Samuɛlə dɔlɔɔ 1 - Bible

Ana è Yâwɛɛ marê kɛ̀ lóŋ mɛni ma

¹ Nalôŋ tɔnɔ da ƃé wɔ́lɔ kɛ̀ Lama taai su Ifiraŋ yee lɔii-kpiniŋ su. Ǹalôŋ ŋí láa ƃé kɛ̀ a Ɛɛkana. Ǹâŋ láa ƃé kɛ̀ a Zeroaŋ, Ɛliu ǹóŋ. Ɛliu ǹâŋ láa ƃé kɛ̀ a Tou, Zuu ǹóŋ. Ǹûai ŋí díkaa a Ifiraŋ ŋɔsuui su-ƃelai da.

² Ɛɛkena ŋɔnɛyâai díkɛ̀ feerɛ. Dɔnɔ láa ƃé kɛ̀ a Ana, gbélii láa kɛ́ ƃò a Penîna. Penîna è nîa-pɛlɛɛ maa sɔlɔ ƃô, kɛ́lɛ lóŋ da fé kɛ́ ní Ana yêei.

³ Ɛɛkena a kâa kùla bɔ́-taai é lí Silo a kóraŋ kélee a gɛ́ɛ é Ɣâla fɛli é sâla kula Ŋ̀wála-wâla kélee Ɣalai, Yâwɛɛ ma ƃɛ́i Ilai ǹônii-sinaai, Ofini da Finiɣa dí kɛ̀ naa a sâla láa soŋ-ƃelai.

⁴ Ɛɛkena a kâa kɛ̀ sâla kulâi a zâla-laa soŋ-nuui sãai gbua támaa tɛ̀ɛ Penîna pɔ́ da ǹônii.

⁵ Kɛ́lɛ a kâa zâla-laa soŋ-nuui sãai gbua kɛ́tɛ ɣelei tɛ̀ɛ Ana pɔ́, kpɛ́ni fêi, è kɛ̀ a ŋ̀wɛ́liɛɛ a ŋ̀ánaa berei máŋ lóŋ fé kɛ́ ní la ǹyêei.

⁶ Penîna a kâa kɛ̀ ɣɛ́lɛ maa kulâi Ana kponôi, kpɛ́ni fêi, Yâwɛɛ fé lóŋ tɛ̀ɛ ní bɔ́.

⁷ A kâa m̀ɛnii ŋí kɛ̀ a kóraŋ kélee, ŋ̀uŋ kpîŋ ƃa tãi da kâa kɛ̀ liî la a gɛ́ɛ dí sâla kula Yâwɛɛ mai. Ana líi a kâa tòo pôlu gɛ́ wɔ̀lɔ va ǹáa mìi.

⁸ Nya ƃe Ana ŋɔsurɔ̂ŋ è marê kɛ̀ ǹyaa m̀ai, “Ana, ya wɔ̂lɔi lé mɛni ma? Ífe ílaa miî lé mɛni ma? Ílii toɔ̂ɔi pôlu lé mɛni ma? Ḿaa mɛni fé tɛ̀ɛ ní lóŋ puu ma íyêei?”

Ana da Ilai

⁹ Ɣele tɔnɔ da dí liɛɛ sâla kulai. Gɛ́ɛ da kpɛ̀ɛ la a dílaa miî, Ana è mù sìɣe é lí Ɣâla fɛlîi. Zâla láa soŋ-nuui Ilai è kɛ̀ seeni ŋâla-fɛli-pɛrɛi lá.

¹⁰ Ana líi è kɛ̀ a doɔ́ɔ pôlu a ŋ̀ánaa gɛ́ wɔ̀lɔ gɛ́ Yâwɛɛ fɛli.

¹¹ È góno tèe ǹyɛɛi, “Óo Yâwɛɛ, Ŋ̀wála-wâla kélee Ɣalai, à kɛ̀ yà pâi ŋámɛni sôlii kâai, ŋ́gili é lɛ́ɛ íŋa, í lóŋ surɔŋ tɛ̀ɛ ḿbɔ, ŋa pâi dɛɛ̂i ípɔ pôlu. Ŋuŋ ƃó kɔli da kélee fé pâi lɔ̂i ŋ̀ûa ŋɔfúlu-laai su.”

¹² Gɛ́ɛ Ɣâla fɛlîi, Ilai è kɛ̀ nɔ́ màa kpɛɛ̂i.

¹³ Ana è kɛ̀ lônoi ǹíi su. Ǹɛ́ŋ nɔ́ ƃé kɛ̀ tûmoi núu fa ŋ̀óo mɛni. Ilai è kɛ̀ nɔ́ gâai yɛ̂ɛ lɔɔ-kpele nɛni.

¹⁴ Ilai è mò ma ǹyɛɛi, “Yâ pâi kɛ̂i a íkpeleɛɛ ɣele ɣɛɛlu yée mu? Ǹɛɛ naa íŋuŋ su é séɣeŋ.”

¹⁵ Kɛ́lɛ Ana è ŋ̀óo su tòo ǹyaa m̀ai, “Kpao, ŋánuu-namui, fa lɔɔ sîi da kélee kpèle, ńii nɔ́ ƃé doɔ̂ɔi pôlu, ǹyaŋ ŋa ŋ́gbîŋ tɛɛ̂i Yâwɛɛ pɔ́.

¹⁶ Ífe íyee mu-nuui kàa a núu kpɛ́ni. Ŋa wɔ̂lɔi a tãi su kôyaa, ŋ́gili ŋá puɔɔ̂i, ńii toɔ́ɔ pôlu.”

¹⁷ Ilai ǹyɛɛ m̀ai, “Lí lii-see su. Tɔɔ Eezuɛ Ɣalai é m̀ɛnii kɛ́ yɛ̂ ya m̀arê kɛ̂i mɛ̀ni mai.”

¹⁸ Ana ǹyɛɛ m̀ai, “Ísɛɣɛ̂.” È lì pôlu é ǹáa míi. Ǹíi fé ŋɔ́nɔ wɔ́lɔ tòo ní pôlu.

Samia maa sɔlɔ ƃóɔɔ da dɛɛ mɛni Ɣâla pɔ́

¹⁹ Dí dímu sìɣe a ɣele ƃɔ̂i kpini dí lí dí Yâwɛɛ fɛ̀li. Dí lì pôlu dípɔ-taai Lama. Ɛɛkena è Ana kɔ̀lɔŋ a nɛnî, ǹyaŋ m̀aa mɛni kíli è tòo Yâwɛɛ ŋá.

²⁰ Ana è koo sîɣe é lóŋ-surɔŋ maa sɔlɔ ƃó. È ǹóloŋ láa sèe a Samia, ǹyɛɛi, “Ŋá Yâwɛɛ marê kɛ̀ m̀ɛni ma.”

²¹ Naa pôlu ma Ɛɛkena da ŋɔpɛ́rɛi mu-ƃelai kélee dí ŋɔ́nɔ lì a gɛ́ɛ dí góraŋ salai kúla Yâwɛɛ ma. Ɛɛkena è lì a zâla-laa soŋ-nuui sãai nyíi è góno tèe la Yâwɛɛ yêei.

²² Kɛ́lɛ Ana fé lì ní. È mò ŋɔsurɔ̂ŋ ma ǹyɛɛi, “Ŋa gbàa kpɔ́ nɔ́ ǹolôŋ kúla ŋíni ma, ŋa pâi pâi la a gɛ́ɛ kú dɛɛ Yâwɛɛ pɔ́ é kɛ́ ŋɔpɛ́rɛi mu wɔ́lɔ-wɔlɔ da wɔlɔ-wɔlɔ.”

²³ Ŋɔurɔ̂ŋ ǹyɛɛ m̀ai, “M̀ɛnii kɛ́ í lâai-la ǹɛ̂lɛɛi. Maa-kpɛŋ kɛ́ ǹolôŋ lá é kúla ŋíni ma. Yâwɛɛ é gɛ́ é gɛ́ í íkono-tee ŋ̀aa-see kɛ́ ǹyêei.” Ana è lɛ̀ɛ naa é lɛ́ɛ la zu ǹolôŋ lá é kúla ŋíni ma.

²⁴ Ǹolôŋ kɛ́ɛ ǹá a kùla ŋíni mai, ǹee è zìɣe é kóraŋ saaƃa niŋa sirɛ siɣe, fêlaƃa pãŋ buu feerɛ ƃɔrɔ tɔnɔ láa fɛ́ɛ da pɔ̂rɔ leɣi tɔnɔ láa fɛ́ɛ a ŋwã̂ai. È lì a ǹolôŋ da zãai ŋí Yâwɛɛ ŋɔpɛ́rɛi lá Silo.

²⁵ Dí ǹiŋai pàa dí pá a ǹolôŋ Ilai pɔ́.

²⁶ Nya ƃe Ana è mò ǹyɛɛi, “Óo, ŋánuu-namui, ńyãa ƃa ǹɛnîi kɛ̀ tɔɔ ni íŋɛi ŋ́gɛ Yâwɛɛ fɛlii.

²⁷ Ǹolôŋ ŋá Ɣâla fɛ̀li mɛni mai ǹyaa ká ŋí. Yâwɛɛ aâ ŋáfɛli wooi mɛ́ni a dɛ̀ɛ ḿbɔ.

²⁸ M̀ɛni ma, ŋa dɛɛ̂i Yâwɛɛ pɔ́ pôlu. Tãi nɔ́ gáa la ɣele mai, a pâi kɛ̂i a Yâwɛɛ pɔ́ɔ.” Ana da Ɛɛkena dí ƃaa kɛ́ maa tɛ̀ɛ naa Yâwɛɛ pɔ́.