Luka 5 - Luka Suvarta 1916 (Kuvi Kond)

¹ Zana samūhomi Paramushreeni zōkoḍi wenzihi evani muhe rihi manzaliĕ evasi Ganezarethu samduri gattu bakki niẓẓiwaha

² ē samduri gattuta manni ri dōningani mestesi; mīnkagattari evaska tānati rēẓiwaha tami wallanga norhi maẓẓeri.

³ evasi ē dōningaña Simonuwai ro dōni engiwaha:— gattuti iẓẓeka nabgadu inzihi evanaï wenziwaha kuggiwaha dōniti zana samuhomitaki bōdha kīhi maẓẓesi.

⁴ evasi bōdha kījali muthi ḍāju:— nīnu dōni bitrita taki kihiwaha mīnka assali mī wallanga meth’du inzihi Simonu tulle wessaliĕ

⁵ Simonu:— zōngitatī! laanga hallee māmbu wāhu ātomi samma māmbu ēnaawa pānaatomi; ātiwa nī hāḍati lehe walla meth’nomi inzihi evani tulle westesi.

⁶ evari ēle kīhiwaha hāreka mīnka asteri, ēdānaki evari walla genza hazzi maẓẓe.

⁷ evari etkeeti dōnita manni tami bōzugattari wāhiwaha tamge tōḍu kījali inzihi evaraki seika kitteri; evari wāhiwaha rī dōni munzini lehe nesteri.

⁸ Simonu Petru ēdāni messiwaha, Jesu menta nōkita menta kuttiwaha:— prabhutī! nannaa pissa hallamu, nānu pāpitee inzihi westesi.

⁹ ēnikīhi iẓẓihe evari asti mīnka rāsitaki evasiĕ evani tulle mannariĕ addazakka āteri.

¹⁰ ēle āhiĕ Simonu tulleti bōzugattari āti Zebedai mrīka āti Jakobuĕ Johanuĕ addazakka āteri. ēdānaki Jesu:— azza anikō! iẓẓetiĕ nīnu mānēi ah’nati āhi manzi inzihi Simonu tulle westesi.

¹¹ evari dōningani gattutaki reẓẓi ḍāju bahēti pissiwaha evani zēẓo perheri.

¹² evasi ro gāḍata mannati kushtu dukha tulle mūtasi ro mānēi maẓẓesi. evasi Jesuï messiwaha menta kuttiwaha:— prabhuti! ninge ishtomi ātihe, nīnu nannaa othi kījali āḍadi inzihi evanaï battimālitesi.

¹³ embatiĕ evasi kēju gōsiwaha evanaï dīgiwaha:— nange ishtomiĕ; nīnu othati āmu inzaliĕ kushtudukha evanaï piste.

¹⁴ embatiĕ evasi:— nīnu imbaani tulle weh’anaha hazziwaha, evaraki sāki kōsomi nī anga pūzāriki tōsiwaha, nīnu othitaki Mose mliphi bōgomika herpamu inzihi hello hittesi.

¹⁵ evani bakkiti samacharomi ōḍe eẓẓeka wēngite. zana samūhomi evani zōkoḍi wennanakiĕ tami rōgingani othnanakiĕ kūḍa wāhi maẓẓe.

¹⁶ evasi prārdhana kījali zāḍata haẓẓesi.

¹⁷ ro nēẓu evasi bōdha kīhi manzaliĕ Galilaja Judaja deshomika wālati nāskatiĕ Jerushalemutiĕ wāti parisājungee dharmashāstromi gūrkee kugga manzaliĕ, evasi othi kīni lehe prabhu blāju evanaki maẓẓe.

¹⁸ ē wēḍa koẓẓeka mānēi bījeki bīsa gattanaï katteli muhe dēkiwaha evanaï bitri taẓiwaha evani nōkita ittali wahiteri samma

¹⁹ loku gotta āhi kūḍitaki evanaï bitri taẓali āḍalaateri, lakka illu muhe engiwaha kirpanga rikhiwaha katteli tulle zakke evanaï Jesu nōkita maddi rēpheri.

²⁰ evasi evari wishwasomi mēlu messiwaha:— mānēiti! nī pāpomika kshaminẓitaï āha mannu inzihi evani tulle wessaliĕ

²¹ shāstrungee parisājungee:— dharmu‐dūshana kēpi manni īvasi imbaasikī? Paramushreeni kiha ōḍe imbaasi pāpomika kshaminẓali āḍinesi inzihi onpa mātheri.

²² Jesu evari onpunga punzihi:— mīmbu mī hījata ēnaa onpi manzeri?

²³ nī pāpomika kshaminẓitaï āha mannu inzihi weh’nai ūñataikī? nīnu ningiwaha tākamu inzihi weh’nai ūñatai kī?

²⁴ ātihe pāpomika kshaminẓali bhūmi muhe mānēi mrīenaki adhikāromi manne inzihi mīmbu punnani kōsomi inzihi evari tulle wessiwaha bījeki bīsa gattanaï messiwaha:— nīnu ningiwaha nī katteli perha koddiwaha nī izzo hallamu inzihi nī tulle wessi manzaï iẓẓesi.

²⁵ zēẓoĕ evasi evari nōkita ningiwaha tānu hunza manni katteli perha koddiwaha Paramushreelaï pāẓihi tani izzo haẓẓesi.

²⁶ waẓẓe zāna addazakka āhihi:— nīnzu kazza iẓintromika mestomi inzihi Paramushreelaï pāẓihi azziti nenziteri.

²⁷ ēḍāju evasi hōẓiwaha Lewi inni ro āshilu gattasi sunkomiti tājuta kugga mannani messiwaha:— nā zēẓo perhamu inzihi evani tulle wessaliĕ

²⁸ evasi wālatani pissa ningiwaha evani zēẓo perhesi.

²⁹ ē Lewi tani izzo evanaki kazza indu kittesi. āshilu gattariĕ tēḍitari hāra zānee evari tulle rāndataki kuggiteri.

³⁰ parisajungee evari shastrungee ēdāni messiwaha:— āshilu gattari tullee pāpunga tullee mīmbu ēni kīhi tinzi unḍi manzeri? inzihi evani shishunga muhe kōpa āteri.

³¹ ēdānaki Jesu:— rōgingkee samma neharaki osso gūrū pāḍa ăusi.

³² wenḍe zīwu pātali nānu pāpungani hāti wātee samma nītigattaraï arga wāha hilloo inzihi westesi.

³³ evari evanaï messiwaha:— Johanu shishunga hāreka upasa prārdhana kīneri, ēle kīhiĕ parisajunga shishunganiĕ kīneri samma nī shishunga tinzi unḍi manneri inzihi westeri.

³⁴ ēdānaki Jesu:— penḍili mrīesi tami tulle manni eẓẓeka penḍili izzotaraï mīmbu upasa kiwikijali āḍiderikī?

³⁵ penḍili mrīesi evari tānati hanni nēẓunga wānu; ē nēẓungaña evari upasa kīneri inzihi evari tulle westesi.

³⁶ evasi evari tulle ro pāḍa westesi. ēnikīhi iẓẓihe:— imbaariwa plaï himboritaki pu’ni ganḍra tāẓi uuri; taẓitihe pū’nai ēdāni geh’ne. ēdi āanaha pu’nani tānati reẓi ganḍra pla’ani tulle andee.

³⁷ imbaasiwa plaï mōñangaña pu’ni drāksharasomi wākh’usi; wākhihe pu’ni drāksharasomi mōñangani laje kīnu, rasomi wānga hanne, mōñanga luha hannu.

³⁸ ātihe pu’ni drāksharasomi pu’ni mōñangaña wakhali walle.

³⁹ plaï drāksharasomi utti zēẓoĕ pu’nani kōrinasi imbaasi hilluusi; pla’aiĕ nehai inzihi westesi.