Kɔlɔnikɔ Maa-ŋuŋ 18 - Bible

Deeƃé è Felesia-ŋai yée mɛi-ɣàle

¹ Ɣele tɔnɔ da Gâloŋ Deeƃé è Felesia-ŋai yée-mɛi ɣále é Gâa-taa-lêei kula yêei kɛ́ é pɛlɛ ǹaa kɔlɛ mâ kpanaŋ-ŋai dîa.

² È ŋɔ́nɔ Môa-ŋai yée mɛi ɣále é díkɛ a ǹyee-mu-ƃela díkɛ ŋuŋ-fela-fei kɔlɛ m̀a.

³ Naa pôlu ma, Deeƃé è ŋɔ́nɔ Zoba kaloŋ Adadezɛ yée mɛi ɣále Ama lɔii kpiniŋ kɔlɛ. Adadezɛ è kɛ̀ liî a gɛ́ɛ é Yufeletii Ya-leei kɔlɛ siɣe a bɔɔ.

⁴ Deeƃé è kɔ́-kɔkeleŋ wála tɔnɔ (1,000) soŋ é pɛlɛ kɔ́-kɔ ƃela wála lɔ́ɔlu mɛi-feerɛ (7,000) nyíi ŋai kɛ̀ kɔi soo-ŋa mɛi dîa da kɔkuluƃa wála buu feerɛ (20,000) nyíi ŋai kɛ̀ siai díkɔɔ-ŋai. Nya ƃe Gâloŋ Deeƃé è zoo-ŋai ŋí dámaa sìɣe zu kɔ́-keleŋ ŋuŋ tɔnɔ mɛni ma. È gbéli-ŋai kélee kɔ̃liŋ.

⁵ Nya ƃe Siria-ŋai kɛ̀ Dɛmɛikai dí pà a gɛ́ɛ díkpɔŋ ma tɛɛ Adadezɛ pɔ́. Kɛ́lɛ Deeƃé è díkɔ-kuluƃa-ŋai wála buu feerɛ káo feerɛ (22,000) pàa.

⁶ Deeƃé è ŋɔkɔ-kuluƃa-ŋai díƃûu-ŋai da-ni tɔ̀ɔ dílɔii su. Dí ǹaa-ƃela kɛ̀ a ǹyée mu-ƃela, díkɛ ŋuŋ fela-fei tɛ̀ɛ bɔ́. Yâwɛɛ è Deeƃé kɛ̀ é ŋɔkpɔara-ƃelai kélee yée mɛi ɣále.

⁷ Deeƃé è Adadezɛ ŋɔkɔ-kuluƃa-ŋai mɛi-ƃelai dígôo kpala ŋá-ɣale kɔli-kalaŋ-ŋai sìɣe é lí a dia Zerusâlɛŋ.

⁸ È ŋɔ́nɔ ƃara támaa kùla Tiƃa da Kûŋ taa-lee-ŋai su kɛ̀ Adadezɛ yée mui. (Saloma è wɔ́lɔ zãai ŋí sìɣe é yá pú-sɛŋ, pɛ́rɛ-yee mu-wuru-ŋai da sɛŋ-folo-ŋa kpɛtɛ a dia Ŋ̀âla-pɛrɛ Kɛ́tɛi mɛni ma.)

⁹ Ama kaloŋ Tou kɛ́ɛ a m̀ɛni a gɛ́ɛ Gáloŋ Deeƃé aâ Zoba Kaloŋ Adadezɛ da ŋɔkɔ-kuluƃa-ŋai yée mɛi ɣálei,

¹⁰ È ǹóŋ Adoraŋ tɛ̀ɛ Gâloŋ Deeƃé pɔ́-naa a gɛ́ɛ é ǹaa tí m̀a, é ŋɔsɛɣɛ-fêi láa seri m̀a Adadezɛ yée mɛi ɣále mɛ̂ni ma. Kpɛni fêi kɔ́ è kɛ̀ Gáloŋ Tou da Adadezɛ díloai. Gâloŋ Tou è gôo, kane, da ƃara sama-sãa tɛ̀ɛ Deeƃé mi.

¹¹ Kɛ́lɛ Gâloŋ Deeƃé è zãai ŋí kélee tɛ̀ɛ Yâwɛɛ pɔ́, gánei da gôoi nyíi è ziɣe ǹɔii-ŋûŋ-ŋai ŋí, Idɔŋ, Môa, Amɔŋ, Felesia da Amɛlɛ lɔii sui.

¹² Abisai nyíi kɛ̀ a Zeruia ǹóŋ, È Idɔŋ kɔ-kuluƃa wála puu káo lɔ́ɔlu mɛi saaƃa (18,000) pàa Gbolo tiŋ-tiŋsu.

¹³ È ƃûu pù naa gɔ-kuluƃa-ŋai maa mɛ̂ni ma. Idɔŋ-ŋai díkɛ̀ a Gâloŋ Deeƃé yée-mu ƃela. Ǹaa pôlu ma, Yâwɛɛ è gɛ̀ Deeƃé é ŋɔkpɔara-ƃelai kélee yée mɛi ɣále.

¹⁴ Deeƃé è nâa kɛ̀ Eezuɛ lɔii kélee mɛi a kaloŋ. È ŋɔnûai kélee kpɔ́ mɛi kâa a teniŋ-ƃo pere.

¹⁵ Zoa ǹêɣe Zɛruia ƃé kɛ̀ gɔ-kuluƃa-ŋai kélee mɛi. Ailu ǹóŋ Zeosafa ƃé kɛ̀ a gɔlɔ pɔ̃yɛ-nuui.

¹⁶ Aitu ǹóŋ-surɔŋ Zadɔ da Abiata ǹóŋ-surɔŋ Aimelɛ ƃé kɛ̀ a zâla-laa soŋ-ƃelai.

¹⁷ Zeoiada ǹóŋ-surɔŋ Benaiya ƃé kɛ̀ Deeƃé mɛi-káa kɔ-kuluƃa-ŋai mɛi. Gâloŋ Deeƃé ǹônii-sinaai ƃé kɛ̀ a ǹûa kpaya-kpayai dítii kɛ́ɛi su.