Ruf 1 - GH

Yɛltita'ar paae Elimalek yidim

¹ Saŋa kanɛ ka tuongatib da sʋ'oe Israel nidib la, kɔ'ɔm tita'ar da lu teŋgbauŋʋn la. Dinzug dau sɔ' nɛ o pu'a nɛ o biribis ayi' da yi Betilehem dinɛ bɛ Juda sʋ'ʋlim la duoe keŋ Moab teŋin zin'in ani.

² Dau la yʋ'ʋri da aan Elimalek, ka o pu'a an Naomi. Ka o biribis la yʋda an Mahlon nɛ Kilion. Ba da anɛ Efirata dim, dinɛ pa'al ye ba anɛ Betilehem dinɛ bɛ Juda sʋ'ʋlim la teŋ nidib. Ba da keŋ Moab ye ba zin'in saŋa bi'ela.

³ Elimalek da kpiya ka kɛ Naomi pʋkɔɔnr nɛ o biribis ayi' la ma'aa.

⁴ Ka o biribis la da di Moab teŋin pu'asada. Yinne yʋ'ʋri da buon Orpa ka yinne la yʋ'ʋr mɛ buon Ruf. Ba da zin'in ani nwɛnɛ yʋʋm piiga,

⁵ ka Mahlon nɛ Kilion wʋsa mɛ kpi, ka Naomi kpɛlim pʋkɔɔnr ka pʋ mɔr biiga.

⁶ Naomi da wʋm ye Zugsɔb la kɛ ka o nidib paam diib bɛdegʋ, dinzug on nɛ o bipu'ab ayi' la da duoe ti'eb ye ba lɛbi kul.

⁷ Ka ba pin'ili nɔk suori lɛbid Juda amaa ban ti paae suor la,

⁸ ka Naomi yɛl o bipu'ab la ye, “Lɛm kulini ya du'adibin. Zugsɔb na kɛ ka o albareka la dɔlli ya nwɛnɛ yanamɛ maal mam nɛ banɛ kpi la sʋm si'em la.

⁹ Zugsɔb la na kɛ ka ya yinne-yinne paam sidibi kuli kpɛn' yir ka vʋ'ʋs.” Ka o kuaki ba ka kɛɛsi ba. Amaa o bipu'ab la pin'ili kum bɛdegʋ

¹⁰ ka ye, “Ayei, tinam pʋ bɔɔd ye ti basi fɔ, ti na dɔlli fʋ keŋi fʋ nidibin.”

¹¹ Ka Naomi lɛbis ye, “M biisɛ, li an sʋ'ʋŋa ye ya lɛb. Bɔ ka ya bɔɔd ye ya dɔlli ma? Ya tɛn'ɛs ye mam na lɛn nyaŋi du'a biribis ka ya kuli baa?

¹² Lɛmmi kuli, bɔzugɔ m kʋdigi galis nɛ mam na nyaŋi kul sid ya'as. Baa m ya'a nyɛ sidi kul yʋ'ʋŋa du'a biribis,

¹³ ya kʋ nyaŋi zin'in hali ka ba ti nɔbigɛ. Ya kʋ nyaŋi guri ba nɛ ban na ti siak pu'adiirɛ. Ayei, m biisɛ, ya mi' ye mam sʋnsa'aŋ gati ya sʋnsa'aŋi an si'em. Bɔzugɔ Zugsɔb la kɛ ka yɛl kaŋa paae mam ka m sʋnf san'am hali.”

¹⁴ Ka ba lɛn kum bɛdegʋ. Ka Orpa kuak o sid ma la ka kɛɛs o ka lɛbi kul, amaa ka Ruf on zan'as ka tabin o nɛ nɔŋilim.

¹⁵ Ka Naomi yɛl o ye, “Ruf, fʋ sid kpɛɛm pu'a la lɛb o nidibin nɛ o wina banɛ ka o pʋ'ʋsid la ni. Fʋn mɛ lɛm dɔl o kul.”

¹⁶ Amaa ka Ruf lɛbis ye, “Da yɛt mam ye m basimi fɔ. Kɛl ka m dɔllif. Fʋn wa'ae zin'isi'a la m na keŋ ani; zin'ikanɛ ka fʋ na bɛ la, m na bɛɛ ani. Fʋ nidib na an mam nidib, ka fʋ Wina'am aan m Wina'am.

¹⁷ Zin'ikanɛ ka fʋ na kpi la, m mɛ na kpii ani ka ba na mumim ani. Zugsɔb kɛl ka sʋnsa'aŋ paae mam, m ya'a kɛ ka si'el wɛlig man nɛ fʋ ka ya'a ka' kum.”

¹⁸ Ka Naomi nyɛ ka Ruf bɔɔd ye o dɔl o nɛ o sʋnf wʋsa la, o da pʋ lɛm pian' si'ela.

¹⁹ Ka ba dɔl taaba paae Betilehem. Ka ban paae teŋin la, li da lidig teŋ la nidib wʋsa nɛ; ka pu'ab la yɛt ye, “Naomi nwa' bɛɛ?”

²⁰ Ka o yɛli ba ye, “Da lɛm buolinim ye Naomi, amaa buoliminim ye Mara, bɔzugɔ, Wina'am Onɛ an Paŋtita'ar sɔb la kɛ ka m bɛllim lieb tɔɔgʋ tisim.

²¹ M da yi kpɛ' nɛ mɔrim bɛdegʋ, amaa Zugsɔb la kɛ ka m lɛb na nɛ nu'uzaalis. Bɔ ka ya buon man ye Naomi? Zugsɔb la tisim yɛlpakir. Wina'am Onɛ an Paŋtita'ar sɔb la kɛ ka zutɔɔg paam.”

²² Li da niŋnɛ anwa ka Naomi nɛ o bipu'a yi Moab teŋin lɛbi kul na. Ba da paae Betilehem ka mui bunib nan pin'innɛ.