Kɔlɔnikɔ Maa-ŋuŋ 17 - Bible

Neetɔŋ è worɛ̂-woo ƃò Deeƃé ma

¹ Gâloŋ Deeƃé kɛ́ɛ a lɔ́ ŋɔkâloŋ pɛrɛi mui, è worɛ̂ tɛ̀ɛ Ɣâla ŋɔlóno kɛ́-nuui Neetɔŋ pɔ́-naa a gɛ́ɛ é pá. Neetɔŋ kɛ́ɛ a pâi, Deeƃé è mò ma ǹyɛɛi, “Ŋ́gaa lâai pɛ́rɛ mu nyíi dɔɔ̂i a sîda wuru-ƃela-ŋa. Kɛ́lɛ Yâwɛɛ ŋɔkpanaŋ-woo-kɛɛ Gãlai káa nɔ́ sua-kɔlɔ-seɣe pɛrɛ mu!”

² Neetɔŋ ǹyɛɛ Deeƃé mai, “M̀ɛnii kélee íkili ŋái, ya pɔ̂ri gɛ̂i, kpɛ́ni fêi, Ɣâla káa ímɛi kâai.”

³ Kɛ́lɛ gbínii pɛlɛ́ɛi, Ɣâla è mò Neetɔŋ ma ǹyɛɛi,

⁴ “Lí í m̀ó ńyee mu-nuui Deeƃé ma yɛ̂i, ‘Ŋa môi ma a gɛ́ɛ vé a ǹúui é pɛ́rɛ tɔ́ɔ mî nyíi ŋa pâi kɛ̂i mui.

⁵ É síɣe tãi ma ŋá Eezuɛ-ƃelai ŋuŋ mâ ƃò la ŋá díkula Ize ǹuɛ-laai sui, ḿve niî láa ní pɛ́rɛ mu. Ŋ́gaa kpɔ́ nɔ́ wɔ́lɔ sua-kɔlɔ-pɛrɛ mu ŋ́gɛ tɛ̀ ŋ́gɛ yèŋ.

⁶ Kwa Eezuɛ-ŋai kwa tɛ̂i kúkɛ yèŋ. Fé tá m̀ó-ni dílaa túɛ-ƃelai nyii-ŋai ŋá dílɛ̀i da ma a gɛ́ɛ é pɛ́rɛ tɔ́ɔ mî a sîda wuru.’

⁷ “Ye m̀ó ńyee mu-nuui Deeƃé ma yɛ̂ ńyãa Ŋ̀wála-wâla kélee Yâwɛɛi, ŋa m̀ôi mà ńyɛ̂ɛi, ‘Ŋá íkùla ƃála-ŋa mɛi kâai ǹɔɔi su ŋá íkɛ a kâloŋ ŋánûai Eezuɛ-ŋai mɛi.

⁸ Ǹyaŋ ƃɛ́i kélee í lì naai ŋá kɛ̀ naa ŋ́gɛ ímɛi kâa. Ŋa íkpɔara-ƃelai kpɛ̀ íŋɛi túɛ. Ŋa pâi gɛ̂i ímaa tuŋ é táa-taa ŋ̀éniɛi gwaa kélee ma a gɛ́ɛ íkaa a núu láa túɛ-nuu kɛ́tɛ.

⁹ Naa pôlu ma, ŋá kwaa ma siɣêi zu a ŋánûai Eezuɛ-ŋai kɛ̂i. Ŋá gɛ a gɛ́ɛ díseêi é kɛ́ naa. Dífe pâi ŋɔ́nɔ kɛ̂i núu da kélee yée mu. É síɣe tãi ma ŋánûai dí pà la ǹɔii ŋí sui, ŋɛi maa nɛ̃ɛ-ƃela támaa díkaa nɔ́ wɔ́lɔ dílaa sâa kɔ̂rii. Kɛ́lɛ da fé ŋɔ́nɔ pâi kɛ̂i.

¹⁰ Ŋá ŋ́gono tèe a gɛ́ɛ ŋa pâi díkelee dísu-karâi a gɛ́ɛ ŋá gwaa ŋí ma tɛɛ ísuui pɔ́.

¹¹ Yà pâi sàa dí íloo ínûa-pɔlɔ-ŋai kɔlɛ, ŋa pâi íloŋ-surɔŋ dɔnɔ siɣêi zu ŋá gɛ́ a kâloŋ ípɔɔ ŋá. Ŋa pâi kɛ̂i bôlu ŋá gɛ́ a gɛ́ɛ ŋɔkâloŋ-laai mu é wuyɛ.

¹² Nyàa ƃé pâi kɛ̂i a ǹúui pâi pɛ́rɛ tɔɔ̂i mî. Ǹyaŋ ŋa pâi ŋɔkâloŋ-laai kɛ̂i naa wɔ́lɔ-wɔlɔ da wɔ́lɔ-wɔlɔ.

¹³ Ŋa pâi kɛ̂i a ǹâŋ ǹyaŋ gɛ́ ƃò a ńoŋ-surɔŋ. Ḿve pâi ńyee kulâi mu yɛ̂ berei ŋá wɔ́lɔ gɛ̀ la a Sɔ̂ɔ ŋá gùla gâloŋ-laai su ŋá ísee bɔ́ɔ ŋa a kâloŋ.

¹⁴ Ŋa pâi gɛ̂i ŋánûai mɛi ŋɔkâloŋ-laai é kɛ́ ƃò naa wɔ́lɔ-wɔlɔ da wɔ́lɔ-wɔlɔ. Ŋɔkâloŋ-laai kɔ́yɛŋ fé wɔ́lɔ pâi kɛ̂i ma.’ ”

¹⁵ Neetɔŋ è m̀ɛnii kélee ƃò Deeƃé ma Ɣâla è m̀o mai.

Deeƃé ŋɔsɛɣɛ-fei Ɣala-fɛli wooi

¹⁶ Nya ƃe Gâloŋ Deeƃé è lì Yâwɛɛ ŋɔsua-kɔlɔ seɣe-pɛrɛi mu é sée Yâwɛɛ ŋɛ́i gɛ́ Ɣâla fɛ̀li. È mò ǹyɛɛi, “Ŋáɣâlai Yâwɛɛ, ḿaa fé ǹɛɛ ní m̀ɛnii ya wɔ́lɔ gɛ̂ mîi maa mɛni ma, kpaa máŋ ŋ́gaayɔɔ-ŋai.

¹⁷ Lonii ma mɛnii íkaa gɛ̂i mîi gɛ́tɛi kpɔ́ a ŋ̀ánaa. Ya íkono tée a gɛ́ɛ ńzuu a pâi kɛ̂i ma tínaa tuɛ-pere. Ŋáɣâlai Yâwɛɛ, ya tûa a ńyãa yɛ̂ɛ núu kɛ́tɛ.

¹⁸ Lé mɛni ƃé naa a gɛ́ɛ ŋá ŋɔ́nɔ m̀ó yâi! Í ímaa mɛni kélee kɔ́lɔŋ kpɔ́ a ǹɛ́lɛɛ. Kɛ́lɛ yâ ƃaa kɛ́-maa kɛ́ɛ ŋí tɛɛ̂i ḿbɔ ńyãai a íyee mu-nuui.

¹⁹ M̀ɛnii ŋí ya gɛ́ mîi, gáa a yá kpîŋ ímɛni kpɛtɛɛ da ínîa mɛni. Ya berei lɛ́ ḿâ a gɛ́ɛ ŋákɛ-ɣeniɛi a pâi kɛ̂i la a gɛ́tɛi tínaa tuɛ-perei.

²⁰ Yâwɛɛ, sɛŋ da fé naa é kɛ́ yɛ̂ɛ yá. Kwa wɔ́lɔ íkɔlɔŋ a gɛ́ɛ yá ƃa Ɣâla.

²¹ Lɔii-ŋuŋ da kélee fé naa é kɛ́ yɛ̂ɛ Eezuɛ, nyíi í ŋ̀uŋ ma ƃò í gula luɛ-laa su Ize í naa-ƃela kɛ́ a ínûai. M̀ɛni lɛ́lɛɛ ma-pɔlɔ-pɔlɔɔi í wɔ́lɔ gɛ̀ dîɛi è gɛ̀ a gɛ́ɛ ílaai duŋ é táa-taa ŋ̀éniɛi gwaa kélee ma. Í ínûai ŋuŋ-ma ƃò í díkula ǹuɛ-laai su Ize díkɛɛ pâi, í ǹɔii ŋûŋ-ŋai kélee kpɛ́ dítuɛ.

²² Yâ Eezuɛ-ŋai kɛ́ a ínûa wɔ́lɔ-wɔlɔ da wɔ́lɔ-wɔlɔ. Yái íkaa a Yâwɛɛ ya nâa kɛ́ a Díɣâla.”

²³ “Yâwɛɛ Ɣâla, ye ǹɛɛ naa góno-teei yaâ gɛ́ kwa ŋásuui kúmɛni mai, ŋàa-see é kɛ́. Ye m̀ɛnii kɛ́ í mò a gɛ́ɛ ya pâi gɛ̂i kúmɛni mai.

²⁴ À kɛ̀ tí gɛ̀ ní í maa tuŋ a pâi táa-tâai ǹûai díkɛ mò dîyɛɛi, ‘Ŋ̀wála-wâla kélee Yâwɛɛ ƃé gáa a Eezuɛ-ŋai Díɣâlai.’ Gɛ̀ ní ya pâi ŋákâloŋ-laai kɛ̂i nɔ́ dɔɔ̂i wɔ́lɔ-wɔlɔ.

²⁵ Wála-wala-laa káa iyêei. M̀ɛni ma, ŋa ífɛlîi a bere sîi ŋí, kpɛ́ni fêi, yá ƃa Ŋáɣâlai mɛni-ŋai ŋí lɛ́ ḿâi. Ńyãai a íyee mu-nuui í mò a gɛ́ɛ ya pâi ńzuui kɛ̂i a kâloŋ-ŋa.

²⁶ Yâwɛɛ, yá ƃé íkaa a Ɣâla. Yá ƃé ya gono-tee kpanaŋ ŋí kɛ́ ńyêei.

²⁷ Ŋa ímarê kɛ̂i a gɛ́ɛ í lûwa láa ŋánuu-suui ma é kɛ́ nɔ́ íwɛli-kɛ-maai su a tãi kélee. Yâwɛɛ yá ƃé yaâ lûwa láa dîa ǹyaŋ ílûwai a pâi kɛ̂i nɔ́ dîa wɔ́lɔ-wɔlɔ.”