Felepiɛŋ 1 - Ŋ̀âla Kɔlɔ Maa Waai

Laa-ti-maa

¹ Ńyãa Pɔ̂ɔ kwa Temete kúkaa a Zîsɛ Kôrai yée-mu-ƃela, Felepâ Ɣala-ƃelai kélee da nàa Kôrai-toli-kpɔŋ ŋɔtíi-mɛi-ƃelai é pɛ́lɛ nàa dìkɛŋ-ŋai dîa nyíi-ŋai díkaa Zîsɛ Kôrai kponôi:

² Ƃɛlɛ-sêe da lii-sêe dí kɛ́ káyêei é kúla Kúnâŋ Ɣâla yêei da Kúnuu-namui Zîsɛ Kôrai.

Pɔ̂ɔ Ŋɔɣâla fɛli-wooi Felepâ-Korai-ƃelai mɛni ma

³ Tãi kámaa-mɛni a tôo la ŋ́gili ŋái, ŋa sɛɣɛi-fei tɛ̀ɛ Ŋáɣâlai pɔ.

⁴ Tãi kélee ŋà Ɣâla fɛ̀li la kákelee kámɛni mai, ŋa vɛ̀li a lii-nɛ̃ɛ.

⁵ Ŋa Ŋáɣâlai sɛɣɛi fè kákpɔŋ-maai mɛni ma Duŋ Lɛ́lɛɛi su é síɣe tãi ma ka zɔlɔ ƃo lai é tóo tãi ŋí ma.

⁶ Ńaâi kpɔ́ la a gɛ́ɛ ǹúui tíi lɛ́lɛɛ kɔ́ɔ pîlaŋ kákponôi a pâi ǹáa kulâi a Zîsɛ Kôrai pa-tãi.

⁷ Ǹɛ́lɛɛ̂i kámaa-mɛni kíli é tóo ŋá kákelee, kpɛ́ni fêi, kákaa ńii su, kwa kâa-ni kú ƃo a m̀ɛlɛ-seei sɔlɔ ƃo-ƃela, ŋ́gɛɛ máŋ kpini-pɛrɛ mui, da ńdɔɔ Duŋ Lɛ́lɛɛi mɛni ma é pɛ́lɛ ŋɔtɔ̃yâi mai.

⁸ Ɣâla káa a ŋásêre a berei ŋa kákelee káwɛ̂lii la a Zîsɛ Kôrai ŋɔwɛli kɛ́-maai.

⁹ Ŋa Ɣâla fɛlîi a gɛ́ɛ káwɛli-kɛ-maai é ƃɔ̂lɔ a zu kɛtɛ mɛni-kɔlɔŋɔɔ su da mɛni-ŋa-kaa,

¹⁰ a gɛ́ɛ ka pɔ̂ri mɛni lɛ́lɛɛ lɛ̂i, a gɛ́ɛ ŋɔ́nɔ kákɛ a kámaa waa kásɔŋ fé kɛ́ káa Kôrai ŋɔɣelei mɛni ma.

¹¹ Kálaa fɛɛ̂i a tɔ̃yâ laa-la ŋɔƃa nyíi pa Zîsɛ Kôrai sarâi Ɣâla ŋɔfólo-laai da ŋɔlaa-maa-tɛi mɛni ma.

Ŋákili-ŋa-siai su, kɛ-ɣeniɛ su-kulâi ƃa Kôrai

¹² Ŋánûa, ŋa ŋ̀wɛ̂lii ká gɔ́lɔŋ a gɛ́ɛ mɛni-ŋai kɛ̀ a ńyãai dí kɛ̀ a gɛ́ɛ Duŋ Lɛ́lɛɛi é lí tuɛ-pere.

¹³ Gɔmɛnɛi ŋuŋ-tuɛ gɔkuluƃa-ŋai kélee da ǹúu kpeli-ŋai dí kɛ̀ a gɔlɔ-ŋɔɔ a gɛ́ɛ gbini-pɛrɛi ŋá kɛ̀ mui, ŋá kɛ̀ m̀u Kôrai mɛni ma.

¹⁴ Ŋánûai dámaa-ɣele da nâa láa a Kúnuu-namui ḿbiliɛɛ kpini-pɛrɛ mu sarâi, dílii a kpele kpɔ́ a ŋ̀ánaa a gɛ́ɛ dífe yao a Ɣâla ŋɔwóoi ƃoɔɔ.

¹⁵ Núu da-ni da Kôrai maa-mɛni ƃo a tólo da ŋɔ̃lɛ, kɛ́lɛ, núu kpeli-ŋai da mò a lii-lɛlɛ.

¹⁶ Ǹyaŋ maa-ƃelai ŋí da gɛ̀ é kúla wɛli-kɛ-maa su. Dí gɔ́lɔŋ dí ḿbu ƃɛ a gɛ́ɛ ŋá Duŋ Lɛ́lɛɛi maa kɔ̃́ɔ.

¹⁷ Kɛ́lɛ, ǹúui duɛ-tuɛ-ŋai dí Kôrai maa-mɛni ƃo é kúla ŋɔ̃lɛ kɛ́ɛ su, ve kula ni dílii su. Kɛ́lɛ, dí kɛ̀ gâai a gɛ́ɛ dí kɛ̀ ńii sólîi tãi ŋá kɛ̀ la gbini-pɛrɛi mui.

¹⁸ Lé ƃe ŋaŋ? Gáa nɔ́ a sɛŋ a gɛ́ɛ pere sii kélee su, à nɛ̀ɛ ma kpîŋ é kɛ́ a wôya-pere kpaa máŋ tɔ̃yâ-pere, Kôrai maa-mɛni ƃóɔɔi, ǹyaŋ ńii lâai maa-mɛni ma.

¹⁹ Tɔ̃yâ ma, ńii a pâi nɛ̃ɛ̂i nɔ́ wɔlɔ. Kpɛ́ni fêi, ŋá gɔ́lɔŋ a gɛ́ɛ Káɣâla-fɛliɛ su da Zîsɛ Kôrai Ŋɔmɔlêŋ ŋɔkpɔŋ-mâai, nyíŋi a pâi kɛ̂i a ŋáƃalo-laa,

²⁰ yɛ̂ɛ berei ŋátɔ̃yâ-maa-kpɛŋ káa la da gili-kɛ-zui gáa ǹyêei a gɛ́ɛ fé pâi ŋumɛ̂i mɛni kélee ma, kɛ́lɛ, lii-kpele támaa a pâi nâa kɛ̂i ńyêei, yɛ̂ɛ berei è wɔ́lɔ kɛ̀ la ńyêei, a gɛ́ɛ ŋa pâi ƃaa kɛ́-maa tɛɛ̂i Kôrai pɔ, à nɛ̃ɛ ma máŋ ŋá kɛ́ a ḿvulu kpaa máŋ ŋá sáa.

²¹ Kpɛ́ni fêi, ŋákili-ŋa-siai su, kɛ-ɣeniɛ su-kulâi ƃa Kôrai, saa kɛ́ ƃo a mɛni lɛ́lɛɛ máŋ é tɛ́ɛ nyíti ma.

²² Kɛ́lɛ, à kɛ̀ ŋ́gaa niî nɔ́ ɣele ma, gɛ̀ ní zu-kulâi ƃa ŋá pâi nîi ƃâi. É máŋ kɛ́ ti nyíi ŋa pâi ǹɛ̂i, fé gɔ́lɔŋ.

²³ Ŋ́gbaaŋɔɔ̂i ŋá ǹɛ́ a gɛ́ɛ ŋá kɛ́ ɣele ma kpaa máŋ ŋá sáa. Ŋa ŋ̀wɛ̂lii ŋá sáa ŋá kɛ́ Kôrai kɔlɛ, kpɛ́ni fêi, nyíti lɛ́lɛɛ̂i kpɔ́ a ŋ̀ánaa.

²⁴ Kɛ́lɛ, à kɛ̀ ŋà kɛ̀ ɣele ma, gɛ̀ ní mɛni lɛ́lɛɛ ká ti kámɛni ma.

²⁵ Ńaâi kpɔ́ a nyíŋi a ǹɛ́lɛɛ. Ŋá gɔ́lɔŋ a gɛ́ɛ ŋa pâi kɛ̂i ɣele ma ŋá kɛ́ kákelee kákɔlɛ káƃɔlɔ mɛni ma da lii-nɛ̃ɛ kúlaa laa-la su,

²⁶ a gɛ́ɛ sâpo támaa é kɛ́ káyêei ka lii-nɛ̃ɛ kula Kôrai kponôi ńzarâi, kpɛ́ni fêi, ŋa pâi kápɔ ŋɔ́nɔ.

²⁷ Ka ǹɛɛ nɔ́ naa kakɛ-ɣeniɛi kɛ-pere é kɛ́ Kôrai ŋɔtuŋ lɛ́lɛɛi ŋɔperei ma, a gɛ́ɛ a nɛ̃ɛ ma kpîŋ ŋá pá a gɛ́ɛ ŋá kákaa kpaa máŋ ŋá kɛ́ ŋ́ɛi pôlu, ŋá mɛni a gɛ́ɛ kákaa tɔɔ̂ni a gbanaŋɔɔ mɔlêŋ tɔnɔ su a kili-ŋa-sia tɔnɔ, kátɔɔ̂i kɛ́ ƃô tɔnɔ ká kɛ́ kɔ́ gîe ma Duŋ Lɛ́lɛɛi maa-laa-lai mɛni ma.

²⁸ Káfe yao kákpɔara-ƃelai yee-ŋa sɛŋ kélee ma. Ǹyaŋ ŋɛi-kɛ-maa su ponoɔɔ ká ŋí dísu-karai mɛni ma, kɛ́lɛ, gáa a ŋɛi-kɛ-maa káƃalo-laai mɛni ma, nyíi kula Ɣâla yêei.

²⁹ Kpɛ́ni fêi, ǹɛɛ̂i kâa a gɛ́ɛ Kôrai maa-mɛni ma káfe laa nɔ́ la, kɛ́lɛ, ka mɛni soli káa mɛni ma.

³⁰ Kákaa namu tɔnɔi kɔ̂i nyíi ká gàai, ǹyaŋ kákaa nâa mɛnîi a gɛ́ɛ gáa a ŋánamui.