Jemes 1 - GH

¹ Man Jemes onɛ an Wina'am nɛ ti Zugsɔb Yesu Kristo tʋmtʋm la sɔbid gbauŋ kaŋa pʋ'ʋsid Wina'am nimbanɛ widig teŋ-teŋ la.

Makir nɛ kpansib yɛla

² M ba'abiisɛ makir kɔn'ɔb-kɔn'ɔb ya'a paae ya yanam mɔr sumalisim Yesu Kristo ni,

³ bɔzugɔ ya mi' ye ya ya'a nyɛ makiri ya yadda niŋir pʋʋgin li kɛt ka ya nyaŋidi mɔdigid.

⁴ Kpɛ'ɛŋimi ya mɛŋ ka mɔdigi paae li bɛn ka gbada kae. Ala ka ya na bi' ya bɛllim pʋʋgin ka kʋ kɔ'ɔŋ si'el, si'ela.

⁵ Ya'am ya'a pansig sɔ' ya sʋʋgin, on sɔsim Wina'am ka o tis o; bɔzugɔ Wina'am anɛ onɛ tisid nidib wʋsa ka li galisid ka pʋ nyɛt sɔ' taalɛ.

⁶ Amaa ya ya'a sɔs o, asɛɛ ka ya niŋ o yadda ka da bi'es baa bi'elaa. Bɔzugɔ onɛ wʋsa bi'esid la nwɛnɛ mu'ar ku'opila ka pɛbisim da'ad ka li tʋʋlim si'em la.

⁷ Niŋkan daana da mɔr pʋtɛn'ɛr ye o na di'e si'el Zugsɔb la san'anɛɛ.

⁸ Onɛ aan ala anɛ pʋtɛnda ayi' sɔb nɛ onɛ pʋ gban'ad yɛl yinnee.

Nɔŋ nɛ kpan'am yɛla

⁹ Li nar ka ti ba'abiig onɛ an nɔŋdaan mɔr sumalisim bɔzugɔ ba na dʋ'ʋs o.

¹⁰ Amaa kpan'am daan mɛ mɔr sumalisim ba ya'a sigis o, bɔzugɔ o kpan'am la na gaad nwɛnɛ mɔɔd puum gat si'em la.

¹¹ Nwɛnɛ winnigi ɛɛnti dʋ ka li tʋlig ka mɔɔd ziank ka li puum sʋʋg ka li vɛnlim san'am si'em la, ala mɛn ka kpan'am daan na kpi, hali ka nan kpɛm bɛɛ o tʋʋma ni.

Makir yɛla

¹² Albareka bɛ nɛ onɛ nyaŋi mɔdig makir pʋʋgin. O ya'a nyaŋ makir la, Wina'am na tis o nyɔvʋr zupibig linɛ an piinkanɛ ka o da zi'el nɔɔri tis banɛ nɔŋ o la.

¹³ Makir ya'a paae sɔ', on da yɛl ye, “Wina'am makidi ma.” Bɔzugɔ bʋmbɛ'ɛd kʋ nyaŋi mak Wina'am. Alazug Wina'am pʋ makid sɔ'ɔɔ.

¹⁴ Sɔ' mɛkama ya'amlɛogʋ pan'asid o ka o kpɛn'ɛd makirin.

¹⁵ Ka ya'amlɛog ya'a nɔk pʋʋg li du'adi tʋʋmbɛ'ɛd, ka li mɛ ya'a nɔbig li du'adi kum.

¹⁶ M ba'abinɔŋa, da kɛ ka sɔ' ma'aa yaa.

¹⁷ Piinkanɛ wʋsa an sʋ'ʋm ka an nyain yitnɛ ti Ba' onɛ bɛɛ agɔl ka maal winnig nɛ linɛ wʋsa kɛt ka li nied nyain la san'an na. O pʋ tiakida ka kpɛn aan o naŋnaŋin.

¹⁸ O mɛŋ bɔɔdim ka o maali ti nɛ o yɛlsida pian'ad ye ti an yiiga dim bʋn linɛ ka o maal wʋsa ni.

Onɛ wʋm ka tʋm la yɛla

¹⁹ M ba'abinɔŋa, baŋimi nɛ'ɛŋa, sɔ' mɛkama wʋsa kɛlisimi sʋ'ʋŋa ka pian'ad baanlimm, ka o sʋnf da pɛligid tɔ'ɔtɔɔ.

²⁰ Ninsaal sʋnpɛɛn pʋ tʋm Wina'am pʋpielim tʋʋmaa.

²¹ Dinzug basimi linɛ an dian'ad tʋʋma wʋsa, nɛ tʋʋmbɛ'ɛd linɛ nɔbigid la, ka sie ya mɛŋi di'e Wina'am pian'ad kanɛ ka o zaŋi niŋi ya sʋnya ni la, ka linɛ na nyaŋi faaɛn ya.

²² Da ma'aa ya mɛŋi kɛlisid Wina'am pian'ad la, ka basi lii, amaa siakim tʋmi lin yɛt si'el la.

²³ Onɛ wʋsa kɛlis pian'ad la ka pʋ tʋmi lii, nwɛnɛ ninsaali na gɔs gɔtiŋin nyɛɛ o mɛŋi an si'em.

²⁴ On gɔs o mɛŋ ka keŋ la o tam on pa'a an si'em nɛ.

²⁵ Amaa onɛ gɔs Wina'am wada linɛ an sʋm ka tisid yɔlisim la, ka mɔɔd sʋ'ʋŋa, ka pʋ tam on wʋm si'el la, ka siaki tʋmi li, Wina'am na niŋ o bareka on tʋm si'el la yɛla.

²⁶ Onɛ wʋsa tɛn'ɛsid ye o anɛ onɛ dɔl Wina'am, ka pʋ gban'e o nɔɔrɛ, o ma'ad o mɛŋ, ka o Wina'am dɔllim la an zaalim.

²⁷ Wina'am dɔllim linɛ an nyain ti Ba' Wina'am san'an anɛ anwa: fʋn na sʋŋ kpiibis nɛ pʋkɔnya ba fara pʋʋgin, ka da kɛ ka dunia tʋʋmbɛ'ɛd kpɛn' fɔ.