Korɛntə dɔlɔɔ 1 - Bible

La-ti-maa

¹ Ńyãa Pɔ̂ɔ, Ɣâla è ńdòli kwa ḿarâŋ nuui Soteni a ŋɔnîa mɛnii a gɛ́ɛ ŋá kɛ́ a Zîsɛ Kôrai ŋɔsia-nuu da kúƃarâŋ Soteni,

² Ɣâla-toli-kpɔŋ gáa Kɔleŋ da diai dímaa waai Zîsɛ Kôrai kponôi, e pɛlɛ diai kélee dîa díkaa kwaa kélee mai Ɣâla e dítòli a Ɣâla-ƃela gîe ma dí Kúnuu-namui Zîsɛ Kôrai láa tóli nyíi gáa a kwa dîa-ni Kúnuu-namui:

³ Ƃɛlɛ-sêe da lii-sêe dí kɛ́ káyêei e kula Kúnâŋ Ɣâla yêei da Kúnuu-namui Zîsɛ Kôrai.

M̀ɛlɛ-sêei maa sɛɣɛi-fei

⁴ Ŋa Ŋáɣâlai sɛɣɛ̂i fè kámɛni ma a tãi kélee m̀ɛlɛ-seei mɛni ma nyíi Ɣâla e dɛ̀ɛ kápɔ Zîsɛ Kôrai kponôi,

⁵ kpɛ́ni fêi, ká kɛ̀ a tɔɔ-ƃela pere-sii kélee su gbonôi lóno-woo kélee su da táre kélee,

⁶ yɛ̂ɛ berei máŋ Kôrai m̀aa sêre-faai e lɔ̀ la kpɔ́ kákponôi

⁷ a gɛ́ɛ M̀ɔlêŋ ŋɔsama-sɛŋ da kélee fe kpɛ̀ɛ káyêei, tãi kákaa Kúnuu-namui Zîsɛ Kôrai maa-kpɛnii la a gɛ́ɛ e gbîŋ lɛ kâa;

⁸ nyíi pâi kásonîi e lɛ́ɛ la zu gbɛɛ ŋái e pa a gɛ́ɛ ka sɔŋ fe lɛ́ɛ kâa Kúnuu-namui Zîsɛ Kôrai ŋɔɣelei mai.

⁹ Ɣâla sã́âi, nyíi kátòli Ǹóŋ Zîsɛ Kôrai Kúnuu-namui ŋɔkɛ-naai sui.

Kôrai ŋá kɔlɛɛ̂i?

¹⁰ Ŋánûa, ŋa kákpera fêi Kúnuu-namui Zîsɛ Kôrai láai su a gɛ́ɛ kákelee ka fáa a gɛ́ɛ káfè kɛ̀ a káŋa kɔlɛɛ, kɛ́lɛ, ka kɛ́ zu tɔnɔɔ gili-ŋa-sia tɔnɔi su da mɛni-ŋa-teɛɛ tɔnɔi.

¹¹ Kpɛ́ni fêi, ŋánûa, Kulowe-ƃela dí mo ḿâ a gɛ́ɛ laa-saa káa káloai.

¹² Mɛnii ŋa môi, zu-kulai ƃa kátà-ni ka mò kâa, “Ŋ́gaa a Pɔ̂ɔ pɔɔ,” da-ni dîyɛɛ, “Ŋ́gaa a Apolo pɔɔ,” da-ni dîyɛɛ, “Ŋ́gaa a Sîfa pɔɔ,” da-ni dîyɛɛ, “Ŋ́gaa a Kôrai pɔɔ.”

¹³ Kôrai ŋá kɔlɛɛ̂i? Dí Pɔ̂ɔ kpàmo wúru su-tíyeŋɔɔ ma kámɛni ma? Kpaa máŋ dí kábatâi kɛ̀ Pɔ̂ɔ láai su?

¹⁴ Ŋa Ɣâla sɛɣɛ̂i fe a gɛ́ɛ fe kátɔnɔ kpîŋ batâi kɛ́ ni é kúla Kulepɔ pôlu da Geeyɔ;

¹⁵ a gɛ́ɛ núu da fe mo a gɛ́ɛ dí kábatâi kɛ̀ ńaâi su. (

¹⁶ Ŋá Tɛfɛnɛ ŋɔpɛ́rɛi mu-ƃelai kélee batâi kɛ̀ máŋ. E kula nyíŋi pôlu, fe gɔ́lɔŋ à kɛ̀ ŋa núu da kpɛni batâi kɛ̀ ŋɔ́nɔ.)

¹⁷ Kpɛ́ni fêi, Kôrai fe ńdɛ̀ɛ ni a gɛ́ɛ ŋa batâi kɛ́, kɛ́lɛ, e ńdɛ̀ɛ a gɛ́ɛ ŋa Duŋ Lɛ́lɛɛi ƃo. Fe wóo kpaya-kpaya ƃo ni a gɛ́ɛ Kôrai ŋɔsaa-wurii su-wála-wala é kpéra.

Kôrai káa a Ɣâla ŋɔwála-wâlai da ŋɔtárei

¹⁸ Zaa-wurii maa-wooi káa nɔ́ a ƃoo-woo diai ŋɛ́i díkaa saâi, kɛ́lɛ, kúai kúƃaloɔ̂i, gáa kúŋɛi a Ɣâla ŋɔwála-walai.

¹⁹ Kpɛ́ni fêi, bɔ̃yɛɛ̂i, “Ŋa pâi dare-ƃelai dítarei su karaâi, ŋa ŋôya-ƃelai dítarei kpera.”

²⁰ Dare-nuui kɔɔ? Gɔlɔ-pɔ̃yɛ-nuui kɔɔ? Ŋ̀éniɛi ŋí su yeli-tɔɔ-nuui kɔɔ? Diai da díkpîŋ kula a tare-ƃela ǹɔii ŋí sui, Ɣâla fe gɛ̀ ní dí kɛ́ a ƃoo-ƃela?

²¹ Kpɛ́ni fêi, berei Ɣâla ŋɔtárei káa lai, ŋ̀éniɛi su-ƃelai dífe Ɣâla kɔlɔŋ ni táre sui, Ɣâla líi lâai a gɛ́ɛ diai laa-la káa díyêei, a díƃalo kúƃoo-Ɣâla-wooi sârai.

²² Kpɛ́ni fêi, Zûu-ŋai da ŋɛi-kɛ-maa kɔ̂ri, Gurii-ŋai díkɛ táre kɔri,

²³ kɛ́lɛ, kwa Kôrai ŋɔkpamo-mɛnii ƃo nyíi gáa a Zûu-ŋai perêi-kpáaŋ-sɛŋ, e ƃò a ƃoo-mɛni Zɛ̃tai-ŋai ŋɛi.

²⁴ Kɛ́lɛ, Zûu-ŋai da Gurii-ŋai nyíi-ŋai Ɣâla e dítòlii, Kôrai káa díŋɛi a Ɣâla ŋɔwála-walai da ŋɔtárei.

²⁵ Kpɛ́ni fêi, Ɣâla ŋɔƃoo-mɛnii káa a tare-mɛni é tɛ́ɛ núu-kpune ŋɔtárei ma, ŋɔmɛni fii-kpɛɛi kɛ́ ƃò a mɛni-kpanaŋ é tɛ́ɛ núu-kpune ŋɔmɛni-kpanaŋ ma.

²⁶ Ŋánûa, ka kákili ŋá sia berei ma Ɣâla e kátòli lai; kátama-ɣele káfe táre ni yɛ̂ɛ berei ŋ̀éniɛi ŋí su tua-perei káa lai, kátama-ɣele wála-wala-laa fe ka-yêei, kátama-ɣele káfe a kâloŋ-lonii;

²⁷ kɛ́lɛ, Ɣâla e ƃoo siɣe ŋ̀éniɛi ŋí su a gɛ́ɛ e tare-ƃela ŋumɛ la, e fii-kpɛɛ siɣe ŋ̀éniɛi ŋí su e wála-wala-ƃela ŋumɛ la,

²⁸ Ɣâla e zɛŋ nyíi siɣe ǹyeŋɔɔ̂i ǹɔii su núu-kpune ŋɛi naɣîŋɔɔi mɛi, zɛŋ nyíi máŋ ve ŋ̀éniɛi ŋí sui, a gɛ́ɛ e zãâi kélee kpɛɛ la díkaa ŋ̀éniɛi sui,

²⁹ a gɛ́ɛ núu-kpune fe yoŋka tee Ɣâla ŋɛi.

³⁰ Nya ƃe kúfulu-laai a kûla ǹyêei Zîsɛ Kôrai kponôi, nyíi ǹyaa Ɣâla e gɛ̀ a ku-tárei, kútɔ̃yâ laa-lai, kúmaa-waa-laai, da kúmaa-tee-laai.

³¹ Mɛni ma, yɛ̂ɛ berei bɔ̃yɛɛ̂i lai, “Ǹúui a yoŋka tèei, tɔɔ e yoŋka tée Kúnuu-namui maa-mɛni ma.”