Korɛntə dɔlɔɔ 7 - Bible

M̀ɛni-ŋai bîlaŋɔɔi tûa-laa mai

¹ M̀ɛni-ŋai ka bɔ̃̀yɛ ḿbɔ naai, ŋa pá nâa lônoi e pîlaŋ dîa. Ǹɛ́lɛɛ̂i a gɛ́ɛ surɔ̂ŋ fe lɛɣɛ nɛnî ma.

² Kɛ́lɛ, kpɛ́ni fêi, su-kɔɔŋ a pâ núu pɔ wulu-wulu kɛ́ mɛni mai, m̀aa nɛɛ̂i surɔ̂ŋ tɛi-tɛi kélee e gbîŋ-nɛni kula, nɛnî tɛi-tɛi kélee e gbîŋ-surɔŋ kula.

³ Fɛ̂ɛ nɔ́ ǹyaŋ zurɔ̂ŋ e ŋɔnɛnîi líi láa, nɛnîi ǹyaŋ e ŋɔsurɔ̂ŋ líi láa.

⁴ Kpɛ́ni fêi, nɛnîi ŋɔwála-wâlai fe gbîŋ-kponoi mɛi, kɛ́lɛ, ŋɔsurɔ̂ŋ ŋɔwála-walai káa mɛi. Bere nɔ́ ƃe ŋɔsurɔ̂ŋ ǹyaŋ ŋɔwála-wâlai fe la gbîŋ kponoi mɛi, kɛ́lɛ, ŋɔnɛnîi ƃe ŋɔwála-walai káa mɛi.

⁵ Ka kánɛni-ŋai ká kɛ́ tí kákîe-ni dîa kápɛrɛ-ŋai mu. Fɛ̂ɛ nɔ́ tãi da, à kɛ̀ a kákpɛtɛ-woo a gɛ́ɛ tãi kpua é lɔ́ káloai, ka kɛ́ Ɣâla-fɛliɛ su a maa-tãi ti; kɛ́lɛ, tãi kpuai ti à tɛ̀ɛ, ka pá ŋɔnɔ pôlu kákîe ma, à wàla kɛ́ ti gɛ̀ ní lii-kpele fe pâi kɛ̂i káyêei, gɛ̀ ní Sêtɔŋ a pâi kasu kɔ́ɔ̂ni ka wulu-wulu kɛ́.

⁶ Ŋa nyíŋi ƃôi nɔ́ ŋákili-ŋa-siai su, kɛ́lɛ, ve a tɔ̂ŋ ŋa dɛɛ kápɔ.

⁷ Kài kɛ̀ yɛ̂ɛ ńyãa. Kɛ́lɛ, núu kélee a sama-sɛŋ-sii tɛi-tɛi sɔlɔ ƃô Ɣâla yêei, núu da ŋɔɔ káa a da kpɛni m̀arâŋ-nuu ŋɔɔ kɛ́ ƃo a da kpɛni.

⁸ À kɛ̀ a goyaŋ-nɛyaai da bɔɔ-nɛyaai ŋa mò a gɛ́ɛ ǹɛ́lɛɛ̂i dí lɛ́ɛ nɔ́ ti yɛ̂ɛ berei ŋ́gaa lai.

⁹ Kɛ́lɛ, à kɛ̀ lii-kpele fe díyêei, fɛ̂ɛ nɔ́ dí surɔ̂ŋ kula da nɛnî. Kpɛ́ni fêi, ǹɛ́lɛɛ̂i a gɛ́ɛ surɔ̂ŋ e nɛnî kula, kpaa máŋ nɛnî e surɔ̂ŋ kula, e tɛ́ɛ la nɛnî kélee wɛli kɛ́ɛ ma surɔ̂ŋ ma, kpaa máŋ surɔ̂ŋ kélee wɛli kɛ́ɛ ma nɛnî ma.

¹⁰ Diai dífe a goyaŋ, ŋa m̀ôi dîa, ǹyaa fei, kɛ́lɛ, Kúnuu-namui ƃe m̀ôi a gɛ́ɛ nɛnî fe ŋɔsurɔ̂ŋ lɛ̀ɛ.

¹¹ Kɛ́lɛ à kɛ̀ nɛnî à ŋɔsurɔ̂ŋ lɛ̀ɛ, ǹɛ́lɛɛ̂i nɔ́ é lɛ́ɛ a gòyaŋ, à wàla kɛ́ tí é pá pôlu da ŋɔsurɔ̂ŋ dí díloai kpɛtɛ. Ŋa m̀ôi ŋɔ́nɔ a gɛ́ɛ surɔ̂ŋ fé ŋɔnɛnîi lɛ̂ɛ.

¹² Ŋa m̀ôi ǹúu kpeli-ŋai dîa, Kúnuu-namui fei, a gɛ́ɛ à kɛ̀ nɛnî káa kúƃarâai da yêei nyíi ve a laa-la-nuui, ǹyaŋ a ŋ̀wɛ̂lii da ǹyaa dí tûa, ve ǹɛɛ.

¹³ A kɛ̀ surɔ̂ŋ à kɛ̀ nɛnî yêei nyíi ve a laa-la-nuui, ǹyaŋ a ŋ̀wɛ̂lii da nɛnîi dí tua, nɛnîi fe ǹɛɛ.

¹⁴ Kpɛ́ni fêi, zurɔ̂ŋ nyíi laa-la fe ǹyêei a maa-waa-laa sɔlɔ ƃô nɛnîi sârai, nɛnîi ǹyaŋ nyíi laa-la fe ǹyêei a maa-waa-laa sɔlɔ ƃô ŋɔsurɔ̂ŋ sârai. À wàla kɛ́ ti, kánîa-pɛlɛɛi maa fe pâi waâi, kɛ́lɛ, yɛ̂ɛ berei gáa lai, dímaa waâi.

¹⁵ Kɛ́lɛ, à kɛ̀ ǹúui nyíi laa-la fe ǹyêei e gbɛtɛ gíli ŋá a gɛ́ɛ dí táa, tɔɔ dí táa; bere-sii ti su, kúƃarâŋ-nuui ti, e kɛ́ ni a nɛnî kpaa surɔ̂ŋ, zɔŋ fe zu. Kpɛ́ni fêi, Ɣâla a kútoli lii-sêe ma.

¹⁶ Nɛnî, í gɔ́lɔŋ leŋ a gɛ́ɛ ya pâi ísurɔ̂ŋ ƃálôi? Surɔ̂ŋ, í gɔ́lɔŋ leŋ a gɛ́ɛ ya pâi ínɛnîi ƃálôi?

Ka tûa yɛ̂ɛ berei Ɣâla è ká tòli lai

¹⁷ Kɛ́lɛ, tɔɔ nɔ́ núu kélee e vulu-laai kɛ́ Kúnuu-namui e dɛ̀ɛ bɔi, vulu-laai nyíi Ɣâla e dòli mai. Ŋátɔ̂ŋ ká ŋí Kôrai-toli-kpɔŋ kélee su.

¹⁸ Diai kélee Ɣâla e dítòlii, da-ni dí kɛ̀ a díkpɛtɛɛ? À kɛ̀ ti, gɛ̀ ní, tɔɔ maa-nuui ti fe ŋɔkpɛtɛ-maki kula mà. Diai kélee Ɣâla e dítòlii, da-ni dífe kɛ́ ni a díkpɛtɛɛ? À kɛ̀ ti, gɛ̀ ní maa-nuui ti fe kpɛtɛ-mɛni wɛ́li kɛ̀.

¹⁹ Kpɛ́ni fêi, núu kɛ́ɛ a gbɛ́tɛɛ, kpaa máŋ, núu kɛ́ɛ ve kpɛtɛ ni, ve a mɛni da, kɛ́lɛ, fɛ̂ɛ Ɣâla ŋɔtɔ̂ŋ-ŋai mɛi káa.

²⁰ Fɛ̂ɛ núu kélee é lɛ́ɛ nɔ́ a berei è kɛ̀ la Ɣâla é dólii.

²¹ Í kɛ̀ a luɛ dílɛɛ pâi ítolîi? Ílii fe sɛ̀lɛŋ. Kɛ́lɛ, à kɛ̀ pere káa íyeêi a gɛ́ɛ íŋuŋ ma-ƃoi sɔlɔ ƃó, gɛ̀ ní, kɔ a maa-perei ti.

²² Kpɛ́ni fêi, ǹúui dí dòli Kúnuu-namui kponôi yɛ̂ɛ luɛi, gáa a Kúnuu-namui ŋɔŋuŋ-ma-ƃo. Bere nɔ́ ƃe è kɛ̀ la a ǹúui kɛ̀ a ŋuŋ ma ƃóɔ tãi dí dòli lai, gáa a Kôrai ŋɔluɛ.

²³ Dí káyà a kásɔ̃ɔ; káfè kɛ̀ a núu-kpune ŋɔluɛ-ŋa.

²⁴ Mɛni ma ŋánûa, berei nɔ́ núu kélee è kɛ̀ la díkɛ dòlii, tɔɔ nɔ́ da Ɣâla dí lɛ́ɛ tí.

M̀are-kɛ̂i é pîlaŋ gòyaŋ-ŋai da bɔɔ-nɛyaai dîa

²⁵ Káai a gòyaŋ-ŋai, mɛni da fe ńa ŋá m̀ó káa é kúla Kúnuu-namui lá, kɛ́lɛ, ŋa ŋ́gbîŋ-tarei lɛ̂i káa yɛ̂ɛ ǹúui zã́âi Kúnuu-namui ŋɔmaloŋ-kaai sui.

²⁶ Ŋa gɔ́lɔŋ berei tãi ŋí su mɛni-kpɔ̂lu-ŋai díkaa lai, m̀aa nɛɛ̂i núu kélee e lɛ́ɛ nɔ́ yɛ̂ɛ berei gáa lai.

²⁷ Nɛnî káa íyeêi? À kɛ̀ ti, gɛ̀ ní káfè kùla kákîe ma. Nɛnî fe íyeêi? À kɛ̀ ti, gɛ̀ ní ífe nɛnî kùla.

²⁸ Kɛ́lɛ, à kɛ̀ yà nɛnî kùla, ífe sɔnyɔ̂ŋ kɛ́ ni. À kɛ̀ ǹyaŋ nɛnî à surɔ̂ŋ kùla, ve sɔnyɔ̂ŋ kɛ́ ni. E máŋ kɛ́ ti, diai díkîe-ni kulâi, da pâi kɛ̂i ŋ̀éniɛi ŋí su mɛni-kpɔ̂lui su, ǹyaŋ fe ŋ̀wɛ̂lii ka kɛ́ zu.

²⁹ Zu-kulai ƃa, ŋánûa, tãi dí nɛ̀i, zu a nâa kpua; é síɣe tãi ŋí ma e li tuɛ-pere, diai nɛnî káa díyêei, tɔɔ dí díɣeniɛi kɛ́ yɛ̂ɛ nya ƃe nɛnî fe díyêei,

³⁰ diai wɔlɔ̂i, tɔɔ dí kɛ́ yɛ̂ɛ diai dífe wɔ́lɔ̂i, diai lii-nɛ̃ɛ kulâi, dí kɛ́ yɛ̂ɛ diai dífe lii-nɛ̃ɛ kulâi, diai sãâ yâi, dí kɛ́ yɛ̂ɛ diai sãâ fe díyêei,

³¹ diai tíi kɛ̂i a ŋ̀éniɛi su-sãai kéleei, tɔɔ dí kɛ́ yɛ̂ɛ diai dífe tíi kɛ̂i a ŋ̀éniɛi su-sãai. Kpɛ́ni fêi, ŋ̀éniɛi ŋí kpɛtɛ-perei káa tɛɛ̂i.

³² Ŋa ŋ̀wɛ̂lii lii-sɛlɛŋ kélee fe kɛ́ kâa. Goyaŋ-surɔŋ kpáaŋɔɔ̂i Kúnuu-namui ŋɔmɛni-ŋai kélee ma, berei a pɔ̂ri Kúnuu-namui líi lâai lai;

³³ kɛ́lɛ, surɔ̂ŋ nɛnî káa ǹyêei, gbáaŋɔɔ̂i a ŋ̀éniɛi su-sãai, berei a pɔ̂ri ŋɔnɛnîi líi lâai lai,

³⁴ ŋɔkili-kɛ-maai ŋá kɔlɛɛ̂i. Goyaŋ-nɛni, kpaa máŋ nɛnî-kpela kpáaŋɔɔ̂i a Kúnuu-namui ŋɔmɛni-ŋai, berei a pɔ̂ri kɛ̂i la a maa-waa-nuu gbonôi da ŋɔmɔ̂leŋ; kɛ́lɛ, nɛnîi nyíi surɔ̂ŋ káa ǹyêei, gbáaŋɔɔ̂i a ŋ̀éniɛi su-sãai, berei a pɔ̂ri ŋɔsurɔ̂ŋ líi lâai lai.

³⁵ Ŋa nyíŋi ƃôi nɔ́ kákpɔŋ-maa mɛni ma. Fe môi a gɛ́ɛ ŋá mɛni-kpanaŋ láa káyêei. Kɛ́lɛ, mɛnii nyíi zã́âi, nya ƃe ŋa môi kâa, a gɛ́ɛ káfe kákili-kɛ-maai ŋá kɔlɛ Kúnuu-namui ŋɔtíi su.

³⁶ À kɛ̀ surɔ̂ŋ da káa nɛnî wɛli kɛ̂i, ǹyaŋ e gɔ́lɔŋ a gɛ́ɛ dûa-pere fe sãa ni e pîlaŋ nɛnîi ti ma, à kɛ̀ a ŋ̀wɛ̂lii e gula a maa félaa, à kɛ̀ ǹyaŋ gáa a sɛŋ fɛ̂ɛ e gula, tɔɔ e gɛ́ yɛ̂ɛ berei a ŋ̀wɛ̂lii lai. Ve sɔnyɔ̂ŋ kɛ́ ni. Tɔɔ dí díkîe kula.

³⁷ Kɛ́lɛ, à kɛ̀ surɔ̂ŋ da káa nɛnî wɛ́li kɛ̂i, ǹíi kpeleɛ, ve kpaaŋ ni a gɛ́ɛ e nɛnîi ti kúla, ǹyaŋ à gbɛ̀tɛ gíli ŋá a gɛ́ɛ da ǹyaa dífe díkîe kula, gɛ̀ ní a mɛni lɛ́lɛɛ kɛ̀.

³⁸ Mɛni ma ǹúui à nɛnî wɛ́li kɛ̀ e gula a nɛnîi, a mɛni lɛ́lɛɛ kɛ́. Ǹúui nyíi a nɛnî wɛ́li kɛ̀ va gulâi, a mɛni lɛ́lɛɛ kɛ́ é tɛ́ɛ m̀arâŋ-nuui ma.

³⁹ Nɛnî káa nɔ́ ŋɔsurɔ̂ŋ mɛni ma tãi nɔ́ gáa la ɣele mai. À kɛ̀ ŋɔsurɔ̂ŋ à sàa, gɛ̀ ní ŋuŋ ma ƃóɔi a gɛ́ɛ surɔ̂ŋ nyíi kélee a ŋ̀wɛ̂lii e gula, à kɛ̀ nɔ́ maa-surɔŋ káa a Kôrai-nuu.

⁴⁰ Kɛ́lɛ, ŋákili-ŋa-siai su, à kɛ̀ à lɛ̀ɛ a pɔɔ-nɛnî lii-laa a pâi kɛ̂i ǹyêei. Ǹyaŋ ŋa gɔ́lɔŋ a gɛ́ɛ Ɣâla Ŋɔmɔ̂leŋ káa ŋ́gbonôi.