Luka 4 - Luka Suvarta 1916 (Kuvi Kond)

¹ Jesu parishudhātma nenzitasi āhi Jordanu kaddati wenḍe wāhiwaha ātma walla zāḍataki ōtasi āhi

² rī kōḍi nēẓung asaitānu hāte parhitasi ātesi, ē nēẓungaña evasi ēnaawa tinnaatesi, ēwi rāthi ḍāju evasi hakki ājaliĕ

³ saitānu:— nīnu Paramushreeni mrīenati ātihe heera mlīni lehe ī walli tulle weh’mu inzihi evani tulle westesi.

⁴ ēdānaki Jesu; — mānēi he’era walla mātromi nīduusi inzihi rāẓitai āha manne inzihi evanaki utromi hittesi.

⁵ embatiĕ saitānu evanaï ōhi hazziwaha bhūmi rāzinga bahē ro gāḍekatakiĕ evanaki tōsiwaha; —

⁶ ī adhikāromi bahee ī rāzingti mahimee ninge hījaï, ēdi nange herpitai āha manne, ēdi īmbaanaki hījali māndi maïā evanaki hīi.

⁷ lakka nīnu nange zohorkījatihe īdi bahē ninge ājanema inzihi evani tulle westesi.

⁸ ēdānaki Jesu:— nī Paramushreela āti prabhutaki zohorkīhiwaha evanaki mātromi sēba kījali walle inzihi rāẓitai āha manne inzihi evani tulle wenḍe westesi.

⁹ ēḍāju evanaï Jerushalemu tāna ōhi hazziwaha gūdi tībrita evanaï niphiwaha:— nīnu Paramushreeni mrīenati ātihe:— imbati lōki gethamu,

¹⁰ ninnaa kātali nī kōsomi tani dūtangaki hello hīnesi

¹¹ nī pa’ana eẓẓela ātiwa wallita blūarettu evari ninnaa keska tulle perha koddineri inzihi rāẓitai āha manne inzihi evani tulle westesi.

¹² ēdānaki Jesu:— nī Paramushreela āti prabhuï parhani, inzihi westai āha manne inzihi evanaki utromi hittesi.

¹³ saitānu wālati parhinani muthiwaha, tagiti samēmi wāni pateka evanaï pissa haẓẓesi.

¹⁴ embatiĕ Jesu ātma blājutasi āhi Galilaja tāna wenḍe haẓẓesi; evani bakkiti samachāromi ē rāzi hallehe wēngite.

¹⁵ evasi bahēti hāte ghanomi pātiwaha evari sunagōgungaña bōdha kīhihi wātesi.

¹⁶ ēḍāju evasi tānu paddāti Nazarethu tānu wātesi. tani tīruti lehe zōmini nēzuta sunagōgungaña hazziwaha ẓaduwali niẓẓi manzaliĕ,

¹⁷ gūrū āti Jeshaja grandhomi evani kējuta hittai āte. evasi grandhomi rikhaliĕ:—

¹⁸ prabhu ātma nā muhe manne kākuli gattaraki suwarta wēkhali evasi nannaa dōlhatesi keidi‐hāalata mannaraki pispikīnaniĕ guḍilangaki meh’naniĕ wēkhali wizitaraki pītowi kīnaniĕ

¹⁹ prabhu nehi barsa wēkhali evasi nannaa panditesi. inzihi rāziti tāju evanaki mēḍa āte.

^20-21 evasi grandhomi trephiwaha gottingki hīhiwaha kuggitesi. sunagōguta mannari waẓee evani bakki messaliĕ evasi:— nēẓutaki mi krīkaki ī rāẓitai mlīte inzihi evari tulle wessali māthesi.

²² embatiĕ waẓẓē zāna evani bakki sāki kīhihi, evani gūtitī wāti daja gatti zōkoḍitaki iẓintromi āhi:— īvasi Josepu mrīesī āusiki? inzihi inpi āhi manzaliĕ

²³ evasi evaraï messiwaha:— osso gūrū, ninnaa nīnuē othakoddamu inni pāḍa wessiwaha, Kapernahumta imbini kammanga nīnu kēpiti inzihi weẓẓomiā ē kammanga ī nī koshteti dēshomita kēpamu inzihi mīmbu sattati nā tulle weh’deri iẓẓesi.

²⁴ ōḍee evasi:— imbini gūrū ātiwa tani koshteti dēshomita helluusi inzihi mī tulle sattaninga wessi manzaï.

^25-26 Elīja nēẓungaña tīni barsa sō lēska hāgu plīkhai āhi dēshomi hallee kazza karuwu kittati Ishraeluta hāra zāna rāndiska maẓẓi zakke, Elija Sidonuta manni Sarepta innī gāḍata manni ro rāndi tānee samma ōḍe imbaari tāna pandaatesi.

²⁷ ōḍee gūrū āti Elisha wēḍata Ishraeluta hāra zāna kushtu dukhagattari maẓẓiwa Suria dēshomitasi āti Najemanu āanaha ōḍe imbaasiwa othaatesi inzihi nānu sattee mī tulle wessi manzaï.

²⁸ sunagōguta mannari waẓẓe zāna ē hāḍanga wenziwaha

²⁹ kōpati nenzāhi ningiwaha evanaï gāḍati hōpha tusiwaha evanaï trāju zēspi kīhi trokhali inzihi tami gāḍa dosti hōru tīpri pāteka evanaï ōhi haẓẓeri.

³⁰ ātihe evasi evari maddi glāẓihi zījuti haẓẓesi.

³¹ embatiĕ evasi Galilajata manni Kapernahumu gāḍa tāna wāhiwaha zomini nēẓuta evaraki bodha kīhi maẓẓesi.

³² evani zōkoḍi adhikāromiti kūḍitai aha maẓẓe, lakka evari evani bōdhataki iẓintromi āteri.

³³ ē sunagoguta pōlaa pēnu asti roosi maẓẓesi.

³⁴ evasi:— kahi, Nazarethutati āti Jesu! nī tulle mange ēnai? mammaa mrekhali wātikī? nīnu imbaatiā nānu puï; nīnu Paramushreeni parishudhutati inzihi danzee killeḍi kitte.

³⁵ ēdānaki Jesu:— tambamu, ivanaï pissa hallamu inzihi ēdāni shikhaliĕ pōlaa pēnu evanaï ē maddi trokhiwaha evanaki ēnaa hersaanaha pissa haẓẓe.

³⁶ ēdānaki bahē zāna addazakka āhiwaha:— īdi eniti hāḍa? īvasi adhikāromiti blājuti pōlaa pēnkaki hellohījaliĕ, evi pissa hannu inzihi rooni tulle roosi wessa kodditeri.

³⁷ embatiĕ evani bakkiti samachāromi ē rāzita hallee wēngite.

³⁸ evasi sunagōguti ningiwaha Simonu izzo haẓẓesi. Simonu pōja hāre nōmeri tulle torga maẓẓe lakka ēdāni kōsomi evani tāna manawi kitteri.

³⁹ evasi ēdāni daggire niẓẓiwaha, nōmeriti shikhaliĕ, ēdi ēdāni piste; zēẓoĕ ēdi ningiwaha evaraki sēba kījali māthe.

⁴⁰ wēḍa kluhi mannati wālati wageli nōmerika walla kākuli ānari imbaaimbaari daggire maẓẓeriā, evari bahē ē rogingani evani tāna taẓi wāteri; embatiĕ evasi evari lōni wālatani muhe keska ittiwaha evaraï othi kittesi.

⁴¹ iẓẓekee āanaha pōlaa pēnka:— nīnu Paramushreeni mrīenati! inzihi killeḍi kīhi, hāra zānaï pissa haẓẓu; evasi Kristu inzihi ēwi punza maẓẓu, lakka evasi evaskani shikhiwaha evaskani zōlali hīatesi.

⁴² wējiti ḍāju evasi hōẓiwaha zādata haẓẓesi, zana samuhomi evanaï tāsihi evani tāna wāhihi tammaa pih’aki niphiwaha,

⁴³ evasi:— nānu etkeeti gāḍangaña Paramushreeni rāziti suwarta wēkhali walle; īdāni kōsomiĕ nānu panḍitatee inzihi evari tulle westesi.

⁴⁴ ḍāju evasi Judaja sunagogungaña wēkhi maẓẓesi.