Luk 1 - GH

Gbauŋ la sɔbir yɛla

¹ Naa, ninvʋsʋŋ Teofilus, nidib bɛdegʋ kpɛ'ɛŋi ba mɛŋi sɔb bʋn linɛ wʋsa tʋmi ti san'an

² nwɛnɛ banɛ daa bɛ pin'ilʋgʋn la nyɛ si'el nɛ ba nini ka mɔɔl labaar la.

³ Ka mam mɛ ma'ae m mɛŋi bu'osi baŋ yɛlbama sʋ'ʋŋa ba pin'ilʋgʋn la zug ka m tɛn'ɛs ka li an sʋm ye m sɔbi tiɛn fʋ li yɛla nwɛnɛ lin nar si'em.

⁴ M niŋid nɛ'ɛŋa ye fʋ baŋ ye, yɛlbanɛ wʋsa ka ba pa'alif la anɛ sida.

Maliak kɛn Zakaria san'an na

⁵ Saŋkanɛ ka Herod da di na'am Juda teŋin la, dau sɔ' da bɛɛ anina ka o yʋ'ʋr buon Zakaria. O da anɛ Wina'am maanmaan, ka an Abija nid. Ka o pu'a yʋ'ʋr buon Elizabet ka an Aaron onɛ da an Wina'am maanmaan la tuŋ nid.

⁶ Ba da anɛ pʋpielim dim Wina'am tuon, ka di'ed Wina'am nɔɔr nɛ o nɔzi'ela wʋsa, ka ka' taala.

⁷ Ba da pʋ mɔr biiga, bɔzugɔ Elizabet da anɛ kʋndu'ar, ka babayi' la wʋsa mɛ kʋdig hali.

⁸ Ka Zakaria nɛ o maanmaan taaba saŋa paae ye ba tʋm Wina'am Pʋ'ʋsim Yir tʋʋma.

⁹ Maanmaannib daa ɛɛnti bʋgʋlʋmnɛ gaŋ onɛ na nyu'oe tudaari la. Ban da bʋgʋlʋm la, ka li lu Zakaria zug ye o kpɛn' Wina'am malʋŋ dɔɔgin nyu'oe tudaari tis Wina'am.

¹⁰ Ka tudaari la nyu'or saŋa paae la, ka nidib bɛdegʋ kpɛlim yiŋi sɔsid Wina'am.

¹¹ Ka Zugsɔb maliak nie o mɛŋi pa'al Zakaria maan zin'ikanɛ ka ba nyu'od tudaari la datiuŋ.

¹² Ka Zakaria nyɛɛ o la, ka yirig hali, ka dabiem kpɛn' o.

¹³ Ka maliak la yɛl o ye, “Zakaria, da zɔt dabiem, bɔzugɔ Wina'am wʋmi fʋ sɔsʋg. Fʋ pu'a Elizabet na du'a biribiŋ, ka fʋ na pʋd o yʋ'ʋr ye Joon.

¹⁴ O na kɛ ka ya paam sumpielim nɛ sumalisim bɛdegʋ. Ka nidib bɛdegʋ na mɔr sumalisim biig la du'am zug.

¹⁵ Ka o na lieb nintita'ar Zugsɔb san'an, ka kʋ nu daam bɛɛ dankpi'euŋɔ. Wina'am Siig Kasi na pɛ'ɛl o, hali o du'am saŋa zaŋi ken sa.

¹⁶ Ka o na mɔr Israel nidib bɛdegʋ lɛbi ba Zugsɔb san'an na,

¹⁷ ka na dɛŋ Zugsɔb la tuon, ka mɔr Wina'am Siig nɛ paŋ kanɛ ka Wina'am nɔdi'es Elaja da pʋn mɔr la. O na maal saamnam nɛ ba biis yɛla, ka kɛ ka nimbanɛ ki'isid Wina'am nɔɔr la lieb pʋpielim nɛ ya'am dim, ka kɛ ka Zugsɔb nidib la ti'eb ka guri ba Zugsɔb.”

¹⁸ Ka Zakaria bu'os maliak la ye, “M na niŋ wala siak nwa'? Bɔzugɔ man nɛ m pu'a wʋsa kʋdignɛ.”

¹⁹ Ka maliak la lɛbis o ye, “Man yʋ'ʋri buon Gabirel, onɛ zi'e Wina'am san'an la. Ka onɛ tʋmim na ye m pian' tisif ka yɛlif labasʋŋ nwa'.

²⁰ Gɔsima, fʋ na lieb gik, ka kʋ tun'e pian'ada, asɛɛ lin wʋsa ka m yɛlif la ti niŋi naae, bɔzugɔ fʋ pʋ niŋim pian'ad la yaddaa. Li saŋa ya'a paae li na niŋ amɛŋa.”

²¹ Nidib la daa gur Zakaria yiib na, ka bɔɔd ye ba baŋ linɛ kɛ ka o yuug Wina'am Pʋ'ʋsim Yin la.

²² Ka on yina la, o pʋ tun'e pian'ada. Ka ba baŋ ye Wina'am nie bʋnsi'a tis o Pʋ'ʋsim Yin la. Ka o gigilim ka pa'annɛ ba nɛ nu'us.

²³ Ka o tʋʋma saŋa daa naae la, ka o kul yin.

²⁴ Ka lin nya'aŋ la, o pu'a Elizabet daa tʋk pʋʋg, ka su'a li nwadis anu, ka pʋ yɛl sɔ'. O daa yɛl ye,

²⁵ “Nwa' anɛ Zugsɔb la tʋʋma, onɛ yʋ'ʋn gɔsim yɛla ka yisim nyan nidib sʋʋgin.”

Maliak kɛn Mɛɛri san'an na

²⁶ Ka Elizabet pʋʋg la daa an nwadis ayuobʋ la, Wina'am daa lɛn tʋm maliak Gabirel Nazaret, teŋ kanɛ bɛ Galile sʋ'ʋlimin la,

²⁷ ye o kem pu'asadir onɛ nan zi' dau san'an. O anɛ Josef pu'a-ɛliŋ, ka o yʋ'ʋr buon Mɛɛri. Josef anɛ na'ab David yaaŋ.

²⁸ Ka maliak la keŋ Mɛɛri san'anɛ pʋ'ʋs o ye, “Nɛ fʋ zusʋŋ. Zugsɔb la bɛ nɛf, ka niŋi fʋ zug yɛlsʋm.”

²⁹ Mɛɛri daa wʋm Maliak la yɛl si'el, li daa daam o nɛ ka dabiem kpɛn o, ka o tɛn'ɛsid ye, bɔ pʋ'ʋsim nwa'?

³⁰ Ka maliak la yɛl o ye, “Mɛɛri, da zɔt dabiem, ka fʋ mɔr yɛlsʋm Wina'am san'an.

³¹ Gɔsima, fʋ na tʋk pʋʋgʋ du'a biribiŋ. Ka fʋ na pʋd o yʋ'ʋr ye Yesu.

³² O na ti an nintita'ar. Ka ba na buol o ye, Wina'am Onɛ Gaad Si'el Wʋsa la Biig. Ka Zugsɔb Wina'am la na tis o, o yaab David na'am gbauŋ.

³³ O na niŋ Jakob yaas na'ab, saŋa linɛ ka' naarɛ. Ka o na'am saŋa kʋ mɔr bɛnnɛ.”

³⁴ Ka Mɛɛri bu'os maliak la ye, “Man nan zi' dau la, m ye m niŋ wala tʋk pʋʋga?”

³⁵ Ka maliak la lɛbisi yɛl o ye, “Siig Kasi na sigi fʋ zugin na, ka Wina'am Onɛ Gaad Si'el Wʋsa la paŋ na bɛɛ fʋ ni. Dinzug, pʋpielim bikanɛ ka fʋ na du'a la, ba na buol o ye Wina'am Biig.

³⁶ Gɔsima, fʋ du'ad Elizabet, onɛ ka ba ye o anɛ kʋndu'ar la tʋk biribiŋ pʋʋg nwadis ayuobʋ nwana, la'an nɛ on an pu'anya'aŋ la.

³⁷ Bɔzugɔ si'el kae ka Wina'am kʋ nyaŋi maalɛ.”

³⁸ Ka Mɛɛri lɛbis ye, “Man anɛ Wina'am tʋmtʋm pu'ak. Kɛl ka li niŋ ala tisim wʋʋ fʋn yɛl si'em la.” Ka maliak la bas o ka keŋ.

Mɛɛri keŋ ye o kaae Elizabet

³⁹ Ka dabisban ni, ka Mɛɛri duoe tɔ'ɔtɔ keŋ Juda sʋ'ʋlim linɛ an kʋkʋna teŋ la.

⁴⁰ Ka o paae kpɛn' Zakaria yinne pʋ'ʋs Elizabet.

⁴¹ Ka on wʋm pʋ'ʋsʋg la, ka biig la duoe o pʋʋgin ka Wina'am Siig Kasi pɛ'ɛl Elizabet,

⁴² ka o tans ye, “Fʋ mɔr albareka pu'ab sʋʋgin. Bikanɛ ka fʋ na du'a la na an albareka biig.

⁴³ Bɔzug ka fʋn onɛ aan m Zugsɔb ma la kena ye fʋ kaae mam?

⁴⁴ Gɔsima, man wʋmi fʋ pʋ'ʋsʋg la, bikanɛ bɛɛ m pʋʋgin la duonɛ nɛ sumalisim.

⁴⁵ Albareka bɛ nɛ fʋn onɛ niŋ yadda ye Wina'am yɛl si'el la wʋsa sid na maal.”

Mɛɛri yʋ'ʋm yʋʋma zun'e Wina'am la

⁴⁶ Ka Mɛɛri yɛl ye, “M zun'od Wina'am yʋ'ʋr nɛ m sʋʋnr wʋsa.

⁴⁷ M mɔr sumalisim, Wina'am onɛ aan m faangid la zug,

⁴⁸ bɔzugɔ o tiɛnd man kanɛ aan o tʋmtʋm pu'ak tadʋŋ la yɛla. Lin yi nannanna ken sa, zʋmaana wʋsa na buonim ye albareka sɔb.

⁴⁹ Wina'am onɛ mɔr paŋ la maal bʋnsʋŋ tita'ari tis man. O yʋ'ʋr anɛ yʋ'ʋsʋŋ.

⁵⁰ Ka o zɔt nimbaanlig nɛ banɛ zɔt o la zʋmaana wʋsa ni,

⁵¹ ka o nu'ug tʋm tʋʋm titada, ka widig nyɛɛsim dim nɛ ba nyɛɛsim pʋtɛnda,

⁵² ka yis na'abanɛ mɔr paŋi ba na'am gbana zut, ka dʋ'ʋs tadimnam,

⁵³ ka diis banɛ kɔ'ɔm zabid la nɛ disʋma, ka ba tig, ka kɛ ka kpan'am dim lɛb nu'uzaalis.

^54-55 O pʋ tam nɔzi'elkanɛ ka o da tisi ti yaanam laa, amaa ka kena ye o sʋŋ o tʋmtʋm Israel, ka tiɛnd o nimbaanlzɔɔr nɛ Abraham nɛ o yaas la wʋsa saŋkanɛ ka' bɛnnɛ.”

⁵⁶ Ka Mɛɛri daa bɛ nɛ Elizabet paae nwadis atan', ka lɛbi kul o yin.

Joon onɛ sʋʋd nidib Wina'am ku'om la yɛla

⁵⁷ Elizabet du'am saŋa da paae la, ka o du'a biribiŋ.

⁵⁸ Ka o kpi'es nɛ o du'adib wʋm ye Zugsɔb la zɔɔ o nimbaanlig bɛdegʋ. Ka ba wʋsa maal sumalisim nɛ o.

⁵⁹ Ka daba anii daar la, ka ba kena ye ba kpɛn'ɛs biig la baŋʋ, ka gban'e ye ba zaŋ o ba' Zakaria yʋ'ʋri pʋd o.

⁶⁰ Amaa o ma yɛl ye, “Ayei, o yʋ'ʋr na anɛ Joon.”

⁶¹ Ka ba lɛbis ye, “Fʋ du'adib baa yinne kae ka o yʋ'ʋr buon alaa.”

⁶² Ka ba bu'os biig la ba' nɛ nu'us ye ba baŋ on bɔɔd ye ba pʋd biig la yʋ'ʋsi'a.

⁶³ Ka o pa'ali ba nɛ nu'ug ye ba tis o si'el ka o sɔb. Ka o di'e sɔb ye, “O yʋ'ʋr anɛ Joon.” Ka li lidigi ba wʋsa.

⁶⁴ Ka anina yim ka o zilim lak, ka o ya'ae o nɔɔri pian'ad Wina'am yʋ'ʋr.

⁶⁵ Ka dabiem kpɛn' ba kpi'es la wʋsa. Ka labakaŋa yadig Juda kʋkʋna teŋ la wʋsa.

⁶⁶ Ka banɛ wʋsa daa wʋmi li yɛla la da tɛn'ɛsid ka bu'osid ye, “Bikaŋa na ti aan anɔ'ɔnɛ? Bɔzugɔ Zugsɔb la nu'ug bɛɛ o ni.”

Zakaria di'e Wina'am pian'adi tis nidib la

⁶⁷ Ka Wina'am Siig Kasi kpɛn' biig la ba' Zakaria ni. Ka o di'e Wina'am nɔɔri yɛl ye,

⁶⁸ “Kɛlli ka ti zun'e Wina'am onɛ an Israel Zugsɔb la yʋ'ʋr, bɔzugɔ o kena ye o faaɛn o nidib ka tisi ba yɔlisim.

⁶⁹ O tisi ti Faangid tita'ar onɛ yii o tʋmtʋm David gbinnin na la,

⁷⁰ wʋʋ on da pian' tis o nɔdi'es sʋma banɛ da bɛ kʋdimin sa,

⁷¹ ye, o na faaɛn ti, ti bi'emnam nɛ banɛ kisi ti la nu'usin.

⁷² Ala ka o pa'al o nimbaanlzɔɔr nɛ ti yaanam, ka tiɛn o nɔzi'elʋg nɛ ba.

⁷³ Li anɛ pɔkanɛ ka o daa pɔ nɛ ti yaab Abraham

⁷⁴ ye o na faaɛn tii ti bi'emnam nu'usin, ka kɛ ka ti tʋm o tʋʋma, ka dabiem kae la.

⁷⁵ Ala ka ti na bɛɛ o san'an nɛ kasi nɛ pʋpielim ti nyɔvʋr bɛn wʋsa.

⁷⁶ Ka fʋn onɛ aan m biig nwa', ba na buonif ye, Onɛ Gat Si'el wʋsa la nɔdi'es, bɔzugɔ fʋ na dɛŋ tuon ye fʋ maal suori tis Zugsɔb la.

⁷⁷ Ka fʋ na yɛl nidib la ye Wina'am na faaɛn ba, ka yisi ba tʋʋmbɛ'ɛdi bas.

⁷⁸ Li anɛ Wina'am nimbaanlzɔɔr la zug ka o yɛlsʋm daar na nie nyain

⁷⁹ tis banɛ bɛ likin nɛ banɛ ka kum kpɛn'ɛsidi ba dabiem la; ka pa'ali ti suokanɛ ka ti na dɔl ka nyɛ sumbʋgʋsʋm.”

⁸⁰ Ka biig la nɔbig, ka mɔr ya'am nɛ siig la paŋ, ka bɛ mɔɔgin hali ti paae saŋkanɛ ka o yis o mɛŋ paalʋ ni Israel dim san'an.