Kɔlɔnikɔ Maa-ŋuŋ 22 - Bible

¹ Nya ƃe Deeƃé è mò ǹyɛɛi, “Ƃɛ́ ŋí ƃé Yâwɛɛ Ɣâla Ŋɔpɛ́rɛ Kɛ́tɛi a pâi kɛ̂i naa. Ŋ̀âla-teƃelei ŋí ƃé Eezuɛ nuai da pâi kɛ̂i kéreŋ sala kulâi ŋá.”

Dí díkpîŋ kpɛ̀tɛ Ŋ̀âla-pɛrɛ Kɛ́tɛi tɔɔ mɛni ma.

² Ǹaa kɛ́ɛ tí, Deeƃé è worɛ̂ tɛ̀ɛ a gɛ́ɛ ŋɔ̃ya-ŋai kɛ̀ Eezuɛi díkelee díŋa tɛ́ gîe ma a gɛ́ɛ é tíi tɛ́ɛ dípɔ. È da-ni sìɣe zu a gɛ́ɛ dí gɔni-ŋai sáa bɛ́rɛi-kaŋ tɔɔ mɛni ma.

³ È pà a kɔli kpûlu kɛ́tɛ a gɛ́ɛ dí nêre-kao-ŋai kpɛtɛ la gbôŋ da ziɣãŋ lá-ƃerei sãai kpɛtɛ mɛni ma. È ŋɔ́nɔ ƃara támaa tɛ̀ɛ nyíi dífe pɔri ní ŋɔwuyɛ kɔɔ̂nii.

⁴ Taya da Sidɔŋ-ƃela dí pà bɔ́ a sîda wuru-kpono támaa nyíi dífe kɛ̀ pɔri ní ǹônoi.

⁵ Deeƃé è mò ǹyɛɛi, “Ŋ̀âla-pɛrɛi nyíi ǹóŋ Saloma a pâi dɔɔ̂i fɛ̂ɛ é kɛ́ a ǹɛ́lɛɛ kpɔ́ a ŋ̀ánaa nyíi ǹɔii-ŋûŋ-ŋai kélee da pâi maa tûŋ ƃôi dínûai kélee dîa. Gáa niî a nyákpa. Vé táre ní m̀ɛnii kélee su. Ŋa pâi zãai kélee ŋá tɛ̂i ma bɛ́rɛi tɔɔ mɛni ma.” M̀ɛni ma Deeƃé è bɛ́rɛi tɔɔ sãa támaa ŋá tɛ gîe ma é lɛ́ɛ pâi saâi.

⁶ È ǹóŋ Saloma tòli é Eezuɛ Ɣalai Yâwɛɛ ŋɔpɛ́rɛi tɔɔ mɛni kélee tùaŋ ma.

⁷ È mò ma ǹyɛɛi, “Ńoŋ, ŋa gbɛ̀tɛ ŋ́gili ŋá a gɛ́ɛ ŋá pɛ́rɛ tɔ́ɔ Ŋáɣâlai Yâwɛɛ ŋɔlaa ma tɛi mɛni ma.

⁸ Kɛ́lɛ Ɣâla è lòno ḿbɔ ǹyɛɛi, ‘Ya kɔ́ támaa kɔ́. Ya ŋãa támaa pú. Mɛni ma ífe pâi pɛ́rɛ tɔɔ̂i maa mɛni ma.

⁹ Kɛ́lɛ ya pâi lóŋ-surɔŋ maa sɔlɔ ƃôi nyíi lii-see a pâi ǹyêei, kpɛ́ni fêi, ŋa pâi dɛɛ̂i bɔ́. Ŋa pâi gɛ̂i é víi tɔ́ɔ ŋɔkpɔara-ƃelai kélee yêei. Ǹáa ƃé pâi kɛ̂i a Saloma. À gâloŋ-laai sɔlɔ ƃô, ŋa lii-see tɛɛ̂i Eezuɛ-ŋai pɔ́ ŋá dímɛi káa.

¹⁰ Ǹyaa ƃé pâi ŋápɛrɛi tɔɔ̂i. Ŋa pâi kɛ̂i a ǹâŋ, ǹyaŋ gɔ́ ƃò a ńoŋ. Ŋa pâi gɛ̂i ŋɔsuui su-ƃela díkɛ a kâloŋ Eezuɛ lɔii su wɔ́lɔ-wɔlɔ da wɔ́lɔ-wɔlɔ.’ ”

¹¹ Deeƃé è ŋɔ́nɔ mò mà ǹyɛɛi, “Ńoŋ, Yâwɛɛ é kɛ́ íkɔlɛ. Íɣâlai Yâwɛɛ é kɛ́ íkɔlɛ é gɛ́ ŋ̀óoi ŋaa-see é kɛ́ í ŋɔpɛ́rɛi tɔ́ɔ yɛ̂ɛ berei è mò lai.

¹² Tɔɔ é táre da mɛni ŋá-kaa tɛ́ɛ ípɔ a tãi ya pâi kɛ̂i la Eezuɛ-ŋai mɛi a gɛ́ɛ í ŋɔtɔ̂ŋ mɛi káa.

¹³ À kɛ̀ tí, ya pâi mɛni lɛ́lɛɛ sɔlɔ ƃôi à kɛ̀ ya ímɛi kâa, í dɔ̂ŋ nyíi Yâwɛɛ è wɔ́lɔ dɛ̀ɛ Mose pɔ́ Eezuɛ-ŋai mɛni mai mɛi káa. Kɛ́ a ítɔ̂ɔi kpanaŋɔɔ ílii kpeliɛɛ. Ílii fé tòo pôlu kpaa máŋ í yao.

¹⁴ Ŋa mɛni sôli támaa káa a gɛ́ɛ ŋá Yâwɛɛ ŋɔpɛ́rɛi tɔɔ sãa ŋáa tɛ́ gîe ma. Ŋa gôo pãŋ wála lɔ́ɔlu mɛi saaƃa (8,000), káne pãŋ ŋɔmêeyɔŋ buu lɔ́ɔlu mɛi feerɛ káo lɔ́ɔlu (75,000,000) ƃara da kɔli kpulu kɛ́tɛ nyíi núu fa pɔ̂ri ŋɔwuyɛ kɔ̂ɔnii, wúru da kɔni. Ya pɔ̂ri díta pûi ma a tɛɛ-ŋa.

¹⁵ Tíi kɛ́-ƃela sii támaa káa íyêei. Kɔni saa-ƃela, pɛ́rɛ tɔɔ-ƃela, wúru-kpamo-ƃela, yɛrɛ-tii kɛ́-ƃela támaa nyii-ŋai da tíi kɛ́

¹⁶ a gôo, káne, ƃara da kɔli. Yɛrɛ kɛ́-ƃela támaa káa ƃɛ́ nyíi ífa pɔ̂ri dílônoi. Ye naa pɛlɛ díi ŋí ma. Yâwɛɛ é kɛ́ íkɔlɛ ma.”

¹⁷ Nya ƃe Deeƃé è mò Eezuɛ-ŋai láa túɛ-ƃelai dîa a gɛ́ɛ díkpɔŋ maa tɛ̀ɛ ǹóŋ Saloma pɔ́.

¹⁸ È mò dîa ǹyɛɛi, “Káɣâlai Yâwɛɛ è kɛ̀ kákɔlɛ. A lii see tɛ̀ɛ kápɔ ƃéla kélee ma, kpɛ́ni fêi, a ǹɔii kélee tɛ́ɛ ḿbɔ, zu-ƃela kélee da kɛ́ a Yâwɛɛ yée mu-ƃela.

¹⁹ Mɛni ma, ka Káɣâlai kɔ́ri a kálii da kámɔlêŋ. Ka kámɛi káa a gɛ́ɛ ká Ɣâla Yâwɛɛ ŋɔpɛ́rɛi tɔ́ɔ a gɛ́ɛ ká pá a ŋɔkpanaŋ-woo Gãlai da zãa maa waa-ŋai nyii-ŋai díkaa a Ɣâla pɔ́ɔi bɛ́rɛi mu nyíi ká dɔ̀ɔ Yâwɛɛ mɛni mai.”