Kɔlɔnikɔ Maa-ŋuŋ 26 - Bible

Ŋ̀âla-pɛrɛ Kɛ́tɛi mɛi káa-ƃelai

¹ Berei ŋí ƃé Liiva-ŋai kɛ̀ a Ŋ̀âla-pɛrɛ Kɛ́tɛi mɛi káa-ƃelai ŋáa kɔ̀lɛ la dítii-ŋai mɛi tɛi-tɛi. Kora ŋɔsuui su-ƃelai ƃé kɛ̀ a: Kore ǹóŋ Mɛselemiya. Dí kɛ̀ a Asafa ŋɔsuu su-ƃela.

² Mɛselemiya ǹônii-sinaai díkɛ̀ lɔ́ɔlu mɛi feerɛ: Zɛkɛraya, Zediaɛ, Zebadia, Zatiniɛ,

³ Elaŋ, Zeoɣana da Ilieonai. Dílaa pɔ̃yɛɛi yɛ̂ɛ berei dí dímaa sɔlɔ ƃô lai.

⁴ Ɣâla è lûwa làa Obɛɛ Idɔŋ ma lônii-sinaai lɔ́ɔlu mɛi-saaƃa. Dílaa pɔ̃yɛɛ̂i yɛ̂ɛ berei dí dímaa sɔlɔ ƃó lai. Semaiya, Zeozaba, Zoaa, Saka, Nɛtaniɛ,

⁵ Amiɛ, Isaka da Peuletai.

^6-7 Obɛɛ Idɔŋ ǹóŋ-surɔŋ maa-ŋuŋ, Semaiya, ǹônii-sinaai díkɛ̀ lɔ́ɔlu mɛi da Semaiya ǹônii-sinaai ƃé kɛ̀ a: Otini, Lefae, Obɛɛ, Ɛzaba, Ɛliu da Semakaya. Díkɛ̀ a nûa maa mɛni kpanaŋɔɔ díkaa-laai su, kpɛni fêi, díkɛ a tíi kɛ́-ƃela díyɛrɛɛ.

⁸ Kpakolo wála-wala buu lɔ́ɔlu mɛi da káo feerɛ ƃé kɛ̀ Obɛɛ Idɔŋ ŋɔsuui su-ƃelai sáma nyíi-ŋai da pɔri kɛ̀ Ŋ̀âla-pɛrɛ Kɛ́tɛi mɛi kâai.

⁹ Mɛselemiya ǹônii-sinaai da díkaayɔɔ-ŋai nyíi pɔri è kɛ̀ dîɛ dítii-ŋai kɛ́ mɛni mai díkɛ̀ a núu puu káo lɔ́ɔlu mɛi saaƃa.

¹⁰ Melali ŋɔsuui su nuui Osa, ǹônii-sinaai díkɛ̀ náaŋ: Siŋri ƃé kɛ̀ dílaa túɛ berei máŋ vé kɛ́ ní la a ǹóŋ duɛ-tuɛi. Kɛ́lɛ dínâŋ è nɛ̀ a gɛ́ɛ é kɛ́ dílaa túɛ.

¹¹ Siŋri ǹônii-sinaai gbéli-ŋai ƃé kɛ̀ a: Ekia, Tebalia da Zɛkɛraya. Osa ǹônii-sinaai da díkaayɔɔ-ŋai kélee kɛ̀ Ŋ̀âla-pɛrɛ Kɛ́tɛi mɛi tii sui díkɛ̀ a núu puu-káo saaƃa.

¹² Dí Ŋ̀âla-pɛrɛ Kɛ́tɛi mɛi káa-ƃelai ŋáa kɔ̀lɛ yɛ̂ɛ berei dínuu suu-ŋai díkɛ̀ lai. Díkelee díkɛ̀ tíi kɛ̂i Ŋ̀âla-pɛrɛ Kɛ́tɛi mu yɛ̂ɛ berei díƃarâŋ Liiva-ŋai díkɛ̀ tíi kɛ̂i la naai.

¹³ Dí kpɛyɛŋ tòo a gɛ́ɛ dí ziɣãŋ lá-ƃelai ŋáa kɔ́lɛ yɛ̂ɛ beei dínuu suu-ŋai díkɛ lai, núu-suu kɛ́tɛ kpaa máŋ guro-te.

¹⁴ Gbɛyɛŋ nyíi dí dòo ziɣãŋ lá-ƃelai kɛ̀ vóloi kulâi-pere loai, è nɛ̃ɛ Selemaya ma. Ǹaa pôlu ma, dí gbɛyɛŋ tòo ǹóŋ Zɛkɛraya nyíi kɛ̀ a lia-woo ƃó nuu lɛ́lɛɛi mɛni ma. Gbɛyɛŋ ŋí è ǹɛ̃ɛ ma Yá-ŋûa-pere siɣaŋ lá-ƃelai mɛni ma.

¹⁵ Ziɣãŋ lá-ƃelai kɛ̀ Séɣai-perei m̀aa kpɛyɛŋ è ǹɛ̃ɛ Obɛɛ Idɔŋ ma, nyíi kɛ̀ zãai lâai kɛ́-pɛrɛi mɛni mai, é nɛ̃́ɛ Obɛɛ Idɔŋ ǹônii-sinaai dîa.

¹⁶ Gbɛyɛŋ nyii-ŋai dí dítòo Vóloi lîi-pere da Salɛkɛ-siaŋ laƃelei nyíi kɛ berei-ŋua pere mɛni mai, è nɛ̀ɛ Supiŋ da Osa dîa. Dí díŋa kɔ̀lɛ a gɛ́ɛ díkɛ tíi kɛ̀ díkîe-ni pɔ́ɔ-ŋa tɛi-tɛi.

¹⁷ Núu lɔ́ɔlu mɛi-da ƃé da kâa tíi kɛ̀ Vóloi kulâi-pere a ɣele kûu tɔnɔ. Náaŋ kɛ́ ƃò Yá-ŋua-pere. Náaŋ kɛ́ ƃò Séɣai-pere. Veerɛ kɛ́ ƃò zãa-laâi kɛ́-pɛrɛi mɛi a tãi tɛi-tɛi.

¹⁸ Diai kɛ̀ bɛ́rɛi kɔlɛ vóloi liî-perei, díkɛ̀ a núu náaŋ, veerɛ kɛ́ ƃò bɛ́rɛi kɔlɛ kpîŋ-kpiŋ ma.

¹⁹ Berei ŋí ƃé dí Ŋ̀âla-pɛrɛ Kɛ́tɛi mɛi káa-ƃelai ŋáa kɔ̀lɛ la. Ǹûai ŋí díkɛ̀ a Kora nyíi kɛ̀ a Melali ŋɔsuu su-nuui ŋɔsuui su-ƃelai da-ŋa.

Ŋ̀âla-pɛrɛ Kɛ́tɛi mu tii da-ni mɛi-ƃela

²⁰ Díƃarâai kɛ̀ a Liiva-ŋai dí ta-ni díkɛ̀ Ŋ̀âla-pɛrɛ Kɛ́tɛi ŋɔsɛŋ-káoi da ŋɔsãai lâai kɛ́ pɛrɛi mɛi ƃɛ́i da kâa Ɣâla ŋɔsama-sãai lâai kɛ̀ naai.

²¹ Ladaŋ nyíi kɛ̀ a Gɛsɔŋ ǹônii-sinaai dɔnɔi, è kɛ̀ a núu-suu támaa mɛi nuu. È kɛ̀ a ǹóŋ Zeɣiɛ ŋɔnûai láa túɛ-nuu máŋ.

²² Laƃaŋ ǹônii-sinaa feerɛi Zɛtaŋ da Zoɛɛ ƃé kɛ̀ Yâwɛɛ ŋɔsɛŋ-káoi da ŋɔsãai lâai kɛ́-pɛrɛi mɛi.

²³ Dí ŋɔ́nɔ tíi tɛ̀ɛ Amaraŋ ŋɔsuui su-ƃelai Iza, Iburɔŋ da Uziɛ ni pɔ́.

²⁴ Gesɔŋ ŋɔsuui su-nuui dɔnɔ, Mose ǹóŋ Sebuɛ ƃé kɛ̀ a ǹúu kɛ́tɛi zãa lâai kɛ́-pɛrɛi mɛi.

²⁵ Ŋɔkáayɔɔ-ŋai Leɣabia, Zesaya ǹóŋ Zoraŋ, Zikari da Selomi nyii-ŋai kɛ̀ a Gesɔŋ ǹêɣe Ilieza ǹônii-sinaai.

²⁶ Selomi da ŋɔkáayɔ-ŋai ƃé kɛ̀ zãai mɛi Gâloŋ Deeƃé da ǹúu suu-ŋai láa túɛ-ƃelai, ǹúu-kpulu-ŋai láa túɛ-ƃelai da ŋɔkuluƃa-ŋai láa túɛ-ƃelai dí wɔ́lɔ dɛ̀ɛ Ɣâla pɔ́i.

²⁷ Zãai dí gula-yêei kɛ̀ kɔ́ sui dí da-ŋa tɛ̀ɛ Ŋ̀âla-pɛrɛ Kɛ́tɛi lá a gɛ̂ɛ díkɛ tíi kɛ̀ a dia naa.

²⁸ Selomi da ŋɔkáayɔ-ŋai ƃé kɛ̀ zãai kélee láa-tuɛ Ɣâla ŋɔlóno kɛ́-nuui Samia, Gâloŋ Sɔ̂ɔ, Nɛ̀ɛ ǹóŋ Aƃimɛ, Zɛrua ǹóŋ Zoa ni dí dɛ̀ɛi.

Liiva gbéli-ŋai dítii

²⁹ Dí Kenaiya da ŋɔkáayɔɔ-ŋai sìɣe Iza ŋɔsuui su a gɛ́ɛ díkɛ ƃò a m̀ɛni-sâa ƃó-ƃelai láa túɛ-ƃela Eezuɛ loai díkɛ m̀ɛni pɔlɔ kɔlɔ-ŋai lâai kɛ̀.

³⁰ Dí Asibia da ŋɔkáayɔ wála tɔnɔ, ŋ̀uŋ lɔ́ɔlu mɛi feerɛ (1,700) sìɣe Iburɔŋ ŋɔsuui su-ƃelai sáma a gɛ́ɛ díkɛ ŋ̀âla mɛni-ŋai da gɔmɛnɛ-tii kɛ́-mɛni-ŋai láa-tuɛ Eezuɛ-ŋai sáma Zɔdiŋ Ya-leei vólo liî-pere.

³¹ Iburɔŋ-ŋai dísuui láa túɛ-nuui ƃé kɛ̀ a Zeria. Góraŋ buu-náaŋ Deeƃé è gɛ̀ gâloŋ-laai sui, dí ǹûai ŋí dínuu suui kpɛɣɛ̂ŋ ƃô dí gáa a gɛ́ɛ Iburɔŋ-ŋai díkɔ-kuluƃa tɔɔ̂i kpanaŋɔɔ-ŋai seéɛɛ è wɔ́lɔ kɛ̀ Zazɛ Gilia kpiniŋ su.

³² Zeria ŋɔkáayɔ-ŋai kɛ̀ a dínûai láa túɛ-ƃelai díkɛ̀ a núu wála feerɛ, ŋ̀uŋ lɔ́ɔlu mɛi feerɛ (2,700). Gâloŋ Deeƃé è dítɔɔ Lubiŋ, Gâa da Manasɛ ŋɔnuu-suui gbulu dɔnɔ kɛ̀ Zɔdiŋ Ya-leei pôlu perei láa túɛ mɛni-ŋai mɛi bîlaŋɔɔi Ɣâla mɛni ma da ǹyaa gâloŋ maa mɛni.