Luka 1 - Luka Suvarta 1916 (Kuvi Kond)

^1-4 Ghanomi pāti Theophilū! dakkiti kanka nenze messiwaha zōkoḍi seba gattari mange herpati lehe, mā maddi mlīti kammanga kōsomi hunge rāẓali hāra zāna mānditeri lakka ninge bōdha kījati sangatika satteeniĕ ātaï inzihi nīnu punzali, evaska bahēti dakkiti ringe chinnikīhihi othe punzihi manni nānu zakke nī dōruti evaska kōsomi tāḍininga rāẓali nehai inzihi āẓitee.

⁵ Iudaja dēshomiti ōḍu āti Herodu neẓungaña Abīja kūḍata manni Zakarīja inni ro puzāri maẓẓesi, evani dokkiri Aharonu māskaña rondi, ēdāni dōru Elisabethu.

⁶ ī rīari prabhu wālati helloti lehee nājomi zīnga lehee doho hillaatari āhi tākihi Paramushreeni nōkita nīti gattari āhi maẓẓeri.

⁷ Elisabethu bānzeni ātaki evaraki pōdipōda hillaatu; ōḍee ē rīari hāree dūtari.

⁸ Zakarīja tani kūḍa māmūluti lehe Paramushreela nōkita pūzari pāna kīhi manzaliĕ.

⁹ pūzari ōẓa lehe prabhu gūdita hazziwaha duppa hījali evanaki ōtu wate.

¹⁰ duppa samēmita lōku samūhomi bahē pangata prārdhana kīhi manzaliĕ

¹¹ prabhu dūta duppazōmba tiini bakki niẓẓiwaha evanaki tōnzājaliĕ

¹² Zakarija evanaï messiwaha dagga āhi azzitasi ātesi.

¹³ embatiĕ ē dūta evani tulle:— Zakarija azza aniko! nī prārdhana wēngite; nī dokkiri āti Elisabethu ninge mrīenaï pāne, evanaki Iohanu inni dōru ittidi.

^14-16 evasi prabhu nōkita kazzasi āhi, drāksha rasomi ātiwa hōẓu ātiwa unnaanaha tani talli bandita zarnati māthihi parishudhātmati nenzitasi āhi, Ishraēlungaña hāra zāna prabhu āti tami Paramushreeni bakki wethesi.

¹⁷ ōḍee evasi tallitanziska hījanga kokkaripōdanga bakkië, wennaagatari nītigattari ēḍu gēnthali wethihi, prabhu kōsomi kāẓi manni lōku sidhomi kijali Elija ātmee blājue gattasi āhi evanaki tolliĕ hannesi lakka ninge rāhee hāre sardee āne; evasi zarnātaki hāra zāna rāha āneri.

¹⁸ Zakarīja:— īdi nānu ēni āhi pu’ini? nānu budhatee, nā dokkiri hāree dūtai inzihi ē dūta tulle wessaliĕ

¹⁹ dūta:— nānu Paramushreeni mūmbu nōkita, nī’ni Gabrielutee; nī tulle zōlki ājalië ī suvarta mānomi ninge punpikījaliĕ panditatee ātee.

²⁰ ōḍee nā hāḍanga ē kālomita mlīnu; nīnu evaskani namma hilludi lakka ī sangatika mlīni pateka nīnu zōlalāḍaanaha mūgigattati āhi manzi inzihi evani tulle westesi.

²¹ lōku Zakarija kōsomi kāẓihi evasi gūdita wēḍa kittaki iẓintromi āteri.

²² evasi pangata wātati evari tulle zōlalāḍaaki, gūdita evanaki darshanomi āte inzihi puẓẓeri, embatiĕ evasi evaraki seike kīhi mūgigattasi āhi maẓẓesi.

²³ evasi sēba kīni nēẓunga nenzitati tani izzo haẓẓesi.

²⁴ ē nēẓunga āti ḍāju evani dokkiri Elisabethu bandi āhi:— mānēikaña nange manni lazza pispi kījali

²⁵ nannaa daja kījati nēẓungaña prabhu īle kīhi kījatesi inzakoddihi tānu pāsa lēska etkeetaraki tōnzaaāte.

²⁶ so lenzuta Gabrielu inni dharmudūta Galilajata manni Nazaretu inni nāto

²⁷ Davidu kūḍagattasi āhi Josepu inni ro mlehataki raïbēri āti laa tāna Paramushreeni walla panḍitasi ātesi, ē laa dōru Maria.

²⁸ ē dūta bitri wahiwaha ēdāni messiwaha:— daja pātatī! ninge subhomi! prabhu ninge tōḍu āha mannesi inzihi westesi.

^29-30 ēdi ē hāḍataki hāreeniĕ dagga āhi:— ī subhomi zōkoḍi ēnaiā inzihi onpa koddi manzaliĕ dūta:— Mariā! azza anika! Paramushreeni walla krupa mēḍa āti.

³¹ īdikō nīnu bandi āhi mrīenaï patiwaha evanaki Jesu inni dōru ittidi.

³² evasi kazzasi āhi wālati muheti gattani mrīesi innasi ānesi; prabhu Paramushreesi evani tanzi āti Davidu simhasanomi evanaki hīnesi.

³³ evasi Jakobu kūḍagattaraï pātupātutaki ēlinesi, evani rāzi mutpuli hillaagattai āhi manne inzihi ēdāni tulle westesi.

³⁴ ēdānaki Maria:— nānu mlehaï punnaagattatee; īdi ēni āhi mlīne inzihi dūta tulle inzaliĕ

³⁵ dūta:— parishudhātma nī mūhe wāne; wālati muheti gattani blāju ninnaa plīgine lakka zarnāni brōnda parishudhatasi āhi Paramushreeni mrīesi iẓẓasi ānesi.

³⁶ ōḍee nī gottagatti Elisabethu zakke tani budhihi wēḍata bandi āha manne; bānzeni iẓẓi ēdānaki sō lēnzu.

³⁷ Paramushreela westi imbini hāḍa ātiwa warrai ăe īnzihi īdāni tulle westesi.

³⁸ ēdānaki Maria:— īdikō nānu prabhu sēbagattatee; nī zōkoḍi lehe nange ājapeko iẓẓe, embatiĕ dūta ēdāni tānati haẓẓesi.

³⁹ ē nēẓungaña Maria ningiwaha Juda dēshomi lōni hōru bakkita manni ro nāto tobbe haẓẓiwaha

⁴⁰ Zakarija izzo rēẓiwaha Elisabethutaki zohora kitte.

⁴¹ Elisabethu Mariati zohora‐bōlu wenzaliĕ ēdāni bandita manni brōnda getkitte, embati Elisabethu parishudhātma tulle nenzitai āhi danze īle inzihi iẓẓe:—

⁴² ījaskaña nīnu dīvanomi pātati nī banditi phalomi dīvanomi pāne.

⁴³ nā prabhu talli nā tāna wānai nange ēni āhi mēḍa ājate?

⁴⁴ īdikō nī shubhomi zōkoḍi nā krījuta rījaliĕ nā bandita manni brōnda rāhati getkitte.

⁴⁵ prabhu ēdānaki punpi kitti hāḍa mlīne lakka nammiti ēdi dīvanomi pātai, iẓẓe.

⁴⁶ embatiĕ Maria īle inzihi iẓẓe:— nā zīwu prabhuti dāmbara kīhi manne.

⁴⁷ evasi tani sēbagattani kākuli‐tossa kātatesi.

^48-49 nā ātma nā rakshinẓinasi āti Paramushreeni muhe rāha āne. wālati blāju gattasi nange kazza kamma mēḍi kījatesi lakka imbatiĕ kūḍanga bahē nannaa tossagattai inzihi inneri. evani dōru parishudhomiĕ.

⁵⁰ evanaï azzinari muhe evani kanikaromi pātu pātu pateka manne.

⁵¹ evasi tani bhahati barsu tōstesi evari hījati onpunga kōsomi garra gattaraï lanza tuh’nesi.

⁵² simhāsanomingati bahni gattaraï trokhiwaha ōntuwa gattaraï ekhesi.

⁵³ hakkili taraï nehi rānda tulle panzi kīhiwaha dhanomi gattaraï warri keska tulle panḍa tuh’nesi.

^54-55 Abrahamutakiĕ evani pōdipōdatakiĕ pātu pātu pateka tani kanikaromi tōstani onpa koddiini inzihi mā akkunga tulle hello hitti lehe evasi tani sēba gatti Ishraēlutaki sājomi kittesi.

⁵⁶ embatiĕ Maria ramārami tīni lēnzu ēdani tulle manzihi ḍāju tani izzo wenḍe haẓẓe.

⁵⁷ brūta wēḍa wātati Elisabethu mrīenaï pāte.

⁵⁸ prabhu ēdāni muhe hāree karma ātesi inzihi, ēdāni pāditariĕ gottangee wenziwaha ēdāni tulle rāha āteri.

⁵⁹ āta nēẓuta evari ē brōndati pōtki dāẓali wāhiwaha, tanzi dōruti lehe Zakarīja inni dōru evanaki itti manzaliĕ

⁶⁰ talli:— ēlekīhi kahi; evanaki Johanu inni dōru ittali inzihi weste.

⁶¹ ēdānaki evari:— nī gottangaña ē dōru gattasi imbaasi hilluusi inzihi ēdāni tulle wessihi

⁶² evanaki ēni dōru ittali mānḍi manzikī? inzihi evani tanzitaki kēju seika kīhi weẓẓeri.

⁶³ evasi ro rāẓini pāna ta’mu inzihi — evani dōru Johanu inzihi rāẓitesi; ēdānaki evari bahē iẓintromi āteri.

⁶⁴ zēẓoĕ evani gūti hungiwaha wentori wīḍiwaha, evasi Paramushreelaï lākihi zōlali māthesi.

⁶⁵ ēdānaki evari zuttupattuti nīḍimanni bahētaraki azzi hōte. ē sangatika bahē Judaja hōru bakkiti bahētaki wēngitu.

⁶⁶ prabhu kēju evanaki tōḍu āha maẓẓe lakka ē sangatika weẓẓari bahē:— ī brōnda ēnitasi ānesiā inzihi ēdāni hījata itta kodditeri.

⁶⁷ ōḍee evani tanzi Zakarīja parishudhātma nenzitasi āhi īle inzihi wēkhesi:—

^68-75 Ishraēlu prabhu āti Paramushreesi lākitasi āpesiko. evasi tani lōkutaki betta āhiwaha evaraki rakshanomi pānpi kittesi. tani sēbagatti Davidu gōtromita mangetaki rakshana mēlu iẓẓihe:— mā īrsagattaritiĕ mammaa lāginari kējutiĕ tappinẓiwaha rakshana pānpi kījatesi. īdāni kōsomi evasi dakkitiĕ tani parishudha gūrka gūtiti zōlitesi. evasi mā akkungki daja kījali; tani parishudha odambaḍi iẓẓihe:— mā tanzi āti Abrahamu tulle tānu kitti ottu onpa koddali māro īrsa gattariti pispikīnai āhi māro nīḍini pateka azzi hillaaki evani nōkita parashudhomi ningee nīti ningee evanaï sēba kīnanaki daja tōsali ī rakshana panpi kittesi.

^76-79 ōḍee hē brōndāti! nīnu wālati blāju gattani gūrūti innati ādi; mā Paramushreeni kazzā zōkoḍilehe evari pāpomikani rakshinẓinanaki tani lōkutaki rakshana ghnānomi evasi hīnilehe evani zīngani mliphali nīnu prabhu nōkita tākidi. mā pā’anangani samādhānomi zījuta tāki kīni lehe anderitee hāki‐hījenitee kuggā mannariki uzzeḍi hīni lehe ē kazzā zōkoḍi kōsomi evasi lekkoti mange gaḍili hōpu hōtali dāja kījateri.

⁸⁰ brōnda padda āhi ātmata blāju pātiwaha Ishraelutaki tōnzāni pateka zāḍata maẓẓesi.