Tɔɔɓɛlaa dɔlɔɔ 16 - Bible

¹ Yâwɛɛ è lòno ŋɔlóno kɛ́-nuui Anani ǹóŋ Zewu pɔ́ é pîlaŋ Baasa ma ǹyɛɛi,

² “Ŋá ímu sìɣe ŋá íkula muluŋ su, ŋá íkɛ a kâloŋ ŋánûai Eezuɛ mɛni ma. Kɛ́lɛ í sìa a bere nyɔ́mɔɔ tɔnɔi Zɛroboaŋ è sìa lai, í ŋánûai Eezuɛ kɛ́ dí sɔnyɔ̂ŋ kɛ́ ŋá ńii ŋwána dîa.

³ M̀ɛni ma, ŋa pá Baasa su-karâi da ŋɔkáa-laai su-ƃelai kélee. Ŋa pâi ŋɔkáa-laai su-ƃelai kɛ̂i yɛ̂ɛ Neba ǹóŋ Zɛroboaŋ ŋɔkáa-laai su-ƃelai.

⁴ Ɣîla-ŋa da pâi Baasa ŋɔnûai poma miî nyii-ŋai pâi saâi daa-lêei sui. Ŋɔnûai pâi saâi víyeŋ ŋá perei gɔ̃ɔ-ŋai da pâi díluu kpelêi.”

⁵ M̀ɛni-ŋai kélee Baasa è gɛ̀ ŋɔkâloŋ-laai sui, gélee pɔ̃yɛ̂ɛi Eezuɛ kaloŋ-ŋai dímɛni pɔlɔ kɔlɔi su.

⁶ Baasa è sàa é lí ǹâŋ pɔlɔ-ŋai pɔ́. Dí nòo Tiiza. Dí ǹóŋ Ila sèe a kâloŋ bɔ́ɔ ŋá.

⁷ Nyíŋi pôlu ma, Yâwɛɛ è worɛ̂-woo tɛ̀ɛ a ŋɔlóno kɛ́-nuui Anani ǹóŋ Zewu é pîlaŋ Baasa ma da ŋɔkáa-laai su-ƃelai nyɔ́mɔɔ-ŋai mɛni ma è gɛ̀ ǹyaa Yâwɛɛ ŋɛ́i. M̀ɛni-ŋai ŋí dí gɛ̀ é ǹíi ŋwána ma. Nyíŋi è gɛ̀ gɛ́ ƃò yɛ̂ɛ Zɛroboaŋ ŋɔkáa-laai su-ƃelai. M̀ɛni-ŋai ŋí dia tɔnɔ nɔ́ fé gɛ́ ƃò yɛ̂ɛ Gâloŋ Zɛroboaŋ, kɛ́lɛ, è Zɛroboaŋ ŋɔkáa-laai su-ƃelai su-kàra.

Ela è kɛ̀ a kâloŋ Eezuɛ

⁸ Zuda kaloŋ Asa ŋɔkâloŋ-laa koraŋ buu feerɛ káo lɔ́ɔlu mɛi dai su, Baasa ǹóŋ Ila è kɛ̀ a kâloŋ Eezuɛ. È kâloŋ-laa kɛ̀ a kóraŋ feerɛ. Zeɛ́ɛ è kɛ̀ Tiiza.

⁹ Ziŋri è kɛ̀ a Ila ŋɔtíi kɛ́-nuu kɛ́tɛi dɔnɔ. Ǹyaa ƃé kɛ̀ ŋɔkɔ́-kɔ keleŋ-ŋai da-ŋa mɛi a núu kɛ́tɛi. È gbɛ̀tɛ a gɛ́ɛ é Ila bàa. Ila è kɛ̀ Tiiza a maa kûui tí gɛ́ kpele-sɛŋ kpanaŋ kpèle Aza ŋɔpɛ́rɛi mu. Aza kɛ̀ a Tiiza kaloŋ-pɛrɛ kɛ́tɛi mɛi-nuui.

¹⁰ Ziŋri è lɔ̀ é dùa é dóo é baa. È kɛ̀ tí é bɔ́ɔ ŋá sìɣe a kâloŋ. M̀ɛnii ŋí è kɛ̀ Zuda kaloŋ Asa ŋɔkâloŋ-laa koraŋ buu feerɛ káo lɔ́ɔlu mɛi feerɛi su.

¹¹ Gɛ́ɛ da zee gâloŋ see-sɛŋ ŋái, è Baasa ŋɔkaa-laai su-ƃelai kélee pàa. Vé zinâai dɔnɔ kpîŋ lɛɛ ní, ŋɔkáayɔɔɔ kpaa máŋ m̀arâai da.

¹² Ziŋri è Baasa ŋɔkáa-lai su-ƃelai kélee pàa yɛ̂ɛ berei Yâwɛɛ è mò la Ɣâla ŋɔlóno kɛ́-nuui Zewu sârai.

¹³ È gɛ̀ tí, kpɛ́ni fêi, zɔnyɔ̂ŋ-ŋai kélee Baasa da ǹóŋ Ila dí gɛ̀ da berei dí gɛ̀ la Eezuɛ é sɔnyɔ̂ŋ kɛ́i, ǹyaa ƃé dí gɛ̀ Yâwɛɛ, Eezuɛ Ŋɔɣâlai kɛ́ ǹíi ŋwàna. Dí Ɣâla pɔkɔɔŋ-ŋa kpɛ̀tɛ díkpîŋ mɛni ma.

¹⁴ M̀ɛni-ŋai kpéli-ŋai kélee Ila è gɛ̀ ŋɔkâloŋ-laai sui, gélee pɔ̃yɛ̂ɛi Eezuɛ kaloŋ-ŋai dímɛni pɔlɔ kɔlɔi su.

Ziŋri ŋɔkâloŋ-laai kɛ́ pere Eezuɛ

¹⁵ Zuda kaloŋ Asa ŋɔkâloŋ-laa koraŋ buu feerɛ káo lɔ́ɔlu mɛi feerɛi su, Ziŋri è ŋɔkâloŋ-laai kɛ̀ Tiiza a fólo lɔ́ɔlu mɛi feerɛ. Gɔ́-kuluƃa-ŋai dí díƃûui pù Felesia taai Giƃɛtɔ̃ŋ kɔlɛ ma.

¹⁶ Eezuɛ-ƃelai kɛ̀ mûui sui kɛ́ɛ da mɛ̀ni la a gɛ́ɛ Ziŋri a tɔ̀ɔ gâloŋ ma a baai, dí Oŋri, gɔ́-kuluƃa-ŋai mɛi-nuu kɛ́tɛi kɛ̀ a kâloŋ Eezuɛ mɛi a m̀aa ɣelei tí mûui su.

¹⁷ Nya ƃe Oŋri da Eezuɛ kɔ-kuluƃa-ŋai kélee dí kùla Gibɛtɔ̃ŋ dí Tiiza taai síɣe.

¹⁸ Tãi Ziŋri è gàa la a gɛ́ɛ da daai síɣei, è lì gâloŋ-pɛrɛ kɛ́tɛi ŋɔloŋpoi zu-pere ŋɔi su, é ŋɔŋ tóo ma ƃɛ́i è kɛ̀ naai. È lɛ̀ɛ é sàa.

¹⁹ È kɛ̀ tí zɔnyɔ̂ŋ-ŋai gɛ̀i mɛni ma. È sɔnyɔ̂ŋ kɛ̀ a Yâwɛɛ. È tùa yɛ̂ɛ Zɛroboaŋ. È gɛ̀ Eezuɛ-ŋai dí sɔnyɔ̂ŋ kɛ́.

²⁰ Ziŋri ŋɔkâloŋ-laai su mɛnii kpéli-ŋai da ŋɔtɔɔ-ma mɛnii è gɛ̀i, gélee pɔ̃yɛ̂ɛi Eezuɛ kaloŋ-ŋai dímɛni pɔlɔ kɔlɔi su.

Oŋri ŋɔkâloŋ-laai kɛ́-pere Eezuɛ

²¹ Nya ƃe Eezuɛ-ƃelai dí díŋaa kɔ̀lɛ a núu kpulu feerɛ. Ǹúu kpului dɔnɔ è kɛ̀ a dɔ́ɔ Gina ǹóŋ Tina pôlu a gɛ́ɛ é kɛ́ a kâloŋ, ǹúu kpului kpéli kɛ́ ƃò Oŋri pôlu.

²² Kɛ́lɛ Oŋri ŋɔnûai díkɛ̀ a díwála-walaa é tɛ́ɛ Gina ǹóŋ Tina ma. Nya ƃe dí Tina pàa, Oŋri é kɛ́ a kâloŋ.

²³ Zuda kaloŋ Asa ŋɔkâloŋ-laa koraŋ buu saaƃa káo tɔnɔi su, Oŋri è kɛ̀ a kâloŋ Eezuɛ. È ŋɔkâloŋ-laai kɛ̀ a kóraŋ puu káo feerɛ. È ŋɔkóraŋ ǹɔ́ɔlu mɛi da kɛ̀ Tiiza.

²⁴ È Sameria yeei yà Simiɛ yêei a sɛŋ káo kole kpua-kpua ŋɔpãŋ ŋuŋ tɔnɔ pôlu buu lɔ́ɔlu. È taa-lêe tɔɔ ǹyéei ŋá é Simiɛ láa sée daai ma nyíi bɔ́ɔ è kɛ̀ a ǹyéei a bɔlɔi. È nàa sèe a Sameria.

²⁵ Kɛ́lɛ Oŋri è sɔnyɔ̂ŋ kɛ̀ a Yâwɛɛ. È sɔnyɔ̂ŋ kɛ̀ é tɛ́ɛ diai kélee dîa wɔ́lɔ kɛ̀ a kâloŋ-ŋa dúɛi.

²⁶ È sìa Neba ǹóŋ Zɛroboaŋ kɔ́ɔ pɔɔi. È gɛ̀ Eezuɛ-ŋai dí pìlaŋ gɔ́ɔ pɔɔi. Eezuɛ-ŋai dí Yâwɛɛ, Eezuɛ Ŋɔɣâlai kɛ̀ ǹíi é ŋwána dîa a díɣâla pɔkɔɔŋ-ŋai maa mɛni.

²⁷ M̀ɛni da kpéli-ŋai Oŋri è gɛ̀ ŋɔkâloŋ-laai su da ŋɔwála-wala-laai, gélee pɔ̃yɛ̂ɛi Eezuɛ kaloŋ-ŋai dímɛni pɔlɔ kɔlɔ-ŋai su.

²⁸ Oŋri è sàa é lí ǹâŋ pɔlɔ-ŋai pɔ́-naa. Dí nòo Sameria. Ǹóŋ Eɣa ƃé lɛ̀ɛ bɔ́ɔ ŋá a kâloŋ.

Eɣa è kɛ́ a kâloŋ Eezuɛ

²⁹ Zuda kaloŋ Asa ŋɔkâloŋ-laa koraŋ buu saaƃa káo lɔ́ɔlu mɛi saaƃai su, Oŋri ǹóŋ Eɣa è kɛ̀ a kâloŋ Eezuɛ. È gâloŋ-laai kɛ̀ a kóraŋ buu feerɛ káo feerɛ Eezuɛ mɛi. Zeɛ́ɛ è kɛ̀ Sameria.

³⁰ Oŋri ǹóŋ Eɣa è sɔnyɔ̂ŋ kɛ̀ a Yâwɛɛ a ŋ̀ánaa é tɛ́ɛ dia-ŋai kélee dîa wɔ́lɔ kɛ̀ a kâloŋ-ŋa dúɛi.

³¹ Zɔnyɔ̂ŋ ní mɛni fé kɛ́ ŋ̀ɛ́i a mɛni kɛ́tɛ ta. Vé kɛ́ ní a gɔ́lɔŋɔɔ a gɛ́ɛ ŋɔsɔnyɔ̂ŋ è kɛ̀ a gɛ́tɛ é tɛ́ɛ Neba ǹóŋ Zɛroboaŋ ma. È Sidɔŋ kaloŋ Ɛbee ǹóŋ-nɛnii Zɛsebɛɛ kùla a ŋɔnɛnî. M̀ɛnii ŋí è gɛ̀ è pɛ̀lɛ tíi kɛ̂i Bêe mì, gɛ́ vɛ̀li.

³² È Ɣâla teƃele kpɛ̀tɛ Bêe ɣalai mì bɛ́rɛi mu mi Sameria gɛ́ vɛ̀li naa.

³³ Eɣa è wúru kôya kpɛ̀tɛ máŋ ŋ̀âla-pɔkɔɔŋ Asira láai mɛni ma, é mɛni támaa kɛ̀ a gɛ́ɛ é Yâwɛɛ, Eezuɛ Ŋɔɣâlai líi ŋwána a zu kɛ́tɛ é tɛ́ɛ gâloŋ-ŋai kélee dîa wɔ́lɔ kɛ̀ dúɛi.

³⁴ Bɛtɛ-nuui Iî è Zɛleko tɔ̀ɔ pôlu Eɣa ŋɔtãi ma. Gɛ́ɛ daai pîlanii kɔɔ̂nii la a m̀aa-ŋuŋ, ǹóŋ-surɔŋ maa-ŋuŋ Abiraŋ è sàa. Gɛ́ɛ kɛ̀ daai ŋɔsiɣãŋ lá kpoŋ pîlanii kɔɔ̂nii lai, ǹóŋ-surɔŋ gbɛɛ-ŋai Sigu è sàa yɛ̂ɛ berei Yâwɛɛ è wɔ́lɔ mò la Nuŋ ǹóŋ Zasua sârai.