Apocalipsis 5 - Kuna Border

Pab-Jesúspí igal-nika, karta-ebirmakal-maid egegal

¹ Tegin an takchabaldo, Pab-ol-kangin-chiid chunkal-nuedzhik karta-ebirmakaled kani-chii. Tenal we kartadin egek nermakal, tegin ilakugle immal-ninniledgin chaktigal-maibal.

² Tegin an takchabal, angel-tummad sapejul kolal, chogal: “¿Toa igal-nika, we karta-ebirmakaledgin-immal-ninniled-naid wankegal, tegin karta egegalbal?”

³ Tenal tule-itobukmalad angel-kwen-abinchuszhulmal, ilgwen yakir pesmal. Tenal tule-kwen-onoszhulmal, Pab-neggin pel chul, iti-napkin pel chul, napil-ulpal pel chulbal karta egegal, tegin karta takegal tule-kwen-onoszhulmalbal.

⁴ Tegin karta egegal tegin karta takegal tule-kwen-onoszhulidbal antin peyedzhe pukib-itogedbal pela-pela poalzhun.

⁵ Tegin chelegan-tummagan-walgwen anka chogal: “¡Pe melle poma! Imi pe takto, Judá-Tule-Achu-Kinnid-nugad tegin David-akar-Tanikid-Tule, e-aichulmaladgin pato nakwis. Al we tule igal-nika, ilakugle-immal-ninniled-eniral-naid wankegal, tegin we karta egegalbal.”

⁶ Tegin an takchabal, ol-kan-chiid-nabal, tegin immal-tulgan-walabakegwad tegin chelegan-tummagan-wala-tulagwen-kakabakegwad-abalgin, Oveja-chapini unmo, tenal tule-tar-mechadyob-takle. Tenal Oveja-chapini peb-walakugle nika, tegin imia-kwakugle nikabal. Imi we imia-kwakugled chogle, Pab-Purpa-walakugled pel-kwapa-nap-naid-ugakche-palmilesmalad.

⁷ Tegin Oveja-chapini, Pab-ol-kangin-chiid chunkal-nuedzhik karta-ebirmakaled kep chunonijun.

⁸ Tegin Oveja-chapini karta chusgu, immal-tulgan-walabakegwad tegin chelegan-tummagan-wala-tulagwen-kakabakegwad Oveja-chapiniga napche tullu-imasmal. Tenal we tulemal-pel-kwapa kal-arpa kani-nemal, tegin ol-murukkin taka-taka immal-wawad kani-nemalbal kuggal. Tenal we immal-wawad choglege, tule-Pabbak-akenanimalad-Pabzhe-koled.

⁹ Tegin immal-tulgan-walabakegwad tegin chelegan-tummagan-wala-tulagwen-kakabakegwad namaked-pingin Oveja-chapiniga namakalmal, chogalmal: Imi tule pe-opurkwijadbal, pe Pab Tummadga pe-abegin tulemal-pakcha, tule chog-ilbal, tule-akal-akal-chunmamalad-ilbal, tule-akal-akal-tamalad-ilbal, tegin nap-nanimalad-ilbal. Al pedin igal-nika karta-ebirmakal-maid chugal, tegin immal-ninniled wankegalbal.

¹⁰ Tenal pedin tulemal-pakcha, Pab-Tummad-e-tulemalga kugal, tegin tule-irwal-Pabga-chunmakedga kumalgalbal. Tegin we tulemal iti-napkin neg-takmalbalo.

¹¹ Tegin an takchabal, Pab-ol-kan-chiid-nabal tegin immal-tulgan-walbakegwad tegin chelegan-tummagan pukwad-nabal, angelmal-miyon-tulaatal tegin ukin mili-milibal ebiris pukwamal.

¹² Tegin an itosbal, angelmal sapejul namakal chogalmal: Imi Oveja-chapini tule-tar-opurkwijadbal igal-nika tule-tummadga kugal, tule-mani-ibedga kugal, pinzheed-nued nikugal, kannaleged nikugal, tule-kin-atamalgal, nug okannolegal, tegin nug otummolegalbal.

¹³ Tegin an itosbal, Pab-pel-kwapa-immal-opinnijad, nikpa-neggined, iti-napkined, napil-ulpalid, termal-askined, tegin termal-ulakad, pel-kwapa namakalmal, chogalmal: Imi Pab-ol-kangin-chiid, tegin Oveja-chapini ilagwen-nadgu otummoledi-kuo, tegin tule Oveja-chapinigin atamalbalo, tegin Oveja-chapini-nug okannoledi-kuo, tegin pela-pela kannaleged nikubalo.

¹⁴ Tegin immal-tulgan-walabakegwad chogalmal: “Teobdo.” Tegin chelegan-tummagan-wala-tulagwen-kakabakegwad napche tullu-imasmal tegin Pab Tummadyob Oveja-chapini-otummoalmalzhun.