Kɔlɔnikɔ Maa-ŋuŋ 12 - Bible

Gɔkûluƃa-ŋai pà Deeƃé pɔi

¹ Deeƃé púɔɔ kɛ̀ Gâloŋ Sɔ̂ɔ yêei, è lì é nòo Zikila. Gɛ́ɛ naai, táre-ƃela pɔlɔ-ŋa da kɔ-kuluƃa-ŋa dí pà díkɛ gbono ma.

² Ǹûai ŋí da kâa kerâŋ da vûma pìli a dílaa mii-yee da díkɔɔ-yee. Ǹûai ŋí díkɛ̀ a Sɔ̂ɔ ŋɔkáyɔɔ-ŋa nyii-ŋai kùla Bɛŋsima ŋɔsuui sui.

^3-7 Simaa nyíi kùla Gibea ǹônii-sinaai Aiezɛ da Zoasi ƃé kɛ̀ a dímɛi-ƃela. Gɔ-kuluƃa-ŋai ƃé kɛ̀ a: Azimavɛ ǹônii-sinaai Zeziɛ da Pelɛ Beraka da Zeu nyii-ŋai kùla Anatɔi. Gibiɔŋ nuui Isimaiya nyii kùla a gɔ-kuluƃa pɔlɔi dɔnɔi Ǹalôŋ ŋí è kɛ̀ kpɔ́ a kɔkuluƃa wála-walaa. È kɛ̀ a “Ǹúu-buu saƃai” láa túɛ-nuui dɔnɔ. Gedera-ƃelai Zɛlemaya Zaaiɛ, Zoana, da Zozaba. Arifi-ƃelai Iluzai, Zerimɔ, Bealiya, Simariya da Sifatia Kora ŋɔsuui su-ƃelai Ɛɛkena, Isia, Azare, Zoezɛ da Zasobiaŋ Gedɔ nuui Zeroaŋ ǹônii-sinaai Zola da Zebadiya.

Gâa ŋɔsuui su-ƃelai kɛ̀ a Deeƃé ŋɔpôlu-ƃelai

⁸ Ǹûai ŋí ƃé kùla Gâa ŋɔsuui su dí lɛ́ɛ Deeƃé pôlu gɛ́ɛ kɛ̀ loo perei vɛ̃ɛ-kpâlaŋ sui. Dí kɛ̀ a kɔ-kuluƃa kili-kuláa-ŋa. Da kâa kɔ̀ a kpála ŋá ɣále kɔli-kalaŋ a ǹɛ́lɛɛ. Díŋɛi è kɛ̀ a m̀ili-miliɛɛ yɛ̂ɛ yala-sulu, díkɔɔ maa félaa yɛ̂ɛ yée su pilaŋ sua.

^9-13 Berei ŋí ƃé dítɔɔ̂i è kɛ̀ la ǹúu láa túɛ-laa perei su: Ɛzɛ ƃé kɛ̀ a dílaa túɛ-nuui. Obadaya ƃé kɛ̀ gɔlɛ ma, Ilia kɛ́ ƃò Obidaya kɔlɛ. Misimana è kɛ̀ Ilaƃi kɔlɛ ma, Zɛlemaya kɛ́ ƃò Misimana kɔlɛ. Atai è kɛ̀ Iliɛ kɛ́ ƃò Atai kɔlɛ ma, Zoana kɛ́ ƃò Iliɛ kɔlɛ ma, Ɛɛzaba kɛ́ ƃò Zoana kɔlɛ ma. Zɛlemaya è kɛ̀ ƃò Ɛɛzaba kɔlɛ ma, Maabanai ǹyaŋ gɛ́ ƃò Zɛlemaya kɔlɛ ma.

¹⁴ Gâa ŋɔsuui su kɔkuluƃa-ŋai ŋí ŋáa è kɛ̀ a gɔlɛ́ɛ a nuu-kpulu feerɛ. Ǹúui gbaya-kpayai díkɛ̀ kɔkuluƃa (1,000) wála tɔnɔ mɛi. Bɛlɛ-pɛlɛɛi dí ƃò kɔkuluƃa (100) ŋuŋ tɔnɔ mɛi.

¹⁵ Zɔdiŋ Ya-leei kɛ́ɛ kɛ̀ a vɛ́ɛ ŋ̀áloŋ maa ŋuŋ sui, ǹûai ŋí ƃé dìyeŋ. Dí tòo diai sáma kɛ̀ diŋ-tiŋ su vóloi kulâi-pere da vóloi liî-pere dí táa-tàa.

Bɛŋsima da Zuda dísuui su-ƃelai

¹⁶ Naa kɛ́ɛ tíi, kpakolo kpulu tɔnɔ è kùla Bɛŋsima da Zuda suui su dí pá Deeƃé pɔ́-naa ƃɛ́i è kɛ̀ ǹoɔ́ɔ naai.

¹⁷ Deeƃé è lì é díperei tɔɔ. È mò dîa ǹyɛɛi, “À kɛ̀ kákaa a ḿarâa ká pà a gɛ́ɛ ká kpɔ́ŋ ḿâ, gɛ̀ ní ǹyée seɛɛ̂i kámu. Ka pá kwáa kɛ́ ƃɛ́. Kɛ́lɛ à kɛ̀ ká pà a gɛ́ɛ ká káyee láa ḿâ ká ńdɛɛ ŋ́gbɔara-ƃelai pɔ́, berei máŋ ḿve mɛni nyɔ́mɔɔ da kɛ̀ ní lai kúnâŋ-ni Díɣâlai a pâi kákula maa kɛ̂i.”

¹⁸ Ɣâla ŋɔmɔ̂leŋ è pà Amasai mɛi. Amasai ŋí ƃé kɛ̀ pâi kɛ̂i a “Ǹúu-buu saaƃai” láa túɛ-nuu. È mò ǹyɛɛi, “Zɛse ǹóŋ Deeƃé, kúkaa a ípɔɔ! Lii-see kɛ́tɛ é kɛ́ yâ da ǹûai pà kpɔŋ mâaa tɛɛ̂i ípɔi. Ɣâla a pâi kɛ̂i ípôlu.” Deeƃé è ǹyée sèe dímu é díkɛ a ŋɔkɔ́ kɔ́-ƃelai mɛi ƃelai da.

Manasɛ ŋɔsuui su kɔkuluƃa-ŋai

¹⁹ Deeƃé kɛ́ɛ liî gɛ́ɛ é kpɔ́ŋ Felesia-ŋai dîa dí kɔ́ Gâloŋ Sɔ̂ɔ pɔ́i, gɔ-kuluƃa-ŋai kùla Manasɛ ŋɔsuui sui da-ŋa dí lì dí tɔ́ɔ bôlu. Kɛ́lɛ Felesia-ŋai dí kɛ̀ yaôi dífe díyee sèe ní mu, kpɛ́ni fêi, díkâloŋ-ŋai fé fáa ní ma. Dí mò dîyɛɛi, “À kɛ̀ Deeƃé a tìnaŋ ŋɔmɛi-nuu pɔlɔi pɔ́-naa pere, gɛ̀ ní da pâi kúpaâi.” Ǹya ƃé lène pôlu Zikila.

²⁰ Gɛ́ɛ lenêi pôlui, gɔ-kûluƃa-ŋai ŋí ƃé lɛ̀ɛ bôlu: Adina, Zozaba, Zediaɛ, Makɛ, Zozaba, Ɛliu da Zilɛtai. Ǹûai ŋí díkɛ̀ kpakolo wála tɔnɔ-tɔnɔ mɛi a tɛɛ-ŋa.

²¹ Deeƃé è ǹûai ŋí siɣe a gɛ́ɛ dí kpɔŋ mâaa tɛɛ bɔ́ a gɛ́ɛ dí kɔ́ doo-ma kɛ́-ƃelai pɔ́, kpɛ́ni fêi, díkɛ̀ a kɔluluƃa líi kpeleɛɛ-ŋa. Dí lɛ̀ɛ naa é lɛ́ɛ la zu díkɛ a Eezuɛ kɔkuluƃa-ŋai láa túɛ-ƃela.

²² Ɣele láa ƃóɔɔ kélee yée mu, kɔ-kûluƃa-ŋa da kâa pà dí díkpîŋ tɛɛ Deeƃé pɔ́ a ŋɔkpɔŋ mâaa-ƃela. Dí lɛ̀ɛ kpɔ́ gɛ̂i tí é lɛ́ɛ la zu dí támaa kpɔ́ a zu kɛtɛ yɛ̂ɛ Ɣâla ŋɔkɔ́ kɔ́-ƃela.

Ǹûai ŋi dí pà Iburɔŋ a gɛ́ɛ díkɛ a Deeƃé ŋɔkɔ-kuluƃa-ŋai da

^23-37 Gɔ-kûluƃa-ŋai ŋí ƃé pà Deeƃé pɔ́-naa Iburɔŋ a gɛ́ɛ dí gɛ́ a kâloŋ Sɔ̂ɔ pɔ́ɔ ŋá. Díkelee díkɛ̀ a kɔ-kûluƃa-ŋa díkpîŋ kpɛtɛɛ a ǹɛ́lɛɛ kɔ́ kɔ́ mɛni ma. Dí gâloŋ-laai tɛ̀ɛ Deeƃé pɔ́ yɛ̂ɛ berei Yâwɛɛ è wɔ́lɔ mò lai. Gɔ́ kɔ́-ƃelai kùla Zuda ŋɔsuui sui, nyii-ŋai keŋe lá kɔli-kalaŋ da kpála-ŋa kɛ́ ƃò díyêei díkɛ̀ a núu wála lɔ́ɔlu mɛi da, ŋ̀uŋ lɔ́ɔlu mɛi saaƃa (6,800). Dí kɛ̀ a díkpɛtɛɛ kɔ́ kɔ́ mɛni ma. Gɔ́ kɔ́-ƃelai kùla Simiɔŋ ŋɔsuui sui díkɛ̀ a kpakolo wála lɔ́ɔlu mɛi feerɛ, ŋ̀uŋ tɔnɔ (7,100). Gɔ́ kɔ́-ƃelai kùla Liiva ŋɔsuui sui díkɛ̀ a kpakolo wála náaŋ, ŋ̀uŋ lɔ́ɔlu mɛi (4,600). Eelɔŋ ŋɔsuui su-ƃelai kɛ̀ Zeoiada pôlui díkɛ̀ a kpakolo wála saaƃa, ŋ̀uŋ lɔ́ɔlu mɛi feerɛ (3,700). Zadɔ ŋɔkáa-yɔɔ-ŋai díkɛ̀ a nyáŋkpa buu feerɛ káo feerɛ. Dí kɛ̀ a kɔ́ kɔ́-ƃela láa túɛ-ƃela. Sɔ̂ɔ ŋɔkáayɔɔ-ŋai kɛ̀ Bɛŋsima ŋɔsuui su díkɛ̀ a kɔ-kûluƃa wála saaƃa (3,000). Bɛŋsima ŋɔsuui su-ƃelai dámaa díkaa niî Sɔ̂ɔ pôlu é too sâa ma. Gɔ-kûluƃa-ŋai kùla Ifiraŋ ŋɔsuui sui díkɛ̀ a kɔ-kûluƃa wála buu feerɛ, ŋ̀uŋ lɔ́ɔlu mɛi saaƃa (20,800). Ǹûai ŋí díkɛ̀ kpɔ́ a kɔ́ kɔ́-ƃela tɔɔ̂i kpanaŋɔɔ dínûai sáma. Diai kùla Manasɛ ŋɔsuui gbulu tɔnɔ su dí pá a gɛ́ɛ dí Deeƃé sée a díkâloŋ, díkɛ̀ a wála puu káo lɔ́ɔlu mɛi saaƃa (18,000). Ǹûai kùla Isaka ŋɔsuui sui díkɛ̀ a núu láa túɛ-ƃela ŋuŋ feerɛ (200). Ǹûai ŋí da díyee mu-ƃelai kélee ƃé pà. Ǹúu láa túɛ-ƃelai ŋi díkɛ̀ a m̀ɛnii kɔ́lɔŋɔɔ ǹɛ́lɛɛi Eezuɛ mɛni mai da tãi màa nɛ̃ɛ̂i dí maa mɛni kpîŋ kɛ́ lai. Diai kùla Zɛbulɔŋ ŋɔsuui sui díkɛ̀ a kɔ-kuluƃa wála buu lɔ́ɔlu (50,000). Ǹûai ŋí da kâa kɔ̀ kpɔ́ a kɔ́ kɔ́-sãa sii támaa. Dí pà a gɛ́ɛ dí Deeƃé kɛ́ a díkâloŋ. Diai kùla Nɛfɛtɛli ŋɔsuui sui díkɛ̀ a kɔkuluƃa-ŋa mɛi-ƃela wála tɔnɔ (1,000). Dia máŋ dí pà a díyee mu-ƃela wála buu saaƃa káo lɔ́ɔlu mɛi feerɛ (37,000). Kpála-ŋa da núu maa kɔ̃ɔ-sãa da kpɛ́ni-ŋa díkɛ̀ díyêei. Diai kùla Daŋ ŋɔsuui sui díkɛ̀ a kɔkuluƃa wála buu feerɛ káo lɔ́ɔlu mɛi saaƃa, ŋ̀uŋ lɔ́ɔlu mɛi-da (28,600). Diai kùla Asɛ ŋɔsuui sui díkɛ̀ a kɔkuluƃa wála buu náaŋ (40,000). Diai kùla Zɔdiŋ Yaa-leei pôlu vóloi kulâi-perei díkɛ̀ a wála ŋ̀uŋ tɔnɔ pôlu buu feerɛ (120,000). Ǹûai ŋí dí kùla Lubiŋ, Gâa da Manasɛ ŋɔsuui gbului kpéli su. Ǹûai ŋí da kâa kɔ̀ kpɔ́ a kɔ́ kɔ́-sãa sii támaa-ŋa.

³⁸ Gɔ-kûluƃa-ŋai ŋí kélee dí pà Iburɔŋ díkpîŋ kpɛtɛɛ a gɛ́ɛ dí Deeƃé sée a kâloŋ Eezuɛ-ƃelai kélee mɛni ma. Eezuɛ-ƃela nyii-ŋai dífe pá ní, díkelee díkɛ̀ a dífaa m̀ɛnii ŋí ma.

³⁹ Da Deeƃé ni dí fólo saaƃa kɛ̀ naa gîe ma díkɛ kúu kɛ́tɛ kɛ̀. Dí dílaa mìi, dí kpele-sɛŋ kpele. M̀ii-sãai da gbele-sãai díkɛ̀ gbelêi naai è kùla díkaayɔɔ-ŋai yêei.

⁴⁰ Díkaayɔɔ-ŋai da-ŋa dí kùla ǹɔii ŋûa-pere kwaa kɛ́ɛ yɛ̂ɛ Isaka, Zɛbulɔŋ é Nɛfɛtɛli ŋɔlɔii kpiniŋ su. Dí pà a mii-sãa támaa gúui ŋí su. Dí pà a dia wɛlɛ-sôo, soo-fáleŋ da soo ƃóloŋ-maa da niŋa-sîrɛ-ŋa mɛi. Ǹûai ŋí dí pà a sãa kɛ́ɛ yɛ̂ɛ felaƃa, kpólo nyíi dí gbɛ̀tɛ a fîi, kpɔmɔ-ƃa kpala nɛ̀ɛ, ŋwã̂ai, wúlɔ, niŋa-ŋa da ƃála-ŋa. Dí pà a zãai ŋí, kpɛ́ni fêi, ŋ̀elei ŋí è kɛ̀ a lii-nɛ̃ɛ ɣele Eezuɛ lɔii su.