Joel 1 - GH

¹ Zugsɔb labaar linɛ yi Petuel biig Joel san'an na la nwa'.

Na'azɔmnamɛ na yi si'em na yɛla

² Kpɛɛmnama, kɛlisimi; yanam banɛ bɛ teŋin la wʋsa kɛlisimi. Ya saŋa la, nɛ' buudi nam mi' maal bɛɛ li mi' maali ya yaanam saŋa la?

³ Yɛlimini ya biis, ka kɛ ka ya biis la mɛ yɛli ba biis, ka ban biis mɛ yɛl zʋmaʋŋ kanɛ dɔlli ba nya'aŋ la.

⁴ Na'azɔmnam la dɛŋ tuonnɛ kena ɔnb ka nya'al si'el la, lin ka na'azɔmnam banɛ an bʋntitada la kena ɔnb; na'azɔm banɛ an bʋntitada la ɔnb ka nya'al si'el la, lin ka na'azɔmnam banɛ an bʋmbaanlʋg la kena ɔnb; na'azɔmnam banɛ an bʋmbaanlʋg la ɔnb ka nya'al si'el la lin ka na'azɔmnam banɛ dɔl nya'aŋ la kena ɔnb wʋsa.

⁵ Danuudiba, duomi ka kaasi! Kaasimi, yanam banɛ nuud daam la; kaasimi danpaalig la yɛla, bɔzugɔ ba faaɛn li ya nɔɔrin.

⁶ Teŋ si'a zabzabidib kpɛn' san'ami m teŋ, ba mɔr paŋ hali, ka zu'oe pʋ mɔr kallɛ; ba nyina nwɛnɛ gbigim nyina nɛ, ba pʋlimmi nwɛnɛ gbigimnya'aŋ nyina.

⁷ Ba san'ami m tiis pɔɔg ka kʋʋ m kekama tiis. Ba pigisi ba pa'ad la lɔbi bas, ka kɛ ka wila la an piela-piela.

⁸ Kaasim wʋʋ pu'a-ɛliŋ ka ba nɔk o tis dau ye o kul ka o sid la pʋ yuugɛ ka kpi.

⁹ Zʋʋd nɛ bʋnnuuda maana lɛn ka' Zugsɔb Yin la ya'asɛ. Maanmaannib banɛ tʋm Zugsɔb Yin la bɛ nɛ kukuma ni.

¹⁰ Teŋ la kʋdignɛ, ka pɔɔd la san'am; zʋʋd san'am ya, ka danpaal naae, ka kpaam lɛn kae.

¹¹ Kpaadiba, maalimi sʋnsa'aŋ; kaasimi, yanam banɛ mɔr vain tiis la. Maalimi sʋnsa'aŋ ki nɛ mui kae la yɛla, bɔzugɔ pɔɔd banɛ ka ya na bʋn la san'am ya.

¹² Vain tiis la kʋdigya, ka kekama la sʋʋg; pomanganɛt nɛ kpʋkpara nɛ tibanɛ kpɛlim la sʋʋgya, tibanɛ bɛ pɔɔgin la wʋsa sʋʋg ya. Sida linɛ an ninsaal sumalisim la wʋsa naae ya.

Sʋnya tiakir yɛla

¹³ Maanmaanniba, kaasimi ka yɛ bɔto fuud ya sʋnsa'aŋ la zug; kaasimi, yanam banɛ tʋm maana bimbim tʋʋma la. Kemi na ka yɛɛi bɔto fuud yʋ'ʋŋ la wʋsa, yanam banɛ tʋmmi tisidi m Wina'am la bɔzugɔ zʋʋd maana nɛ bʋnnuuda maana la lɛn kae ya Wina'am Pʋ'ʋsim Yin la.

¹⁴ Gban'ami nɔlɔɔr linɛ bɛɛ li kɔn; kɛl ka nidib la la'as la'asʋg linɛ an kasi. La'asimi kpɛɛmnam la nɛ nimbanɛ bɛ teŋin la wʋsa ye ba kemi ya Zugsɔb Wina'am la Pʋ'ʋsim Yin na, ka kaasi tisi Zugsɔb la.

¹⁵ Dabisir la paae ya! Zugsɔb dabisir la li'el ya; li na yi Wina'am Onɛ Galis la san'anɛ kena nɛ san'auŋ.

¹⁶ Diib la pʋ naae ti nini nii? Hali sumalisim lɛn kae ti Wina'am Pʋ'ʋsim Yin la.

¹⁷ Bʋmbʋʋda la daa kʋdignɛ teŋin, teŋ la pʋʋgin anɛ kpi'emis. Diib kae na su bʋya la nii ka bʋya la lii san'am bɔzugɔ li wʋsa kʋdignɛ.

¹⁸ Wʋmmi niigi la bʋʋn si'em! Ba giligidnɛ yɔɔg-yɔɔg bɔzugɔ yaama kae ka ba na ɔnbɛ. Hali pɛ'ɛs la mɛ namisidnɛ.

¹⁹ Fʋn ka m buon, Zugsɔba, bɔzugɔ bugum kanb yaama banɛ bɛ paalʋ la ka lɛn di tiis banɛ bɛ karinyauŋin la.

²⁰ Hali wɛog bʋnkɔnbid yu'osidi ieedif, ku'om linɛ pʋbid kɔldabibisin la kpiɛnnɛ ka bugum di yaama banɛ bɛ sian'arin la wʋsa.