Piɛrə dɔlɔɔ 4 - Bible

Ɣâla ŋɔƃɛlɛ-sêei maa-tii-kɛ-ƃela lɛ́lɛɛ

¹ Mɛni ma tãi nɔ́ Kôrai kpono è mɛni-soli kàa la kúmɛni mai, kâa máŋ ka kákpîŋ kpɛ̀tɛ a gili-ŋa-sia tɔnɔi tí, kpɛ́ni fêi, ǹúui gbono a mɛni-soli káai, a kpera sɔnyɔ̂ŋ ma,

² a gɛɛ vé ŋɔfúlu-laai kpéli kɛ̀ gbonôi a núu ŋɔkɛ-pere-nyɔŋ maa-sɛŋ-wɛliɛi ŋɔ́nɔ, kɛ́lɛ, é kɛ́ a Ɣâla nia-mɛni.

³ Kpɛ́ni fêi, ka wɔ́lɔ tãi támaa siɣe kákɛ m̀ɛnii kɛ̂ Zɛ̃tai-ŋai da ŋ̀wɛ̂lii dí gɛ́i. Ǹyaa ƃa núu kɛ́ɛ wolii-kpɔ̂lɔ su, núu ŋɔkɛ-pere-nyɔŋ maa-sɛŋ-wɛliɛi, lɔɔ-kpeleɛ, ƃoo-pele, lɔɔ-kpele-kuu, da ɣâla-pɔɔkɔ̂ŋ fɛliɛ nyíi vé Kôrai-ƃelai dítɔ̂ŋ sui.

⁴ Díla è kpàla dia a gɛɛ dí kákaa ka dîa-ni káfe zu tɔnɔɔ dítûa-pere-nyɔŋ su da berei dífa díkpîŋ mɛi kâa lai. Da laa-nyɔŋ sèe kâa.

⁵ Kɛ́lɛ, da pâi díkoraŋ ƃôi ǹúui mì gbɛtɛɛ̂i a gɛɛ é vúlu-ƃelai dímɛnii ŋá tée da zaa-ƃelai.

⁶ Kpɛ́ni fêi, mɛni ŋí ƃe dí Duŋ Lɛ́lɛɛi ƃò la máŋ zaa-ƃelai dîa a gɛɛ berei máŋ dímɛnii ŋá téɛɛ̂i la díkponôi sú yɛ̂ɛ núu-kpunei, dí kɛ́ dímɔ̂leŋ su yɛ̂ɛ Ɣâla.

Ɣâla ŋɔƃɛlɛ-sêei mɛi káa-ƃela lɛ́lɛɛ-ŋai

⁷ Sɛŋ kélee kpɛɛ ŋá a lɛ̂ɣɛ. M̀ɛni ma táre é kɛ́ káyêei kákili ŋá é pono Ɣâla fɛli mɛni ma.

⁸ Nyii gáa m̀ɛnii kélee mɛi, ǹyaa ƃa káwɛli-kɛ-maai sú é kpanaŋ kákîe-ni sáma, kpɛ́ni fêi wɛli-kɛ-maa a sɔnyɔ̂ŋ támaa mɛi pɛlɛ.

⁹ Ká kɛ́ a ŋɔ̃yâ maa-mɛni kɛ-ƃela kákîe-ni mɛni ma, káfe káŋuŋ su-woo saa.

¹⁰ Zama-sɛŋ núu kélee a zɔlɔ ƃó tɔnɔ-tɔnɔi, ka tíi kɛ́ la kákîe-ni mì yɛ̂ɛ Ɣâla ŋɔƃɛlɛ-sêe-sii támaai maa-tii kɛ-ƃela.

¹¹ Núu à kɛ̀ lônoi, tɔɔ é lóno yɛ̂ɛ núu à kɛ̀ Ɣâla wóo kpîŋ ƃôi. Núu à kɛ̀ kpɔŋ-maa kɛ̂i, tɔɔ é gɛ́ a gbanaŋ yɛ̂ɛ berei Ɣâla è dɛ̀ɛ la bɔi, a gɛɛ mɛni kélee su Ɣâla ŋɔfólo-laai maa é tɛ́ Zîsɛ Kôrai sârai, nyíi fólo-laa káa a bɔ́ɔ da wala-wala-laa wɔlɔ-wɔlɔ da wɔlɔ-wɔlɔi. É kɛ́ ti.

Mɛni-sôli káa yɛ̂ɛ Kôrai-nuu

¹² Ŋáwɛli-kɛ-maa-ƃelai, kála fé kpàla kâa a zu-kɔɔŋ mɛni-kpɔlu-ŋai da pâ kápɔ yɛ̂ɛ ŋɔŋ a gɛɛ dí kásu kɔɔ̂ŋ nyíi-ŋai díkaa yɛ̂ɛ mɛni nina ƃe kɛ̀ a káai.

¹³ Kɛ́lɛ, ka lii-nɛ̃ɛ kùla yɛ̂ɛ berei ka Kôrai è mɛni-solii sɔlɔ ƃo lai, a gɛɛ káa máŋ ka lii-nɛ̃ɛ kúla lii-laa é kɛ́ káyêei tãi ŋɔfólo-laai a lɛ́ lai.

¹⁴ À kɛ̀ kálaa nyɔ́mɔɔ à kɛ̀ nûa lá Kôrai láai mɛni ma, lûwa káa kâa, kpɛ́ni fêi, vólo-laa da ŋ̀wála-wala Mɔleŋ, nyíi gáa a Ɣâla Ŋɔmɔ̂leŋ, káa kámɛi.

¹⁵ Kɛ́lɛ, kátɔnɔ kpîŋ fé mɛni-soli kàa a gɛɛ gáa a núu-paa-nuu, kpaa máŋ a ŋuma-nuu, kpaa máŋ a mɛni nyɔ́mɔɔ kɛ-nuu, kpaa máŋ a mɛni-kɔ̂ri-nuu.

¹⁶ É máŋ kɛ́ tí, à kɛ̀ núu à mɛni-soli kàa yɛ̂ɛ Kôrai-nuu, maa-ŋumɛ fé kɛ́ mà, kɛ́lɛ, tɔɔ é Ɣâla ŋɔfólo-laai maa tɛ́ ǹáai tí mu.

¹⁷ Kpɛ́ni fêi, mɛni-ŋa-tee-tãi a pá a gɛɛ gɔ́ɔ é pîlaŋ Ɣâla ŋɔpɛ́rɛi-mu-ƃelai dîa, ǹyaŋ à kɛ̀ gɔ́ɔ à pîlaŋ kûa, gɛ̀ ní le ƃe pâi kɛ̂i a diai dífa díwoli tɔ̀ɔ Ɣâla ŋɔtuŋ lɛ́lɛɛi mai?

¹⁸ Ǹyaŋ, “À kɛ̀ dɔ̃yâ-nuui ƃálo-laa walai, gɛ̀ ní mí ƃe diai dífe Ɣâla kɔlɔŋ da zɔnyɔ̂ŋ-nuui da pâi kulâi naai?”

¹⁹ Mɛni ma diai da mɛni-soli kàa yɛ̂ɛ berei Ɣâla ŋɔnîa-mɛnii káa lai, tɔɔ dí mɛni lɛ́lɛɛ kɛ́ dí dímɔ̂leŋ tɛ́ɛ Zɛŋ-kélee kpɛtɛ-nuu sã́ai pɔ.