyɛɛ m̀ai “Gɔ́-kuluƃa-ŋai ƃé díkùla Amɛlɛ-ŋai yêei. Dí m̀ála lɛ́lɛɛ-ŋai da niŋa lɛ́lɛɛ-ŋai lɛ̀ɛ naa a gɛ́ɛ kú pá sâla kula a dia Íɣâlai Yâwɛɛ ma. Kɛ́lɛ kú zãai gbeli-ŋai kélee kpɔ́ su kàra.”

¹⁶ Samia ǹyɛɛ m̀ai, “Tɔɔ tí! Tɔɔ ŋá mɛnii ƃó yâ Yâwɛɛ è sâa mò ḿâ a gbínii.” Sɔ̂ɔ ǹyɛɛ m̀ai, “Owoei, m̀ó ḿâ.”

¹⁷ Samia ǹyɛɛ m̀ai, “Íkili ŋá-siai a ǹɛ̂i yâ a gɛ́ɛ íkaa a lôloŋ. Kɛ́lɛ Yâwɛɛ è ísiɣe zu é íkɛ a kâloŋ. Yá ƃé Eezuɛ-ŋai díkaa ílaai su.

¹⁸ Yâwɛɛ kɛ́ɛ a ítɛɛi, è mò yâ a gɛ́ɛ í Amɛlɛ-ŋa sɔnyɔmɔɔ-ŋai ŋí kélee páa.

¹⁹ Lé ƃé kɛ̀ ífe íwoli tɔɔ ní la Yâwɛɛ mai? Lé mɛni ƃé í daa-tulɛ-ŋai lɛ̀ɛ naa íkɛ gɛ̀ gɛ́ ǹíi ŋwanai?”

²⁰ Sɔ̂ɔ ǹyɛɛ m̀ai, “Kɛ́lɛ ŋá Yâwɛɛ wóo siɣe. È ńdɛɛ sia ma, ǹyaŋ ŋá lì. Ŋá gâloŋ Aga sòŋ ŋá ŋɔlɔii su-kàra.

²¹ Kúkɛ̀ máŋ pâi daa-tulɛ-ŋai su-karâi. Zɛŋ ƃé gɛ̀ gɔ-kuluƃa-ŋai díkɛ m̀ála-ŋai da niŋa-ŋai ǹɛ́lɛɛ-lɛlɛɛ-ŋai sìɣe a gɛ́ɛ kú pá a dia Geega sâla kula mɛni ma Íɣâlai Yâwɛɛ ma.”

²² Samia è marê kɛ̀ ǹyɛɛi, “M̀ó ma, sâla kuláa da sama-sɛŋ tɛɛ ƃé ǹɛ̂lɛɛi a Yâwɛɛ nîai? Kpao! Vé ísâla-ŋai wɛ̂lii. A ŋ̀wɛ̂lii a gɛ́ɛ í ŋ̀óo mɛni.

²³ Í máŋ tɔɔ Ɣâla ma kpaa máŋ í ŋ̀óo píli, kpɛ́ni fêi, íkpîŋ kɛ́tɛi íŋɛi, gáa nɔ́ a ǹyɔ́mɔɔ yɛ̂ɛ núu a kɛ̀ ɣâla-pɔkɔɔŋ fɛlii, kpaa máŋ gɛ́ m̀arê kɛ̀ a gɛ́ɛ é ǹîa woo ƃó. Í íyee kùla m̀ɛnii mu Ɣâla è mò yâ a gɛ́ɛ í gɛi. Mɛni ma, aâ gbɛtɛ gíli ŋá a gɛ́ɛ ífa ŋɔ́nɔ pɔri kɛ̂i a kâloŋ.”

²⁴ Sɔ̂ɔ è fàa ma ǹyɛɛi, “Ŋaâ sɔnyɔ̂ŋ kɛ́. Ŋá ka Yâwɛɛ wóo pìli. Ŋá kɛ̀ yaôi gɔ-kuluƃa-ŋai dîa. M̀ɛni ma, ŋá ŋ́oli tɔ̀ɔ dîa é tɛ́ɛ kâa.

²⁵ Ye kpera yɛ̂ ńzu-mɛni lɛɛ í pá pôlu kwa yá kú lí a gɛ́ɛ ŋá Yâwɛɛ fɛli.”

²⁶ Samia è ŋ̀óo su tòo ǹyɛɛi, “Kpao, í Yâwɛɛ wóo pìli. Mɛni ma, ḿva pɔri pâi pôlu ípɔ-naa. Yâwɛɛ aâ m̀ó ǹyɛɛi ífa ŋɔ́nɔ pɔri kɛ̂i a kâloŋ Eezuɛ mɛni ma.”

²⁷ Samia kɛ́ɛ a tínaŋ a gɛ́ɛ é líi, Sɔ̂ɔ è ŋɔseɣei wóŋ sòŋ é fála.

²⁸ Samia è mò ma ǹyɛɛi, “Yâwɛɛ aâ gâloŋ-laai kúla íyêei Eezuɛ mɛni ma sâa. A pâi dɛɛ̂i núu da kpɛ́ni pɔ́ nyíi ǹɛ̂lɛɛi é tɛ́ɛ yâi.

²⁹ Ǹaa pôlu ma, ŋ̀ɔ́lɔ-wɔlɔ Ɣâlai gáa Eezuɛi vé a núu-kpune. Va lɛ́ɛ kɛ̀ kpaa máŋ é ǹíi maa fáleŋ.”

³⁰ Sɔ̂ɔ ǹyɛɛ m̀ai, “Ŋaâ sɔnyɔ̂ŋ kɛ́. Kɛ́lɛ ye kpera yɛ̂ ƃaa-kɛ́-maa tɛ́ɛ ḿbɔ gɔ-kuluƃa-ŋai láa-tuɛ-ƃelai Eezuɛi díŋɛi. Pá pôlu kwa yá kú lí pôlu a gɛ́ɛ ŋá Íɣâlai Yâwɛɛ fɛli.”

³¹ Samia è lɛ̀ɛ Sɔ̂ɔ pôlu dí tínaŋ dí lí pôlu, Sɔ̂ɔ é Yâwɛɛ fɛli.

³² Samia è làɣi ǹyɛɛi, “Ka pá a Amɛlɛ kaloŋ Aga ḿî.” Aga è pà gɛ́ ƃò yɔlɛ ŋá. È kɛ̀ lônoi gbîŋ pɔ́ ǹyɛɛi, “Tɔ̃yâ ma dífe pâi ḿbaâi lônii ma.”

³³ Kɛ́lɛ Samia è mò ǹyɛɛi, “Aga, í nîa-pɛlɛɛ-ŋa kùla dílee-ni kâraŋ ŋá í dípaa, ǹyaŋ ílee ŋɔnîa-pɛlɛɛi da fé pâi lɛɛ̂i ɣele ma.” Nya ƃe Samia è Aga su tee-tee a gbua pɛlɛ-pɛlɛɛ ŋ̀âla fɛli kwaai ma Geega.

³⁴ Samia è lì pôlu bɔ́-taai Lama, Sɔ̂ɔ ǹyaŋ é lene pôlu bɔ́-taai Giƃea.

³⁵ Berei máŋ Sɔ̂ɔ malôŋ è Samia sòŋ lai, vé ŋɔ́nɔ Sɔ̂ɔ káa ní naa pôlu ma.