Marcos 6 - Kuna Border

Tulemal Nazaretkin Jesús-kwen-abingaszhulmalad

¹ Tegin Jesús Capernaum-akar nad, aga e-tunkujad-neg-kweburzhe, Nazaretche. Tenal e-chapingan Jesúsbak mes nadmalmo.

² Tegin Jesús Nazaretche omosmalgu ulukued-ibegin Judio-ormaked-neggin Pab-igalbal tulemal-oturdakal. Tenal Jesús-e-chunmakedbal tule-íchejul-Jesús-itobukmalad weob pakal pesmal. Al tulemal-Jesús-itobukmalad aga emal-emal chunmakalmal chogalmal: —¿Pia we tulede turdas-wede, weob chunmakeddé? ¿Ibiga nabir pinzheed-nika chunma-wede? ¿Tegin pia kannaleged onosbal-wede, immal-taktijulid imagal?

³ ¿We tulede, ulu-chobedzhulzhí? ¿E-nande Maríajulzhí? ¿Tegin e-urpamalde Santiago, José, Judas, Simónzhulzhí? ¿Tegin e-punmal anmalbak wegin pukwamalmojulzhí? ¿Tede toa Jesús-itogo, a chunmanaiddé? Anmal itoged saté. Tegin tule-Nazaretkinmalad istar Jesús-takalmalzhun.

⁴ Tegin Jesús tulemal-istar-e-takchamaladga chogal: —Imi tulemal chogmal: ‘tulemal-neg-kwebur-pimaladgin tule-tummadyob Pab-kaka-palchogmalad-takmal. Tenal tulemal-e-neg-kweburginmalad tegin tule-e-neg-yaginmalad tegin e-kwenamaladdin tule-tummadyob Pab-kaka-palchogmalad-kwen-takchulmal.’ Al pemal tule-tummadyob an-kwen-takchulmalmo.

⁵ Tenal tulemal-Jesúsgin-kwen-ibzhejulidbal Jesús Nazaretkin immal-taktijulid kwen imaszhul-kus, pinche unnila chunkalgin-ebujadbal iche-iche tule-yemalad-wis-nudas.

⁶ Tenal tulemal-Nazaretkinmalad-pel-kwablejal Jesúsgin pengusmal. Al Jesús weob pakal pes. Tegin Jesús neg-kwebur-purwiganagin pipirmadi-kual, tegin Pab-igalbal tulemal-oturdadi-kusbal.

Jesús aga e-chapingan-palmijad Pab-neg-takmaidgin chunmagal

⁷ Imi teun Jesús aga e-chapingan-walambe-kakabogwadzhe kocha. Tegin Jesús wal-walbogin, e-chapingan-palmijogal. Tenal Jesús aga e-chapinganga igal-ukcha tulegin-nia-mamikid-onigal.

⁸ Tegin Jesús aga e-chapinganga chogal: —Imi pe nadmalal, pe melle immalmal chedo, kabubi unnila pe chedmalo. Pe melle mas-kunned chedo, pe melle muchila chedo, pe melle mani chedo.

⁹ tenal pe kutar-yowigwadbi pe nemalo, tegin pe melle mol-ogwaged chedbalo, chunkal-kwabi pe nemalo.

¹⁰ Tegin Jesús aga e-chapinganga chogalbal: —Pe neg-kwebur omojal, tule-pe-odojad-neggin pe togzhal, we neggin ilgwen pe peio pe naoedzhe; melle neg ogwa-ogwa nanemalo.

¹¹ Tenal meke ibi-neg-kweburgin, pe-Pab-Tummad-kakapurwa-chogdanikidbal tulemal yapa pe-abingeel, yapa pe-itogel, ilgwen pe we neg-akar pe nao. Tenal pe kutargin-pur-naniid opat-opat imako oyogal, Pab-kakapurwa pato we tulemalzhe arpi, tenal we tulemal Pab-kakapurwa kwen abingaszhulmal. Tenal tegi-kuo, Pab-kakapurwa pal kwen nonikojul. (Imi an chunchunnad pemalga chogdo: imi tule-pe-kwen-abingaszhulmaladga, Pab tulemalga igal-itogalil, we tulemal Sodoma tegin Gomorra-tolganga, pul-pule sapejul oturdalenonimalo.)

¹² Tegin Jesús-e-chapingan nadmalgu, tulemalga Pab-kaka-nuegan palchogdi-kualmalzhun: “Imi pedin aga ulubgin iskuedgin pukib-itogenabmal.”

¹³ Tegin Jesús-e-chapingan ichejul tulegin-nia-mamikid-onis, tegin tule-nonogin-kwallu-eyojadgin ichejul tule-yemalad-nudasbal.

Herode Juan-Bautista-mechad

¹⁴ Tegin tulemal-pel-kwapa Jesúsgin chunmaked-kibi-kualmalgu, Errey-Herode kep Jesús-wisgualmo. Imi teun tulemal chogalmal: —Imi we Jesús, Juan-Bautista-kannan-tullejad, ¿al nabir immal-taktijulid imayé?

¹⁵ Tegin tule-pimalad-wal-walgwen chogmalmo: —Imi we Jesús, akpenegwad-Pab-kaka-palchoged-Elías. Tegin tule-pimalad chogmalmo: —Jesúsde Pab-kaka-palchoged-akpene-megwijadyobid.

¹⁶ Tegin Herode Jesús-wisgusgu, chogal: —Imi we Jesús, ¿Juan Bautista tukal-idiral an tar-mechadzhulzhí? ¿Imi we tule kannan tullesbaldé?

¹⁷ ¿Ibiga Herode teob chogal pe ebinzhe? Nabir. Imi teun Herode e-urpa-Felipegin ome-Herodías-idiris.

¹⁸ Al Juan Herodega pakal-pud chogzhagusdo: —Imi pedin noal kudii. ¿Ibiga pe aga urpa-Felipegin ome-Herodías-idiris-wede? Imi anmalga igal weob kwen maichul.

¹⁹ Al Herodías istar Juan-taknoni, tegin Juan-mesbi-kualzhun. Tenal Herode Juan-kas, tegin oturdaleged-neggin Juan-odos, tegin ezha-tubgin Juan-etisbal. Al Herodías keg kugus Juan-mesgal.

²⁰ Tenal Herode Juan-tob. Tenal Herode wiis Juandega, tule-napírragwad, tule-ilgwenad. Al Herode Juan-pentas melle Herodías Juan-mesgal. Tenal Herode Juan-itosgu ede istar-tii, Herode ulubgin pokidikid kwen nikchul-pes. Tenal Herode yabli yer Juan-itos.

²¹ Imi teun Herodías ampa igal-aminai, igi nabir Juan-mesgal. Tegin Herodíasga ibe noni. Imi teun Herode pel-kwapa-e-tummaganzhe kocha, e-mimmilejad-ibegin mas kunmalgal. Tegin tule-tummagan-Herode-pentamalad, chulub-tummagan tegin Galilea-napkin-mamimalad-e-tummagan mas kunnonimal.

²² Tegin tule-tummagan mas-kunpukwadgin, Herodías-e-chiskwa tognonigu, Herodega kwilal. Tenal Herode tegin e-tummagan yer puna-kwiled takchamal. Al Herode punaga chogzha: —Imi meke-ibi-immalmal pe peiel, pe anche ekiso, an pega uko.

²³ Tegin Herode kannan punaga chogzhabal: —Imi an Pab-wagin napírra pega chogdo: meke-ibi-immalmal pe anche ekichial, antin pega uko; imi immalmal-an-nikad, an chunna abalzhal pega uko.

²⁴ Tegin puna nodgu, aga e-nanzhe nad. Tegin puna aga e-nanga chogal: —¿An ibi nabir Herodeje ekiso-diá? Tegin e-nan aga punaga chogal: —Pe Juan-Bautista-e-nono pe ekisodo.

²⁵ Tegin puna kannan ilgwen Herode-chiidzhe nonigu, Herodega chognoni: —Antin imis-imis Juan-Bautista-nono pei, pateagin.

²⁶ Tenal Herode puna-ega-chognonikid itosgu, peyedzhe pukib pakal pes. Tenal Herode Pab-wagin, tegin tule-tummagan-wagin punaga pato kaka-ukchadbal, al Herode punaga keg pal chogel, “Chul”.

²⁷ Tegin Herode ilgwen Juan-oturdalemaidzhe chulub-tule-mejed-palmijogalgu, chulubga chogal: —Pe Juan-tukal idirijal, pateagin e-nono chedago. Tegin chulub nadgu, aka oturdalemaid-neg-yabal Juan-tukal chikcha.

²⁸ Tegin chulub pateagin Juan-nono cheal, tegin punaga Juan-nono ukcha, tegin punade ukin aga nanga ukchamo.

²⁹ Tegin Juan-e-chapingan Juan-purkwis itosgu, e-mui aminonimal. Tegin e-chapingan uanzhe Juan-mui tigapmal.

³⁰ Tegin Juan Bautista purkwijad-cholbal, Jesús-e-chapingan-walambe-kakabogwad nonimalgu, Jesúsbak ormasmal. Tegin e-chapingan pel-kwapa Jesúsga chogzhamalzhun, pél emalga ib kujad, tegin emalde pél tulemal-oturdasbalid.

Jesús masgin miliatal-tulemal-okuchad

³¹ Imi teun tulemal ichejul nugumai, tegin tulemal-anal ukpomaibal. Al Jesús aga e-chapinganbak ulukued-igal kwen nikchulmal, tegin Jesúsmal nuekwa mas-kunned-igal pel nikchulmalbal. Tegin Jesús aga e-chapinganga chogal: —Anmalpí akne wis nemal ulukugal.

³² Tegin Jesús aga e-chapinganbak ulgin amalpí mata-kakpal nadmal, neg-tule-nikchulidbal.

³³ Tenal tulemal Jesús-takchamal, Jesúsde pia nad. Tegin tulemal igalbal abarmadmal. Tegin tulemal neg-kweburgangin abarma-nasmalgu, tulemal-neg-kweburginmalad mes nadmalmo. Tenal tulemal yabli Jesús-iktual-omosmal.

³⁴ Tegin Jesús omosgu, pato taknatapmal tulemal-ichejul edu pukwamal. Tenal Jesús tulemal-takchagu, pinzheal: “We tulemal, oveja-ibed-nikchulmaladyob kudimal.” Al Jesús wilejakwa tulemal-takalzhun. Tegin Jesús Pab-igalbal ichejul tulemal-oturdakalzhun.

³⁵ Tegin tad-arkwandanigusgu, e-chapingan Jesúsga chognonimal: —Imi pe tak neg pato chedodani. Tegin pe wisbal, anmal neg-kweburgin pukchulmal; anmal neg-nikchulidbal pukwamal. ¿Imi tulemalde pia aga mas-kunned paknemal-wede?

³⁶ Tenal pedin tulemalga chogenab: ‘Pe neg-kweburzhe nemalo. Chulil, tule-nagnugin-mamimaladzhe, pe nao mas-kunned pakegal.’

³⁷ Tenal Jesús aga e-chapinganga chogal: —Tagoed. Tenal pemal we tulemalga mas-kunned wis ukenab. Tegin e-chapingan Jesúsga chogal: —¿Igiwá? ¿Anmalá? Imi anmal masgin we tulemal-okunkal, wedin mani-tummad. ¿Ibabigwa-arpaged-wilub pe ebinzhe? Wedin ni-walapábak-arpaged-wilub. ¿Imi weob karkegu anmal masgin tulemal-okunnodé?

³⁸ Tegin Jesús aga e-chapinganga chogal: —¿Pemal walbigwa madu wis nikamal-ade? Pe wis taknegweldo. Tegin Jesús-e-chapingan madu-nika takchagu, Jesúsga chognonimal: —Anmal madu-walatal, ua-ukabo wis nika. Tegin Jesús aga e-chapinganga chogal: —Tegil nueddo.

³⁹ Tegin Jesús aga e-chapinganga chogal: —Imi pe tulemalga chogo: emalde kagan-arraragwadgin tunnul-tunnul ampaguenabmal.

⁴⁰ Tegin tulemal wala-tulaatalgin, tegin wala-tulabo-kakaambegin tunnul-tunnul ampagusmal.

⁴¹ Tegin Jesús walatal madu chus, tegin ukabo ua-chusbal. Tegin Jesús nikpa atadgu, Pab Tummadga tog-nuedi chogal. Tegidgin Jesús madu pipichis, tegin madu Jesúsga melgud. Tegin Jesús aga e-chapinganga ukcha, tulemalga mimigal. Tegin Jesús ua-ukabogid ampa madu-imajadyob imasbal, tegin ua Jesúsga melgudmo. Tegin Jesús-e-chapingan tulemalga ua-mimismalbal.

⁴² Tegin tulemal-pel-kwapa immeché mas kuchamalgu,

⁴³ Jesús-e-chapingan mas-okpismalad wesmal. Tegin mas-kunned ampa karpa-kwaambe-kakabog okpis.

⁴⁴ Imi teun tulemal-mas-kuchamalad, macherganbi miliatal. Tenal omegan, tegin purwigana kwen choglejul.

Jesús ti-askin kannamakal e-chapinganzhe nonikid

⁴⁵ Tegin tulemal-mas-kuchamalad-cholbal, Jesús aga e-chapinganga chogal: —Imi pemal akalzhul antu ulgin opakal nemalo, Betsaidaje. Tenal antin tulemal-wis-takkwelo. Tegin tulemal-naded-cholbal an pe-cholbal natapmogo.

⁴⁶ Tegin Jesús tulemal-akar nadgu, yalzhe nad Pab Tummadzhe kolgal.

⁴⁷ Tegin tad-arkwatku, Jesús-e-chapingan ulgin ampa mata-magadbal natapmal. Tenal Jesús ampa walkwénna yalgin pes.

⁴⁸ Tegin Jesús panna-akar aga e-chapingan-takcha, ulgin peyedzhe kamme minanimal. Tegin purwa peyedzhe abin kolmaidbal e-chapingan peyedzhe wilenanimal. Tegin wakurudzhik-kallin-namakedbal, Jesús aga e-chapingan-natapid-inik, ti-askin kannamanatapmo. Tenal Jesús aga e-chapingangin pakal-nao chognatapin.

⁴⁹ Tegin Jesús-e-chapingan ti-askin kannamadani Jesús-takalmalgu, pinzhealmal: “Wedin tule-purpa.”

⁵⁰ Tenal Jesús-e-chapingan nued takchamalan wedin Jesús. Tenal Jesús-e-chapingan yabli Jesúsgin kwakismal. Al e-chapingan sapejul kolmasmal. Tegin Jesús yok e-chapinganzhe kote chogal: —Melle pe kwakiemalma, aga pe niga okannoma. ¿Pe takchulzhí an?

⁵¹ Tegin Jesús aga e-chapinganbak ulgin mes nakwiszhun. Tegidgin purwa kep pokigusmojun. Tenal Jesús-madu-omelojadbal Jesús-e-chapingan weob pakal peied-wilubzhulmalan.

⁵² Tenal Jesús-e-chapingan nono-akpurrujadbal, ampa aku itomal Jesús ega madu melojad. Al Jesús-e-chapingan purwa-pokichajadbal weob pakal pesmal.

⁵³ Tegin Jesús mata opasgu, Genesaretche nonimal. Tegin Jesús-e-chapingan ul-esnas egwasmalgu,

⁵⁴ Jesús ul-akar aktes. Tegin tulemal mag takmal wedin Jesús.

⁵⁵ Tegin tulemal Jesús-noni wisgusgu, negganbal abarmadmal, tule-yeed-amigal. Tegin tulemal Jesús-chiidzhe, kachigin tule-yemalad-cheinonimal.

⁵⁶ Al Jesús meke pia nadel, neg-kwebur-tummagangin, neg-kwebur-purwiganagin, tegin neg-kwa-kwagwen-chijiidgin-tulemal-ampagumaladgin, tulemal Jesúszhe tule-yeed-cheinonidamal. Tegin tulemal Jesúsgin wilenaigualdamal, Jesús-mol-tuku wis ebumalgal. Tegin Jesús tule-yemaladga chogalda: —Tegil pe akalzhul an-mol-tuku ebugode. Tegin tule-yemalad-Jesús-ebusmalad pél nugusmal.