Mak 1 - GH

Joon onɛ sʋʋd nidib Wina'am ku'om la mɔɔlʋg

¹ Nɛ'ɛŋa anɛ Yesu Kristo onɛ an Wina'am Biig la labasʋŋ pin'ilʋg.

² Li sɔb Azaya onɛ an nɔdi'es la gbauŋʋn ye, “M na tʋmi m tʋmtʋm ka o dɛŋi fʋ tuonnɛ maal suosʋŋi fʋ zug.”

³ Sɔ' bɛ mɔɔgini mɔɔn ye, “‘Maalimi suori tis Zugsɔb la; maalim suoraugʋ tisi ti Wina'am la, kɛl ka li an sappi mɔɔgin la tis o.’”

⁴ Joon onɛ da sʋʋd nidib Wina'am ku'om la da bɛ mɔɔgin mɔɔnnɛ tisid nidib ye, “Basimi ya tʋʋmbɛ'ɛd ka di'e Wina'am ku'om sʋʋb, ka Wina'am na yisi ya tʋʋmbɛ'ɛdi bas.”

⁵ Ka nidib bɛdegʋ yi Juda sʋ'ʋlim nɛ Jerusalem teŋin keŋ Joon san'an ka pɛligi ba pʋʋgʋ yɛl o ba tʋʋmbɛ'ɛd. Ka o sʋʋ ba Wina'am ku'om Joodan mu'arin la.

⁶ Joon daa yɛnɛ fuud linɛ ka ba maal nɛ yʋgʋm kɔnbid ka nɔk gbauŋʋ lɔɔ o siaa, ka o diib an na'azɔmnam nɛ siind.

⁷ Ka o mɔɔnnɛ tisid nidib ye, “Ninkanɛ dɔl mam nya'aŋ la anɛ nintita'ari gaad mam. M pʋ nar nɛ mam na sɛbini o tuonnɛ yidig o ta'ada nwiisɛ.

⁸ Mam sʋʋdi ya nɛ ku'om, amaa ninkanɛ kenna la na sʋʋ ya nɛ Wina'am Siig Kasi.”

Yesu Wina'am ku'om sʋʋb

⁹ Lin nya'aŋ ka Yesu yi Nazaret linɛ bɛ Galile sʋ'ʋlim la kena. Ka Joon sʋʋ o Wina'am ku'om Joodan mu'arin.

¹⁰ Ka on da dʋt ku'omin la, ka nyɛ ka arezana za'anɔɔr yɔ'ɔg, ka Wina'am Siig Kasi sigid o zugin na nwɛnɛ dawan nɛ,

¹¹ ka kʋkɔr yi arezana ni na yɛl ye, “Fʋ anɛ m binɔŋir ka m nini tigif hali.”

Sʋntaana n da mak Yesu la yɛla

¹² Tɔ'ɔtɔ yim ka Wina'am Siig Kasi daa mɔr Yesu keŋ mɔɔgin.

¹³ Ka o bɛɛ ani paae dabisa pisnaasi ka Sʋntaana kena mak o. Mɔɔgin bʋnkɔnbid da bɛɛ ani, ka maliaknam kena sʋŋ o.

Yesu buol ziiŋgban'adib anaasi la yɛla

¹⁴ Ban da yɔ Joon sanrega ni la, li nya'aŋ ka Yesu keŋ Galile

¹⁵ mɔɔn Wina'am labasʋŋʋ tisid nidib ka yɛt ye, “Li saŋa paae na. Wina'am sʋ'ʋlim li'el ya. Basimini ya tʋʋmbɛ'ɛd ka siak labasʋŋ la.”

¹⁶ Yesu n da dɔl Galile mu'ar nɔɔrin la, o nyɛ ziiŋgban'adib ayi', Simon nɛ o pitʋ Andrew ka ba gban'ad zimi. Li da anɛ ba tʋʋma la.

¹⁷ Ka o yɛli ba ye, “Dɔlli nɛ m ka mam na pa'ali ya suor ka ya kɛ ka nidib dɔl man wʋʋ ziiŋgban'adibi gban'ad zimi si'em la.”

¹⁸ Ka ba kpɛm basi ba zimi la'ad la, ka dɔl o.

¹⁹ Ka o keŋ bi'ela, ka nyɛ nidib ayi' banɛ an Zebedee biis Jemes nɛ Joon. Ka ba bɛ anrʋŋʋn maannɛ ba zimi la'ad.

²⁰ Ka o buoli ba, ka ba basi ba saam Zebedee nɛ o tʋmtʋmnib anrʋŋʋn la ka dɔl o.

Yesu kad kikirig Kapeenum la yɛla

²¹ Ka ba paae Kapeenum teŋin. Ka Jew dim Vʋ'ʋsʋm Daar ka Yesu kpɛn' Jew dim la'asʋg dɔɔgin pa'an nidib.

²² O da pa'an nidib la nɛ kpi'euŋ, ka li ka' wʋʋ gbauŋmi'idibi pa'an si'em laa. Ka pa'alʋg la lidig nidib la.

²³ Saŋkan nɔɔ ka dau sɔ' bɛ la'asʋg dɔɔgin la ka kikirig dɔl o.

²⁴ Ka o tans ye, “Yesu onɛ yi Nazaret na, fʋ ba'a bɔɔ bɛɛ ti ni? Fʋ kena ye fʋ san'ami tii? M mi' fʋn an sɔ'. Fʋ anɛ Wina'am onɛ an kasi la tʋmtʋm.”

²⁵ Ka Yesu tans kikirig la ye, “Kɛl vuud, ka yii o san'an.”

²⁶ Ka kikirig la kɛ ka dau la lu wʋʋ kpisiŋkpi'ir sɔb nɛ, ka kaas nɛ kʋkɔtita'ar ka nyaan yi dau la san'an.

²⁷ Ka li lidigi ba wʋsa, ka ba bu'osid taaba ye, “Nɛ' an bɔ? Li anɛ pa'al paal bɛɛ? Dau kaŋa mɔr kpi'euŋʋ pian'adi tisid kikiris ka ba siakid o nɔɔr.”

²⁸ Nɛ'ɛŋa da kɛnɛ ka Yesu labaar tiig Galile sʋ'ʋlim wʋsa tɔ'ɔtɔ.

Yesu ti'eb ban'adnam bɛdegʋ

²⁹ Ka ban yi Jew dim la'asʋg dɔɔgin la kpɛn' Simon nɛ Andrew yin la, ka Jemes nɛ Joon mɛ la'am dɔlli ba.

³⁰ Ka nwɛ'ɛdʋg mɔr Simon diem pu'a o ka digi, ka ba yɛl Yesu o yɛla,

³¹ ka o keŋ gban'e o nu'ugʋ duoe o zi'el. Ka nwɛ'ɛdʋg la bas pu'a la, ka o maali ba saauŋ.

³² Ka winnigi ti sɔbid la ka nidib mɔr ban'adnam bɛdegʋ nɛ banɛ ka kikiris dɔlli baa kɛn Yesu san'an na.

³³ Ka teŋ la nidib bɛdegʋ la'as samannin.

³⁴ Ka Yesu ti'eb nidib bɛdegʋ banɛ mɔr wiim kɔn'ɔb-kɔn'ɔb, ka kad kikiris bɛdegʋ yis. Yesu da pʋ siak ka kikiris la yɛl si'ela, bɔzugɔ ba pʋn mi' on an sɔ'.

Yesu keŋ zin'ikanɛ an baanlimm sɔs Wina'am

³⁵ Yesu da duonɛ ka bɛog nam pʋ yɔe nierɛ ka o yi teŋ pʋʋg la yiŋi keŋ mɔɔgin sɔs Wina'am.

³⁶ Ka Simon nɛ o zuanam yii ieed o,

³⁷ ka ban nyɛɛ o la, ba yɛl o ye, “Nidib wʋsa ieedif nɛ.”

³⁸ Ka Yesu yɛli ba ye, “Kɛlli ka ti keŋ tɛɛns banɛ kpi'e la ka m mɛ mɔɔl labasʋŋ la anina ka linzug ka m kena.”

³⁹ Ka o keŋ gilig Galile sʋ'ʋlim wʋsa ka mɔɔn labasʋŋ la Jew dim la'asʋg dɔɔdin ka kad kikirisi yisid.

Yesu ti'eb kʋkɔm la yɛla

⁴⁰ Ka kʋkɔm kɛn Yesu san'an naa igini sɔs o ye, “Li ya'a aan fʋ bɔɔdim fʋ na tun'e kɛ ka m nyɛ laafi ka lieb nyain.”

⁴¹ Ka Yesu zɔɔ o nimbaanlig ka si'is o, ka yɛl ye, “M bɔɔd ala, liebim nyain.”

⁴² Ka o wiim la kpɛm bas o, ka o niŋgbiŋ lɛbi an nyain.

^43-44 Ka Yesu sa'al o nɛ kpi'euŋ ye, “Mid ka fʋ yɛl sɔ' li yɛla. Amaa kem nɔki fʋ mɛŋi pa'al Wina'am maanmaan la, ka maal maannɛ tis Wina'am wʋʋ Moses n da zi'el si'em la fʋ laafi nyɛɛb la zug. Ala ka nidib wʋsa na baŋ ye fʋ mɔr laafi nannanna.”

⁴⁵ Amaa on yi la, o pin'ili mɔɔnnɛ li paalʋ. Ka li tiig zin'ig wʋsa. Dinzug ka Yesu da pʋ siaki nie o mɛŋ tempʋʋsinɛ, ka kpɛlim teŋkpɛmisin. Ka nidib yi zin'is wʋsa kɛɛn o san'an na.