Zefanaya 1 - GH

¹ Zugsɔb da tis o nɔdi'es Zefanaya onɛ an Kus biig la labaar. Kus da anɛ Gedalaya biig ka Gedalaya mɛ an Amaraya biig ka Amaraya an Hezekia biig. Saŋkan la ka Josia onɛ da an Ammon biig la da zin' na'am gbauŋ zug, Juda teŋgbauŋʋn.

San'auŋ linɛ kenna la yɛla

² “M na piis si'el wʋsa yis teŋgbauŋ la zug,” Zugsɔb la pian'ʋkʋ la.

³ “M na san'am ninsaalib nɛ bʋnkɔnbid wʋsa, nɛ niis banɛ bɛɛ agɔl nɛ zimi banɛ bɛɛ atɛukʋn la. M ya'a ti san'am ninsaalib teŋgbauŋ nwa' zug, nimbɛ'ɛdnam la na dig wʋʋ tandia'ana nɛ.” Zugsɔb la pian'ʋkʋ la.

Juda tʋʋmbɛ'ɛd

⁴ Zugsɔb la lɛn yɛl ye, “M na namis Juda dim wʋsa nɛ banɛ bɛ Jerusalem tempʋʋgin la wʋsa. M na san'am banɛ wʋsa kpɛlim bi'ela ka nan kpɛn dɔl Baal la; ka kɛ ka ba tam banɛ wʋsa maan maana tisid bada nɛ teŋgbana la.

⁵ M na san'am nimbanɛ dʋt dɔɔd zugʋ pʋ'ʋsid nwadbibis la nɛ banɛ mɔr Zugsɔb la yʋ'ʋri pɔɔd ka lɛm pɔɔd nɛ ba'ar kanɛ yʋ'ʋri buon Molek yʋ'ʋr la.

⁶ M na san'am banɛ daa dɔl mam ka pʋ lɛn dɔllim la, nɛ banɛ pʋ bɔɔd Zugsɔb yɛla bɛɛ ieed o sa'alʋg la.”

⁷ Bɛi baanlimm Zugsɔb la tuon, bɔzugɔ Zugsɔb la dabisir la li'el ya. Zugsɔb maalnɛ malʋŋ ka pie banɛ ka o buol la ka ba bɛɛ ba kɔn'.

⁸ Zugsɔb la yɛl ye, “Daakanɛ ka m na maali m malʋŋ la, daakan la m na namis tuongatib, nɛ Juda na'abiis, nɛ banɛ yɛɛd teŋ zʋŋ fuud la wʋsa.

⁹ Daakan la m na namis banɛ ian'adi kpɛn'ɛd nɔŋ dim dɔɔdin ma'ad ziri ka faand la'adi pɛ'ɛnnɛ ba bada dɔɔd la.”

¹⁰ Zugsɔb la yɛl ya ye, “Daakan la,” “kuŋ na nwɛ' Zimi Yaŋirin la, ka kaasig yi Yapaala la ni na, ka vuud na dammid zuoya la ni.

¹¹ Kaasimi nɛ sʋnsa'aŋ, yanam banɛ yaa bɛ da' baba la, bɔzugɔ ba na kʋ kpikpinkpinnib la wʋsa, hali banɛ tɔlim anzurifanam la wʋsa mɛ na kpi'ilim.

¹² Saŋkan la, m na nɔk fita ie Jerusalem tempʋʋginɛ namis banɛ wʋsa tɛn'ɛsidi ba mɛŋ yɛla ma'aa la, banɛ nwɛnɛ kuan'ari gɛndig daam gan'arin ka li san'am la. Ba tɛn'ɛsidi ba sʋnfʋn sa ye Zugsɔb la pʋn kʋ tʋm linɛ an sʋm bɛɛ bɛ'ɛdɛ.

¹³ Anina ka m na kɛ ka faandib faaɛn ba areza'as la wʋsa, ka nwa'a ba ya' la sɔɔm-sɔɔm. Ba na mɛ' ya' ka kʋ nyaŋi kpɛn'ɛɛ, ka sɛ tiis ka kʋ dii li wala.”

Zugsɔb dabistita'ar la yɛla

¹⁴ “Zugsɔb dabistita'ar la li'el ya, li bɛnɛ yammin-yammin. Kɛlisimi! Zugsɔb dabisir la saŋa, ba na kaasid nɛ sʋntɔɔg. Zabzabidib la tʋkpiidʋg ma'aa na dʋt anina na.

¹⁵ Dabiskan la na anɛ sʋnpɛɛn dabisir, sʋnsa'aŋ nɛ ɛndʋg na bɛɛ li daar. Yɛla nɛ san'auŋ na bɛ ka zibisʋg nɛ kpaandʋg bɛ zin'ig wʋsa, daakan la na anɛ saŋgbansabilig nɛ lik.

¹⁶ Daakan la, ba na pieb zaba na'atan ka nwɛ'ɛd tanp kuŋ hali ba na nwɛ' tanp tembanɛ ka ba mɛ' zaŋguoma gilig la, nɛ banɛ bɛ teŋkpɛmis la wʋsa.

¹⁷ M na namis nidib la, ka kɛ ka ba kennɛ babinnɛ ieed suor nwɛnɛ zʋnzɔɔs nɛ ban tʋm bɛ'ɛdi tis man Zugsɔb la zug. Ba ziim na kpa'ae suoraadin, ka ba niŋgbina pun'oe yadig teŋin la.

¹⁸ Ba anzurifa bɛɛ ba sanlima kʋ tun'e faaɛn ba Zugsɔb la sʋnpɛɛn daarɛ. Zugsɔb sʋnpɛɛn linɛ dit wʋʋ bugum la na di dunia la wʋsa. Bɔzugɔ o na kɛ ka bʋn linɛ wʋsa mɔr vʋm dunia kaŋa naae vuguri.”