Kɔlɔnikɔ Maa-ŋuŋ 21 - Bible

Deeƃé è ŋɔkúluƃa-ŋai lòno

¹ Ǹaa kɛ́ɛ tí, Sêtɔŋ è kɛ̀ ŋ̀wɛ̂lii é mɛni kpɔ̂lu láa Eezuɛ m̀a. È pìli Deeƃé líi su é gɛ́ Deeƃé é Eezuɛ-ŋai lóno.

² Deeƃé è mò Zoa da ŋɔkɔ-kuluƃa-ŋai mɛi-ƃelai dîa ǹyɛɛi, “Ka lí ká Eezuɛ-ŋai lóno ká pá a m̀aa koraŋ-ƃo ḿbɔ gɛ́ɛ ŋá kɛ́ a díkelee díkɔlɔŋɔɔ díkɔni ma é síɣe Bɛɛsiba é tóo Daŋ ŋɔlɔii-kpîniŋ su.”

³ Kɛ́lɛ Zoa ǹyɛɛ mài, “Tɔɔ Yâwɛɛ é gɔ-kuluƃa-ŋai táma a ŋ̀uŋ tɔnɔ (100) seêi ŋ̀uŋ tɔnɔ (100) é tɛ́ɛ nyii-ŋai díkaa naai dîa. Ńuu-namui, ǹûai ŋí kélee dífe a íyee mu-ƃela? Lé mɛni ƃé ya nyíŋi kɛ̂i mɛni mai, ńuu-namui? Lé mɛni ƃé ya ŋ̀wɛ̂lii a gɛ́ɛ ǹɔii ŋí é píli la sɔnyɔ̂ŋ sui?”

⁴ Kɛ́lɛ gâloŋ è gɛ̀ Zoa é ǹûai lóno. Nya ƃe Zoa è lì ǹɔii gwaa kélee é ǹûai lóno é lene pôlu Zerusâlɛŋ.

⁵ È gɔ-kuluƃa-ŋai kélee ǹɔii sui laa see lɛ̀ Deeƃé ma. Diai kélee kɛ̀ a kɔ́ kɔ́-ƃelai díkɛ a núu (1,100,000) meeyɔŋ tɔnɔ, wála ŋ̀uŋ tɔnɔ Eezuɛ kpiniŋ su. Diai kɛ̀ Zuda kpiniŋ sui díkɛ̀ a núu (470,000) wála ŋ̀uŋ náaŋ pôlu buu lɔ́ɔlu mɛi feerɛ.

⁶ Zoa líi fé kɛ́ ní a ǹáa ǹûai lóno mɛni ma. M̀ɛni ma, vé Liiva-ŋai da Bɛŋsima suui su-ƃelai lóno ní.

⁷ Eezuɛ-ŋai lóno mɛni fé kɛ́ ní a Ɣâla nîa mɛni. M̀ɛni ma, è Eezuɛ-ŋai kula-maa kɛ̀ m̀ɛnii ŋí mɛni ma.

⁸ Nya ƃe Deeƃé è mò Ɣâla ma ǹyɛɛi, “M̀ɛnii ŋí ŋaâ gɛ̂i, gáa a sɔnyɔ̂ŋ kɛ́tɛ. M̀ɛni ma ye kpera yɛ̂ ńzu mɛni lɛɛ, kpɛ́ni fêi, ŋaâ ƃoo mɛni támaa kɛ́ a yá.”

⁹ Nya ƃe Yâwɛɛ è mò Ɣâla ŋɔlóno kɛ́-nuui Gâa ma ǹyɛɛi,

¹⁰ “Lí í m̀ó Deeƃé ma yɛ̂i, ‘M̀ɛnii Yâwɛɛ è m̀oi ǹyaa ƃa: Ŋa pâi mɛni-ŋuŋ saaƃa ƃôi yâ a gɛ́ɛ í dɔnɔ siɣe zu a gɛ́ɛ ŋá gɛ́ a yá.’ ”

¹¹ Gâa è lì Deeƃé pɔ́-naa ǹyɛɛ mai, “M̀ɛnii Yâwɛɛ è m̀ôi ǹyaa ƃa í m̀ɛni saaƃai ŋí dɔnɔ siɣe zu:

¹² Puru é tóo a kóraŋ saaƃa, kpaa íkpɔara-ƃela dí káyee-mɛi ɣále ɣáloŋ saaƃa yée mu, kpaa máŋ Yâwɛɛ é ŋɔkéla tɛ́ɛ a núu paa kɔlɔ-fela nyɔmɔɔ-ŋa dí nûa paa fólo saaƃa yée-mu Eezuɛ lɔii gwaa kélee ma. M̀ɛnii ŋí su toôi ƃa lé a gɛ́ɛ ŋá m̀ó Yâwɛɛ ma ńdɛ̀ɛi.”

¹³ Deeƃé è mò Gâa ma ǹyɛɛi, “Ńii toɔ̂ɔi kpɔ́ pôlu a ŋ̀ánaa. Tɔɔ Yâwɛɛ é ŋ́gula-maa kɛ́, kpɛ́ni fêi, ŋɔmaloŋ-kâai su kɛ́tɛi. Kɛ́lɛ núu-kpune fé ŋ́gùla maa kɛ̂.”

¹⁴ Gɛ́ɛ tí, Yâwɛɛ è mɛni kpɔ̂lu làa Eezuɛ-ŋai dîa. È gɛ̀ núu wála buu lɔ́ɔlu mɛi feerɛ (70,000) dí sáa Eezuɛ lɔii su.

¹⁵ Nya ƃe Yâwɛɛ è ŋɔkélai tɛ̀ɛ a gɛ́ɛ é Zerusâlɛŋ su kara. Kɛ́lɛ ŋ̀âla-taa kelai kɛ́ɛ kɛ̀ m̀ɛnii ŋí kɛ̂i, Yâwɛɛ è naa kàa ǹíi é tóo pôlu. È m̀o ŋ̀âla-taa kelai ma ǹyɛɛi, “É naa lɛɛ tí. Nyíti aâ táma!” Ŋ̀âla-taa kelai è kɛ̀ tɔ̂ɔni Arauna ŋɔmii-sɛŋ tânii kɔlɛ ma. Arauna è kɛ̀ a Zɛbu-nuu.

¹⁶ Deeƃé è ŋ̀âla-taa kelai kâa gɛ́ ƃò tɔ̂ɔni, kɛ́lɛ gɔ́ɔ fé kɛ́ ní a bîlaŋɔɔ ǹɔii ma. Ƃóa-sɔkpɔ è kɛ̀ ǹyêei zãa Zerusâlɛŋ pere. Da ǹúu-pɔlɔ-ŋai maloŋ-tôo-maa seɣe è kɛ̀ diai, dí pà dí díŋuŋ ma pîlaŋ ǹɔii ma.

¹⁷ Deeƃé è Ɣâla fɛ̀li ǹyɛɛi, “Ńyãa ƃé gɛ̀ díkɛ ǹûai lòno. Gɛ̀ ní, ńyãa ƃé zɔnyɔ̂ŋ kɛ̀, ŋá dua-pere nyɔ̂ŋ sãŋ ŋí kɛ́. Kɛ́lɛ ǹûai ŋí díkaa a ínûa. Dífe mɛni nyɔ́mɔɔ kɛ́ ní. M̀ɛni ma, óo Ŋáɣâlai Yâwɛɛ, ŋa ímarê kɛ̂i a gɛ́ɛ í ŋ́gula-maa kɛ́ kwa ŋánûai m̀ɛnii ŋí mɛni ma. Ífe ǹûai ŋí su-kàra.”

¹⁸ Nyíŋi pôlu ma, Yâwɛɛ ŋɔkélai è mò Gâa ma a gɛ́ɛ é m̀ó Deeƃé ma é lí é Ɣâla-teƃele tɔɔ Yâwɛɛ mɛni ma Zɛbu-nuui Arauna ŋɔmii-sɛŋ táŋ kwaai ma.

¹⁹ Deeƃé è Gâa wóo mɛ̀ni. È gɛ̀ yɛ̂ɛ berei Yâwɛɛ è mò lai.

²⁰ Arauna da ǹônii-sinaai náaŋ díkɛ̀ mii-sɛŋ tânii. Nya ƃe dí ŋ̀âla-taa kelai kàa. Gɛ́ɛ tí, Arauna ǹônii-sinaai ǹaaŋɔɔ dí pù dí díloo.

²¹ Arauna kɛ́ɛ a Gâloŋ Deeƃé káai, è kpèra mii-sɛŋ táŋɔɔ ma é lí é pɛ́lɛ gɔ́ɔ mu é ŋ̀uŋ pîlaŋ.

²² Deeƃé è mò ma ǹyɛɛi, “Ye ímii-sɛŋ tânii tɛɛ ḿbɔ ŋá ǹyá ŋá Ɣâla-teƃele tɔɔ naa Yâwɛɛ mɛni ma a gɛ́ɛ é m̀ɛni kpɔ̂lui ŋí kúla Eezuɛ lɔii ma. Ŋa pâi ǹyâi yɛ̂ berei zɔ̃ɔ káa lai.”

²³ Arauna è ŋ̀óo su tòo ǹyɛɛi, “Ńuu-namui, ye ziɣe m̀ɛnii ya ŋ̀wɛ̂lii í gɛ́ lai, í gɛ́ la. Ye díi kɛ́-niŋa sirɛ-ŋai ŋí síɣe a géreŋ sala kula-sɛŋ. Ye mii-sɛŋ táŋ wurui síɣe í gɛ́ a kɔi zâlai kula mɛni ma. Ŋa pâi m̀ii-sɛŋ da tɛɛ̂i ípɔ a mìi-sɛŋ sala sɛŋ.”

²⁴ Kɛ́lɛ Gâloŋ è ŋ̀óo su tòo ǹyɛɛi, “Kpao, ŋa pâi zɔ̃ɔ tɛɛ̂i ípɔ yɛ̂ɛ berei gáa lai. Fa ísãai siɣêi ŋá dɛɛ Yâwɛɛ pɔ́, kpaa máŋ ŋá sâla kula a zɛŋ nyíi dí dɛ̀ɛ ḿbɔ kpɛ́ni-kpɛnii.”

²⁵ Nya ƃe è gôo sɛŋ-kao kpua-kpua ŋ̀uŋ lɔ́ɔlu mɛi da (600) tɛɛ Arauna pɔ́ mii-sãa tânii mɛni ma.

²⁶ È Ɣâla-teƃele tɔ̀ɔ naa Yâwɛɛ mɛni ma é kéreŋ sala da lawei-laa sala kùla naa. È Ɣâla fɛ̀li, Ɣâla è fáa ŋ̀óo ma é ŋɔŋ kúla ŋ̀elei su é tóo ŋ̀âla-teƃelei ŋá é zãai kélee kéreŋ.

²⁷ Yâwɛɛ è lòno ŋɔkélai pɔ́. Gélai è ŋɔƃóa-sɔkpɔi lɔ̀ daâi pôlu.

²⁸ Gɛ́ɛ Deeƃé a gáa a gɛ́ɛ Yâwɛɛ a ǹyée sée ŋɔfɛli-wooi mu Zɛbu-nuui Arauna ŋɔmii-sɛŋ tanîi, è sâla kùla naa.

²⁹ Yâwɛɛ ŋɔsua-kɔlɔ-seɣe pɛrɛi Mose è wɔ́lɔ dɔ̀ɔ vɛ̃ɛ-kpâlaŋ sui da ŋ̀âla-teƃelei kɛ̀ géreŋ salai kula mɛni mai díkelee díkɛ̀ ŋ̀âla-fɛli kwaai ma kɛ̀ Giƃiyɔŋ Yêei ma.

³⁰ Kɛ́lɛ Deeƃé fé pɔri ní kɛ̀ liî naa a gɛ́ɛ é Ɣâla fɛli, kpɛ́ni fêi, è kɛ̀ kpɔ́ yaôi a ŋ̀ánaa Yâwɛɛ ŋɔkélai ŋɔƃóa-sɔkpɔi ma.