Yiiga Joon 1 - GH

Onɛ tisid nyɔvʋr la yɛla

¹ Ti sɔbid nɛ'ɛŋa nɛ yɛti ya pian'ad linɛ an nyɔvʋr ka da bɛ dunia pin'ilʋgʋn sa la. Ti wʋm o pian'ad, ka nyɛɛ o nɛ ti nini. Sida ti nyɛɛ o, ka ti nu'us si'is o.

² Nyɔvʋr la da nie paalʋ ka ti nyɛɛ o nɛ ti nini ka dii li kasɛt. Onɛ an nyɔvʋr kanɛ ka' naarɛ ka ti mɔɔn o yɛla tisidi ya. O da bɛ nɛ ti Ba' Wina'am ni, ka nie ti san'an.

³ Tinamɛ nyɛ ka wʋm si'el la ka ti yɛti ya mɛn, ka ya na la'as nɛ ti nɔɔr yinne, ka mɔr nɔɔr yinne kanɛ ka ti mɔr nɛ ti Ba' Wina'am nɛ o Biig Yesu Kristo la.

⁴ Ti sɔbid nɛ'ɛŋa ye ti sumalisim la paae li bɛn.

Wina'am anɛ nɛɛsim

⁵ Labakaŋa ka ti wʋm o Biig la san'an ka mɔɔli tisi ya. Wina'am anɛ nɛɛsim, ka lik ka' o san'an baa bi'elaa.

⁶ Ti ya'a yɛl ye ti mɔr nɔɔr yinne nɛ o, ka lɛɛ bɛ likin, linɛ ka ti yɛt la, nɛ linɛ ka ti tʋm la anɛ dama'am.

⁷ Amaa ti ya'a ken nɛɛsimin, nwɛnɛ Wina'am bɛ nɛɛsimin si'em la, ti mɔr nɔɔr yinne nɛ taaba, ka o Biig Yesu ziim la pie ti tʋʋmbɛ'ɛd wʋsa, ka kɛ ka ti lieb nyain.

⁸ Ti ya'a yɛl ye ti ka' tʋʋmbɛ'ɛdɛ, ti ma'anɛ ti mɛŋ, ka sida ka' ti san'anɛ.

⁹ Ti ya'a pɛligi ti pʋʋsi tis Wina'am, o anɛ yɛlsida sɔb, ka na kɛɛ ti taali bas, ka pie ti tʋʋmbɛ'ɛd ka ti lieb pʋpielim dim.

¹⁰ Ti ya'a yɛl ye ti pʋ tʋm tʋʋmbɛ'ɛdɛ, ti buol o nɛ dama'am sɔb, ka o pian'ad ka' ti san'anɛ.