Nahum 1 - GH

¹ Labakaŋa anɛ Ninive yɛla ka Wina'am nie pa'al Nahum onɛ yi Elikos teŋin na la ka o sɔb.

Zugsɔb sʋnf pɛlig Ninive yɛla

² Zugsɔb la anɛ Wina'am onɛ nyuun, ka an onɛ yɔɔd sam nɛ o sʋʋnr wʋsa: Zugsɔb yɔɔd o dataas wʋsa sam, ka o sʋnf pɛligid nɛ o bi'emnam.

³ Zugsɔb la sʋʋnr pʋ duod tɔ'ɔtɔɔ amaa o lɛɛ mɔr paŋ; ka lɛɛ kʋ bas tʋʋmbɛ'ɛd sɔb ka o keŋ zaalim-zaalim, asɛɛ o tɛɛg o tʋbir. O suor bɛ nɛ sisi'etita'ar nɛ sisi'epiliŋin, ka saŋgbana la aan o nɔba uusʋg.

⁴ Zugsɔb la tisid nɔɔr ka Atɛuk kpiɛnd, onɛ kɛt ka kɔlis la wʋsa kʋdigid; Basan nɛ Kaamel zuoya mɔɔd la zɛndig nɛ, ka Lebanon tiis puum linɛ vɛnl la wʋsa sʋʋg.

⁵ Zuoya la na dam, ka zuobibis nyɛlig. Teŋ la mi'im o tuon, nɛ dunia la zin'ikanɛ ka nidib bɛ wʋsa.

⁶ O sʋʋnr ya'a duoe, anɔ'ɔnɛ na nyaŋi zi'enɛ o tuon bɛɛ kpɛm bɛɛ o ni, o sʋnpɛɛn la saŋa? O sʋnpɛɛn la kpa'adnɛ nwɛnɛ bugum nɛ, ka tampiins wʋsa nwa'adi widigid o tuon.

⁷ Zugsɔb la an sʋ'ʋŋa, fʋ ya'a ti bɛ yɛllin, onɛ aan fʋ suak zin'ig; o sʋŋid banɛ niŋ o yadda la.

⁸ Amaa Ninive tempʋʋg la wʋsa, o na kɛ ka ku'om dii li ka li naae, ka kad o dataas wʋsa kpɛn'ɛs likin.

⁹ Bɔɔ kɛ ka ya gban'e pʋtɛn'ɛbɛ'ɛd Zugsɔb la yɛla? O na li' ya wʋsa vuguri ka li naae.

¹⁰ Ba na tʋ'ʋsid wʋʋ banɛ bug daam nɛ, ka bugum na dii ba nwɛnɛ gɔn'ɔs nɛ mɔkpi'emis nɛ.

¹¹ Ninive, sɔ' nam mi' yii fʋ san'an na tɛn'ɛsid bɛ'ɛdi tisid Zugsɔb la, ka sa'an nidib sa'al bɛ'ɛdɛɛ.

¹² Amaa Zugsɔb la yɛl ye, “La'an nɛ ban mɔr sʋŋidib ka ba an bɛdegʋ la, ba na kɛnsigi ba bɛn la ka li naae. Amaa namiskanɛ daa paae yanam Juda dim la, m kʋ lɛn namisi ya ala ya'asɛ.

¹³ Nannanna m na yis yu'asin la ya niŋgɔnya ni ka san'am bana banɛ lɔɔ ya nu'us wʋsa.”

¹⁴ Zugsɔb la tis nɔɔr Ninive dim yɛla, ye, “Ya kʋ mɔr yaas ka ba pʋdigi ya yʋ'ʋrɛ. M na san'ami ya bada banɛ ka ya mɛɛ zi'el la wʋsa. M na tuu ya yaad, bɔzugɔ ya ka' vɔɔnrɛ ka li pʋ nar ye ya vʋeya.”

¹⁵ Gɔsima, sɔ' mɔr labasʋŋʋ yit zuoya ni kenna, O pian'ad anɛ suguru nɛ sumbʋgʋsʋm. O yɛt ye, “Yanam Juda dima, maalimi ya malima la di'ema, ka yɔ yanamɛ kaanb si'eli zi'el la. Bɔzugɔ nimbɛ'ɛdnam kʋ lɛn nyaŋi yaa, ba na paam san'auŋ.”