Luka 11 - Luka Suvarta 1916 (Kuvi Kond)

¹ Evasi ro tājuta prārdhana kihi maẓẓesi. prārdhana muthi ḍāju evani shishungaña roosi:— prabhu! Johanu tani shishungaki mrīsti lehe mange prārdhana kinani mrīstamu inzihi evanaï weẓẓesi.

² ēdānaki evasi:— mīmbu prārdhana kīnati:— ābā nī dōru parishudha ninga āpeko, ni rāziomi wāpeko lakkapūruta ēni āhiĕ, ēle kihiĕ bhūmita nī zittomi mlīpeko.

³ mange wālati nēẓu kawalini rānda nīnzu hījamu.

⁴ māmbu mange aẓẓa manni wālatanaki kshaminẓi mannomi lakka mā pāpomika kshaminẓamu; mammaa shodhanata ta’ani; dushtuti mammaa tappinẓamu inzihi zōladu inzihi evari tulle westesi,

⁵ ōḍee evasi evari tulle īle iẓẓesi:— imbaanaki ātiwa ro tōneesi manzaliĕ evasi atta nēkerita ē tōneeni tāna hazziwaha:— tōnehō! tīni gotta he’eranga utāra hījamu,

⁶ nā tōneesi zījuti nā tāna wātesi; evanaki hījali nā tāna ēnaiwa hillee inzihi evani tulle westihe,

⁷ evasi bitri manziwaha:— nannaa dagga kījaani; dāra tunda manne, nā īẓīẓari nā tulle hunza manneri, nānu ningiwaha hījalāḍoo inzihi weh’nesikī?

⁸ evasi tani tōneesi ātaki ningiwaha hīatti zakke, evasi lazza āhi gāḍegāḍeki rīstaki ningiwaha evanaki kawelinaa bahee hīnesi inzihi mī tulle wessi manzaï.

⁹ ēlekīhi mīmbu zakke rih’du, minge hīnai āne; dah’du minge pā’nai āne; dudu minge dēnai āne.

¹⁰ rih’ni wālatanaki hīnai āne, dahananaki pānai āne, dunanaki dēnai āne inzihi mī tulle wessi manzaï.

¹¹ mī lōni tanzi āha mannasi tani mrīesi mīnu rīstihe, mīnu uppara rāẓu hīnesikī? guḍḍu rīstihe kaẓẓa kuppi hīnesikī?

¹² lakka mīmbu laggeetari ātiwa mī pōdipōdataki nehi hīwonika hījali punzā manzaha,

¹³ lakkapūruta manni tanzi tannaa rih’naraki eẓẓee sattaninga parishudhātmaï daja kīnesi iẓẓesi.

¹⁴ ro bēḍe evasi tēja pōlaa pēnu hōphi maẓẓesi. ē pōlaa pēnu pissa haẓẓi dāju tējagattasi zōlitesi lakka zana samuhomi iẓintromi āte.

¹⁵ ātihe evari lōni koẓẓetari:— īvasi pōlaa pēnka adhipati āti Bajelzebulu hāte pōlaa pēnkani hōphi mannesi inzihi westeri.

¹⁶ ōḍe koẓẓetari evanaï parhihi:— lakkapūruti ro iẓintromi āti kamma tōh’mu inzihi evanaï weẓẓeri.

¹⁷ evasi evari onpungani punziwaha evari tulle īle iẓẓesi. — tange tānue urh’iwaha etkee āti wālati rāzi paju āne; izzotaki īrsāti illu riha haẓẓe.

¹⁸ Saitanu tange īrsa āhi tānuĕ etkee ātihe evani rāzi ēni āhi niẓẓi manne? nānu Bajelzebulu hāte pōlaa pēnkani hōphi maï inzihi mimbu inzi manzeri.

¹⁹ nānu Bajelzebulu hāte pōlaa pēnkani hōphi purre, mī mrīka imbaani hāte hōphi manneri? lakka evariĕ minge tīrzanari manneri.

²⁰ ātihe nānu Paramushreeni wanzu tulle pōlaa pēnkani hōphihe sattee Paramushreeni rāzi mī tāna wāte.

²¹ blājugattasi lohogondingani nethihi tani garri kā’nati evani āsti wīdh’anaha manne.

²² ātihe evani kiha blājugattasi roosi evani muhe rihiwaha gelhinati evasi nammiti lohogondingani bahēti rezza koddiwaha evani asti hanh’esi.

²³ nāpōti mannaagattasi nange īrsagattasi; nā tulle kūḍi kīagattasi chederi kīnesi.

²⁴ pōlaa pēnu ro mānēiti pisti ḍāju, ēdi zōminani parrihi ēju hillaa tājungaña rēzō manne. zōminai pānaataki:— nānu pissa wāti nāzzo wenḍe haïni inzakoddihi,

²⁵ wāhiwaha, ē illu hēpihi ūspihi mannani messiwaha,

²⁶ hazziwaha tange kiha nānisi laggeeti sāta gotta pōlaa pēnkani zēẓo kēpa koddaha wāne; ēwi embaa rēẓiwaha, embee basa kīnu; lakka ē mānēi ḍājuti pāli dakkitani kiha laggeetai āne inzihi westesi.

²⁷ evasi zōli manzaliĕ ē zana samuhomita manni ro īja evanaï messiwaha: ninnaa dēkati bandiĕ nīnu utti rangungee bhāgiomi gattataï āha mannu inzihi killeḍi kīhi wessaliĕ

²⁸ evasi:— hao samma Paramushreeni zōkoḍi wenziwaha ēdāni lehe kīnari nānisi bhāgiomi gattari inzihi westesi.

²⁹ ōḍee lōku gotta āhi kūḍi mannati, evasi īle wessali māthesi:— ī bōsutari dushtu bōsutari āhi manzihi iẓintromi āti kamma wenzi manneri. ātihe Jona kōsomiti iẓintromiĕ samma ōḍe ēni iẓintromi āti kamma ēvaraki daja hīnai ăe.

³⁰ Jona Ninewe gāḍataraki ēni kihiĕ iẓintromi lehe maẓẓesiā, ēle āhiĕ mānēi‐mrīesi ī bōsutaraki inẓintromi lehe mannesi.

³¹ dakshina dēshomiti rāni tūkh’ni kālomita ī bōsutari tulle zakke ningiwaha evari muhe nēromi niphne. ēdi Sālomonu gūnomi wennanaki bhūmi mutpuliti wāte; īdikō Sālomonu kiha kazzasi imbaa mannesi.

³² Ninewe lōku tūkh’ni kālomita ī bōsutari tulle zakke niẓẓiwaha evari muhe nēromi niphneri. evari Jona wēkhnani wenziwaha wenḍe‐zīwu pāteri; īdikō Jona kiha kazzasi imbaa mannesi.

³³ imbaasiwa dīwo mrōsiwaha māduli tājuta ātiwa māña lōki ātiwa ittuusi, samma bitri wānaraki uzeḍi tōnzājali dīwo sāḍata ittinesi.

³⁴ nī kannu nī angataki dīwoĕ lakka nī kannu tēta āha maẓẓihe nī anga bahee uzeḍi āhi līnzi manne; ēdi hēḍitai iẓẓihe nī anga anderi hōdhi manne.

³⁵ lakka nī tāna manni uzedi anderi ahi mannaaretu he’mu.

³⁶ imbini pādia ātiwa anderi āanaha nī anga bahee uzedi ātihe, dīwo tani līnzu walla ninge uzedi hīnati ēni āhi manneā ēle āhiĕ anga hallee uzedi āhi manne inzihi westesi.

³⁷ evasi bōdha kīhi manzaliĕ ro parisājuusi tani tulle zakke rānda tinnamu inzihi ārhiwaha, evasi bitri hazziwaha bhōzi dāḍita kuggitesi.

³⁸ evasi tinnani kiha tolliĕ ēju mīataki inzihi parisājuusi messiwaha ḍājueski ātesi.

³⁹ ēdānaki prabhu īle iẓẓesi:— parisājunga gatti mīmbu mandiĕ pallemiĕ pangata hōmbideri samma mī bitriti hīja dongaharku tullee laggee pāna tullee nenza manne.

⁴⁰ ēdu hillaagattateri! pangati pādia kittasi bitri pādia kīattesikī?

⁴¹ lakka minge maẓẓaa hōmbadu, embatiĕ minge manni waẓẓee opnu.

⁴² ābalē parisājungateri, mīmbu pundeni tunisi ōḍee wālati zājukuẓẓa doso bhāga hīderi samma nājomitiĕ Paramushreeni prēmee pissa manzeri, evaskani pih’anaha, īvaskani kīnai.

⁴³ ābalē parisājungateri, mīmbu sunagōgungaña lekkoti zōmbanganiĕ hātasahaḍangaña zohorkaniĕ māndi manzeri.

⁴⁴ ābalē mīmbu tōnzaā hātari glāka lehe manzeri; evaska muhe tākini mānēi ēwaa punnuuri iẓẓesi.

⁴⁵ embatiĕ dharma‐shastromi gūrū roosi:— gūrūtī! īlekihi nīnu wessiwaha mammaa zakke ninda gēthi manzadi? inzihi evani tulle wessaliē

⁴⁶ evasi:— ābalē dharma‐shastromi gūrkateri! dēkālaḍaā bōzungani mīmbu mānēi muhe gēth’deri samma mīmbu ro wanzuti ātiwa ē bōzungani dījaliĕ dījuuderi.

⁴⁷ ābalē! mī ackunga hāje paiti gūrka glākani mīmbu dospi kīhi manzeri.

⁴⁸ lakka mīmbu sākingateri āhi mī ackunga kāremikaki māndi manzeri. evari gūrkani hāje paiteri, mīmbu evari glākani dospi kīhi manzeri.

⁴⁹ ēdānaki Paramushreeni gūnomi westai ēnaa iẓẓihe:— nānu evari tāna gūrkaniĕ apostalunganiĕ panḍii.

⁵⁰ evari koẓẓetaraï hāje paineri koẓẓetaraï kākuli kīneri.

⁵¹ lakka lōkomi zarniti iẓẓihe Abelu kassa māthihi, pūzazōmbatakiĕ gūditakiĕ maddi hāti Zakarija kassa pateka, wāngiti gūrka bahēti kassa kōsomi ī bōsutaraki tūkhnai āne. satteeniĕ ī bōsutaraki ē kassa kōsomi tūkhai āne inzihi mī tulle wessi manzaï.

⁵² ābalē dharma‐shastromi gūrkateri! mīmbu ēdu inni tālomi‐kēju perha ōteri, mīmbuwa bitri rēkuuderi, rēnaraï āngideri inzihi westesi.

^53-54 evasi embati haẓẓati shastrungee parisajungee evani muhe nenza īrsa ittiwaha, evani muhe nēromi gēthali inzihi manziwaha, evani gūtiti wātani ēnaa ātiwa assali inzihi pōrhihi parrihi hāre sangatika kōsomi evanaï zōli kījali mātheri.