Luka 10 - Luka Suvarta 1916 (Kuvi Kond)

¹ Ēḍāju prabhu tīni kōḍi doso zāna tēḍitaraï niphiwaha tānu hanni wālati nātotakiĕ wālati tājutakiĕ tange kiha tolliĕ rīarīaraï lekka panḍitesi.

² panḍitati evasi evari tulle īle iẓẓesi:— dah’nai hāreka manne samma dāpagattari ūña zānee. lakka dāpu kazzanaï tani dāputaki dāpagattaraï panḍali lākwadu.

³ mīmbu hazzu, īdikō nakkanga maddi mēnḍa mīlangani panḍiti lehe nānu mimmaa panḍi manzaï.

⁴ mīmbu mōña ātiwa zāḍi ātiwa cheppunga ātiwa ōhi hallaadu.

⁵ zījuta imbaanaï ātiwa kizzowi kahaadu, mīmbu imbini izzowa re’nati:— ī illutaki samadhānomi āpeko inzihi dakkiti weh’du.

⁶ samadhānomitaki pāḍa ātasi maẓẓihe mī samadhānomi evani muhe ni’ne; hillaati purre ēdi minge wenḍe wāne.

⁷ evari minge hījani kūḍa tinzihi unḍihi ē izzoĕ manzu; kammagattasi tani zītomitaki pāḍa ānesi. illillu rēlaadu.

⁸ ōḍee mīmbu imbini gāḍata rēnati, evari mimmaa dūkhatihe mī nōkita ittitani tinzu.

⁹ embaa manni rōgingani oth’du. — Paramushreeni rāsiomi mī daggire wāte inzihi evari tulle weh’du.

¹⁰ mīmbu imbini gāḍata ātiwa rēẓi mannati evari mimmaa dūkha koddaati purre

¹¹ mīmbu ēdāni sahaḍangaña hazziwaha — mā pa’anangaki attiti dūḍi zacke mī nōkitee hanha tusi mannomi, ātizakke Paramashreeni rāziomi mī daggiretaki wāha manne inzihi punza koddadu inzihi weh’du.

¹² ē gāḍati gati kiha Sodoma gāḍati gati ē nēẓuta ōrhali kānai āha manne inzihi mī tulle wessi manzaï.

¹³ ābalē Korasinutī! ābalē Bethsaidatī! mī maddi kēpiti ghanomi āti iẓintromika Turu Sidonu gāḍangaña kēpitaï āti purre ē gāḍatari pūrwomiĕ gōni himborka porhiwaha dharmbu wākha koddiwaha kuggiwaha wenḍe‐zīwu pāta manneri.

¹⁴ ātihe wiẓārana nēẓuta mī gati kiha Turu Sidonu gāḍatari gati ōrhali kānai āha manne.

¹⁵ hē Kapernahumutī! hāgulekko pateka nīnu padda āti, nīnu nāga lōkomi pateka kluha hazzi.

¹⁶ mī hāḍa wennasi nā hāḍa wennesi; mimmaa ūña meh’nasi nannaa ūña mestanesi; nannaa ūña mestanasi nannaa panḍatanaï ūña meh’nesi iẓẓesi.

¹⁷ ē tīni kōdi doso zāna shishunga rāhati wenḍe wāhiwaha:— prabhutī! pōlaa pēnkawa nī dōruti mange lōbāḍa manzanu inzihi wessaliĕ

¹⁸ evasi:— Saitanu pizza kla’li lehe hāguti rittani mestee.

¹⁹ īdikō rāskani kazza kupingani wissali īrsagattanaki kalgiti blāju bahēti muhe minge adhikāromi daja kījatee; imbinaï ātiwa enta mātromi mimmaa hersee.

²⁰ ātiwa pōlaa pēnka minge lobāḍa mannu inzihi rāha āanaha, mī dorka lakkapūruta rāẓitaï āha mannu inzihi rāha ādu inzihi evari tulle westesi.

²¹ ē gāḍekatee Jesu parishudhātmata hāree rāha āhiwaha:— ābā! hāgutaki bhūmitaki prabhutī! nīnu gūnomigattarakiĕ ēdugattarakiĕ ī sangatika māduli kīhiwaha kokkari‐pōdangaki hōphi inzihi nānu ninnaa hitwi maï; haābā, īleāhi nī mesputaki īdi nehai maẓẓe.

²² wālatai nā tanzi hāte nange herpitai āha manne; mrīesi imbaasiā tanzi kiha ōḍe imbaasi punnuusi; tanzi imbaasiā mrīeni kiha mrīesi imbaanaki evasi hōphali māndinesiā evani kiha ōḍe imbaasi punnuusi inzihi westesi.

²³ embatiĕ tani shishunga bakki wenḍiwaha:— mīmbu messi manni kammanga meh’ni kanka bāgiomi gattaï āha mannu.

²⁴ hāra zāna gūrkee ōḍkee mīmbu messi mannani messali māndihi meh’anahee, wenzali māndihi wennaanahee maẓẓeri inzihi mī tulle wessi manzaï inzihi etkee mannati evari tulle westesi.

²⁵ ro bēḍe dharmashātromi gūrū roosi ningiwaha:— gūrūtī! nitti zīwomi mēḍi ājali nānu ēnaa kījali inzihi evanaï parhihi weẓẓesi.

²⁶ ēdānaki evasi:— dharmashāstromita ēnai rāẓitai āha manne? nīnu ēnaa ẓaḍawa manzi inzihi evanai wenzaliĕ

²⁷ evasi:— nī Paramushreela āti prabhuï nī nenze hījati, nī nenze manassuti, nī nenze blājuti, nī nenze ēduti zīwu kījali inzihiĕ, ninnaa lehe nī pāditanaï zīwu kījali inzihiĕ, rāẓitai āha manne inzihi westesi.

²⁸ ēdānaki evasi:— nīnu manni lehe utromi hitti; ēle kēpamu, embatiĕ nīḍidi inzihi evani tulle westesi.

²⁹ ātihe tānu nītigattani lehe tōnzājali māndihi evasi:— haa samma nā pāditasi imbaasi inzihi Jesuï weẓẓesi.

³⁰ ēdānaki Jesu īle iẓẓesi:— ro mleha Jerushalemuti Jeriko gāḍataki hazzihi donga hāte herhesi, evari evani himborka duhiwaha evanaï wēẓiwaha ūña zīwuti pissa haẓẓeri.

³¹ ē samēmita ro pūzāri ē zījuta hazzihi evanaï messiwaha tottoti haẓẓesi.

³² ēle āhiĕ Lewi roosi ē tājuta wāhiwaha tottoti haẓẓesi.

³³ ātihe ro Samarajuusi hōẓa hazzi manzaliĕ evasi torga manni tājuta wāhiwaha

³⁴ evani messiwaha, evani muhe karma āhiwaha daggire hazziwaha nījuĕ drāksharasomiĕ wākhiwaha evani gahangani dossiwaha tani gōḍa muhe ekhiwaha ro rānda prāh’ni izzo ōhiwaha evanaki samrakshana kittesi.

³⁵ ōḍe nēẓuta ri dēnāromika rezziwaha ē rānda prah’nanaki hīhiwaha:— īvanaki samrakshana kīmu, nīnu ōḍeẓẓeka karẓu rāphihe, nānu wenḍe wānati ēdāni ninge tīrzaï inzihi evani tulle wessa hazzesi.

³⁶ lakka donga hāte herhanaki ī tīni zāna lōni imbaasi pāditasi? inzihi ninge tōẓine inzihi Jesu wenzaliĕ evasi:— evani muhe karma ānasiĕ iẓẓesi.

³⁷ ēdānaki Jesu:— nīnuwa hazziwaha ēle kēpamu inzihi evani tulle westesi.

³⁸ anta lōni evari hōẓa hazzi manzaliĕ evasi ro nāto rētesi. Martha inni ro īja evanaï tani izzo dūkha koddite.

³⁹ ēdānaki Maria inni tangi maẓẓe; īdi Jesu pa’ananga tāna kuggiwaha evani bōdha wenzi maẓẓe.

⁴⁰ Martha hāreka kamma itta kodditaki dagga āhiwaha evani tāna wāhiwaha:— prabhutī! nānu rooteeniĕ kamma kījali nā tangi nannaa pistataki ninge onpu hilleekī? nange tōḍu kījamu inzihi ēdāni tulle weh’mu iẓẓe.

⁴¹ ēdānaki prabhu:— Martha Martha, nīnu hāreka kammanga kōsomi onpu pātiwaha dagga āhi manzi samma kawalinai rondiĕ,

⁴² Maria nehi ōtu āẓa koddite, ēdi ēdāni tānati rennai ăe inzihi ēdāni tulle westesi.