Kɔleŋtiɛŋ Veerɛi 1 - Ŋ̀âla Kɔlɔ Maa Waai

La-ti-maa

¹ Ńyãa Pɔ̂ɔ, ŋ́gaa a Zîsɛ Kôrai ŋɔsia-nuu yɛ̂ɛ berei Ɣâla ŋɔnîa-mɛnii káa lai, kwa Temete nyíi gáa a ku ƃarâŋ-nuui, Ɣâla-toli-kpɔŋ gáa Kɔleŋ da Ŋ̀âla-ƃelai kélee díkaa Ɛkeya-lɔii kwaa kélee:

² Ƃɛlɛ-sêe da lii-sêe dí kɛ́ káyêei é kúla Kúnâŋ Ɣâla yêei da Kúnuu-namui Zîsɛ Kôrai.

Pɔ̂ɔ è sɛɣɛ-fêi tɛ̀ɛ Ɣâla pɔ́

³ Lûwa é kɛ́ Kúnuu-namui Zîsɛ Kôrai Ǹâŋ Ɣâla ma nyíi gáa a maloŋ-kaa-Naŋ da ŋa-nɛnɛ-Ɣalai

⁴ nyíi a kúŋa nɛ̀nɛ kúmɛni-kpɔ̂lui kélee su a gɛ́ɛ kúa máŋ pɔ̂ri é kɛ́ kûɛ ku diai ŋá nɛnɛ díkaa mɛni-kpɔ̂lu sui, a ŋa-nɛnɛi nyíi Ɣâla a kúa kpîŋ kúŋa nɛ̀nɛ lai.

⁵ Kpɛ́ni fêi, à kɛ̀ ku Kôrai ŋɔmɛni-solii dámaa sɔlɔ ƃô, bere nɔ́ ƃe ǹyaŋ kwa pâi ŋa-nɛnɛ támaa sɔlɔ ƃôi la máŋ Kôrai sârai.

⁶ A kɛ̀ kwà mɛni-kpɔ̂lu sɔlɔ ƃô, gɛ̀ ní gáa káŋaa nɛnɛ mɛni ma da káƃalo-laai. A kɛ̀ kwà ŋa-nɛnɛ sɔlɔ ƃô, gɛ̀ ní gáa káŋa-nɛnɛ mɛni ma nyíi ká zɔlɔ ƃô tãi ká tɔ̀ɔ la a lii-kpele-pere mɛni-soli tɔnɔi su nyíi ku zɔlɔ ƃôi.

⁷ Gili-kɛ-zui gáa kúyêei kámɛni mai, va tumo. Kpɛ́ni fêi, kú gɔ́lɔŋ berei ká kúmɛni-solii da sɔlɔ kàa lai, ka pâi máŋ kúŋa-nɛnɛi da sɔlɔ ƃôi.

⁸ Kpɛ́ni fêi, ŋánûa, kúfe ŋ̀wɛ̂lii a gɛ́ɛ kákɛ a káƃoɔɔ mɛni-kpɔ̂lui ku zɔlɔ ƃô Eesiai m̀ɛni ma; kpɛ́ni fêi, mɛni-kpɔ̂lui è kɛ̀ kpɔ́ a ŋwiɛɛ kûa a dámaa nyíi kúfa pɔ̂ri mui, ǹyaŋ kúlɛ̂woi kpîŋ maa-lii-sɛlɛŋ è kɛ̀ kûa.

⁹ Tɔ̃yâ ma, è kɛ̀ kúkili ŋá a gɛ́ɛ da kúsaa-mɛni ƃó kúa; kɛ́lɛ, nyíti e kúkɛ̀ a gɛ́ɛ kúfe kúkili làa kúa kpîŋ kûa, kɛ́lɛ, kú kúkili láa Ɣâla ma nyíi a núu mu siɣe saa yêei.

¹⁰ È kúkùla zaa-woloi tí lá, ǹyaŋ a pâi ŋɔ́nɔ kúkula-yeei kɛ̂i; kwa kúkili pu ma a gɛ́ɛ a pâi ŋɔ́nɔ kúkula-yeei kɛ̂i.

¹¹ Fɛ́ɛ ka kpɔŋ kûa máŋ a Ɣâla fɛliɛ a gɛ́ɛ núu támaa dí sɛɣɛi-fei tɛɛ kúmɛni ma m̀ɛlɛ-seei Ɣâla è dɛ̀ɛ kúpɔ Kúɣâla fɛliɛ támaai mɛni mai, mɛni ma.

Pɔ̂ɔ fé pá ní lé mɛni ma?

¹² Kpɛ́ni fêi, kúyoŋka téɛɛ ká ŋí, kúkili-ŋa-siai m̀aa sêre-faai ƃa a gɛ́ɛ kwa tûa lɛ́lɛɛ kɛ́ ŋ̀éniɛi su a Ɣâla ŋɔmaa-waa-laai da ŋɔtɔ̃yâ laa-lai. Kútûa lɛ́lɛɛi dámaa káa kápɔ-pere. Kúfe gɛ̀ ní a ǹɔii ŋí su-tarei, kɛ́lɛ, kú gɛ̀ a Ɣâla ŋɔƃɛlɛ-sêei.

¹³ Kpɛ́ni fêi, m̀ɛnii nɔ́ ka pɔ̂ri ǹónôi ka táre zui nya ƃe kwa bɔ̃̀yɛ kápɔ naa. Gáa ŋ́gili ŋá ka pâi tárêi gélee su a ǹɛ́lɛɛ,

¹⁴ yɛ̂ɛ berei ka táre la zu a gɛ́ɛ kálii é kɛ́ a nɛ̃ɛ kúmɛni ma Zîsɛ Kôrai ŋɔɣelei ma, yɛ̂ɛ berei kúlii a pâi kɛ̂i la a nɛ̃ɛ kámɛni mai.

¹⁵ Ŋá kɛ̀ ŋ́wɛ̂lii ŋa pa kápɔ a maa-ŋuŋ a gɛ́ɛ ká lii-laa sɔlɔ ƃó gîei feerɛ, kpɛ́ni fêi, ŋá kɛ̀ a ǹáa a mɛnii ŋá mòi.

¹⁶ Ŋá kɛ̀ ŋ̀wɛ̂lii ŋa kɛ́ liî Masadonia, ŋá tɛ́ɛ a kápɔ naa-pere ŋa kánaa káa ŋá kúla naa ŋá pá ŋɔ́nɔ pôlu kápɔ a gɛ́ɛ ká ńdɛɛ Zuda.

¹⁷ Ŋá kɛ̀ tíi támaa kɛ̂i tãi ŋá kɛ̀ ŋ̀wɛ̂lii ŋa nyíŋi kɛ́ lai? Ŋa ŋámɛni kpɛtɛɛi kɛ̀ yɛ̂ɛ ŋ̀éniɛi ŋí su-nuu, nyíi gbɛtɛɛ̂i nɔ́ a gɛ́ɛ é kɛ́ Ooei, Kpa, a maa félaai?

¹⁸ Yɛ̂ɛ berei Ɣâla sã́âi la kpɔ́ a tɔ̃yâi, kúwooi fe niî kɛ́ ni a Ooei, Kpa.

¹⁹ Kpɛ́ni fêi, Zîsɛ Kôrai Ɣâla Ǹóŋ nyíi kwa maa-mɛni ƃò kásamâi, kwa Seveenɔ da Temete, ve niî kɛ́ ni a Ooei, kpaa máŋ Kpa. Ooei nɔ́ ƃe a tãi kélee gbonôi.

²⁰ Kpɛ́ni fêi, Ooei káa Ɣâla ŋɔkono-tee-ŋai kélee ma gbonôi. Mɛni ƃe kwa “É kɛ́ tí” ƃò la Zîsɛ sarâi Ɣâla ŋɔfólo-laai mɛni ma.

²¹ Kɛ́lɛ, Ɣâla ƃe kwa yá kúkɛ̀ ku tɔ́ɔ a gbanaŋɔɔ Kôrai kponôi, ǹyaŋ a kúmaa waa ŋɔtíi mɛni ma.

²² A ŋɔŋɛi-kɛ-maai kɛ́ kûa. A Ŋɔmɔlêŋ tɛ́ɛ kúpɔ kúlii-ŋai su yɛ̂ɛ kono-tee-woo.

²³ Kɛ́lɛ, ŋa Ɣâla marê kɛ̂i a gɛ́ɛ é kɛ́ a ŋáserêi-sapoi fé pá ní la Kɔleŋ, ǹyaa ƃa fé kɛ́ ní ŋ̀wɛ̂lii ŋá kálii sɛlɛŋ.

²⁴ Zu-kulai fa kúwala-wala è kɛ́ kálaa-lai mɛi. Kwa káa-ni kwa tíi kɛ̀ kálii-nɛ̃ɛi mɛni ma, kpɛ́ni fêi, kákaa tɔ̂ɔni a gbanaŋɔɔ kálaa-lai su.