Tɔɔɓɛlaa dɔlɔɔ 10 - Bible

Seba nɛni-kaloŋ è Saloma naa kàa

¹ Saloma maa tuŋ è tàa-taa. Seba nɛni-kaloŋ è m̀ɛni da berei è ǹáa mɛ̀ni la é pîlaŋ Yâwɛɛ mai. Nya ƃe è pà a gɛ́ɛ é zu-kɔɔŋ a mare-kɛ̂ɛ kpanaŋ-ŋa.

² È pà Zerusâlɛŋ a núu-kpulu kɛ́tɛ. Zoo-faleŋ-ŋai díkɛ liî a leɣi maa pɔri sãa, gôo támaa da kɔni sɔ̃ɔ kpanaŋɔɔ-ŋa. È pà Saloma pɔ́ da ǹyaa dí lóno é pîlaŋ mɛni-ŋai dîa kɛ̀ gíli ŋá gɛ́ pâi.

³ Saloma è ŋɔmare kɛ̂ɛ-ŋai kélee su kùla. Mɛni da kélee fé kɛ́ ní naa nyíi kɛ̀ a gbanaŋɔɔ a gɛ́ɛ Gâloŋ Saloma fa pɔri kɛ̀ é zu-kulâi.

⁴ Seba nɛni-kaloŋ è Gâloŋ Saloma ŋɔtárei kélee kàa da ŋɔkâloŋ pɛrɛ kɛ́tɛi è dɔ̀ɔi.

⁵ È m̀ii-sã̂ai kàa kɛ̀ ŋɔtêƃelei ŋái, ŋɔnûa láa túɛ-ƃelai dísee-sãai, gâloŋ ŋɔpɛ́rɛi mu-tii kɛ́-ƃelai maa-ɣiri seɣe-ŋai kɛ̀ dîai, ŋɔkpele kɔ̂ɛ tɛɛ-ƃelai, da géreŋ da zâla sãai è gùla a sâla Yâwɛɛ ŋɔɣâla-pɛrɛ kɛ́tɛi mu. M̀ɛnii ŋí è ǹíi nɛ̃ɛ kpɔ́ a ŋ̀ánaa.

⁶ È mò gâloŋ ma ǹyɛɛ, “Duŋ ŋá mɛ̀ni ḿbɔ-taai é pîlaŋ la m̀ɛnii ma ƃa gɛ́i da ítarei mai gáa a tɔ̃yâ.

⁷ Kɛ́lɛ ḿve láa ní a mɛni-ŋai ŋí é lɛ́ɛ la zu ŋa pá ŋa díkaa a ŋ́gbɔɔi ŋɛi-gao. Tɔ̃yâ ma, dífe kpîŋ m̀ɛnii gbûra da ƃó ní ḿâ é pîlaŋ ítárei da tɔɔ-sãai mɛni ma.

⁸ Gbakolo-ŋai íyêei dílii lâai! Ínûa láa túɛ-ƃelai líi lâai a tãi kélee da kɛ̀ ítare woo-ŋai mɛnîi.

⁹ Laa-maa-tɛ é tɛ́ɛ Íɣâlai Yâwɛɛ pɔ́ nyíi ǹíi lâai íyêei. A ísee gâloŋ see-sɛŋ ŋá Eezuɛ, kpɛ́ni fêi, Yâwɛɛ ŋɔwɔ́lɔ-wɔlɔ da wɔ́lɔ-wɔlɔ wɛli-kɛ-maai káa nɔ́ naa Eezuɛ mɛni ma, a í kɛ́ a kâloŋ a gɛ́ɛ í teniŋ-ƃo da tɔ̃yâ laa lɛ́.”

¹⁰ È gôo pãŋ wála lɔ́ɔlu mɛi náaŋ tɛ̀ɛ gâloŋ pɔ́, mii-sãa maa kpɛtɛ-sãa sîi támaa da kɔni sɔ̃ɔ kpanaŋɔɔ-ŋa. É kúla mii-sãa maa kpɛtɛ-sãa sii támaai ŋí pôlu, Seba nɛni-kaloŋ è pà a dia a zu kɛ́tɛi, Gâloŋ Saloma fé ŋɔ́nɔ wɔ́lɔ mii-sãa maa kpɛtɛ-sãa da sɔlɔ ƃó ní a gɛ́ɛ tí.

¹¹ Iraŋ ŋɔtîma-ŋai dí kùla a gôo Ofi, dí pà a Amɔ̂ŋ wuru-kpono támaa da kɔni sɔ̃ɔ kpanaŋɔɔ-ŋa.

¹² Gâloŋ è Amɔ̂ŋ wuru-kpono-ŋai kɛ̀ a Yâwɛɛ ŋɔɣâla-pɛrɛ kɛ́tɛi yée-mu wuru-ŋai da gâloŋ-pɛrɛ kɛ́tɛi yée mu wuru-ŋa. Dí da kɛ̀ a kɔnîŋ-ŋa da maa sîi da kpɛ́ni-ŋa bêle kɛ́-ƃelai mɛni ma.

¹³ Gâloŋ Saloma è zɛŋ kélee tɛ̀ɛ Seba nɛni-kaloŋ pɔ́ è kɛ̀ ŋ̀wɛ̂lii da nyíi è mare kɛ̂ɛ kɛ̀ m̀ai, é kúla nyii-ŋai kélee pôlu è dɛ̀ɛ bɔ́ é kúla ŋɔtɔɔ-sãai sui. Nya ƃe è lène pôlu bɔ́-taai a ŋɔnûa kpɔŋ è pà a diai.

Gâloŋ Saloma ŋɔtɔɔ-sãai

¹⁴ Gôoi Gâloŋ Saloma a kâa zɔlɔ ƃô kóraŋ tɔnɔ yée mui, è kɛ̀ a pãŋ wála buu lɔ́ɔlu (50,000)

¹⁵ é kúla ŋuŋ fela-fei pôlu a kâa zɔlɔ ƃô bɔni-tɔɔ-ƃelai yêei, Arebia kaloŋ-ŋai kélee da ŋɔlɔii kpiniŋ-ŋai mɛi-ƃelai.

¹⁶ Gâloŋ Saloma è kɔ́ kɔ́-ƃela maa kɔ̃ɔ sãa kpaya-kpaya ŋuŋ feerɛ kpɛ̀tɛ é gôo pú dîa. Gôo ŋɔpãŋ puu káo lɔ́ɔlu ƃé è bù dɔnɔ ma.

¹⁷ È kɔ́ kɔ́-ƃela maa kɔ̃ɔ sãa pɛlɛ-pɛlɛɛ ŋuŋ saaƃa kpɛ̀tɛ máŋ é gôo pú dîa. È gôo ŋɔpãŋ náaŋ pú dɔnɔ ma. È dípù gâloŋ pɛrɛ kɛ́tɛi mu ƃɛ́i ma da dòli a Lɛƃanɔŋ wolai.

¹⁸ Nya ƃe gâloŋ è kâloŋ see-sɛŋ kɛ́tɛ kpɛ̀tɛ, zu pere kɛ́ ƃò a séle nyiŋ, bôlu pere kɛ́ ƃò a gôo lɛ́lɛɛ.

¹⁹ Núu kɔ́ɔ ƃɔ̂rɔnii lɔ́ɔlu mɛi da è kɛ̀ gâloŋ see-sɛŋ ma gɛ́ tɛ̀, bôlu pere kɛ́ ƃò kɛ́rɛ-kɛrɛ. Núu yée lâai è kɛ̀ zee-sɛŋ m̀éla feerɛ ma, yala-sûlu pɔkɔɔŋ tɛi-tɛi kɛ́ ƃò tɔɔ̂-ni m̀éla veerɛ kɔlɛ ma.

²⁰ Yala-sulu pɔkɔɔŋ puu káo feerɛ è kɛ̀ ǹúu kɔ́ɔ ƃɔ́rɔŋ-sɛŋ tɛi-tɛi tée ŋá m̀éla veerɛ ma. Dífe ta ŋɔ́nɔ wɔ́lɔ kâloŋ sɛŋ-sɛŋ kɛ́ɛ tí da kpɛtɛ ní kâloŋ-laa da kpɛ́ni mɛni ma kwaa da ma.

²¹ Gâloŋ Saloma ŋɔkpele sɛŋ-folo-ŋai kélee dí kɛ̀ a gôo. Zɛŋ-folo-ŋai kélee kɛ̀ gâloŋ pɛrɛ kɛ́tɛi sâmai ƃɛ́i da kâa naa tòli a Lɛƃanɔŋ wolai dí kɛ̀ a gôo lɛ́lɛɛ. Dífe sɛŋ da kpɛ̀tɛ ní a sɛŋ káo kole, kpɛ́ni fêi, sɛŋ káo kole ma mɛni fé kɛ́ ní a gbanaŋɔɔ Saloma ŋɔtãi ma.

²² Yá tîma-ŋa díkɛ̀ Saloma yêei pɔni-tɔɔ mɛni ma dí kɛ́ sìa da Iraŋ ŋɔtîma-ŋái yúo ŋá. Ŋɔyá ŋá keleŋ-ŋai da kâa pà pôlu kóraŋ saaƃa tɛɛ pôlu ma a gôo, sɛŋ kâo kole, séle-nyiŋ, woro-ŋa da kwala-ŋa.

²³ Gâloŋ Saloma è kɛ̀ a dáreɛɛ a ŋ̀ánaa é tɛ́ɛ gâloŋ-ŋai kélee dîa. È kɛ̀ a dɔɔ́ a zu kɛ́tɛ é tɛ́ɛ kâloŋ da kpɛ́ni kélee ma ŋ̀éniɛi su.

²⁴ Ŋ̀éniɛi su-ƃelai kélee da kâa kɛ̀ ŋ̀wɛ̂lii dí pá a gɛ́ɛ dí díwoli tɔ́ɔ mà dárei mɛni ma Ɣâla è dɛ̀ɛ bɔ́ a zu kɛ́tɛi.

²⁵ Diai kélee da kâa pà naa kâai a kóraŋ kéleei, da kâa pà a sáma-sãa yɛ̂ɛ sɛŋ káo kole da gôo, kâloŋ yokpo lɛ́lɛɛ sɔ̃ɔ kpanaŋɔɔ-ŋa, kɔ́ kɔ́-sãa, mii-sãa kúŋ lɛ́lɛ sãa, soo-ŋa da mûu-ŋa.

²⁶ Kɔ́ kɔ́-keleŋ-ŋa da soo-ŋa dí kɛ̀ Saloma yêei. Kɔ́ kɔ́-keleŋ wála tɔnɔ pôlu ŋuŋ náaŋ da soo wála puu káo feerɛ da kâa kɛ̀ ǹyêei gɔ́-keleŋ taa-lêei su da Zerusâlɛŋ.

²⁷ Gâloŋ Saloma è sɛŋ káo kole mɛni kɛ̀ Zerusâlɛŋ a fii-kpɛɛ mɛni yɛ̂ɛ kɔni káo. Sîda maa mɛni è kɛ̀ nɔ́ yɛ̂ɛ Sakɛmo wuru-ŋa. Dí kɛ̀ ǹyée-ŋai su gwaa kélee.

²⁸ Saloma a kâa ŋɔsoo-ŋai kùla Ize lɔii su da Kue. Gâloŋ ŋɔpɔni tɔɔ-ƃelai ƃé da kâa dí yà Kue.

²⁹ Da kâa lì Ize lɔii su dí kɔ́ kɔ́-keleŋ tɔnɔ yá a sɛŋ káo kole kpua-kpua ŋuŋ lɔ́ɔlu mɛi da. Soo tɔnɔ è kɛ̀ a sɛŋ kâo kole kpua-kpua ŋuŋ tɔnɔ pôlu buu lɔ́ɔlu. Da kâa lì máŋ a dia dí díkɔlɛ Ita-ŋai da Araŋ-ŋai dí kâloŋ-ŋai kélee dîa.