Jona 1 - GH

Jona zɔɔ yi Zugsɔb la san'an

¹ Zugsɔb la pian'ʋk da kɛn Jona onɛ an Amitai biig la san'an na ye,

² “Kem Ninive linɛ an teŋ tita'ar la nii mɔɔli tisi ba ye, ‘Man nyɛti ya tʋʋmbɛ'ɛd la wʋsa.’”

³ Amaa Jona da duoe zɔti ken Tarsis teŋin ye o zɔɔ yi ka bas Zugsɔb la. O da zɔɔ sig Joppa tempʋʋgin linɛ bɛ Atɛuk nɔɔrin la ka nyɛ anrʋŋ linɛ wa'ae Tarsis. Ka o yɔ ka kpɛn' ye o dɔlli ba keŋ Tarsis teŋin, dinɛ na kɛ ka o zɔɔ yi ka bas Zugsɔb la.

⁴ Ka Zugsɔb kɛ ka sisi'etita'ar kɛɛn Atɛukʋn la na. Sisi'em la da mɔri paŋ hali da'adi Atɛuk ku'om la ka anrʋŋ la bɔɔd ye li kɔ'.

⁵ Ka dabiem kpɛn' nimbanɛ tʋm anrʋŋ tʋʋma la ka sɔ' wʋsa nwɛ'ɛd kuŋi buon o win. Ka ba vaae anrʋŋ la la'adi lɔbi bas Atɛuk la pʋʋgin ye li faki tisi ba. Amaa ka Jona on gaadi sig anrʋŋ la teŋiri digi gbisid.

⁶ Ala ka anrʋŋ la kpɛɛm keŋ o san'anɛ bu'os o ye, “Bɔ ka fʋn digi gbisida? Duom ka buoli fʋ win, ka daasi'erɛ o na zɔɔ ti nimbaanlig ka faaɛn ti bas.”

⁷ Ka banɛ gɔsid anrʋŋ la yɛl taaba ye, “Kɛlli ka ti maal bʋgʋlʋm-bʋgʋlʋm baŋ onɛ zug ka yɛltɔɔg kaŋa paadi ti!” Ka ba maal bʋgʋlʋm-bʋgʋlʋm ka li gban'e Jona.

⁸ Ka ba bu'os o ye, “Yɛlimi ti, anɔ'ɔn zug ka yɛlbama nwa' paadi ti? Fʋ tʋʋma an bɔ? Fʋ yi yaanɛ? Fʋ teŋ yʋ'ʋrɛ? Fʋ an buudkanɛ nida?”

⁹ Ka o lɛbisi ba ye, “M anɛ Hibiru nid, ka pʋ'ʋsid Zugsɔb onɛ an Arezana Wina'am ka maal Atɛuk nɛ teŋgbauŋ la.”

¹⁰ Ka nɛ'ɛŋa kpɛn'ɛs nidib la dabiem pamm ka ba bu'os ye, “Bɔɔ nwa' ka fʋ niŋɛ?” (Nidib la da baŋ ye Zugsɔb la yɛla ka Jona zɔti yit o san'an, bɔzugɔ o pʋn yɛli ba nɛ ala.)

¹¹ Ka Atɛuk la zan'as ka gudigid, ka ba bu'os o ye, “Ti na niŋif wala ka Atɛuk nwa' ma'ae tisi ti?”

¹² Ka o lɛbisi ba ye, “Ʋkiminimɛ lɔbi bas Atɛuk la pʋʋgin ka li na ma'ae tisi ya. M mi' ye li anɛ m taal, linɛ kɛ ka pɛbistita'ar nwa' da'ad.”

¹³ Amaa nidib la da kpɛ'ɛŋidi ba mɛŋ ye ba mɔr anrʋŋ la lɛb gʋʋr ka pʋ nyaŋɛ, bɔzugɔ Atɛuk la maligim zan'as nɛ ka mɔɔd nɛ paŋ.

¹⁴ Ka ba nwɛ' kuŋi tis Zugsɔb la ye, “Zugsɔba, da kɛ ka ti kpi dau nwa' nyɔvʋr yɛlaa! Dau nwa' ya'a ka' taalɛ, da kɛ ka o ziim yɛla dɔlli tii, ka li anɛ fʋn Zugsɔb bɔɔdim ye li aan ala.”

¹⁵ Ka ba ʋk Jona lɔb o Atɛuk la pʋʋgin ka Atɛuk la nyaan lɛbi ma'ae baanlimm.

¹⁶ Nɛ'ɛŋa da kɛ ka dabiem kpɛn' nidib la, Zugsɔb la yɛla. Ka ba maal maannɛ tis Zugsɔb la, ka pɔɔ zi'el o.

¹⁷ Amaa Zugsɔb la da tʋm ziiŋ tita'ar na ka o vɔl Jona. Daba atan', yʋ'ʋŋ nɛ nintaŋ wʋsa, ka o bɛ ziiŋ la pʋʋgin.