Mateo 1 - Kuna Border

Jesucristo-e-tadgan ukin-ukin ampagusmalad

¹ Imi Jesucristo David-akar tani, tegin David Abraham-akar tanimo. Tenal antin Mateo, Jesucristo-e-tadgan-ampagusmalad akpene-akar nermakal-maidgin chunmanejun.

² Imi Abraham-machidin nug Isaac. Tegin Isaac-machidin nug Jacob. Tegin Jacob-machidin nug Judá, tegin Judá-urpamal-nikusmo.

³ Tegin Judá-machidin nug Fares, tegin e-machi-piddin nugmo Zara. Tenal we machi-walbogid-e-nandin nug Tamar. Tegin Fares-machidin nug Esrom. Tegin Esrom-machidin nug Aram.

⁴ Tegin Aram-machidin nug Aminadab. Tegin Aminadab-machidin nug Naasón. Tegin Naasón-machidin nug Salmón.

⁵ Tegin Salmón-machidin nug Booz, tenal Booz-e-nandin Rahab. Tegin Booz-machidin nug Obed, tenal Obed-e-nandin Rut. Tegin Obed-machidin nug Isaí.

⁶ Tegin Isaí-machidin nug David tenal Daviddin erreyga megwis. Tenal Errey-David-machidin nug Salomón. Tenal Salomón-e-nandin David-Uríasgin-ome-idirijad.

⁷ Tegin Salomón-machidin nug Roboam. Tegin Roboam-machidin nug Abías. Tegin Abías-machidin nug Asa.

⁸ Tegin Asa-machidin nug Josafat. Tegin Josafat-machidin nug Joram. Tegin Joram-machidin nug Uzías.

⁹ Tegin Uzías-machidin nug Jotam. Tegin Jotam-machidin nug Acaz. Tegin Acaz-machidin nug Ezequías.

¹⁰ Tegin Ezequías-machidin nug Manasés. Tegin Manasés-machidin nug Amón. Tegin Amón-machidin nug Josías.

¹¹ Tegin Josías-machidin nug Jeconías. Tenal Josías machimal-pimalad-nikusbal. Imi teun takalgu, Babilonia-tulemal aga e-neg-kweburzhe Israel-tulemal-chesmal e-mosmalga imagal.

¹² Tegin Babilonia-tolgan Israel-tulemal-chesmalad-cholbal Jeconías machi-nikusbal, Tenal we machidin nug Salatiel. Tegin Salatiel-machidin nug Zorobabel.

¹³ Tegin Zorobabel-machidin nug Abiud. Tegin Abiud-machidin nug Eliaquim. Tegin Eliaquim-machidin nug Azor.

¹⁴ Tegin Azor-machidin nug Sadoc. Tegin Sadoc-machidin nug Aquim. Tegin Aquim-machidin nug Eliud.

¹⁵ Tegin Eliud-machidin nug Eleazar. Tegin Eleazar-machidin nug Matán. Tegin Matán-machidin nug Jacob.

¹⁶ Tegin Jacob-machidin nug José. Tenal Josédin María-e-machered. Tenal Maríadin Jesús-e-nan. Tenal we Jesús imis pimal Cristo, Pab-akpene-chogzhad-palmidagoed-tule.

¹⁷ Imi Abraham-akar Davidzhe tadgan-walambe-kakabake kumal. Tenal David-akar, Israel-tulemal Babilonia-tulemalzhe-kalejadzhe tadgan-walambe-kakabake kumalmo. Tenal Babilonia-tulemal Israel-tulemal-kajad-akar, Cristo-nonikidzhe tadgan-walambe-kakabake kumalbal.

Jesucristo mimmilejad

¹⁸ Imi Jesucristo-mimmilejad weob kusdo. Imi teun takalgu, Jesús-e-nan-María tule-José-nugadbak aga kaka-ukchamal aga nikumalgal. Tenal José ampayo María-nikueddu, María taklegal Pab Purpa Nuedga pato ponigwal-kwichi.

¹⁹ Tenal José-María-macheredga-kuoed tule-nued-choggu, al José tulemal-wagin yapa María-opinkechegus. Al José otukal nabiridgin María-ebebi-kual.

²⁰ Tenal José ampa María-ponigwal-kwichidgin-pinzhediidgin, Pab-angel Joséga kabdakedgin chunmanoni, Joséga chogal: “José-David-e-wagwa, imi pe akalzhul María-nikuo pe-omega kugal. Imi María-we-nuchu-nikuneed Pab Purpa Nuedga nikudanikid.

²¹ Tenal María nuchu-nikunonikil, machi-nikuo. Tenal pe we machi-nugzhao Jesús, ade iskued-akar e-tulemal-abonogo.”

²² Imi Maríaga tegin Joséga pel-kwapa weob immal kujaddin, Pab Tummad akpene e-kaka-palchogedbal iktualeba chogzhagujad-yopí kunoni.

²³ Tenal Pab-kartagin chogzhado: Imi puna-yae-walgwen-machered-kwen-wichulid ponigwal-kwisgunoniko, tenal we puna machi-toto-nikunoniko. Tenal we machi nugzhalenoniko Emanuel. (Wedin choglege: “Pab anmalbak kudii.”) Is. 7:14

²⁴ Tegin José kabmaid-akar atasgu, angel-ega-chogzhad-yopí imas. Al José Maríabak aga nikunonimalzhun.

²⁵ Tenal José María-nikusgu, apka omega María-kwen-imaszhul. Tenal José María-machi-nikujad-cholbal kep omega María-imas. Tenal José we machi-nugzhaszhun, Jesús.