Luka 3 - Luka Suvarta 1916 (Kuvi Kond)

¹ Tiberi kaisaru pāna pondro barsata Judajataki Ponti Pilatu adhipati āhi; Galilajataki Herōdu danduti mugulu āhi; Ituraja Trakoniti dēshomitaki evani taiï āti Philippu danduti mugulu āhi; Abilene dēshomihaki Lusania adhipati āhi,

² Annee Kajapee mugulu puzāri āha manni kālomita zaḍata manni Zakarija mrīesi āti Johanu tāna Paramushreeni zōkoḍi wāte.

^3-6 ēnēẓuĕ evasi wāhiwaha pāpu kshamāpana kōsomi wenḍe zīwuti bāptismomi pātali inzihi Jordanu kadda bakki bahē wēkhi maẓẓesi:— prabhu zīju mlipha tuh’du evani zīngani nimmanima kīdu wālati zēspi nehi kīnai āne wālati hōruwa kudriwa sadunu mliphnai āne wangwa manni zīnga harḍa ānu gazi gazi zīnga nehinu wālati anganga Paramushreeni rakshana meh’neri, inzihi zāḍata killeḍi kīhi manni rooni hāli inzihi gūrū ati Jeshaja pustakomita rāẓiti lehe īdi zargite.

⁷ evasi tani hāte baptismomi pānka wāti zana samuhomiti messiwaha:— rāẓu bōsutī! wāni kōpati pītowi kījali nīnge ēdu westatasi imbaasi?

⁸ wenḍe zīwutaki tagiti phalomi kampi kīdu — Abrahamu mange tanzi inzihi mīmbu mīmbu inzakoddali dakk māthaadu; Paramushreela ī walka walla Abrahamutaki pōdipōda zarnikījali āḍinesi inzihi mī tulle wessi manzaï.

⁹ nīeniĕ kla’ali mrānu hīruta ittitai āha manne, lakka nehi phalomi kampaa wālati mrānu tūnha tūstai āhi hiẓẓuta methnai āne inzihi westesi.

¹⁰ ēdānaki lōku:— ēle iẓẓihe māmbu ēni kījali inzihi evanaï wenzaliĕ

¹¹ evasi:— ri sokka gattasi ēnaa hillaa gattanaki hījali inzihiĕ randa gattasi ēle kījali inzihiĕ evari tulle westesi.

¹² ashīlu gattariwa baptismomi pānka wāhiwaha:— gūrūtī! māmbu ēnaa kēpali inzihi evanaï wenzaliĕ,

¹³ evasi:— minge nirnaïnẓitani kiha aggada kodda adu inzihi evari tulle westesi.

¹⁴ kōskawa: māmbu ēnaa kījali inzihi evanaï weẓẓaki evasi:— imbaanakiwa kākuli kianaha, imbaani muhe ninda gēthanaha mī māla tulle panzadu inzihi evari tulle westesi.

¹⁵ lōku kāẓihi, īvasi Kristu āhi mannesi habbu inzihi bahee Johanu kōsomi tami hījangaña onpa koddi manzaliĕ

¹⁶ Johanu:— nānu ējuti minge baptismomi hīhi manzaï, ātihe nange kiha blāju gattasi roosi wāhi mannesi evani cheppunga wāru ātiwa hukhali nānu pāḍa ātatee aĕ, evasi parishudhātmatee hiẓẓutee minge baptismomi hījanesi.

¹⁷ evani hēẓi evani kējuta manne; evasi tani klānu nehikili hēniwaha tani kolkita gohonga wākhiwaha dumbaa hiẓẓu tulle pōḍu hūda tuh’nesi inzihi bahētari tulle westesi.

¹⁸ īdi āanaha evasi ōḍe hāra sangatika wessiwaha lōku bōdha kīhihi evaraki suwarta wēkhesi.

¹⁹ ātihe dandumugulu āti Herōdu tani taiï dokkiri āti Herodia kōsomiĕ tānu kitti wālati laggeeti kammanga kōsomiĕ Johanu tannaï shikhaki

²⁰ ēdāni kiha ōkhee tānu kēpitaï hallee hālaate lakka Johanuï keidi ha’alata metpi kittesi.

²¹ lōku hallee baptismomi pātati Jesu zakke baptismomi pātiwaha prārdhana kīhi manzaliĕ hāgu dettai āhi

²² parishudhātma anga wāna āhi pawara lehe evani muhe rēẓa wāte, embatiĕ:— nīnu nā zīwu gatti mrīenati, nī bakkiti nānu rāha āhi maï inzihi ro ha’ali hāgu lekkoti rēte.

²³ Jesu bōdha kījali dakki māthati evasi ramārami kōḍe doso barsa hōḍu gattasi āha maẓẓesi. evanaï Josepu mrīenaï inzihi āẓiteri. Josepu Helinaki.

²⁴ Heli Mattanaki, Matta Lewinaki, Lewi Malkinaki

²⁵ Malki Annataki, Anna Joseputaki, Josepu Mattatijaki, Mattatija Amosutaki, Amosu Najamunaki, Najanu Eslinaki, Esli Naggainaki.

²⁶ Naggai Majakutaki, Majatu Mattatijanaki, Mathatija Simijanaki Simija Joshekunaki, Josheku Jodanaki.

²⁷ Joda Jowannataki, Jowanna Resanaki, Resa Zorobbabelunaki, Zorobbabelu Salatijelunaki, Salatijel Nerinaki.

²⁸ Neri Melkinaki, Melki Addinaki, Addi Kosamutaki, Kosamu Jelmadamunaki, Jelmadamu Erunaki.

²⁹ Eru Jehoshuwanaki, Jehoshuwa Elijezarunaki, Elijezaru Jorimutaki, Jorimu Mattatunaki, Mattatu Lewinaki.

³⁰ Lewi Simeonutaki, Simeon Judataki, Juda Joseputaki, Josepu Jonamutaki, Jonamu Elijakimutaki.

³¹ Elijakimu Melejanaki, Meleja Mennanaki, Mennana Mattatanaki, Mattata Natanutaki, Nahanu Davidutaki.

³² Davidu Jessaitaki, Jessai Obedunaki, Obedu Bowozutaki, Bowozu Salmonunaki, Salmonu Najassonutaki.

³³ Najassonu Amminadabunaki, Amminadabu Arnajitaki, Arnaji Esronutaki, Esronu Jaresutaki, Paresu Judanaki.

³⁴ Juda Jakobutaki, Jakobu Isaakutaki, Isaak Abrahamutaki, Abrahamu Taranaki, Tara Nahorutaku,

³⁵ Nahoru Sarukutaki, Saruku Ragaunaki, Ragau Palekunaki, Paleku Eberutaki, Eberu Salataki,

³⁶ Sala Kajinanutaki, Kajinanu Arpaksataki, Arpaksa Semutaki, Semu Nowahunaki, Nowahu Lamekutaki.

³⁷ Lameku Matushalemutaki, Matushalemu Enokutaki, Enoku Jaredutaki, Jaredu Malelejēlunaki, Malelejelu Kajinanutaki,

³⁸ Kajinanu Enosutaki, Enosu Setunaki, Setu Adamunaki, Adamu Paramushreenaki mrīka āha maẓẓeri.