Kaalʋg 1 - GH

¹ Israel dim la da bɛ Sinai mɔɔgin la, Zugsɔb la da pian' tis Moses La'asʋg Fuug Sʋgʋrin la. Li da anɛ Israel dimi da yi Egipt teŋin la li yʋma ayi' nya'aŋ, li nwadig kanɛ pɛ'ɛs ayi' la pin'ilʋg daar. Ka Zugsɔb yɛl o ye,

² “Kaalim Israel nidib la, tuŋ nɛ yir wʋsa, ka sɔb dau wʋsa yʋ'ʋr.

³ Fʋn nɛ Aaron na kaali ba bɛn-bɛn, dap banɛ wʋsa bɛ Israel ka ba yʋma paae pisi bɛɛ gaad ala ka ba na nyaŋi yi tanpinɛ zab.

⁴ Dɔɔg wʋsa ni dau onɛ an o tuŋ kpɛɛm na sʋŋi ya.

⁵ Nimbanɛ na sʋŋi ya la yʋda nwa': Reuben dɔɔg la ni na anɛ Elizu onɛ an Sediu biig la,

⁶ ka Simeon dɔɔg la ni na anɛ Selumiel onɛ an Zurisiadai biig la,

⁷ ka Juda dɔɔg la ni na anɛ Nason onɛ an Aminadab biig la.

⁸ Isaka dɔɔg la ni anɛ Netanɛl onɛ an Zuar biig la,

⁹ ka Zebulun dɔɔg la ni anɛ Eliab onɛ an Helon biig la.

¹⁰ “Josef biisin la, Efiram dɔɔg la ni na anɛ Elisama onɛ an Ammihud biig la, ka Manase dɔɔg la ni na anɛ Gamaliel onɛ an Pedazu biig la,

¹¹ ka Benjamin dɔɔg la ni na anɛ Abidan onɛ an Gideon biig la,

¹² ka Dan dɔɔg la ni na anɛ Ahieza onɛ an Amisiadai biig la,

¹³ ka Aser dɔɔg la ni na anɛ Pagiel onɛ an Okiran biig la.

¹⁴ Gad dɔɔg la ni na anɛ Eliasaf onɛ an Dewel biig la,

¹⁵ ka Naftali dɔɔg la ni na anɛ Ahira onɛ an Enan biig la.”

¹⁶ Nimbama ka ba da gaans nidib la sʋʋgin ye ba luu ba mɛŋ dɔɔd la tuon. Banɛ da an Israel buudi la dɔɔd tuongatib.

¹⁷ Moses nɛ Aaron da la'as nimbama banɛ ka ba gaans la

¹⁸ ka buol Israel nidib la wʋsa ye ba la'as taaba, nwadkanɛ paasid ayi' la pin'ilʋg daare sɔb banɛ an wʋʋ yʋma pisi bɛɛ gaad ala la yʋda yinne-yinne, dɔlisidi ba tuŋ nɛ ba yir wʋsa pʋʋgin,

¹⁹ wʋʋ Zugsɔb la da pʋn yɛl Moses si'em la. Alazug, o da kaali ba Sinai mɔɔgin la.

²⁰ Reuben da anɛ Jakob onɛ yʋ'ʋri da lɛm buon Israel la bikpɛŋ. O dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba yaa an si'em la.

²¹ Banɛ ka ba da sɔb Reuben dɔɔg la ni kal da anɛ tusa pisnaasi nɛ ayuobʋ nɛ kɔbisnu (46,500).

²² Simeon dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

²³ Banɛ ka ba da sɔb Simeon dɔɔg la ni kal da anɛ tusa pisnu nɛ awai nɛ kɔbistan' (59,300).

²⁴ Gad dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

²⁵ Banɛ ka ba da sɔb Gad dɔɔg la ni kal da anɛ tusa pisnaasi nɛ anu nɛ kɔbisyuobʋ nɛ pisnu (45,650).

²⁶ Juda dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

²⁷ Banɛ ka ba da sɔb Juda dɔɔg la ni kal da anɛ tusa pisyɔpɔi nɛ anaasi nɛ kɔbisyuobʋ (74,600).

²⁸ Isaka dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

²⁹ Banɛ ka ba da sɔb Isaka dɔɔg la ni kal da anɛ tusa pisnu nɛ anaasi nɛ kɔbisnaasi (54,400).

³⁰ Zebulun dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

³¹ Banɛ ka ba da sɔb Zebulun dɔɔg la ni kal da anɛ tusa pisnu nɛ ayɔpɔi nɛ kɔbisnaasi (57,400).

³² Josef yaas la pʋʋgin, Efiram dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

³³ Banɛ ka ba da sɔb Efiram dɔɔg la ni kal da anɛ tusa pisnaasi nɛ kɔbisnu (40,500).

³⁴ Manase dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

³⁵ Banɛ ka ba da sɔb Manase dɔɔg la ni kal da anɛ tusa pistan' nɛ ayi' nɛ kɔbisyi' (32,200).

³⁶ Benjamin dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

³⁷ Banɛ ka ba da sɔb Benjamin dɔɔg la ni kal da anɛ tusa pistan' nɛ anu nɛ kɔbisnaasi (35,400).

³⁸ Dan dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

³⁹ Banɛ ka ba da sɔb Dan dɔɔg la ni kal da anɛ tusa pisyuobʋ nɛ ayi' nɛ kɔbisyɔpɔi (62,700).

⁴⁰ Aser dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

⁴¹ Banɛ ka ba da sɔb Aser dɔɔg la ni kal da anɛ tusa pisnaasi nɛ yinne nɛ kɔbisnu (41,500).

⁴² Naftali dɔɔg la ni, ba da sɔb dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la yʋda yinne-yinne dɔlis wʋʋ ba tuŋ nɛ ba za'asi an si'em la.

⁴³ Banɛ ka ba da sɔb Naftali dɔɔg la ni kal da anɛ tusa pisnu nɛ atan' nɛ kɔbisnaasi (53,400).

⁴⁴ Bama ka Moses nɛ Aaron nɛ Israel tuongatib pii nɛ ayi' la da sɔb, sɔ' wʋsa nɛ o tuŋ kpɛɛm.

⁴⁵ Israel dim dap banɛ wʋsa yʋma da paae pisi bɛɛ gaad ala ka na nyaŋi yi tanpinɛ zab la, ba da sɔbi ba yʋda yinne-yinne dɔlis wʋʋ ba tuŋ nɛ ba za'asi an si'em la.

⁴⁶ Ba wʋsa kal da la'as nɛ tusa kɔbisyuobʋ nɛ atan' nɛ kɔbisnu nɛ pisnu (603,550).

⁴⁷ Amaa ba da pʋ kaal Levi dɔɔg dim la paasɛ,

⁴⁸ bɔzugɔ Zugsɔb la da pʋn yɛl Moses ye,

⁴⁹ “Mid ka fʋ kaal Levi dɔɔg la bɛɛ paasi ba Israel dim wʋsa kallin,

⁵⁰ amaa gaŋim Levi dɔɔg la ka ba gɔt Nɔnaar Fuug Sʋgʋr kanɛ ka m girima bɛɛ ani la nɛ li la'ad nɛ linɛ wʋsa bɛɛ ani la. Banɛ na ziid Fuug Sʋgʋr la nɛ li la'ad nɛ linɛ bɛɛ ani la wʋsa. Banɛ na gɔti li yɛla ka zin' giligi li.

⁵¹ Saŋkanɛ wʋsa ka li nar ye Fuug Sʋgʋr la tɔɔm zin'ig, Levi dim la na piligi li ka li ya'a nar ye li zi'en zin'isi'a banɛ na maali li zi'el. Onɛ ka' Levi dɔɔg nid ka li'eli li, ba na kʋʋ o.

⁵² Israel dim la anɛ ba ti' ba sʋga la bɛn-bɛn, dau wʋsa nɛ o zin'ig nɛ o tuuta linɛ aan o zanbin.

⁵³ Levi dim la anɛ ba ti' ba sʋga la gilig Nɔnaar Fuug Sʋgʋr linɛ ka Zugsɔb girima bɛɛ li ni la, lin na kɛ ka Zugsɔb sʋnpɛɛn da lu Israel nidib la zugɔ. Levi dim la tʋʋma anɛ ba gɔt Nɔnaar Fuug Sʋgʋr la yɛla.”

⁵⁴ Israel dim la da niŋ nwɛnɛ Zugsɔb la da pa'al Moses si'em la.