Yiiga Timoti 1 - GH

¹ Man Paul, onɛ an Yesu Kristo tʋmtʋm ka li anɛ Wina'am onɛ aan ti faangid nɛ Yesu Kristo onɛ aan ti ti'ir la tisim nɔɔr;

² ka m sɔbid gbauŋ kaŋa tisid fʋn Timoti onɛ niŋ Yesu Kristo yadda ka liebim biig amɛŋa la. Ti Ba' Wina'am nɛ ti Zugsɔb Yesu Kristo na tisif yɛlsʋm nɛ nimbaanlzɔɔr nɛ sumbʋgʋsʋm.

Ziri pa'alʋg dim la sa'alʋg

³ Man daa wa'ae Masedonia teŋin la, m daa tisif nɔɔr ye fʋ kpɛm bɛ Efesus teŋin ka sa'al ninsieba ye ba da pa'an ziri pa'ala la.

⁴ Ka da dɔl teŋkʋdʋgin sɔlima nɛ yaanam yʋda kaalʋg linɛ ta'asid nɔŋgbannwa'ar ka pʋ sʋŋid ka Wina'am tʋʋma linɛ an yadda niŋir la ken tuonnɛ.

⁵ Dinɛ kɛ ka m yɛla anwa la anɛ ye nɔŋilim linɛ an nyain la yitnɛ pʋtɛn'ɛr sʋŋin nɛ pʋpielim nɛ yadda niŋir linɛ an amɛŋa ni na.

⁶ Ninsieba bas nɛ nɛ'ɛnam ka pian'ad pian'ayaalis.

⁷ Ba sʋnya lɔnɛ ye ba an banɛ pa'an Wina'am wada la, amaa ba zi' ba mɛŋi pian'ad si'el la gbinnɛ, bɛɛ pʋ mi' ban bʋmbanɛ ka pian'ad nɛ kpi'euŋ la gbinnɛ.

⁸ Ti mi' ye ti ya'a nɔk wada la tʋm lin nar si'em, li an sʋ'ʋŋa.

⁹ Ti mɛ mi' ye ba pʋ zi'el wada la nɛ pʋpielim dim yɛlaa, amaa banɛ pʋ dɔl wada suor la, nɛ banɛ pʋ siakid linɛ an yɛlsida nɛ banɛ pʋ dɔl Wina'am suorɛ nɛ tʋʋmbɛ'ɛd dim nɛ bugusim dim nɛ banɛ pʋ dɔl pʋ'ʋsim suorɛ nɛ banɛ kʋʋdi ba saamnam nɛ ba manam nɛ banɛ an ninkʋʋdib

¹⁰ nɛ pu'ab nɛ dap banɛ san'amid taaba nɛ dap banɛ dig nɛ ba dap taaba wʋʋ pu'ab nɛ, nɛ banɛ zuud nidibi gban'ad, nɛ dama'anam, nɛ ziri kasɛtib, nɛ banɛ niŋid linɛ mɛkama pʋ dɔl pa'alsʋŋɔ.

¹¹ Pa'alʋg la dɔlnɛ labasʋŋ linɛ niedi pa'an Wina'am onɛ an albareka nɛ girima sɔb ka o niŋi m nu'usin ye m mɔɔl la.

Wina'am n zɔ Paul nimbaanlig la yɛla

¹² M pʋ'ʋsidi ti Zugsɔb Yesu Kristo bareka on tisim paŋ la. M pʋ'ʋsid o nɛ on baŋim pʋʋg ka gaŋim ye m tʋm tʋʋm kaŋa nwa' la.

¹³ Hali baa saŋsi'en ka m da san'amid o yʋ'ʋr, ka namisid o, ka tʋ'ʋd o la, o la'am zɔɔm nimbaanlig, bɔzugɔ man da nam pʋ niŋ Yesu yadda la, m da pʋ baŋ man niŋid si'ela.

¹⁴ Ka Zugsɔb la tisim pʋpielim piini ka li galis, nɛ Yesu Kristo yadda niŋir nɛ nɔŋilim linɛ bɛɛ o san'an la.

¹⁵ Nwa' anɛ yɛlmɛŋir ka m yɛt, ka li nar ye sɔ' mɛkama di'e li sʋ'ʋŋa, “Yesu Kristo kɛn dunia ni na ye o faaɛn tʋʋmbɛ'ɛd dim,” ka man tʋʋmbɛ'ɛdi gat sɔ' wʋsa.

¹⁶ Mam onɛ an tʋʋmbɛ'ɛd dim kpɛɛm la, paam nimbaanlzɔɔr Yesu Kristo ni ka li pa'al nidib la o suguru linɛ ka' bɛn la an si'em, ka an zanbinnɛ tis banɛ na ti yuolim niŋ o yadda la ka ba di'e nyɔvʋr linɛ ka' naarɛ.

¹⁷ Na'akanɛ sʋ'oe zʋmaana wʋsa la, o pʋ kpiida, nidib mɛ pʋ nyɛt o nɛ ninii, o anɛ Wina'am kanɛ an yinne, zʋn'or nɛ na'asi anɛ o din, saŋa linɛ ka' naarɛ. Ami.

¹⁸ M biig Timoti, nɔzi'elkaŋa ka m tisidif, ka li dɔl linɛ ka Wina'am nɔdi'es da pian' fʋ yɛla la. Kɛl ka nɛ'ɛŋa kpɛmisif ka fʋ zab zabsʋŋ linɛ na kad yɛlbɛ'ɛd la.

¹⁹ Kpɛm mɔr yadda niŋir nɛ pʋpielim ya'am. Ninsieba pʋ siak pʋpielim ya'am linɛ bɛɛ ba san'an la, ka li san'amidi ba yadda niŋir.

²⁰ Ba sieba anɛ Himeneus nɛ Alekzanda, banɛ ka m kɛɛsi ba niŋ Sʋntaana nu'usin ye ba zulig ya'am ka da san'am Wina'am yʋ'ʋrɛ.