Samuɛlə dɔlɔɔ 13 - Bible

Sɔ̂ɔ è Ǹuu-namui wóo pìli

¹ Sɔ̂ɔ è kɛ̀ a nyákpa gɛ́ɛ kâloŋ-laai. È kɛ̀ Eezuɛ mɛi a kóraŋ feerɛ.

² È kpakolo wála saaƃa sìɣe Eezuɛ a gɛ́ɛ díkɛ a ŋɔkɔ́ kɔ́-ƃela. È ǹûai gbéli tɛ̀ɛ pôlu dípɛrɛ-ŋai lá. Gɔ́ kɔ́-ƃelai ŋí ŋɔwála feerɛ è lɛ̀ɛ gɔlɛ ǹyée-ŋai ma Mesima da Bɛtɛ kɔlɛ. È gɔ́ kɔ́-ƃelai ŋí ŋɔwála tɔnɔ tɛ̀ɛ da Zonetaŋ ni Giiba, Bɛŋsima lɔii-kpiniŋ su.

³ Zonetaŋ ni dí lì dí kɔ́ pɛ̀lɛ Felesia-ŋai dîa díƃûui su Giƃea. Dí Felesia-ŋai díƃûui wòlo. Kɛ́lɛ, Felesia-ŋai dí díƃarâai maa mɛni duŋ mɛ̀ni. Nya ƃe Sɔ̂ɔ è mò ŋɔworɛ̂-woo ƃó nuui ma ǹyɛɛi, “Lí gbanâŋ-ŋai kélee lá ǹɔii ŋí su. Yà lì naa, ye dúruii fɛ́ɛ. Ǹûai da pa, í mɛnii ŋí su kula dîɛ.”

⁴ Ŋ̀orɛ̂-woo ƃó-ƃelai dí lì dîyɛɛ Eezuɛ-ƃelai dîai, “Sɔ̂ɔ aâ Felesia-ŋai díkɔ kɔ́-ƃelai díƃûui wólo Giƃea. Eezuɛ-ŋai ƃɛlɛ fé Felesia-ŋai koi. M̀ɛni ma, ka kɔ́ kɔ́-ƃela tɛɛ a gɛ́ɛ dí kpɔ́ŋ Sɔ̂ɔ ŋɔkɔ́ kɔ́-ƃelai dîa Geega.”

⁵ Nya ƃe Felesia-ŋai dí díkɔ kɔ́-ƃelai ŋáa tɛ̀ gîe ma a gɛ́ɛ dí kɔ́ Eezuɛ-ŋai pɔ́. Kɔ́ kɔ́-keleŋ wála saaƃa è kɛ̀ díyêei. Núu wála lɔ́ɔlu mɛi da dí kɛ́ kîrɛ siɣêi dítuɛ pere. Naa pôlu ma, gɔ́ kɔ́-ƃelai kɛ̀ siâi díkɔɔ-ŋai díkɛ kpɔ́ a dí támaa yɛ̂ɛ ŋãyai gáa yúo kpono mai. Dí lì Mesima dí díƃûui pú vóloi kulai pere Bɛɛ-Avɛŋ kɔlɛ ma.

⁶ Tãi Eezuɛ-ŋai dí gɔ̀lɔŋ la a gɛ́ɛ Felesia-ŋai tâmaai é tɛ́ɛ dîai, dí kɛ̀ yaôi kpɛ́ni fêi, díkɛ a gɔ́lɔŋɔɔ gɔ́i a pâi díyee mɛi ɣâlei. Nya ƃe Eezuɛ-sinaai dí dí lòo kɔni wôlo-ŋa su, dí díloo ǹóa-ŋai su gɔni-ŋai loai, dí díloo ǹɔɔi su. Dí tani dí pù dí lí ƃɛi ma da pɔri liî nai. Dá tani dí pù dí lí molôŋ-ŋai sáma dí díloo naa. Díta-ni dí díloo lóa kpóŋ kôya-ŋa su.

⁷ Díta-ni dí pù máŋ dí lí Gâa da Gilia Zɔdiŋ Ya-leei pôlu pere. Sɔ̂ɔ è lɛ̀ɛ Geega. Ŋɔkɔ́ kɔ́-ƃelai dí kɛ̀ kpɔ́ yaôi díkɛ̀ kpɛ̃liŋ.

⁸ Sɔ̂ɔ è Samia maa kpɛ̀ŋ naa a fólo lɔ́ɔlu mɛi feerɛ yɛ̂ɛ berei Samia è mò la m̀ai. Kɛ́lɛ Samia fé niî kɛ̀ pá ní Geega. Nya ƃe ǹûai dí pɛ̀lɛ táa-taai dí Sɔ̂ɔ lɛ̀ɛ tɔɔni naa.

⁹ Sɔ̂ɔ kɛ́ɛ naai, è ŋ̀óo tɛ̀ɛ Samia pɔ́-naa ǹyɛɛ m̀ai, “Pá ḿî a daa-tulɛ-ŋai, a gɛ́ɛ kú sâla kula a dia Ǹuu-namui ma é ǹíi láa kú m̀arê kɛ́ kpɔŋ ḿâi mɛni ma.”

¹⁰ Sɔ̂ɔ kɛ́ɛ a daa-tulɛi dɔnɔ pàai, è kɛ̀ kpɔ́ nɔ́ ǹâai ŋ̀âla-teƃelei ŋá, Samia kɛ́ pà. Sɔ̂ɔ è lì é kpulɔ̂ŋ ma.

¹¹ Samia è m̀arê kɛ̀ ǹyɛɛi, “Lé ƃé ƃâa gɛ́ ŋíi?” Sɔ̂ɔ ǹyɛɛ m̀ai, “Ŋákɔ kɔ́-ƃelai dí kɛ̀ liî a dínîa pere, ǹyaŋ ífe kɛ́ ní pâi a maa félaa. Felesia-ŋai díkɛ̀ díŋaa tɛ̂i díkîe ma Mesima.

¹² Ńii è kɛ̀ kɔ́-kɔi. Ŋá kɛ̀ gâai yɛ̂ɛ sɛŋ ƃé da kɛ́ pâi pɛlɛ̂i ḿâ Geega Ƃɛ́. Ŋá kɛ̀ a gɔ́lɔŋɔɔ fé niî Yâwɛɛ marê kɛ́ ní a sâla kuláa. Nya ƃe ŋá gɛ̀ a ḿâ kpa ŋá sâla kula ŋ̀âla-teƃelei ma ŋɔŋ ŋá.”

¹³ Samia è ŋ̀óo su tòo ǹyɛɛi, “Í tùa a ƃoo pere. Ífe íwoli tɔɔ ní Íɣâlai Yâwɛɛ ma. Eêi kɛ̀ í íwoli tɔ̀ɔ ma, ísuui su nuu da eêi pɔri kɛ̂i a kâloŋ Eezuɛ mɛi a kóraŋ kélee.

¹⁴ Kɛ́lɛ vé pâi kɛ̂i tí ŋɔ́nɔ, kpɛ́ni fêi, ífe íwoli tɔɔ ní. M̀ɛni ma, Yâwɛɛ fé pâi núu da kélee kulâi ísuui su a gɛ́ɛ é kɛ́ a kâloŋ. Aâ gbâa nuui síɣe a wɛ̂lii é kɛ́ a kâloŋ ŋɔnûai mɛi ípɔɔ ŋá.”

¹⁵ Samia è m̀u-siɣe é kúla Geega é lí Giƃea, Bɛŋsima lɔii-kpiniŋ su. Sɔ̂ɔ ŋɔkɔ́ kɔ́-ƃelai kɛ̀ gbono mai è dílòno. Dí kɛ̀ yɛ̂ɛ kpakolo ŋuŋ lɔ́ɔlu mɛi da.

¹⁶ Nya ƃe Sɔ̂ɔ, ǹóŋ Zonetaŋ da díkɔ kɔ́-ƃelai dí lí dí díƃûui pú Giƃea, Bɛŋsima ŋɔlɔii kpiniŋ su. Felesia-ŋai dí díwɔ̂i ƃuui pu Mesima.

¹⁷ Felesia-ŋai da kâa too-ma kɛ́-ƃela tɛ̀ɛ dí lí dí pɛ́lɛ gbanâŋ-ŋai lá-ƃelai dîa dísãai kúla díyêei dí naa su kara. Ǹúu-kpului ŋí dɔnɔ a kâa lì yá-ŋûa pere Ofura perei ma Suaa kpiniŋ su.

¹⁸ Nuu-kpului dɔnɔ a kâa lì vóloi liî-pere Bɛorɔŋ perei ma pere. Nuu-kpului zaaƃa ɣelei su-ƃelai da kâa lì vóloi kulai-pere vɛ̃ɛ-kpâlaŋ su goyaŋ-perei ma Zeboiŋ gbotoloi mɛi pere.

¹⁹ Ŋ̀ele-ŋai tí ma, kɔli ɣale nuu fé kɛ́ ní Eezuɛ-ŋai sáma, kpeni fêi, Felesia-ŋai dífe kɛ́ ní wɛ̂lii dí kɔli ɣali pere lɛ́ dîa. Felesia-ŋai da kâa mò dîyɛɛi, “À kɛ̀ kwa kɔli ɣale pere lɛ̀ Eezuɛ-ŋai dîa, gɛ̀ ní da pâi kɛ̂i ƃóa-sɔkpɔ-ŋa da kpála-ŋa ɣalêi.”

²⁰ Mɛni ma, Eezuɛ-ŋai da kâa lì Felesia-ŋai pɔ́-naa a gɛ́ɛ dí díkɔli-sãai ŋá lí. Da kâa lì a kɔli-sãa kéɛ yɛ̂ɛ díkwaa sí kɔli-ŋai, yuɔ̂-ŋai, m̀ɔlɔŋ-tee ƃoa-ŋai, ǹiŋa kɔlɔ ƃɔ́ kɔli-ŋai da díkâli-ŋai a gɛ́ɛ Felesia-ŋai dí díŋaa Sɔ̂ɔ dîɛ.

²¹ Felesia-ŋai da kâa Eezuɛ-ŋai ƃaâ tèe a gɛ́tɛ díi-ŋai ŋí kɛ́ mɛni ma.

²² Mɛni ma, Eezuɛ kɔkɔ́-ƃelai da kâa kɛ̀ liî kɔ́ ma, kɔ́ kɔ́-sãa fa kâa kɛ̀ dí yêei. Sɔ̂ɔ da ǹóŋ Zonetaŋ nɔ́ ƃé ƃóa-sɔ̂kpɔ da kpála da kâa kɛ̀ díyêei.

²³ Nya ƃe Felesia-ŋai dí díƃûui pù Mesima perei ma.