Zerusâlɛŋ Karáa Maa Wɔ̂lɔ-wooi 1 - Ŋ̀âla Kɔlɔ Maa Waai

Zerusâlɛŋ ŋɔmaloŋ too-maai

¹ Zerusâlɛŋ lâai léŋ ŋí a vóloi, nyii ǹáa è kɛ̀ a vɛ́ɛ a núui? A kɛ́ léŋ ŋí yɛ̂ɛ pɔɔ-nɛnii, ǹyaai kɛ̀ a gɛ́tɛ ǹɔii-ŋûŋ-ŋai sámai? Ǹyaai kɛ̀ a kâloŋ-nɛni ǹɔii-ŋûŋ-ŋai mɛni mai, aâ kɛ́ a luɛ.

² A gbêɣei toôi kpɔ́ a ŋ̀ánaa a kpíni kélee ŋ̀ɛ́i-ya kɛ́ yèŋ a ǹɛɣɛ̂ŋ. Ŋɔwɛli kɛ́-maa-ƃelai dɔnɔ kpîŋ fé naa é ŋ̀aa nɛnɛ. Díkelee da gíri, da kɛ́ a gbɔara-ƃela.

³ Zuda-ƃelai dímɔ̃lɛ-laai da maa sɛŋ-soli maai pôlu ma, da kɛ́ a lɔii da kpɛ́ni-ŋa su-ƃela. Da kɛ́ lɔii da kpɛ́ni-ŋa su-ƃela sáma, díkɛ̂i fé ma. Díkpɔara-ƃelai da dímaa tínaŋ, ǹyaŋ pere fé ŋɔ́nɔ díyêei dí pú.

⁴ Zãiyɔŋ Ɣala-pɛrɛ Kɛ́tɛi lá perei a pú. Núu da fé ŋɔ́nɔ pâi naa gúu-ŋai ŋ̀aa-see kɛ́ mɛni ma. Ziɣãŋ-ŋai lá a lɛɛ a vólo. Zâla láa soŋ-ƃelai dí kɛ́ ǹyîɛ. Ǹɛnî-kpela-ŋai da malôŋ-see ƃôi. Daa lêei káa mɛni kpɔ̂lu su.

⁵ Ŋɔkpɔara-ƃelai da kɛ́ a m̀ɛi-ƃela. Lii-sɛlɛŋ fé ŋɔ́nɔ dîa. Ɣâla Yâwɛɛ a lii-too pôlu támaa tɛ́ɛ bɔ́ ŋɔsɔnyɔ̂ŋ ŋánaai mɛni ma. Ǹônii da kɛ́ a lɔii-ŋuŋ da kpɛ́ni-ŋa su-ƃela díkpɔara-ƃelai yêei.

⁶ Zãiyɔŋ ŋɔkɛ́tɛ-laai a kùla ǹyêei. Ŋɔnúu láa túɛ-ƃelai da kɛ́ yɛ̂ɛ pîlaŋ sua-ŋa ƃé dílaa mii kwaa ma fé ma. Da lɛɛ pûi díkpɔara-ƃelai yêei kɔlɔ a kpɛɛ dîa.

⁷ Zerusâlɛŋ kɛ́-pere pɔlɔi kíli è tòo ŋ̀á tãi è kɛ̀ la mɛni kpɔ̂lu da mɔ̃lɛ-laa sui. Tãi è tòo la ŋɔkpɔara-ƃelai yêei, núu da fé kɛ́ ní naa é kpɔŋ mâa tɛɛ bɔ́. Ŋɔkpɔara-ƃelai dí ɣɛ̀lɛ m̀a zu-kara perei ma.

⁸ Zerusâlɛŋ a sɔnyɔ̂ŋ kɛ́ a zu kɛ́tɛ. M̀aa fé ŋɔ́nɔ waa ní. Diai kɛ̀ ƃaa kɛ́-maa tɛɛ̂i bɔ́i, dífe ŋɔ́nɔ gɛ̂i tí, kpɛ́ni fêi, da gaŋ káa. A nyîɣɛi gɛ́ ŋ̀ɛi lòo ŋumɛ pere su.

⁹ M̀aa lîƃi-pere a too pono ŋá. Vé kpîŋ kpáaŋ ní a m̀ɛnii pâi kɛ̂i lai. Berei è tòo la pôlui, è kɛ̀ a zu kɛ́tɛ. Núu da fé kpáaŋ ní kɛ̀ m̀ɛni ma. Gbɔara-ƃelai da ǹyée mɛi ɣále. Ǹyaŋ a wɔ̂lɔi Ɣâla Yâwɛɛ ma a gɛɛ é m̀alôŋ káa.

¹⁰ Ŋɔkpɔara-ƃelai dí ŋɔsãa-laai kɛ́ kwaa-ŋai ma su kàra. È díkàa dí kɛ́ lɔ̀ ŋɔkwaa ma waai ma, ƃɛ́i Ɣâla Yâwɛɛ fé fáa ní kɛ̀ ma zɛ̃tai-ŋai dí lɔ́ kɛ̀ naai.

¹¹ Ŋɔnûai da kɛ̀ díkɔnɔ̃ŋ kɔ̂rii, da kɛ̂ nyîɣɛi. Da díkɔ̃liŋ kpanaŋ-ŋai maa fáleŋ a mii-sãa a gɛɛ dífulu-laai é lɛ́ɛ díyêei. Díkɛ môi dîyɛɛi, “Yâwɛɛ, íyee sée ḿû, ŋa mɔ̃lɛ̂i.

¹² “Káai kélee ka tɛɛ ḿâi, ka ḿaa kpɛ́ɛ ḿî. Mɛni kpɔ̂lu da káa naa dɛ́ɛ ŋ́ɔ̂i ma? Yâwɛɛ a mɛni kpɔ̂lu láa ḿâ ŋɔlii ŋwânai su.

¹³ “A ŋɔŋ kúla ŋ̀elei su a bú ḿâ. Ŋ̀ɔŋ ŋí a ŋ́gerenîi ŋ́gbonôi-pere. A ƃáre tɛ́ ḿberêi, a ńzoŋ a ḿbîlaŋ. A gɛ́ ŋa lɛɛ ńyãa tɔnɔ, ŋ́gɛ fôa a ɣele kélee.

¹⁴ “A ŋásɔnyɔ̂ŋ kélee kpɛtɛ yɛ̂ɛ yɔlɛ a gbíniŋ a ŋ́gɔŋ. Ǹyɔlɛi ŋí ŋɔwuyɛ a kɔlɔ kpɛɛ̂i ḿâ. Ǹuu-namui a ńdɛɛ diai pɔ́ díyee tɛɛ̂i ḿâi.

¹⁵ “Ǹuu-namui a ǹyée kúla ŋá kɔ́kɔ-ƃelai mû. A gɛ́ kɔ́ kɔ́-ƃela da tɔɔ ŋányaŋkpa-ŋai dîa a gɛɛ dí dísu kara. A ŋánûai Zuda-ƃelai lúaŋ yɛ̂ɛ da ŋwã̂ai lùŋ ŋwã̂ai lúaŋ kwaa ma.

¹⁶ “M̀ɛnii ŋí ƃé ŋa wɔ̂lɔi la, ŋ́ɛi-ya kɛ́ yèŋ. Núu da fé naa é ŋ́aa nɛnɛ, é pá ḿbɔ a kili-kɛ zu. Ŋ́gbɔara-ƃelai da ńyee mɛi ɣále, ǹyaŋ ŋánûai da mɔ̃lɛ̂i.

¹⁷ “Ŋa ńyee sãa, núu da fa pâ é kpɔŋ ḿâ. Yâwɛɛ a gɛ́ nûa da tɔɔ ḿâ ƃéla kélee ma. Da ńzoŋ yɛ̂ɛ sɛŋ maa liƃiɛɛ.

¹⁸ “Yâwɛɛ teniŋ ƃôɔɔi, kɛ́lɛ fa ŋɔtɔ̂ŋ mɛi kâa. Nûa, ka káwoli tɔ́ɔ ká berei káa ŋa mɔ̃lɛ̂i lai. Ŋá nyáŋkpa-ŋai da kɛ́ a luɛ-ŋa lɔii-ŋuŋ da kpɛ́ni-ŋa su.

¹⁹ “Ŋá ḿarâai tôli, kɛ́lɛ dí ŋ́ɛi lɛ̀ɛ perêi. Zâla láa soŋ-ƃelai da ǹúu-pɔlɔ-ŋai da saa a puru daa-leei su. Dí kɛ̀ tɛ̂i dí kɛ́ yèŋ díkɔnɔ̃ŋ mɛni ma a gɛɛ dí lɛ́ɛ ɣele ma.

²⁰ “Óo Yâwɛɛ, gáa berei ŋa mɔ̃lɛ̂i lai. Ŋa mɛni sôli kâai. Maloŋ too-maa támaa káa ńii su kpɛ́ni fêi, ŋa tɔɔ yâ. Da ŋánûai paâi daa lêei su da bɛ́rɛ-ŋai mu.

²¹ “Nṹa da ńyiɣɛ woo mɛnîi kɛ́lɛ díta fé naa é ŋ́aa nɛnɛ. Ŋ́gbɔara-ƃelai da ŋámɛni-solii maa mɛni mɛnîi. Da lii-nɛ̃ɛ kulâi m̀ɛnii ya gɛ́ a ńyãai, m̀ɛni ma. Yɛ̂ɛ berei í íkono tèe la ńyêei, dia máŋ díkula maa kɛ́ díwɔ̂ sɔnyɔ̂ŋ mɛni ma yɛ̂ɛ berei í gɛ̀ la a ńyãai.

²² “Dísɔnyɔ̂ŋ-ŋai gula maa kɛ́ a dia. Gɛ́ dí mɔ̃lɛ dísɔnyɔ̂ŋ mɛni ma yɛ̂ɛ berei ŋá mɔ̃lɛ̂i la ŋ́ɔ̂i sui. Ŋa nyîɣɛi a ŋ̀ánaa ŋ́gɛ fôa.”