Zakaria 1 - GH

Zugsɔb la buon O nidib ye ba lɛm O san'an na

¹ Darius na'am la yʋma ayi' saŋa, li nwadis anii la ni ka Zugsɔb la da pian' tis o nɔdi'es Zakaria onɛ an Berekaya biig ka an Iddo yaaŋ la ye,

² “Zugsɔb la sʋnf da duoe nɛ ya yaanam la hali.

³ Dinzug yɛlim nidib la ye Zugsɔb Onɛ an Paŋtita'ar Sɔb la yɛl ye, ‘Lɛmmini m san'an na, ka mam mɛ na lɛbi ya san'an na.’ Zugsɔb Onɛ an Paŋtita'ar Sɔb la yɛl si'em la.

⁴ Da aaɛn wʋʋ ya yaanam banɛ da ki'is kʋdimin nɔdi'esidib pian'ad, ban da yɛli ba ye, Zugsɔb Onɛ an Paŋtita'ar Sɔb la yɛl ye, ‘Basimini ya tʋʋmbɛ'ɛd suoya nɛ ya tʋʋmbɛ'ɛd tʋʋma la.’ Amaa ka ba pʋ kɛlis bɛɛ di'e man yɛli ba si'el la. Zugsɔb la yɛl si'em la.

⁵ Ya yaanam la bɛ yaanɛ nannanna? Ka ya tɛn'ɛs ye ya nɔdi'esidib la na vʋe saŋa wʋsaa?

⁶ Amaa m pian'ad la nɛ m zi'ela banɛ ka m da tisim nɔdi'esidib banɛ aan m tʋmtʋmnib la pʋ dii ya yaanam laa?” Li saŋa ka ba yʋ'ʋn da tiak ka yɛl ye, “Zugsɔb Onɛ an Paŋtita'ar Sɔb la maali ti nɛ wʋʋ ti tʋʋma nɛ ti suoya la nar si'em, nwɛnɛ on gban'e ye o tʋm si'em la.”

Dau kanɛ bɛ tutuud gbinnin la yɛla

⁷ Nwadkanɛ paasid pii nɛ yinne ka ba buon Siibat la, li dabpisi nɛ anaasi daar, Na'ab Darius na'am la yʋma ayi' saŋa, ka Zugsɔb la labaar kɛn nɔdi'es Zakaria onɛ saamme an Berekaya ka o yaab an Iddo la san'an na. Ka Zakaria yɛl ye,

⁸ Li daa anɛ yʋ'ʋŋ ka si'el nie pa'alim, ka m nyɛ ka dau ban'ad wiedzɛn'ug. O daa zi'enɛ tutuud teŋsʋk bɔn'ɔfaligin. Ka wiedzin'a nɛ wiedpugusʋg nɛ wiedpielig zi'e o nya'aŋ.

⁹ Ka m bu'os ye, “M zugdaana, nɛ'ɛnam an bɔnama?” Ka maliak kanɛ sɔnsid nɛ m la lɛbis ye, “M na pa'alif ban an si'el.”

¹⁰ Ka dau kanɛ zi'e tutuud teŋsʋk la yʋ'ʋn pin'ili pa'annɛ li gbin ye, “Zugsɔb la tʋm si'em ba ye ba giligi kaae gɔs dunia wʋsa la, la.”

¹¹ Ba da lɛb na yɛl Zugsɔb maliak onɛ zi'e tutuud teŋsʋk la ye, “Tinam gilig dunia la wʋsa, ka nyɛ ka dunia la dig baanlimm ka sumbʋgʋsʋm bɛ.”

¹² Zugsɔb maliak la da bu'os ye, “Zugsɔb Onɛ an Paŋtita'ar Sɔba, Jerusalem nɛ Juda tempʋbanɛ ka fʋ sʋnf duoe nɛ ba yʋma pisyɔpɔi nwana la, bʋndaar ka fʋ na zɔɔ ba nimbaanliga?”

¹³ Ka Zugsɔb la pian' bʋgʋsʋga nɛ pian'abanɛ mɔr sumalisim tis maliak kanɛ pian'ad nɛ mam la.

¹⁴ Ka Maliak kanɛ pian'adi tisidim la yɛl ye m mɔɔlim labakaŋa ye, “Zugsɔb Onɛ an Paŋtita'ar Sɔb la yɛl ye, ‘Mam nɔŋ Jerusalem nɛ Zion yɛla hali,

¹⁵ amaa ka m sʋnf lɛɛ duoe nɛ tembanɛ tɛn'ɛs ye si'el kʋ nyaŋi maali ba la. Man sʋnf daa duonɛ bi'ela, amaa ba lɛn kɛ ka m nidib la namisʋg zu'oe galis.’”

¹⁶ Alazug ka Zugsɔb Onɛ an Paŋtita'ar Sɔb la yɛl ye, “Man na lɛn lɛb Jerusalem na nɛ nimbaanlzɔɔr. Ani ka ba na lɛm mɛɛ m Pʋ'ʋsim Yir la, ka Jerusalem nyɛ zi'esim ya'as.” Zugsɔb Onɛ an Paŋtita'ar Sɔb la pian'ʋkʋ la.

¹⁷ Mɔɔlim keŋ tuon ka yɛli ba ye, “Zugsɔb Onɛ an Paŋtita'ar Sɔb la yɛl ye, Man tempʋʋs la na lɛm pɛ'ɛl nɛ arezak ya'as, ka mam Zugsɔb la na lɛn di'e Jerusalem ka li aan m mɛŋ din.”

Iila anaasi nɛ dapa anaasi banɛ kʋnt la yɛla

¹⁸ Ka m gɔs agɔla ka nyɛ ka kʋnt iila anaasi zi'e m tuon.

¹⁹ Ka m bu'os maliak kanɛ pian'ad nɛ m la ye, “Nɛ'ɛnam an bɔ?” Ka o lɛbisim ye, “Iil bama pa'annɛ dunia nwa' paŋ dim banɛ da widig Juda nɛ Israel nɛ Jerusalem nidib la.”

²⁰ Ka Zugsɔb la pa'alim dapa anaasi banɛ mi' tʋʋma kɔn'ɔb-kɔn'ɔb.

²¹ Ka m bu'os ye, “Bama kenna ye ba maal bɔ?” Ka o lɛbis ye, Iil bama da widig Juda ka sɔ' kʋ nyaŋi ziank o zug la, amaa banɛ mi' tʋʋma kɔn'ɔb-kɔn'ɔb la kenna ye ba kpɛn'ɛsi ba dabiem ka nyaŋi ba, ka san'am sʋ'ʋlim banɛ da zab nɛ Juda n widig o nidib la iila.