Piɛrə dɔlɔɔ 3 - Bible

Sinâa da dínɛyâa dítûa-pere

¹ Nɛyâa, ka kásinâai wóo mɛni, a gɛ́ɛ a kɛ̀ díta-ni, berei máŋ dífa díwoli tɔ̀ɔ la ŋ̀óoi mai, dínɛyâai tûa-pere é gɛ̀ dílii é pene da wàla máŋ lono dípɔ,

² da pâi gaâi a gɛɛ kátûa-pere maa waâi yao-ma-pere su.

³ Káfe kɛ̀ nɔ́ a kálɛlɛɛ kákɔlɔ ma, káŋuŋ láa-a ǹɛ́lɛɛ, ká kámaa ɣiri a gôo ká seɣe lɛ́lɛɛ-ŋa too kâa.

⁴ Kɛ́lɛ, kálɛlɛ-laai é kúla kákponôi é kɛ́ a kátûa-perei nyíi maa-yeŋɔɔ̂i mɛi saai, nyíi ǹɛ́lɛɛ̂i Ɣâla ŋɛ́i-tuɛ yɛ̂ɛ kɔni mɛni kpanaŋɔɔ̂i.

⁵ Mɛni ma bere-sii ŋí sú nɛyâa maa waa-ŋai nyíi kili-kɛ-zu è kɛ̀ díyêei Ɣâla kponôi da kâa dímaa ɣiri díkɛ ƃaa-kɛ-maa tɛ̂ɛ dísinâai pɔ,

⁶ yɛ̂ɛ Seera nyíi Eberaɣɛ̃ɛ wóo mɛni gɛ̀ dòli a nuu-namui. Ǹyaŋ kákaa nâa a ŋɔnîa-pɛlɛɛ à kɛ̀ kà tùa a zã́a káfe ǹɛɛ naa sɛŋ da kélee fé kámaa yao.

⁷ Sinâa, kili-ŋa-sia é kɛ́ kâa a bere tɔnɔi tí é pîlaŋ kánɛyâai dîa a berei ka pɔ̂ri tûai la a diai. Ka ƃaa-kɛ-maa tɛ́ɛ dípɔ, kpɛ́ni fêi, díwala-walai fé seri ní káwɔ̂i pɔ, kpɛ́ni fêi ŋɔ́nɔ, ka dîa-ni kákaa a vulu-laai maa-ƃɛlɛ-sêei sɔlɔ-ƃo-ƃela zu tɔnɔɔ a gɛɛ pɔ́ɔ fé pɛlɛ Káɣâla-fɛliɛɛi ma.

Kili-ŋa-sîa maa waa

⁸ Gbɛɛ-ŋai, kákelee kákili é kɛ́ tɔnɔɔ, maloŋ-see é kɛ́ káyêei, ká kákîe-ni wɛ́li, maloŋ-kaa é kɛ́ káyêei da líi-maa-yeŋɔɔ.

⁹ Káfe mɛni nyɔ́mɔɔ su tòo a mɛni nyɔ́mɔɔ, kpaa máŋ ka larâŋ pɔ́ɔ kúla a larâŋ. Kɛ́lɛ, nyíi ka pɔ̂ri gɛ̂i, ǹyaa ƃa ká lûwa láa mà, kpɛ́ni fêi, da kátoli nyíŋi ma, a gɛɛ ká lûwa sɔlɔ ƃó.

¹⁰ Kpɛ́ni fêi, “Ǹúui à fulu-laa wɛ̀li a gɛɛ é ɣele lɛ́lɛɛ-ŋa kaai, fɛ̂ɛ é ǹɛ́ŋ kúla mɛni nyɔ́mɔɔ su é ǹá kúla kiri-mɛni ƃóɔ sú.

¹¹ Fɛ̂ɛ é bôlu fé mɛni nyɔ́mɔɔ ma é mɛni lɛ́lɛɛ kɛ́. É lii-sêe kɔ̂ri é lɛ́ɛ zu é zɔ̀lɔ ƃo.

¹² Kpɛ́ni fêi, Nuu-namui ŋ̀ɛi káa dɔ̃yâ-ƃelai dîa, ŋ̀óli lá ƃóɔ a gɛɛ é Díɣâla-fɛli-wooi mɛni. Kɛ́lɛ, Nuu-namui ŋ̀ɛi seɛɛ̂i mɛni nyɔ́mɔɔ kɛ́-ƃelai dîa.”

¹³ Ǹyaŋ gbɛ̂ɛ ƃe pâi sɛŋ solîi kâa à kɛ̀ ka ŋ̀wɛ̂lii ká mɛni lɛ́lɛɛ kɛ̀ kpɔ́ a ŋánaa?

¹⁴ Kɛ́lɛ, à kɛ̀ máŋ kà mɛni-soli kàa tɔ̃yâ-laa mɛni ma, lûwa a pâi kɛ̂i kâa. Káfe yao dîa, kpaa máŋ kálii é kɔ́.

¹⁵ Kɛ́lɛ, ka Kôrai siɣe kálii su a maa-waa yɛ̂ɛ Nuu-namui. Ka kɛ́ a kákpɛtɛɛ a tãi kélee a gɛɛ ká kákpîŋ maa kɔ̃ɔ núu kélee yêei nyíi a kátoli a gɛɛ ká kákili-kɛ-zui maa-sapoi lɛ̂i, é máŋ kɛ́ tí ka gɛ́ a maa-yeŋ-pere yao-ma-pere su.

¹⁶ Kákili-ŋa-siai é kɛ́ a maa waa a gɛɛ nûa da lòno kâa, diai da lòno kâa kátûa-pere-lɛ̂lɛi mɛni ma Kôrai kponôi, dí ŋumɛ.

¹⁷ Kpɛ́ni fêi, ǹɛ́lɛɛi a gɛɛ núu é mɛni-soli káa mɛni lɛ́lɛɛ kɛ́-mɛni ma, à kɛ̀ gáa a Ɣâla nia-mɛni é tɛ́ɛ la mɛni nyɔ́mɔɔ kɛ́ɛ ma.

¹⁸ Kpɛni fêi, Kôrai máŋ è sàa sɔnyɔ̂ŋ mɛni ma zu tɔnɔɔ. Dɔ̃yâ-nuui è sàa kúai kúkaa a zɔnyɔ̂ŋ-ƃelai kúmɛni ma a gɛɛ é pá a kúa Ɣâla pɔ́. Dí gbonoi pàa, kɛ́lɛ, è kɛ̀ a vúlu mɔ̂leŋ su.

¹⁹ È lì mɔ̂leŋ sú é Ɣâla-woo ƃó mɔ̂leŋ-ŋai dîa kpini-pɛrɛ mu,

²⁰ nyíi-ŋai dífe woo-mɛni kɛ̀ ni a maa-ŋuŋ tãi Ɣâla è dímaa kpɛ̂ŋ la a lii-kpele-pere Nôa ŋɔtãi ma a geleŋ-kpɛtɛ-tãi, nyíi núu-kpulu loŋ, zu-kulâi ƃa nuu lɔ́ɔlu mɛi saaƃa, è ƃàlo zu yá sârai.

²¹ Batâi, nyíi gáa nɔ́ yɛ̂ɛ m̀ɛnii ŋí, a nâa kámaa wáa, zu-kulâi fa kákponôi líƃi a kpɛ̂ɛ mà, kɛ́lɛ, gáa a kúliɛ Ɣâla pɔ́ a gɛɛ é kúkili-ŋa-siai maa waa Zîsɛ Kôrai ŋɔmu-siɣe saa-yeei sârai,

²² nyíi a lí Ɣâla-taa gáa see ni Ɣâla láa-mii-yee mɛi da ŋ̀âla-taa-kela-ŋai, núu-mɛi-ƃelai, é pɛ́lɛ ŋwála-wala-ƃelai dîa nyíi-ŋai díkaa mui.