Samuɛlə dɔlɔɔ 11 - Bible

Sɔ̂ɔ è Zaabɛɛ taai ŋuŋ ma ƃò

¹ Sɔ̂ɔ kɛ́ɛ a kâloŋ-laa kɛ́ a ɣáloŋ tɔnɔi, Amɔŋ kaloŋ Ǹaai è pà a ŋɔkɔ-kuluƃa-ŋai é dí tínaŋ Zaabɛɛ taai ma nyíi kɛ̀ Giiba lɔii kpiniŋ sui. Diai kɛ̀ Zaabɛɛ taai sui dí mò Ǹaai ma dîyɛɛi, “À kɛ̀ kwa kâa-ni kwa mɛni kpɛtɛɛ kɛ̀, ya pɔri kɛ̂i a kúmɛi nuu. Kwa pâi kɛ̂i kúŋuŋ fela-fei tɛɛ̂i ípɔ.”

² Ǹaai ǹyɛɛ dîai, “Tɔ̃yâ ma kwa kâa-ni kwa pâi mɛni kpɛtɛɛ kɛ̂i. Kɛ́lɛ fɛ̂ɛ kúwoo é pú gîe ma mɛni tɔnɔ ma. M̀ɛnii kpîŋ ƃa fɛ̂ɛ ŋá ƃâa kúla Eezuɛ-ƃelai dîa a Zaabɛɛ sinaai kélee láa mii yée mɛi ŋɛi-gaoi kuláa dí ŋuŋ ma tɛi-tɛi.”

³ Daa láa túɛ-ƃelai dîyɛɛ m̀ai, “Ye fólo lɔ́ɔlu mɛi feerɛ tɛ́ɛ kúpɔ a gɛ́ɛ kú worɛ̂ tɛɛ Eezuɛ-ŋai pɔ́-naa a gɛ́ɛ dí kpɔŋ ḿâa tɛɛ kúpɔ. À kɛ̀ da wàla pá díkpɔŋ ḿâ tɛɛ kúpɔ dí kúkula-yeei kɛ́, gɛ̀ ní kwa pâi kúkpîŋ tɛɛ̂i kápɔ.”

⁴ Ŋ̀orɛ̂-woo ƃó-ƃelai da-ni dí lì Giiba Sɔ̂ɔ pɔ́-taai. Díkelee dí pɛ̀lɛ wɔ̂lɔi.

⁵ Naa kɛ́ɛ tii, Sɔ̂ɔ è kula ŋɔkpâlaŋ ŋá é tɛ́ daai su. È kɛ̀ siâi ŋɔtíi kɛ́-niŋa-ŋai pôlu. È ǹûai marê kɛ̀ ǹyɛɛi, “Lé ƃé kɛ̀ ǹûai kélee da wɔ̂lɔi?” Í M̀ɛnii Zaabɛɛ taai su naloŋ è mò dîai dí mò.

⁶ Naa kɛ́ɛ tii, Ɣâla ŋɔmɔ̂leŋ è pìli Sɔ̂ɔ kponôi a maa félaa é gɛ́ Sɔ̂ɔ é ǹíi ŋwána kpɔ́ a ŋ̀ánaa.

⁷ È ŋɔtíi kɛ́-niŋa-ŋai veerɛ pàa é zu tée-tee a gbua pɛlɛ-pɛlɛɛ. È gbua tɔnɔ tɛ̀ɛ ŋ̀orɛ̂-woo ƃó-ƃelai pɔ́. È mò dîa a gɛ́ɛ dí zua kpuai tí lɛ́ Eezuɛ-ƃelai dîyɛɛ dîai, “Sɔ̂ɔ da Samia díkaa kɔ-kuluƃa-ŋa ŋáa tɛ̂i gîe ma. Ka pá ká pú dîa. À kɛ̀ kà wàla pá bere ƃé kwa pâi gɛ̂i la a kátii kɛ́-niŋa-ŋai!” Nuu-namui è gɛ̀ Eezuɛ-ŋai dí yào kpɔ́ a ŋ̀ánaa. Nya ƃe zinaai kélee dí pà dí kîe ma

⁸ Beezɛ. Sɔ̂ɔ è dípù díkîe ma é dílono. Núu wála ŋuŋ saaƃa (300, 000) è kùla Eezuɛ. Núu wála buu saaƃa (30,000) é kúla Zuda.

⁹ Sɔ̂ɔ ŋɔtíi kɛ́-ƃelai dí ŋ̀orɛ̂-woo ƃó-ƃelai tɛ̀ɛ pôlu Zaabɛ a gono-tee woo ŋí: “Kwa pâi káŋuŋ ma ƃôi a vólo maa láai tínaa.” Nya ƃe Ŋ̀orɛ̂-woo ƃó-ƃelai dí lì pôlu Zaabɛ dí m̀ó ǹûai dîa a gɛ́ɛ da pâi ŋuŋ-ma ƃô sɔlɔ ƃôi. Díkelee dílii è làa.

¹⁰ Dí mò Amɔra-ŋai dîa dîyɛɛi, “Kúfe pâi kúkpîŋ tɛɛ̂i kápɔ tínaa, mɛni ma ka pɔri m̀ɛnii kélee kɛ̂i ka ŋ̀wɛ̂lii ká gɛ́i.”

¹¹ Bôlu ma ɣelei, Sɔ̂ɔ è ŋɔkɔ́ kɔ́-ƃelai ŋáa kɔlɛ gîei saaƃa. Dí pɛ̀lɛ ǹûai dîa ɣele é lɛ́ɛ pâi ƃɔ̂i. Dí pɛ̀lɛ Amɔŋ-ŋai paâi é lɛ́ɛ la zu vóloi maa é láa. Amɔŋ-ŋai gbulu loŋ nɔ́ ƃé pù. Kɛ́lɛ díkɛ̀ a dítaa-taa díkɛ̂i kôya díkîe-ni dîa.

¹² Eezuɛ kɔ-kuluƃa-ŋai dí lì Samia pɔ́-naa dí m̀ó ma a gbanaŋɔɔ dîyɛɛi, “Ǹûai kɔɔ mò dîyɛɛ Sɔ̂ɔ fé a díkâloŋ? Pá a dîa kúpɔ kú dípaa!”

¹³ Sɔ̂ɔ è díwoo su tòo ǹyɛɛi, “Kpao, Ǹuu-namui aâ sâa Eezuɛ ŋuŋ-ma ƃó. Mɛni ma núu da fé pâi núu da paâi sâa.”

¹⁴ Samia è mò ǹûai kélee dîa ǹyɛɛi, “Ka pá kwáa lí Geega kwaa kúwoo sée a gɛ́ɛ Sɔ̂ɔ nɔ́ ƃé pâi kɛ̂i a kúkâloŋ.”

¹⁵ Díkelee kpɔ́ dí lì ŋ̀âla fɛli kwaai ma Geega. Dí liɛ́ɛi, dí fàa ma a gɛ́ɛ Sɔ̂ɔ é kɛ́ a díkâloŋ. Da Sɔ̂ɔ ni dí lawei-laa sâla kùla a taa-tulɛ-ŋa Nuu-namui ma. Dí kúu kɛ́tɛ kɛ̀ naa a m̀aa ɣelei tí.