Obadia 1 - GH

¹ Obadia n da zaansim ka Zugsɔb onɛ an paŋ tita'ar sɔb la nie pa'al o Edom dim yɛla si'em nwa'. Ti wʋm labaar ka li yi Zugsɔb la san'an na yɛt ye o tʋm o tʋmtʋm buudi wʋsa ni, ye ba yɛl ye, “Duomi ka ti ti'ebi keŋ zab nɛ Edom dim la!

² Gɔsima, m na kɛ ka fʋ an tembil tɛɛns la wʋsa ni ka ba na ziemif hali.

³ Fʋn kanɛ bɛ tampiins linɛ bɛ zuoya zug, ka bɛ kukuos zug agɔla la, nyɛɛsim kanɛ ka fʋ mɔri fʋ sʋnfʋn la ma'adif. Fʋ nwɛ'ɛdi fʋ nyɔ'ɔg ye, ‘Anɔ'ɔnɛ na nyaŋi sigisim teŋinɛ?’

⁴ La'an nɛ fʋn ianki dʋ agɔl wʋʋ silʋg ka tɛɛdi fʋ tɛog nwadbibis la teŋsʋk la, ani ka m na vɛ'ɛgi fʋ sigis na.” Zugsɔb la pian'ʋkʋ la.

⁵ “Na'ayiis ya'a kɛɛn ya yin na bɛɛ faandib ya'a libigi ya yʋ'ʋŋ, ba kʋ zuu ya la'ad la wʋsaa, asɛɛ ban ieed si'el la ma'aa. (Waai, gɔsim ban bɛ yɛla ni si'em!) Bunnib la ya'a bun pɔɔdinɛ, ba kʋ bas sieba ka banɛ wi'isid la mɛ paam?

⁶ Amaa ba na faaɛn Esau la'ad la wʋsa hali la'abanɛ ka o su'a la wʋsa ba na mɔri keŋ?

⁷ Banɛ sʋŋidif la na kadi fʋ ta'as teŋ titɔndigin; nimbanɛ aan fʋ zuanam la na pan'asif ka bɛndi nyaŋif. Banɛ diti fʋ diib la bɛnd baansi fʋ tuon amaa ka fʋ kʋ baŋɛ.”

⁸ Zugsɔb la yɛl ye, “Daakan la bi'esʋg kae, m na kʋ Edom nimbanɛ mɔr ya'am nɛ banɛ an baŋir dim Esau zuoya ni la.

⁹ Yanam Teman dima, dabiem na kpɛn' ya zabzabidib la, ka onɛ wʋsa bɛ Esau zuoya la ni ba na kɔdig o.

¹⁰ Yanamɛ da kisi ya pitʋ Jakob la zug, ya na di nyan ka nyɛ san'auŋ saŋa linɛ ka' bɛnnɛ.

¹¹ Daakanɛ ka saam da vaae o la'ad wʋsa la ya da zi'enɛ gɔsid. Hali ka teŋ zʋŋ dim la kpɛn' o tempʋʋgin la ka maal bʋgʋlʋm-bʋgʋlʋm Jerusalem yɛla, ya da anɛ wʋʋ ba bi'emnam la yinne.

¹² Li da pʋ dɔl suor ye ya sʋnf malisi ya ba'abiig la'ad san'auŋ la saŋa, bɛɛ maan sumalisim Juda san'auŋ dabisir la daarɛ, bɛɛ nwɛ'ɛd nyɔ'ɔg daakanɛ ka ba paam yɛla laa.

¹³ Li da pʋ dɔl suor ye ya dɔl taaba wʋʋ zabzabidib nɛ kpɛn' m nidib la teŋ za'anɔya ni, ba san'auŋ dabisir la daarɛ. Li pʋ dɔl suor ye ya nɛ'ɛsidi ba ban da bɛ yɛla nii, ba san'auŋ dabisir la daarɛ. Li pʋ dɔl suor ye ya vaae ba areza'asi pɛ'ɛsi ya din, ba san'auŋ dabisir la daarɛ.

¹⁴ Li mɛ pʋ dɔl suor ye ya zi'e suokita ni kʋʋdi ba nimbanɛ zɔti yit la, bɛɛ ya lɛm gban'ad banɛ kpɛlim vʋe la tisidi ba dataas, ba san'auŋ dabisir la daarɛ.

¹⁵ Daakanɛ ka Zugsɔb na kad buudi wʋsa saria la li'el ya. Yanam Edom dimi maal Israel dim si'em la ya bɛ'ɛd kanɛ ka ya maal la, li lɛbi ya mɛŋ zugin.

¹⁶ Nwɛnɛ yanam banɛ aan m nidib la da nu tʋbtɛɛgir daam m zuokanɛ an kasi la zug la, ala mɛn ka tɛɛns la wʋsa na nuudi li saŋa wʋsa, ba na nu hali, ka lɛm maligin nuu ti bʋg ka bɔdig nwɛnɛ ba nan zi' bɛ dunia kaŋa nwa' ni nɛ.

¹⁷ Amaa Zion Zuor na an zin'ikanɛ ka onɛ wʋsa bɛ na paam faangir: li na an zin'ikanɛ an kasi. Ka Jakob yidim wʋsa na lɛb na dii ba faar.

¹⁸ Saŋkan la ka Jakob yir na an bugum ka Josef dɔɔg na an bugum pielim; ka Edom dim na an vaala ka bugum la na dii kanb Edom teŋ la wʋsa, ka ba sɔ' kʋ lɛn vʋeya.” Zugsɔb la pian'.

¹⁹ M nimbanɛ bɛ Negef la na di'e Edom zuoya la wʋsa bɛɛ anina. Ka banɛ bɛ Sefela teŋgbauŋʋn la mɛ na sʋ'oe Filistia teŋ la. Ba na sʋ'ʋgi li mɔri paae Efiram sʋ'ʋlim nɛ Samaria teŋgbauŋ la wʋsa, ka Benjamin yaas la mɛ na sʋ'oe Gilead sʋ'ʋlim la.

²⁰ Ka Israel dim banɛ nam bɛ Keenan teŋin la na kul na ka sʋ'ʋg teŋ la wʋsa mɔri keŋ paae Zarefat; ka banɛ mɛ yi Jerusalem teŋin bɛɛ Sefarad teŋgbauŋʋn la na lɛb na sʋ'oe Negef teŋkpɛmis la wʋsa.

²¹ Ka banɛ nyɛ faangir la na dʋ Zion Zuor zuginɛ sʋ'oe Edom zuoya sʋ'ʋlim la. Ka Zugsɔb yʋ'ʋn na an Na'ab ka sʋ'oe na'am sʋ'ʋlim wʋsa.