Siilima 1 - GH

¹ Solomon onɛ da an David biig, ka an Israel na'ab la siilima nwa':

² Siilima nwa' ye li pa'al nɛ nidib ya'am ka sa'ali ba, ka kɛ ka ba gban'e ya'am pian'ad gbin.

³ Li na sʋŋ nidib ka ba di'e sa'alʋg ka keŋ tuonnɛ tʋm linɛ nar ka dɔl suor;

⁴ Siilim bama na kɛ ka Azi'iyɛ'og baŋ ya'am, ka pa'al dasam nɛ pu'asada ka ba baŋ ya'am suoya, nɛ linɛ mɔr sʋŋir.

⁵ Kɛl ka ya'am dim kɛlis ka paam baŋiri paas. Li na sʋŋ banɛ gban'e li gbin la ba tʋʋma ni.

⁶ Li na kɛ ka nidib baŋ siilima nɛ sɔlima, ka baŋ ya'am dim pian'ad nɛ bʋgʋlʋm-bʋgʋlʋm gbin.

⁷ Zugsɔb la zɔtim an baŋir pin'ilʋg amaa zɔn nɛ'ɛsidnɛ ya'am nɛ sa'alʋg.

Sa'alʋg linɛ na tisif ya'amlɛog ka fʋ bɔ ya'am

⁸ M biiga, wʋmmi fʋ ba' sa'alʋg, ka da zan'asi fʋ maa na pa'alif si'el la.

⁹ Ka li na an vɛnlim bɛɛ fʋ zugin, ka an zɔnti fʋ niŋgɔɔnrin.

¹⁰ M biiga, tʋʋmbɛ'ɛd dim ya'a pan'asidif, fʋn da kɛlisi ba pian'adɛ.

¹¹ Ba ya'a yɛl ye, “Kem na dɔlli ti; kɛl ka ti su'a kʋ sɔ', kɛl ka ti su'a suor kpikpɛŋi kʋ nid zaalim-zaalim;

¹² kɛlli ka ti vɔli ba vʋt wʋʋ yaʋg nɛ, ka vɔli ba mummi wʋʋ banɛ sig bʋmbɔkin nɛ;

¹³ ka ti na nyɛ la'asʋma nɛ li buudi ka fan' la'adi pɛ'ɛli ti ya';

¹⁴ kem na la'as nɛ ti ka ti pʋdig tinamɛ faaɛn si'el la.”

¹⁵ M biiga, ba ya'a yɛtif ala fʋn da dɔlli ba keŋɛ, da nɔki fʋ nɔbiri dɔlli ba suor la;

¹⁶ bɔzugɔ ba nɔba zɔti ken bɛ'ɛd zin'ig, ba zɔti tɔ'ɔtɔ mɔɔd ye ba kʋ nid.

¹⁷ Li pʋ dɔl suor nɛ fʋn na ya'ae sʋlʋg la nɔɔr ka niis la wʋsa gɔsida!

¹⁸ Nimbama su'anɛ gur ye ba kʋʋ ba mɛŋ; ba mɛŋ nyɔvʋr ka ba na yis!

¹⁹ Ala ka li aɛn tis onɛ wʋsa kʋʋd ye o paam mɔrim; o ba'asʋg anɛ kum.

Ya'am buon nidib

²⁰ Ya'am nwɛnɛ pu'a kanɛ bɛ suoraugʋn buon, o dʋ'ʋs o kʋkɔri buon nidibi bɛ zin'isi'a wʋsa;

²¹ nidibi galis zin'isi'a wʋsa maan tʋkpiidʋg, o bɛɛ ani, ka kaasidi buon tempʋʋg la za'anɔya ni ka yɛt ye,

²² “Yanam banɛ an Azi'iyɛ'og dima, bɔ ka ya nan kpɛm bɛ zi'iliminɛ? Bɔ ka nintʋ'ʋsnam nan kpɛn nɔŋ nintʋ'ʋsim, ka zɔn la mɛ kis baŋirɛ?

²³ Ya ya'a siakini m sa'alʋg, m naan pɛligini m pʋʋgi tisi ya ka kɛ ka ya baŋim tɛn'ɛsa.

²⁴ Yanamɛ sadigim zan'asi m buolʋg, ka m tiɛn m nu'ug ka sɔ' pʋ kɛligɛ,

²⁵ yanamɛ zan'asi m sa'alʋg ka m tansi ya ka ya pʋ wʋm la,

²⁶ ala ka tɔɔg ya'a ti paae ya, m mɛ na la'adi ya, dabiem ya'a ti kpɛn' ya m na maali ya siaa.

²⁷ Li ya'a ti paae ya wʋʋ sisi'em nɛ; tɔɔg ya'a ti mɔri ya keŋ wʋʋ sisi'epiliŋ nɛ ka yɛla nɛ sʋnsa'aŋ paae ya, m ba'a kae.

²⁸ Ani ka ba na buonim amaa m kʋ siakɛ; ba na ieedim, amaa ba kʋ nyɛɛ ma.

²⁹ Ban kis baŋir ka pʋ gaŋ Zugsɔb zɔtim la zug,

³⁰ ban zan'asi m sa'alʋg ka m tansi ba ka ba pʋ wʋm la,

³¹ ala ka ban bʋd si'el la ka ba na bʋn ban gban'e si'el la li na bi'igi ba.

³² Azi'iyɛ'og dim kalinka'alim la na kʋʋ ba zɔn ya'a ti ye nɛ' ka' yɛllɛ, linɛ na san'ami ba;

³³ amaa onɛ wʋsa kɛlis mam pian'ad na bɛ nɛ laafi ka kʋ zɔt dabiem nɛ yɛlbɛ'ɛdɛ.”