Luka 24 - Luka Suvarta 1916 (Kuvi Kond)

¹ Wāromi nēẓu wējaliĕ tāmbu mliphi nehi gandha gatti sazzunga taẓihi maheni‐manda tāna wāhiwaha

² manda nōkita manni walli mekha tustani messiwaha bitri haẓẓu samma

³ prabhu Kristu anga evaskaki tōnzaāte.

⁴ īdāni kōsomi evaskaki ēnaa tōẓa anaha manzaliĕ uzeḍi gatti himborka huẓẓiti rīari mānēi evaska tāna nitteri.

⁵ evaska azziwaha mūmbuti tozzo plīga manzaliĕ īvari:— nīḍinanaï mīmbu ēnaataki hātari tāna parri manzeri?

⁶ evasi imbaa hilluusi, evasi ningitesi; evasi Galilajata ōḍe mannati:—

⁷ mānēi‐mrīesi pāpu gatti lōkutaki herpitasi āhi shiluwa meth’āsi ahi dīni dinata ninginasi ānesi inzihi evasi mī tulle westi hāḍa onpa koddadu inzihi evari tulle westeri.

⁸ embatiĕ evari evani hāḍa onpa koddihi

⁹ maheni‐mandati wenḍe hazziwaha ī sangatika bahee egāro zāna shishungaki tatimi bahētaraki punpi kittu.

¹⁰ ī sangatika apostalunga tulle westaï imbaï iẓẓihe — Magdalene Mariee, Johannee, Jakobu talli āti Mariee, evaska tulle manni etkeeti ījaskee.

¹¹ ātihe evaska hāḍanga īvaraki bai hāḍanga lehe tōnzātu lakka īvari evaska hāḍanga nammaateri.

¹² ātihe Peturu ningiwaha maheni‐manda tāna hotti hottiwaha bonga messaliĕ gūnahimborka mātromi pistaï tōnzātu. evasi mlītani messiwaha addazakka āhihi izzo hazzesi.

¹³ ē nēẓutee evari lōni rīari Jerushalemutaki kōseka hĕo manni Emmaju inni ro nājutaki hazzihi

¹⁴ mlīti ī sangatika bahēti kōsomi rooni tulle roosi zōlki āhi maẓẓeri.

¹⁵ evari zōlki āhi onpi mānzaliĕ Jesu tānuĕ daggire wāhiwaha evari tulle kūḍa tākitesi.

¹⁶ ātihe evari evanaï ẓinni punna anaha evari kanka muẓẓitaï ātu.

¹⁷ evasi:— mīmbu tākihi rooni tulle roosi zōlki āhi manni hāḍanga ēnaï inzihi wenzaliĕ evari līpki mīmbu āhi nitteri.

¹⁸ evari lōni Kleopha inni roosi:— Jerushalemuta basa kīhi manzihi ī nēẓungaña embaa mlīti sangatika nīnu rootiĕ punnuudī? inzihi evanaï weẓẓesi.

¹⁹ evasi:— ēvi imbinaï inzihi evaraï weẓẓati evari:— Nazaretutasi Jesu bakkiti sangatikee; evasi Paramushreeni nōkitee lōku bahētari nōkitee krījatee zōkoḍitee blāju gatti gūrū āha maẓẓesi.

²⁰ mā mugulu‐pūzārangee, adhikāringee evanaï ēnikīhi hākishikshataki herpiwaha evanaï shiluwa irh’eriā inzihi nīnu punnuudi?

²¹ Ishraeluï rakshinẓinasi īvasiĕ inzihi māmbu inzakodditomi. īdi āanaha ī sangatika mlīhiwaha nīnzutaki tīni dina āha mannu.

²² ātihe mā lōni koẓẓeka zāna ījaska wējaliĕ maheni‐mandatāna hazziwaha evani angati meh’anaha wāhiwaha:—

²³ koẓẓeka zāna dharmu‐dūtanga tamge tōnzāhiwaha, evasi nīḍa mannesi inzihi westeri inzihi mā tulle wessiwaha mange zīwu loho kījateri.

²⁴ mā tulle kūḍa manni koẓẓetari maheni‐manda tāna hazziwaha ē ījaska westi lehe kanukodditeri samma evanaï meh’ateri inzihi evani tulle westeri.

²⁵ ēdānaki evasi:— ēḍu hillaa gattateri, gūrka westi zōkoḍika bahē nammaa mōno zāngitaterī!

²⁶ Kristu īleti wāhu āhi tani mahimata rēnai ăekī? inzihi evari tulle wessihi

²⁷ Mosee wālati gurkee māthiwaha dharmu‐pustakomita tani bakkiti zōkoḍi bhāwomi evaraki punpi kittesi.

²⁸ intalōni tambu hazzi manni nāju daggire wātati evasi ōḍe koẓẓeka hĕo hanni lehe tōnzājaliĕ

²⁹ evari:— miḍolkihi āte, wēḍa klūte, mā tulle mannamu inzihi wessiwaha evanaï balmi kitteri lakka evasi evari tulle manzali bitri haẓẓesi.

³⁰ evasi evari tulle rāndataki kuggitati ro he’era assiwaha dhōlhiwaha ēdāni likhiwaha evaraki hāsaliĕ

³¹ evari kanka meh’naï āhi evanaï ẓinni puẓẓeri; embatiĕ evasi mlengitesi.

³² embatiĕ evari:— evasi zījuta mā tulle zōlkihi dharmu‐pustakomi mange bōdha kījanati mā hīja mā tāna linzi hillaatekī? inzihi rooni tulle roosi wessa kodditeri.

³³ ē gāḍijatee evari ningiwaha Jerushalemu tāna wenḍe hazzaliĕ egāro zāna shishunganiĕ evari tulle andamannaraïĕ messaliĕ

³⁴ evari:— prabhu satteeniĕ ningihi Simonutaki tōnzātesi inzihi westeri. evari ēdaa wenziwaha

³⁵ zījuta mlīti sangatika, evasi he’era likhaki tamge ēni āhi ẓinni puẓẓasi ātesiā inzihi punpi kitteri.

³⁶ evari īle inzihi ōḍe zōlki āhi manzaliĕ evasi evari maddi niẓẓiwaha:— minge samādhānomi āpeko inzihi evari tulle westesi.

³⁷ ātihe evari addazakka āhihi hāree azzihi mah’eni tamge tōnzāte inzihi onpiteri.

³⁸ embatiĕ evasi:— mīmbu ēnaataki peḍiri manzeri? mī hījanga dājueski ēnaataki ānu?

³⁹ nānuĕ evatee inzali nā keskaniĕ nā pā’ananganiĕ hē’du; nannaa assa hē’du, nange manni lehe mīmbu messi manni plēkee ūngee mahenitaki mannău inzihi wessiwaha

⁴⁰ tani keska pā’ananga evaraki tōstesi.

⁴¹ ātihe evari rāhati ōḍe nammaanaha iẓintromi āha manzaliĕ evasi:— imbaa mī tāna ēnai ātiwa tinzali mannekī? inzihi weẓẓesi.

⁴² evari hūditi mīnu ganḍra evanaki hitteri.

⁴³ evasi ēdaa koddiwaha evari nōkita tiẓẓesi.

⁴⁴ embatiĕ evari:— Mose dharmashastromi lōniĕ gūrka pustakomi lōniĕ katanga lōniĕ nā bakkiti rāẓiti bahee mlījali inzihi nānu mī tāna maẓẓati mī tulle westati hāḍanga mlītu inzihi evari tulle westesi.

⁴⁵ ēwēla evari dharmu‐pustakomi punza kodditi lehe evasi evari mōno hukhiwaha:—

⁴⁶ Kristu wāhu āhi tīni dinata hātari tānati ninginesi inzihiĕ

⁴⁷ Jerushalemu māthiwaha wālati lōkungaña evani dōruti wenḍe‐zīwuĕ pāpu pih’naniĕ wekh’nai āne inzihiĕ rāẓitai āha manne.

⁴⁸ ī sangatikataki mīmbuĕ sākingateri.

⁴⁹ īdikō nā tanzi hārowi āti zōkoḍi mī muhe panḍi manzaï. mīmbu lekkoti blāju pā’ni pateka gāḍata niẓẓa manzu inzihi evari tulle iẓẓesi.

⁵⁰ ēḍāju evasi Bethania pateka evaraï ōhi hazziwaha keska perhiwaha evaraï dhōlhesi.

⁵¹ evaraï dhōlhi manzaliĕ evasi evari tānati etkee āhi lakkapūrutaki ūmbitesi.

⁵² evari evanaki zohorkihiwaha hāra rāhati Jerushalemu tāna wenḍe hazzihi

⁵³ tewa anaha gūdita manzihi Paramushreelaï pāẓiteri.