Mateo 1 - GH

Yesu Kristo yaanam la yɛla

¹ Nɛ'ɛŋa an Yesu onɛ an David yaaŋ, ka an Abraham yaaŋ la yaanam yɛla.

² Abraham da du'a Isaak. Ka Isaak du'a Jakob. Ka Jakob du'a Juda, nɛ o bieyanam nɛ o pitib.

³ Ka Juda du'a Perez nɛ Zera, ka ba ma yʋ'ʋr an Tama. Ka Perez du'a Heziron. Ka Heziron du'a Ram.

⁴ Ka Ram du'a Aminadab. Ka Aminadab du'a Nason. Ka Nason du'a Salmon.

⁵ Ka Salmon du'a Boaz, ka Rahab aan o ma. Ka Boaz du'a Obɛd ka Ruf aan o ma. Ka Obɛd du'a Jese.

⁶ Ka Jese du'a na'ab David. Ka David du'a Solomon. O ma da anɛ Uria pu'a.

⁷ Ka Solomon du'a Rehoboam. Ka Rehoboam du'a Abija. Ka Abija du'a Asa.

⁸ Ka Asa du'a Jehosafat. Ka Jehosafat du'a Joram. Ka Joram du'a Uzia.

⁹ Ka Uzia du'a Jotam. Ka Jotam du'a Ahaz. Ka Ahaz du'a Hezekia.

¹⁰ Ka Hezekia du'a Manase. Ka Manase du'a Amos. Ka Amos du'a Josia.

¹¹ Ka Josia du'a Jekonia nɛ bisieba. Saŋkan la ka ba gban'e Israel dimi mɔri ba keŋ Babilon teŋin la.

¹² Ka ban keŋ Babilon la, li nya'aŋ, ka Jekonia du'a Sealtiel. Ka Sealtiel du'a Zerubabɛl.

¹³ Ka Zerubabɛl du'a Abiud. Ka Abiud du'a Eliakim. Ka Eliakim du'a Azor.

¹⁴ Ka Azor du'a Zadok. Ka Zadok du'a Akim. Ka Akim du'a Eliud.

¹⁵ Ka Eliud du'a Eleazar. Ka Eleazar du'a Matan. Ka Matan du'a Jakob.

¹⁶ Ka Jakob du'a Josef, Mɛɛri sid, onɛ da an Yesu onɛ ka ba buon Kristo la ma.

¹⁷ Nɛ'ɛŋa pa'al ye Abraham n ti paae David anɛ yaanam kɔn'ɔb-kɔn'ɔb pii nɛ anaasi. Ka David n ti paae saŋkan ka ba mɔr Israel dimi keŋ Babilon la anɛ yaanam kɔn'ɔb-kɔn'ɔb pii nɛ anaasi. Ka saŋkanɛ ka ba mɔri ba keŋ Babilon la ti paae Kristo du'am la da anɛ yaanam kɔn'ɔb-kɔn'ɔb pii nɛ anaasi.

Yesu Kristo du'am yɛla

¹⁸ Yesu Kristo du'am da anɛ nwa'. O ma Mɛɛri da anɛ Josef pu'a-ɛliŋ. Ka Josef n da nam pʋ baŋ o la, ba nyɛ ka o mɔr pʋʋg linɛ an Wina'am Siig Kasi la din.

¹⁹ Ka o sid Josef n da an sida sɔb ka pʋ bɔɔd ye o diis Mɛɛri nyan nidibin la zug, o da gban'e o pʋtɛn'ɛrin ye o su'a bas Mɛɛri.

²⁰ On da tɛn'ɛsid yɛlbama o sʋʋnrin la, ka Zugsɔb maliak kɛɛn o san'an zaansʋŋin na. Ka maliak la yɛl o ye, “Josef, David yaaŋa, da kɛ ka dabiem kpɛn'ɛf nɛ fʋn na di'e Mɛɛri ka o aan fʋ pu'a, bɔzugɔ bikanɛ pʋʋg ka o mɔr la, anɛ Wina'am Siig Kasi la din.

²¹ O na du'a biribiŋ, ka fʋ na pʋd o yʋ'ʋr ye Yesu, bɔzugɔ o na faaɛn o nidibi ba tʋʋmbɛ'ɛdin.”

²² Yɛlbama wʋsa da niŋnɛ ye Zugsɔb la da kɛ ka o nɔdi'esidib yɛl si'el la niŋ amɛŋa ye,

²³ “Gɔsima, pu'a kanɛ zi' dau la na tʋk pʋʋgʋ du'a biribiŋ, ka ba na pʋd o yʋ'ʋr ye, ‘Immanuel’, ka li gbin an ye, ‘Wina'am bɛ nɛ ti.’”

²⁴ Ka Josef nie gbɛɛmini niŋ wʋʋ Zugsɔb maliak la yɛl o si'em la, ka pi'e o pu'a kul.

²⁵ Amaa o da pʋ baŋ o, hali ka o ti du'a biribiŋ la. Ka o pʋd biig la yʋ'ʋr Yesu.