Korɛntə dɔlɔɔ 5 - Bible

Wulu-wulu-kɛɛ maa-mɛni ŋa teɛɛ

¹ Tɔ̃yâ ma ku mɛni a gɛ́ɛ wulu-wulu kɛ́ɛ káa kásama, ŋwulu-wului nyíi ve Ɣâla kpolowa-ŋa sama máŋ; kpɛ́ni fêi, núu tɔnɔ káa kásama ǹâŋ ŋɔnɛnii káa ǹyêei.

² Ǹyaŋ káyoŋkaâi! Vei pɔ̂ri kɛ̂i a sɛŋ ka wɔ́lɔ? Tɔɔ ǹúui a mɛnii ŋí kɛ́i, e kula kásama.

^3-4 Kpɛ́ni fêi, berei máŋ ŋ́gbono fe la kásamâi, ŋámɔ̂leŋ káa kásama. Ǹúui mɛnii ŋí kɛ̀i, ŋa ŋɔmɛnii ŋa tée Kúnuu-namui Zîsɛ láai su yɛ̂ɛ ŋà kɛ̀ kásama a tɔ̃yâ. Ka káŋa tɛ̀ gîe ma, ŋámɔ̂leŋ káa kásama da Kúnuu-namui Zîsɛ ŋɔwála-walai.

⁵ Ka nalôŋ ŋí tɛ́ɛ Sêtɔŋ pɔ a gɛ́ɛ gbîŋ-tua-pere-nyɔŋ su e kara, a gɛ́ɛ ƃálo-laa é kɛ́ ŋɔmɔ̂leŋ yêei a Kúnuu-namui Zîsɛ ŋɔɣelei.

⁶ Káyoŋka-teɛɛi fe lɛlɛ ni. Káfe gɔ́lɔŋ a gɛ́ɛ kpólo-tɛ-sɛŋ kuro-te a gbólo kânei kélee tɛ̀?

⁷ Ka gbólo-tɛ-sɛŋ pɔlɔi kúla naa a gɛ́ɛ ká kɛ́ a kpólo-kane nina, kpɛ́ni fêi, kákaa a tɛ́-sɛŋ fé-kpolo a tɔ̃yâ. Kpɛ́ni fêi, Kôrai nyíi gáa a kútɛɛ-mɛi-ƃála-loŋ, da wɔlɔ gula a sâla.

⁸ Mɛni ma kwaa ku gúui kɛ́ kúfe gɛ a gbólo-tɛ-sɛŋ pɔlɔi nyíi gáa a mɛni nyɔ́mɔɔ da lii-ŋwana, kɛ́lɛ, ku gɛ́ a dɛ-sɛŋ-fe-zu-kpoloi nyíi gáa a tenîŋ-ƃo-laa da tɔ̃yâ-laai.

⁹ Ŋá bɔ̃̀yɛ kápɔ naa ŋákɔlɔi su a gɛ́ɛ ka wulu-wulu kɛ-ƃela káfè kɛ̀ kákîe-ni pôlu;

¹⁰ zu-kulai fa a gɛ́ɛ ka ŋ̀éniɛi ŋí su-wulu-wulu kɛ-ƃelai káfe mɛni da kélee kɛ̀ gîe-ni dîa, kpaa máŋ sɛŋ-wɛli-ƃela, kpaa máŋ ŋúma-ƃela, kpaa máŋ ɣâla-pɔɔkɔŋ fɛli-ƃela. À kɛ̀ kà ǹûai ŋí ka wàla mɛni da kélee kɛ́ gîe ma, gɛ̀ ní fɛ̂ɛ nɔ́ ká kúla ǹɔii ma.

¹¹ Kɛ́lɛ, ŋá kɔlɔ pɔ̃yɛ kápɔ naa a gɛ́ɛ ka nûa káfè kɛ̀ kákîe-ni pôlu nyíi-ŋai láa káa dîa a gɛ́ɛ díkaa a káƃarâa, kɛ́lɛ, díkɛ wulu-wulu kɛ̀, sɛŋ-wɛli kɛ́ ƃo dîa, ɣâla-pɔɔkɔŋ fɛli-ƃela, ǹûai da lono núu mai, lɔɔ-kpele-ƃela, kpaa máŋ ŋúma-ƃela-ka maa-ƃelai káfe kálaa mii máŋ gîe ma.

¹² Kpɛ́ni fêi, le ƃe ŋa pɔ̂ri gɛ̂i e pîlaŋ la diai dífe Kôrai-toli-kpɔŋ sui dímɛni-ŋa-teɛɛ ma? Diai díkaa Kôrai-toli-kpɔŋ sui dia fe káfa pɔ̂ri dímɛnii ŋá teêi?

¹³ Diai dífe Kôrai-toli-kpɔŋ sui, Ɣâla ƃa dímɛnii ŋá tèe. Ka ŋ̀wana-lɔ̂ɔ-nuui kúla kásama.